ਰੈਬੀਜ਼ ਨਾਲ ਨੌਜਵਾਨ ਦੀ ਮੌਤ, ਛੇ ਮਹੀਨਿਆਂ ’ਚ ਅੱਠ ਹਜ਼ਾਰ ਤੋਂ ਵੱਧ ਡਾਗ ਬਾਈਟ ਦੇ ਮਾਮਲੇ

ਸਟਾਫ ਰਿਪੋਰਟਰ, ਪੰਜਾਬੀ ਜਾਗਰਣ, ਸ੍ਰੀ ਮੁਕਤਸਰ ਸਾਹਿਬ : ਕੁੱਤੇ ਦੇ ਕੱਟਣ ਨੂੰ ਹਲਕੇ ਵਿੱਚ ਲੈਣਾ ਇੱਕ ਪਰਿਵਾਰ ਲਈ ਜਾਨਲੇਵਾ ਸਾਬਤ ਹੋਇਆ। ਜ਼ਿਲ੍ਹੇ ’ਚ ਕੰਮ ਕਰਨ ਆਏ ਉੱਤਰ ਪ੍ਰਦੇਸ਼ ਦੇ ਇੱਕ ਨੌਜਵਾਨ ਦੀ ਰੈਬੀਜ਼ ਕਾਰਨ ਮੌਤ ਹੋ ਗਈ, ਕਿਉਂਕਿ ਉਸ ਨੇ ਸਮੇਂ ਸਿਰ ਐਂਟੀ-ਰੈਬੀਜ਼ ਦਾ ਟੀਕਾ ਨਹੀਂ ਲਗਵਾਇਆ ਸੀ। ਤਿੰਨ ਮਹੀਨੇ ਪਹਿਲਾਂ ਨੌਜਵਾਨ ਨੂੰ ਮੁਕਤਸਰ ਦੇ ਜਲਾਲਾਬਾਦ ਰੋਡ ’ਤੇ ਇੱਕ ਅਵਾਰਾ ਕੁੱਤੇ ਨੇ ਕੱਟਿਆ ਸੀ। ਜਾਣਕਾਰੀ ਅਨੁਸਾਰ ਯੂਪੀ ਦੇ ਇਟਾਵਾ ਨਿਵਾਸੀ ਕੁਲਦੀਪ (35) ਟ੍ਰਾਂਸਪੋਰਟ ਕੰਪਨੀ ’ਚ ਕਰੀਬ ਸੱਤ ਸਾਲਾਂ ਤੋਂ ਕੰਮ ਕਰ ਰਿਹਾ ਸੀ। ਕੰਪਨੀ ਦੇ ਮਾਲਕ ਲਵਲੀ ਕੁਮਾਰ ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਕੁਲਦੀਪ ਸ੍ਰੀ ਗੰਗਾਨਗਰ ਤੋਂ ਦਾਲ ਦੇ ਗੱਟੇ ਲੈ ਕੇ ਬਲਰਾਮਪੁਰ ਲਈ ਨਿਕਲਿਆ ਸੀ। ਇਸੇ ਦੌਰਾਨ ਰਸਤੇ ’ਚ ਉਸਨੂੰ ਕਿਸੇ ਕੁੱਤੇ ਨੇ ਕੱਟ ਲਿਆ ਸੀ, ਪਰ ਉਸ ਨੇ ਇਸ ਨੂੰ ਨਜ਼ਰਅੰਦਾਜ਼ ਕਰ ਦਿੱਤਾ ਅਤੇ ਆਪਣਾ ਸਫ਼ਰ ਜਾਰੀ ਰੱਖਿਆ। ਹਾਪੁੜ ਦੇ ਕੋਲ ਪਹੁੰਚਣ ’ਤੇ ਉਸ ਦੀ ਤਬੀਅਤ ਵਿਗੜਨ ਲੱਗੀ। ਉਸ ਨੇ ਫ਼ੋਨ ’ਤੇ ਦਵਾਈ ਲੈਣ ਦੀ ਗੱਲ ਕਹੀ, ਪਰ ਆਰਾਮ ਨਹੀਂ ਕੀਤਾ। ਬਰੇਲੀ ਦੇ ਕੋਲ ਰਾਮਪੁਰ ’ਚ ਹਾਲਤ ਜ਼ਿਆਦਾ ਖ਼ਰਾਬ ਹੋ ਗਈ। ਇਸਤੋਂ ਬਾਅਦ ਉਸ ਨੇ ਘਰ ’ਚ ਆਪਣੇ ਭਰਾ ਨੂੰ ਸੂਚਨਾ ਦਿੱਤੀ। ਪਰਿਵਾਰਕ ਮੈਂਬਰ ਮੁਕਤਸਰ ਤੋਂ ਤੁਰੰਤ ਰਾਮਪੁਰ ਪਹੁੰਚੇ ਅਤੇ ਉਸ ਨੂੰ ਮੁਢਲੀ ਸਹਾਇਤਾ (ਪ੍ਰਾਇਮਰੀ ਟ੍ਰੀਟਮੈਂਟ) ਦੇਣ ਤੋਂ ਬਾਅਦ ਘਰ ਲੈ ਗਏ। ਅਗਲੇ ਦਿਨ ਜਦੋਂ ਉਸ ਨੂੰ ਇਟਾਵਾ ਦੇ ਹਸਪਤਾਲ ਲਿਜਾਇਆ ਗਿਆ ਤਾਂ ਡਾਕਟਰਾਂ ਨੇ ਦੱਸਿਆ ਕਿ ਇਹ ਰੈਬੀਜ਼ ਦਾ ਕੇਸ ਹੈ ਅਤੇ ਸਮੇਂ ਸਿਰ ਟੀਕਾ ਨਾ ਲੱਗਣ ਕਾਰਨ ਹਾਲਤ ਵਿਗੜ ਚੁੱਕੀ ਹੈ। ਇਲਾਜ ਦੌਰਾਨ ਕੁਲਦੀਪ ਦੀ ਮੌਤ ਹੋ ਗਈ। ਕੁਲਦੀਪ ਦਾ ਵਿਆਹ ਕਰੀਬ ਨੌਂ ਮਹੀਨੇ ਪਹਿਲਾਂ ਹੀ ਹੋਇਆ ਸੀ। ਜ਼ਿਲ੍ਹੇ ’ਚ ਵਧ ਰਹੇ ਡਾਗ ਬਾਈਟ ਦੇ ਕੇਸ ਜ਼ਿਲ੍ਹਾ ਐਪੀਡੈਮੀਓਲੋਜਿਸਟ ਡਾ. ਹਰਕੀਰਤਨ ਸਿੰਘ ਨੇ ਦੱਸਿਆ ਕਿ 2026 ’ਚ ਜਨਵਰੀ ਤੋਂ ਜੂਨ ਤੱਕ ਮੁਕਤਸਰ ਜ਼ਿਲ੍ਹੇ ਵਿੱਚ ਕੁੱਤੇ ਦੇ ਕੱਟਣ ਦੇ 8,810 ਮਾਮਲੇ ਸਾਹਮਣੇ ਆਏ ਹਨ। ਇਸ ਵਿੱਚ ਪਾਲਤੂ ਅਤੇ ਅਵਾਰਾ ਦੋਵੇਂ ਤਰ੍ਹਾਂ ਦੇ ਕੁੱਤੇ ਸ਼ਾਮਲ ਹਨ। ਜਨਵਰੀ ਵਿੱਚ 1,351, ਫਰਵਰੀ 1,503, ਮਾਰਚ 1,627, ਅਪ੍ਰੈਲ 1,464, ਮਈ 1,433 ਅਤੇ ਜੂਨ ਵਿੱਚ 1,432 ਮਾਮਲੇ ਸਾਹਮਣੇ ਆਏ ਹਨ। ਔਸਤਨ ਹਰ ਦਿਨ 15 ਤੋਂ 20 ਲੋਕ ਕੁੱਤਿਆਂ ਦੇ ਕੱਟਣ ਦਾ ਸ਼ਿਕਾਰ ਹੋ ਰਹੇ ਹਨ। ਡਾਕਟਰਾਂ ਦੀ ਅਪੀਲ ਹੈ ਕਿ ਕੁੱਤੇ ਦੇ ਕੱਟਣ, ਝਰੀਟ ਮਾਰਨ ਜਾਂ ਲਾਰ ਲੱਗਣ ਤੇ ਤੁਰੰਤ ਨੇੜੇ ਦੇ ਸਰਕਾਰੀ ਹਸਪਤਾਲ ਜਾ ਕੇ ਐਂਟੀ-ਰੈਬੀਜ਼ ਦੇ ਸਾਰੇ ਡੋਜ਼ (ਟੀਕੇ) ਪੂਰੇ ਕਰਵਾਓ। ਥੋੜ੍ਹੀ ਜਿਹੀ ਲਾਪਰਵਾਹੀ ਵੀ ਜਾਨ ਤੇ ਭਾਰੀ ਪੈ ਸਕਦੀ ਹੈ।