Big Revelation : ਪਰਵਿੰਦਰ ਝੋਟਾ ਕਤਲ ਮਾਮਲੇ ’ਚ ਕਾਤਲ ਅਸ਼ਵਨੀ ਦੀ ਪਤਨੀ ਗ੍ਰਿਫ਼ਤਾਰ, SSP ਬੋਲੇ- ਕਤਲ ਕਾਂਡ ਬਾਰੇ ਨੀਲਮ ਨੂੰ ਸੀ ਜਾਣਕਾਰੀ, ਵਾਰਦਾਤ ਤੋਂ ਬਾਅਦ ਮੁਲਜ਼ਮ ਨੇ ਬੰਦ ਕਰ ਲਿਆ ਸੀ ਫੋਨ

ਜਾਸ, ਮਾਨਸਾ: ਪਰਵਿੰਦਰ ਸਿੰਘ ਝੋਟਾ ਕਤਲ ਮਾਮਲੇ ’ਚ ਅਹਿਮ ਭੂਮਿਕਾ ਨਿਭਾਉਣ ਦੇ ਦੋਸ਼ ਹੇਠ ਮੁਲਜ਼ਮ ਅਸ਼ਵਨੀ ਕੁਮਾਰ ਦੀ ਪਤਨੀ ਨੀਲਮ ਰਾਣੀ ਨੂੰ ਮਾਨਸਾ ਪੁਲਿਸ ਨੇ ਗ੍ਰਿਫ਼ਤਾਰ ਕਰ ਲਿਆ ਹੈ।

ਐੱਸਐੱਸਪੀ ਮਾਨਸਾ ਵੈਭਵ ਚੌਧਰੀ ਨੇ ਖ਼ੁਲਾਸਾ ਕੀਤਾ ਕਿ ਨੀਲਮ ਨੂੰ ਅਸ਼ਵਨੀ ਦੇ ਇਰਾਦਿਆਂ ਬਾਰੇ ਪਤਾ ਸੀ ਜੋ ਉਸ ਨੇ ਪੁਲਿਸ ਤੋਂ ਲੁਕਾ ਕੇ ਰੱਖੀ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਘਟਨਾ ਤੋਂ ਪਹਿਲਾਂ ਅਸ਼ਵਨੀ ਕੁਮਾਰ ਨੇ ਪੰਜ ਫੋਨ ਕਾਲਾਂ ਕੀਤੀਆਂ ਸਨ: ਚਾਰ ਆਪਣੇ ਪੁੱਤਰ ਨੂੰ ਅਤੇ ਇੱਕ ਆਪਣੇ ਚਾਚੇ ਨੂੰ। ਅਸ਼ਵਨੀ ’ਤੇ ਅਪਰਾਧਿਕ ਮਾਮਲੇ ਦਰਜ ਹੋਣ ਦੇ ਬਾਵਜੂਦ ਉਸ ਦਾ ਦੋ ਹਥਿਆਰਾਂ ਦਾ ਲਾਇਸੰਸ ਬਣਨ ’ਤੇ ਸਬੰਧਿਤ ਅਥਾਰਟੀ ਤੋਂ ਰਿਕਾਰਡ ਲੈ ਕੇ ਜਾਂਚ ਹੋਵੇਗੀ। ਇਸ ਤੋਂ ਇਲਾਵਾ ਉਸ ਵੱਲੋਂ ਲਏ ਗਏ ਮੈਡੀਕਲ ਲਾਇਸੰਸ ਦੀ ਵੀ ਜਾਂਚ ਹੋਵੇਗੀ।

ਐੱਸਐੱਸਪੀ ਨੇ ਦੱਸਿਆ ਕਿ ਅਸ਼ਵਨੀ ਇੱਕ ਚਲਾਕ ਵਿਅਕਤੀ ਹੈ। ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਬਾਅਦ, ਉਸਨੇ ਆਪਣਾ ਫੋਨ ਬੰਦ ਕਰ ਲਿਆ ਅਤੇ 'ਲਾਡੀ' ਨਾਮਕ ਇੱਕ ਸਾਥੀ ਨੇ ਬੁਲੇਟ ਮੋਟਰਸਾਈਕਲ ਨਾਲ ਉਸ ਦੀ ਭੱਜਣ ’ਚ ਮਦਦ ਕੀਤੀ। ਇਸ ਤੋਂ ਬਾਅਦ ਅਸ਼ਵਨੀ ਕੁਮਾਰ ਜਨਤਕ ਆਵਾਜਾਈ ਰਾਹੀਂ ਰਾਜਸਥਾਨ ਪਹੁੰਚ ਗਿਆ, ਜਿੱਥੇ ਤਕਨੀਕੀ ਜਾਂਚ ਦੇ ਆਧਾਰ 'ਤੇ ਪੁਲਿਸ ਨੇ ਉਸਨੂੰ ਕਾਬੂ ਕਰ ਲਿਆ। ਐੱਸਐੱਸਪੀ ਅਨੁਸਾਰ, ਅਸ਼ਵਨੀ ਕੁਮਾਰ ਮੁਹਾਲੀ ਖੇਤਰ ਤੋਂ ਨਸ਼ੀਲੇ ਪਦਾਰਥਾਂ ਦੀ ਖੇਪ ਮੰਗਵਾਉਂਦਾ ਸੀ। ਐੱਸਐੱਸਪੀ ਨੇ ਅੱਗੇ ਕਿਹਾ ਕਿ ਪੁਲਿਸ ਰਿਮਾਂਡ ਦੌਰਾਨ ਹਥਿਆਰ ਬਰਾਮਦ ਕੀਤੇ ਜਾਣਗੇ।