ਸੀਟੀ ਗਰੁੱਪ ਵੱਲੋਂ ਅੰਤਰਰਾਸ਼ਟਰੀ ਕਾਨਫਰੰਸ ਕਰਵਾਈ

ਅੰਤਰਰਾਸ਼ਟਰੀ ਕਾਨਫਰੰਸ ਦੌਰਾਨ ਇਕੱਤਰ ਪਬੰਧਕ। ਮਨਪ੍ਰੀਤ ਸਿੰਘ ਮੱਲੇਆਣਾ, ਪੰਜਾਬੀ ਜਾਗਰਣ, ਮੋਗਾ : ਕਜ਼ਾਖਸਤਾਨ ਦੇ ਇਤਿਹਾਸਕ ਸ਼ਹਿਰ ਅਲਮਾਟੀ ਨੇ ਹਾਲ ਹੀ ਵਿਚ ਵਿਸ਼ਵ ਪੱਧਰੀ ਅਕਾਦਮਿਕ ਨਵੀਨਤਾ ਦਾ ਕੇਂਦਰ ਬਣਦਿਆਂ 9ਵੀਂ ਇੰਟਰਨੈਸ਼ਨਲ ਮਲਟੀ-ਟ੍ਰੈਕ ਕਾਨਫਰੰਸ ਆਨ ਸਾਇੰਸਜ਼, ਇੰਜੀਨੀਅਰਿੰਗ, ਮੈਨੇਜਮੈਂਟ ਅਤੇ ਟੈਕਨੀਕਲ ਇਨੋਵੇਸ਼ਨ ਦੀ ਸਫ਼ਲ ਮੇਜ਼ਬਾਨੀ ਕੀਤੀ। ਇਸ ਵੱਡੇ ਅਕਾਦਮਿਕ ਸਮਾਗਮ ਦਾ ਆਯੋਜਨ ਸੀਟੀ ਇੰਸਟੀਚਿਊਟ ਆਫ਼ ਇੰਜੀਨੀਅਰਿੰਗ, ਮੈਨੇਜਮੈਂਟ ਐਂਡ ਟੈਕਨਾਲੌਜੀ ਵੱਲੋਂ ਸੀਟੀ ਯੂਨੀਵਰਸਿਟੀ ਭਾਰਤ ਦੇ ਸਹਿਯੋਗ ਨਾਲ ਕੀਤਾ ਗਿਆ। ਇਸ ਦੇ ਨਾਲ ਅੰਤਰਰਾਸ਼ਟਰੀ ਸਹਿ-ਆਯੋਜਕਾਂ ਵਿਚ ਸਿਟੀ ਯੂਨੀਵਰਸਿਟੀ ਅਜਮਾਨ (ਯੂਏਈ) ਅਤੇ ਗਲੋਬਲ ਯੂਨੀਵਰਸਿਟੀ ਮਲੇਸ਼ੀਆ ਸ਼ਾਮਲ ਰਹੇ। ਇਸ ਮੀਲ ਪੱਥਰ ਸਮਾਗਮ ਵਿਚ ਵਿਸ਼ਵ ਭਰ ਤੋਂ ਪ੍ਰਸਿੱਧ ਵਿਗਿਆਨੀ, ਮੁੱਖ ਵਕਤਾ, ਅਕਾਦਮਿਕ ਵਿਦਵਾਨ ਅਤੇ ਉਦਯੋਗਕ ਮਾਹਿਰ ਇਕੱਠੇ ਹੋਏ, ਜਿਨ੍ਹਾਂ ਨੇ ਵਿਗਿਆਨ, ਇੰਜੀਨੀਅਰਿੰਗ, ਪ੍ਰਬੰਧਨ ਅਤੇ ਤਕਨੀਕੀ ਨਵੀਨਤਾ ਨਾਲ ਸੰਬੰਧਤ ਮਹੱਤਵਪੂਰਨ ਚੁਣੌਤੀਆਂ ਅਤੇ ਨਵੇਂ ਮੌਕਿਆਂ ਤੇ ਵਿਚਾਰ-ਵਟਾਂਦਰਾ ਕੀਤਾ। ਕਾਨਫਰੰਸ ਦੀ ਸ਼ੁਰੂਆਤ ਪ੍ਰਭਾਵਸ਼ਾਲੀ ਉਦਘਾਟਨ ਸਮਾਰੋਹ ਨਾਲ ਹੋਈ, ਜਿਸ ਵਿਚ ਨਾਰਖੋਜ਼ ਯੂਨੀਵਰਸਿਟੀ ਦੀ ਸੀਨੀਅਰ ਅਕਾਦਮਿਕ ਅਤੇ ਸਕੂਲ ਆਫ਼ ਇਕਨਾਮਿਕਸ ਐਂਡ ਮੈਨੇਜਮੈਂਟ ਦੀ ਸਾਬਕਾ ਡੀਨ ਪ੍ਰੋ. ਦਿਲਬਰ ਗਿਮਰਾਨੋਵਾ ਨੇ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ। ਡਾ. ਨਿਤਨ ਅਰੋੜਾ, ਡਾਇਰੈਕਟਰ ਸੀਸੀਪੀਸੀ ਅਤੇ ਪ੍ਰਿੰਸੀਪਲ ਦੀ ਅਗਵਾਈ ਹੇਠ ਸੈਸ਼ਨਾਂ ਦਾ ਸੰਚਾਲਨ ਕੀਤਾ ਗਿਆ, ਜਿੱਥੇ ਅੰਤਰਰਾਸ਼ਟਰੀ ਮਾਹਿਰਾਂ ਵੱਲੋਂ ਨਵੀ ਤਕਨਾਲੌਜੀ ਤੇ ਤਕਨੀਕਾਂ ਬਾਰੇ ਵਿਚਾਰ ਸਾਂਝੇ ਕੀਤੇ ਗਏ। ਡਾ. ਪੁਨੀਤ ਪੁਰੀ ਅਤੇ ਮਿਸ ਕ੍ਰਿਤਿਕਾ ਅਰੋੜਾ ਨੂੰ ਉਨ੍ਹਾਂ ਦੇ ਸ਼ਾਨਦਾਰ ਖੋਜ ਦੇ ਕੰਮ ਲਈ “ਬੈਸਟ ਪੇਪਰ ਐਵਾਰਡ” ਨਾਲ ਸਨਮਾਨਿਤ ਕੀਤਾ ਗਿਆ। ਇਸ ਤੋਂ ਇਲਾਵਾ ਡਾ. ਇਸਮਾਗੁਲੋਵਾ ਸਿਮਬਤ, ਡਾ. ਅਣਨਯਾ ਮਿਸ਼ਰਾ, ਡਾ. ਪਰਦੀਪ ਗੋਰਾਇਆ, ਮਿਸ ਅਗੇਰਿਮ ਸ਼ਾਖਾਨੋਵਾ, ਡਾ. ਅਭਿਨਵ ਆਨੰਦ, ਡਾ. ਵਰਿੰਦਰ ਸਿੰਘ ਰਾਣਾ, ਐਸੋਸੀਏਟ ਪ੍ਰੋ. ਡਾ. ਦਲਵਿੰਦਰ ਕੌਰ ਅਤੇ ਮਿਸਟਰ ਅਮਨਦੀਪ ਸਿੰਘ ਵਰਗੇ ਪ੍ਰਸਿੱਧ ਬੁਲਾਰਿਆਂ ਨੇ ਆਪਣੇ ਵਿਚਾਰ ਸਾਂਝੇ ਕੀਤੇ। ਸੀਟੀ ਗਰੁੱਪ ਦੇ ਪ੍ਰਬੰਧਨ ਨੇ ਜ਼ੋਰ ਦਿੰਦਿਆਂ ਕਿਹਾ ਕਿ ਆਧੁਨਿਕ ਤੇਜ਼ੀ ਨਾਲ ਵਧ ਰਹੀਆਂ ਉਦਯੋਗਕ ਜ਼ਰੂਰਤਾਂ ਲਈ ਅਲੱਗ-ਅਲੱਗ ਖ਼ੇਤਰਾਂ ਦੀ ਬਜਾਏ ਬਹੁ-ਵਿਭਾਗੀ ਸਹਿਯੋਗ ਲਾਜ਼ਮੀ ਹੈ। ਇਸੇ ਦ੍ਰਿਸ਼ਟੀਕੋਣ ਨੂੰ ਧਿਆਨ ਵਿਚ ਰੱਖਦਿਆਂ ਕਾਨਫਰੰਸ ਦੇ ਤਕਨੀਕੀ ਸੈਸ਼ਨਾਂ ਵਿਚ ਏਆਈ ਆਧਾਰਿਤ ਡੀਪਫੇਕ ਡਿਟੈਕਸ਼ਨ, ਬਾਇਓ-ਥੈਰੇਪੀ, ਸ਼ਹਿਰੀ ਜੀਵਨਯਾਪਨ, ਪਰਿਆਵਰਣੀ ਪ੍ਰਦਰਸ਼ਨ ਮੁਲਾਂਕਣ ਅਤੇ ਟਿਕਾਊ ਤਕਨਾਲੌਜੀਆਂ ਵਰਗੇ ਮਹੱਤਵਪੂਰਨ ਵਿਸ਼ਿਆਂ ਤੇ ਨਵੀਨਤਮ ਰਿਸਰਚ ਪੇਸ਼ ਕੀਤੀ ਗਈ। ਸੀਟੀ ਗਰੁੱਪ ਦੇ ਮੈਨੇਜਿੰਗ ਡਾਇਰੈਕਟਰ ਪ੍ਰੋ. ਮਨਬੀਰ ਸਿੰਘ ਨੇ ਕਿਹਾ ਕਿ ਅਸਲ ਗਿਆਨ ਅਤੇ ਨਵੀਨਤਾ ਕਿਸੇ ਭੂਗੋਲਿਕ ਸੀਮਾਵਾਂ ਵਿਚ ਬੱਝੀ ਨਹੀਂ ਹੁੰਦੀ। ਉਨ੍ਹਾਂ ਨੇ ਦੱਸਿਆ ਕਿ ਸੀਟੀ ਗਰੁੱਪ ਹਮੇਸ਼ਾਂ ਇਕ ਅਜਿਹਾ ਅਕਾਦਮਿਕ ਮਾਹੌਲ ਤਿਆਰ ਕਰਦਾ ਆ ਰਿਹਾ ਹੈ, ਜਿੱਥੇ ਵਿਦਵਾਨ, ਖੋਜਕਰਤਾ ਅਤੇ ਉਦਯੋਗਕ ਮਾਹਿਰ ਇਕੱਠੇ ਹੋ ਕੇ ਵਿਚਾਰ ਸਾਂਝੇ ਕਰਦੇ ਹਨ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਮਲੇਸ਼ੀਆ, ਸਿੰਗਾਪੁਰ, ਦੁਬਈ, ਅਜ਼ਰਬੈਜਾਨ, ਵੀਅਤਨਾਮ ਅਤੇ ਹੁਣ ਕਜ਼ਾਖਸਤਾਨ ਵਿਚ ਹੋਈਆਂ ਕਾਨਫਰੰਸਾਂ ਨੇ ਨੂੰ ਇਕ ਵਿਸ਼ਵ ਪ੍ਰਸਿੱਧ ਮੰਚ ਬਣਾਇਆ ਹੈ। ਕਾਨਫਰੰਸ ਦੇ ਅੰਤ ਵਿਚ ਨੈੱਟਵਰਕਿੰਗ ਸੈਸ਼ਨ, ਪ੍ਰਸ਼ਨ-ਉੱਤਰ ਫੋਰਮ ਅਤੇ ਸਾਂਝੇ ਵਿਚਾਰ-ਵਟਾਂਦਰੇ ਨੇ ਭਵਿੱਖ ਵਿਚ ਅੰਤਰਰਾਸ਼ਟਰੀ ਸਹਿਯੋਗ, ਸਾਂਝੀ ਖੋਜ ਅਤੇ ਫੈਕਲਟੀ ਐਕਸਚੇਂਜ ਲਈ ਮਜ਼ਬੂਤ ਬੁਨਿਆਦ ਰੱਖੀ। ਸਫ਼ਲਤਾ ਨੇ ਇਕ ਵਾਰ ਫਿਰ ਸੀਟੀ ਗਰੁੱਪ ਦੀ ਵਿਸ਼ਵ ਪੱਧਰੀ ਅਕਾਦਮਿਕ ਖ਼ੇਤਰ ਦੀ ਮਿਸਾਲ ਕਾਇਮ ਕੀਤੀ ਅਤੇ ਅੰਤਰਰਾਸ਼ਟਰੀ ਸਾਂਝੇਦਾਰੀਆਂ ਨੂੰ ਮਜ਼ਬੂਤ ਕਰਨ ਦੀ ਵਚਨਬੱਧਤਾ ਨੂੰ ਦਰਸਾਇਆ।