ਬਲਦੇਵ ਸਿੰਘ ਆਜ਼ਾਦ ਦੀ ਚੌਥੀ ਕਿਤਾਬ ਲੋਕ ਅਰਪਣ

ਮਨਪ੍ਰੀਤ ਸਿੰਘ ਮੱਲੇਆਣਾ ਪੰਜਾਬੀ ਜਾਗਰਣ ਮੋਗਾ: ਪੰਜਾਬ ਐਂਡ ਸਿੰਧ ਬੈਂਕ ਇੰਪਲਾਈਜ਼ ਵੈੱਲਫੇਅਰ ਐਸੋਸੀਏਸ਼ਨ ਮੋਗਾ ਨੇ ਨਰੇਸ਼ ਕੁਮਾਰ ਦੀ ਪ੍ਰਧਾਨਗੀ ਹੇਠ ਹੋਟਲ ਪਾਰਕ ਰੀਜੈਂਸੀ ਮੋਗਾ ਵਿਖੇ ਇਕ ਮੀਟਿੰਗ ਕੀਤੀ। ਇਸ ਮੀਟਿੰਗ ਵਿਚ ਵਿਸ਼ੇਸ਼ ਮਹਿਮਾਨ ਵਜੋਂ ਪੰਜਾਬ ਐਂਡ ਸਿੰਧ ਬੈਂਕ, ਲਖਨਊ ਦੇ ਫੀਲਡ ਜਨਰਲ ਮੈਨੇਜਰ ਰਾਜੀਵ ਬਾਂਸਲ ਸ਼ਾਮਲ ਹੋਏ। ਹਰਜਿੰਦਰ ਸਿੰਘ ਕੰਡਾ, ਜਨਰਲ ਸਕੱਤਰ ਨੇ ਰਾਜੀਵ ਬਾਂਸਲ ਦਾ ਮੀਟਿੰਗ ’ਚ ਸਵਾਗਤ ਕਰਕੇ ਕਾਰਵਾਈ ਸ਼ੁਰੂ ਕੀਤੀ। ਬਾਂਸਲ ਨੂੰ ਉਨ੍ਹਾਂ ਦੀ ਤਰੱਕੀ ਲਈ ਸੰਸਥਾ ਵੱਲੋਂ ਵਿਸ਼ੇਸ਼ ਤੌਰ ’ਤੇ ਸਨਮਾਨਿਤ ਕੀਤਾ ਗਿਆ। ਨਰੇਸ਼ ਕੁਮਾਰ ਅਤੇ ਸਵਰਨਜੀਤ ਸਿੰਘ ਗਿੱਲ ਨੇ ਬਾਂਸਲ ਨਾਲ ਆਪਣੇ ਸਮੇਂ ਦੀਆਂ ਯਾਦਾਂ ਸਾਂਝੀਆਂ ਕੀਤੀਆਂ। ਜਸਵੰਤ ਸਿੰਘ, ਕੈਸ਼ੀਅਰ ਅਤੇ ਨਾਇਬ ਸਿੰਘ ਭੁੱਲਰ ਨੇ ਰਾਜੀਵ ਬਾਂਸਲ ਨੂੰ ਇਕ ਮਜ਼ਬੂਤ ਪ੍ਰਸ਼ਾਸਕ, ਇਕ ਮਿਹਨਤੀ ਅਤੇ ਇਕ ਅਜਿਹਾ ਵਿਅਕਤੀ ਦੱਸਿਆ ਜੋ ਹਮੇਸ਼ਾ ਸਾਰਿਆਂ ਦੀ ਭਲਾਈ ਅਤੇ ਖੁਸ਼ੀ ਲਈ ਮੌਜੂਦ ਰਹਿੰਦਾ ਹੈ। ਇਸ ਮੌਕੇ ਬੋਲਦਿਆਂ ਫੀਲਡ ਜਨਰਲ ਮੈਨੇਜਰ ਰਾਜੀਵ ਬਾਂਸਲ ਨੇ ਸੰਸਥਾ ਦੇ ਪਿਆਰ ਅਤੇ ਸਤਿਕਾਰ ਲਈ ਧੰਨਵਾਦ ਕੀਤਾ ਅਤੇ ਭਵਿੱਖ ਵਿਚ ਸੰਗਠਨ ਦੇ ਮੈਂਬਰਾਂ ਨੂੰ ਹਰ ਸੰਭਵ ਸਹਾਇਤਾ ਦਾ ਭਰੋਸਾ ਦਿੱਤਾ। ਇਸ ਮੌਕੇ ’ਤੇ ਫੀਲਡ ਜਨਰਲ ਮੈਨੇਜਰ ਰਾਜੀਵ ਬਾਂਸਲ ਨੇ ਸਾਬਕਾ ਮੈਨੇਜਰ ਬਲਦੇਵ ਸਿੰਘ ਆਜ਼ਾਦ ਦੁਆਰਾ ਲਿਖੀ ਚੌਥੀ ਕਿਤਾਬ ਮਹਿਕ ਮੁਹੱਬਤ ਨੂੰ ਲੋਕ ਅਰਪਣ ਕੀਤਾ। ਚੇਅਰਮੈਨ ਬਲਵੀਰ ਸਿੰਘ ਸੱਗੂ ਨੇ ਇਸ ਮੌਕੇ ’ਤੇ ਆਪਣੇ ਵਿਚਾਰ ਪੇਸ਼ ਕੀਤੇ। ਅੰਤ ਵਿਚ ਜਨਰਲ ਸਕੱਤਰ ਹਰਜਿੰਦਰ ਸਿੰਘ ਕੰਡਾ ਨੇ ਹਾਜ਼ਰ ਸਾਰੇ ਮੈਂਬਰਾਂ ਦਾ ਧੰਨਵਾਦ ਕੀਤਾ। ਇਸ ਮੌਕੇ ਨਰੇਸ਼ ਕੁਮਾਰ, ਸਵਰਨਜੀਤ ਸਿੰਘ ਗਿੱਲ, ਨਾਇਬ ਸਿੰਘ ਭੁੱਲਰ, ਸੰਦੀਪ ਸਿੰਘ, ਹਰਜਿੰਦਰ ਸਿੰਘ ਕੰਡਾ, ਅੰਗਰੇਜ ਸਿੰਘ, ਨਿਤਿਨ ਕੁਮਾਰ, ਰੌਬਿਨ ਢਿੱਲੋਂ, ਬਲਦੇਵ ਸਿੰਘ ਆਜ਼ਾਦ, ਜਸਵੰਤ ਸਿੰਘ ਅਤੇ ਰਾਜੀਵ ਬਾਂਸਲ ਆਦਿ ਹਾਜ਼ਰ ਸਨ।