ਮੁਕਤਸਰ 'ਚ NCB ਦੀ ਦੇਰ ਰਾਤ ਛਾਪੇਮਾਰੀ, ਕੋਰੀਅਰ ਰਾਹੀਂ ਨਸ਼ਾ ਭੇਜਣ ਦੇ ਮਾਮਲੇ 'ਚ ਗੱਡੀ ਕਬਜ਼ੇ 'ਚ; ਦੋ ਜਣਿਆਂ ਨੂੰ ਹਿਰਾਸਤ 'ਚ ਲੈਣ ਦੀ ਚਰਚਾ

ਮੁੱਢਲੀ ਜਾਣਕਾਰੀ ਮੁਤਾਬਕ, ਮਾਮਲੇ ’ਚ ਹਿਮਾਚਲ ਪ੍ਰਦੇਸ਼ ਦੇ ਊਨਾ ਵਾਸੀ ਮੁਹੰਮਦ ਆਸਿਫ਼ ਯੂਸੁਫ਼ ਦਾ ਨਾਂ ਸਾਹਮਣੇ ਆਇਆ ਹੈ। ਦੱਸਿਆ ਜਾਂਦਾ ਹੈ ਕਿ ਉਹ ਕੁਝ ਦਿਨ ਪਹਿਲਾਂ ਚੰਡੀਗੜ੍ਹ ਤੋਂ ਤਾਮਿਲਨਾਡੂ ਭੇਜਣ ਲਈ ਕੋਰੀਅਰ ਦੇਣ ਗਿਆ ਸੀ। ਜਾਂਚ ਦੌਰਾਨ ਉਸ ਕੋਰੀਅਰ ’ਚੋਂ ਕੋਕੀਨ ਅਤੇ ਹੈਰੋਇਨ ਮਿਲਣ ਦੀ ਗੱਲ ਸਾਹਮਣੇ ਆਈ। ਸੂਤਰਾਂ ਮੁਤਾਬਕ, ਪੁੱਛਗਿੱਛ ਦੌਰਾਨ ਯੂਸੁਫ਼ ਨੇ ਕਥਿਤ ਤੌਰ ’ਤੇ ਮੁਕਤਸਰ ਵਾਸੀ ਕਰਨ ਚੁੱਘ ਦਾ ਨਾਂ ਲਿਆ ਅਤੇ ਕੋਰੀਅਰ ਉਸਦਾ ਹੋਣ ਦੀ ਗੱਲ ਕਹੀ। ਇਸ ਮਗਰੋਂ ਟੀਮ ਨੇ ਚੁੱਘ ਦੇ ਘਰ ਛਾਪਾ ਮਾਰਿਆ ਅਤੇ ਰੂਪਨਗਰ ਨੰਬਰ ਵਾਲੀ ਇਕ ਗੱਡੀ ਕਬਜ਼ੇ ’ਚ ਲਈ। ਬਾਅਦ ’ਚ ਮੋਬਾਈਲ ਫੋਨ ਦੀ ਲੋਕੇਸ਼ਨ ਦੇ ਆਧਾਰ ’ਤੇ ਮੌੜ ਰੋਡ ’ਤੇ ਸਥਿਤ ਇਕ ਹੋਰ ਘਰ ’ਚ ਜਾਂਚ ਕੀਤੀ ਗਈ। ਇਸ ਤੋਂ ਇਲਾਵਾ ਗਿੱਦੜਬਾਹਾ ’ਚ ਦੋ ਜਣਿਆਂ ਨੂੰ ਹਿਰਾਸਤ ’ਚ ਲਏ ਜਾਣ ਦੀ ਗੱਲ ਹੈ ਪਰ ਇਸ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਹੋਈ। ਦੋਵਾਂ ਥਾਵਾਂ ਦੀ ਕਾਰਵਾਈ ਦਾ ਆਪਸੀ ਸਬੰਧ ਵੀ ਸਪੱਸ਼ਟ ਨਹੀਂ ਹੈ।