ਕਾਰਗਿਲ ਦੀਆਂ ਬਰਫੀਲੀਆਂ ਚੋਟੀਆਂ ਤੋਂ ਅੱਜ ਵੀ ਸੁਣਾਈ ਦਿੰਦੀ ਹੈ ਜਾਂਬਾਜ਼ਾਂ ਦੇ ਸ਼ੌਰਯ ਦੀ ਗੂੰਜ : ਕੁੰਵਰ ਵਿੱਕੀ

- ਕਾਰਗਿਲ ਵਿਜੈ ਦਿਵਸ ਸਬੰਧੀ ‘ਸ਼ੌਰਯ ਸਨਮਾਨ ਸਮਾਗਮ’ ਅੱਜ

ਆਕਾਸ਼, ਪੰਜਾਬੀ ਜਾਗਰਣ

ਗੁਰਦਾਸਪੁਰ : ਸਾਰਾ ਦੇਸ਼ ਕਾਰਗਿਲ ਯੁੱਧ ਦੇ ਜਾਂਬਾਜ਼ਾਂ ਨੂੰ ਇੱਕ ਸੁਰ ਵਿੱਚ ਯਾਦ ਕਰ ਰਿਹਾ ਹੈ। ਕਾਰਗਿਲ ਯੁੱਧ ਦਾ ਸਮਰਨ ਹੁੰਦੇ ਹੀ ਭਾਰਤੀ ਸੇਨਾ ਦੇ ਸ਼ੌਰਯ ਦੇ ਸਾਹਮਣੇ ਸਮੂਹ ਦੇਸ਼ਵਾਸੀਆਂ ਦਾ ਸਿਰ ਸ਼ਰਧਾ ਨਾਲ ਝੁਕ ਜਾਂਦਾ ਹੈ, ਕਿਉਂਕਿ ਇਹ ਯੁੱਧ ਭਾਰਤੀ ਸੇਨਾ ਨੇ ਜਿਨ੍ਹਾਂ ਔਖੀਆਂ ਹਾਲਤਾਂ ਵਿੱਚ ਲੜਿਆ, ਉਸ ਦੀ ਮਿਸਾਲ ਵਿਸ਼ਵ ਵਿੱਚ ਹੋਰ ਕਿਤੇ ਨਹੀਂ ਮਿਲਦੀ। 1999 ਵਿੱਚ ਪਾਕਿਸਤਾਨ ਵੱਲੋਂ ਭਾਰਤ 'ਤੇ ਥੋਪੇ ਗਏ ਕਾਰਗਿਲ ਯੁੱਧ ਵਿੱਚ ਜਿੱਥੇ ਪੂਰੇ ਦੇਸ਼ ਦੇ 527 ਸੈਨਿਕਾਂ ਨੇ ਵੀਰਗਤੀ ਪਾਈ, ਉੱਥੇ ਸ਼ਹੀਦਾਂ ਦੀ ਜਨਮਭੂਮੀ ਜ਼ਿਲ੍ਹਾ ਗੁਰਦਾਸਪੁਰ ਅਤੇ ਪਠਾਨਕੋਟ ਦੇ ਅੱਠ ਸੈਨਿਕਾਂ ਨੇ ਕਾਰਗਿਲ ਦੀਆਂ ਬਰਫੀਲੀਆਂ ਚੋਟੀਆਂ 'ਤੇ ਅਦਭੁੱਤ ਵੀਰਤਾ ਅਤੇ ਸ਼ੌਰਯ ਦਾ ਪ੍ਰਦਰਸ਼ਨ ਕਰਕੇ ਆਪਣੀਆਂ ਜਾਨਾਂ ਵਾਰ ਕੇ ਆਪਣਾ ਨਾਮ ਸ਼ਹੀਦ ਸੈਨਿਕਾਂ ਦੀ ਸ਼੍ਰੇਣੀ ਵਿੱਚ ਸੁਨਹਿਰੀ ਅੱਖਰਾਂ ਵਿੱਚ ਦਰਜ ਕਰਵਾ ਲਿਆ। ਕਾਰਗਿਲ ਦੀਆਂ ਬਰਫੀਲੀਆਂ ਚੋਟੀਆਂ ਤੋਂ ਅੱਜ ਵੀ ਜਾਂਬਾਜ਼ਾਂ ਦੇ ਸ਼ੌਰਯ ਦੀ ਗੂੰਜ ਸੁਣਾਈ ਦਿੰਦੀ ਹੈ।

ਸ਼ਹੀਦ ਸੈਨਿਕ ਪਰਿਵਾਰ ਸੁਰੱਖਿਆ ਪ੍ਰੀਸ਼ਦ ਦੇ ਜਨਰਲ ਸਕੱਤਰ ਕੁੰਵਰ ਰਵਿੰਦਰ ਸਿੰਘ ਵਿੱਕੀ ਨੇ ਕਿਹਾ ਕਿ ਕਾਰਗਿਲ ਦੇ ਇਨ੍ਹਾਂ ਜਾਂਬਾਜ਼ਾਂ ਨੂੰ ਦੇਸ਼ ਦਾ ਸਲਾਮ ਹੈ, ਜਿਨ੍ਹਾਂ ਨੇ ਦੇਸ਼ ਦੇ ਆਉਣ ਵਾਲੇ ਕੱਲ ਲਈ ਆਪਣਾ ਅੱਜ ਕੁਰਬਾਨ ਕਰਕੇ ਦੇਸ਼ ਦੀ ਭਵਿੱਖੀ ਪੀੜ੍ਹੀ ਵਿੱਚ ਦੇਸ਼ਭਗਤੀ ਦੀ ਅਲਖ ਜਗਾਈ ਅਤੇ ਉਨ੍ਹਾਂ ਵਿੱਚ ਰਾਸ਼ਟਰ 'ਤੇ ਮਰ-ਮਿਟਣ ਦਾ ਜਜ਼ਬਾ ਭਰ ਦਿੱਤਾ। ਇਨ੍ਹਾਂ ਸੂਰਵੀਰਾਂ ਦੀ ਸ਼ਹਾਦਤ ਨੂੰ ਨਮਨ ਕਰਨ ਲਈ 26 ਜੁਲਾਈ ਨੂੰ ਐੱਸਐੱਸਐੱਮ ਕਾਲਜ ਦੀਨਾਨਗਰ ਵਿੱਚ ਕਾਰਗਿਲ ਵਿਜੈ ਦਿਵਸ ਦੇ ਉਪਲੱਖ ਵਿੱਚ 'ਸ਼ੌਰਯ ਸਨਮਾਨ ਸਮਾਰੋਹ' ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ।

ਕੁੰਵਰ ਰਵਿੰਦਰ ਵਿੱਕੀ ਨੇ ਦੱਸਿਆ ਕਿ ਸੂਬੇਦਾਰ ਨਿਰਮਲ ਸਿੰਘ ਦਾ ਜਨਮ 6 ਮਈ 1957 ਨੂੰ ਪਿੰਡ ਛੀਨਾ ਬੇਟ ਵਿੱਚ ਪਿਤਾ ਧਨਾ ਸਿੰਘ ਅਤੇ ਮਾਤਾ ਸ਼ਾਂਤੀ ਦੇਵੀ ਦੇ ਘਰ ਹੋਇਆ। ਸਰਕਾਰੀ ਹਾਈ ਸਕੂਲ ਤਾਲੀਬਪੁਰ ਪੰਡੋਰੀ ਤੋਂ ਮੈਟ੍ਰਿਕ ਕਰਨ ਉਪਰੰਤ 21 ਸਤੰਬਰ 1976 ਨੂੰ ਸੇਨਾ ਦੀ 8 ਸਿੱਖ ਰੈਜੀਮੈਂਟ ਵਿੱਚ ਭਰਤੀ ਹੋ ਗਏ। ਕਾਰਗਿਲ ਯੁੱਧ ਦੌਰਾਨ ਸਭ ਤੋਂ ਪਹਿਲਾਂ ਇਨ੍ਹਾਂ ਦੀ ਯੂਨਿਟ ਨੂੰ ਉੱਥੇ ਭੇਜਿਆ ਗਿਆ। 6 ਜੁਲਾਈ 1999 ਨੂੰ ਇਨ੍ਹਾਂ ਨੂੰ ਟਾਈਗਰ ਹਿੱਲ ਫਤਹਿ ਕਰਨ ਦਾ ਹੁਕਮ ਮਿਲਿਆ। ਸੂਬੇਦਾਰ ਨਿਰਮਲ ਸਿੰਘ ਦੀ ਅਗਵਾਈ ਵਿੱਚ ਇੱਕ ਸੈਨਿਕ ਦਸਤੇ ਨੇ ਔਖੀ ਚੜ੍ਹਾਈ ਚੜ੍ਹਦਿਆਂ ਪਾਕਿਸਤਾਨੀ ਸੇਨਾ 'ਤੇ ਧਾਵਾ ਬੋਲ ਦਿੱਤਾ। ਸੂਬੇਦਾਰ ਨਿਰਮਲ ਸਿੰਘ ਨੇ ਆਪਣੇ ਸਾਥੀ ਸੈਨਿਕਾਂ ਦੀਆਂ ਜਾਨਾਂ ਬਚਾਉਂਦਿਆਂ ਪਾਕਿਸਤਾਨੀ ਸੇਨਾ ਦੇ ਕਈ ਸੈਨਿਕਾਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਇਸ ਦੌਰਾਨ ਦੁਸ਼ਮਣ ਦੀ ਇੱਕ ਗੋਲੀ ਇਨ੍ਹਾਂ ਦੇ ਸੀਨੇ ਵਿੱਚੋਂ ਵਿੰਨ੍ਹਦੀ ਹੋਈ ਨਿਕਲ ਗਈ, ਜਿਸ ਕਾਰਨ ਇਸ ਵੀਰ ਯੋਧੇ ਨੇ ਕਸ਼ਮੀਰ ਦੀਆਂ ਵਾਦੀਆਂ ਤੋਂ ਦੇਸ਼ਵਾਸੀਆਂ ਨੂੰ ਆਖ਼ਰੀ ਸਲੂਟ ਕਰਦਿਆਂ ਆਪਣੀ ਕੁਰਬਾਨੀ ਦੇ ਦਿੱਤੀ।

ਵੀਰਤਾ ਨਾਲ ਲੜੇ ਸੂਬੇਦਾਰ ਅਜੀਤ ਸਿੰਘ : ਪਿਤਾ ਹਰਬੰਸ ਸਿੰਘ ਅਤੇ ਮਾਤਾ ਯਸ਼ਪਾਲ ਕੌਰ ਵਾਸੀ ਦਕੋਹਾ ਦੇ ਬਹਾਦਰ ਪੁੱਤਰ ਸੂਬੇਦਾਰ ਅਜੀਤ ਸਿੰਘ ਨੇ ਸਰਕਾਰੀ ਹਾਈ ਸਕੂਲ ਘੁਮਾਣ ਤੋਂ ਦਸਵੀਂ ਕਰਨ ਮਗਰੋਂ 1976 ਵਿੱਚ ਸੇਨਾ ਦੀ ਆਰ.ਟੀ. 305 ਯੂਨਿਟ ਵਿੱਚ ਭਰਤੀ ਹੋਏ। 20 ਅਗਸਤ 1999 ਨੂੰ ਕਾਰਗਿਲ ਦੀਆਂ ਚੋਟੀਆਂ ਨੂੰ ਫਤਹਿ ਕਰਕੇ ਬਹਾਦਰੀ ਦਾ ਪਰਚਮ ਲਹਿਰਾਇਆ ਅਤੇ ਪਾਕਿਸਤਾਨੀ ਸੇਨਾ ਨਾਲ ਲੜਦਿਆਂ ਆਪਣੀ ਕੁਰਬਾਨੀ ਦੇ ਦਿੱਤੀ।

ਜ਼ਖ਼ਮੀ ਹਾਲਤ ਵਿੱਚ ਵੀ ਦੁਸ਼ਮਣ ਨਾਲ ਲੜਦੇ ਰਹੇ ਲਾਂਸਨਾਇਕ ਰਣਬੀਰ ਸਿੰਘ : ਲਾਂਸਨਾਇਕ ਰਣਬੀਰ ਸਿੰਘ ਦਾ ਜਨਮ 15 ਅਪ੍ਰੈਲ 1966 ਨੂੰ ਪਿੰਡ ਆਲਮਾ ਵਿੱਚ ਪਿਤਾ ਠਾਕੁਰ ਸੰਸਾਰ ਸਿੰਘ ਅਤੇ ਮਾਤਾ ਕੌਸ਼ਲਿਆ ਦੇਵੀ ਦੇ ਘਰ ਹੋਇਆ। ਸਰਕਾਰੀ ਹਾਈ ਸਕੂਲ ਭੈਣੀ ਮੀਆਂ ਖਾਂ ਤੋਂ ਦਸਵੀਂ ਪਾਸ ਕਰਨ ਮਗਰੋਂ 30 ਅਕਤੂਬਰ 1997 ਨੂੰ ਸੇਨਾ ਦੀ 13 ਜੈਕ ਰਾਈਫਲ ਯੂਨਿਟ ਵਿੱਚ ਭਰਤੀ ਹੋ ਗਏ। 16 ਜੂਨ 1999 ਨੂੰ ਇਨ੍ਹਾਂ ਦੇ ਸੈਨਿਕ ਦਸਤੇ ਨੇ 16 ਹਜ਼ਾਰ ਫੁੱਟ ਉੱਚੀ ਕਾਰਗਿਲ ਦੇ ਦ੍ਰਾਸ ਸੈਕਟਰ ਵਿੱਚ ਔਖੀ ਚੜ੍ਹਾਈ ਚੜ੍ਹਦਿਆਂ ਪਾਕਿਸਤਾਨੀ ਸੇਨਾ 'ਤੇ ਹਮਲਾ ਬੋਲਿਆ। ਲਾਂਸਨਾਇਕ ਰਣਬੀਰ ਸਿੰਘ ਅਤੇ ਇਨ੍ਹਾਂ ਦੇ ਸੈਨਿਕ ਦਸਤੇ ਨੇ ਵੀਰਤਾ ਦੀ ਮਿਸਾਲ ਕਾਇਮ ਕਰਦਿਆਂ ਦੁਸ਼ਮਣ ਦੇ 25 ਸੈਨਿਕਾਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਗੰਭੀਰ ਤੌਰ 'ਤੇ ਜ਼ਖ਼ਮੀ ਹੋਣ ਦੇ ਬਾਵਜੂਦ ਵੀ ਰਣਬੀਰ ਦੁਸ਼ਮਣ ਨਾਲ ਲੋਹਾ ਲੈਂਦੇ ਰਹੇ ਅਤੇ ਆਖ਼ਰ ਵਿੱਚ ਭਾਰਤ ਮਾਤਾ ਦਾ ਇਹ ਲਾਲ ਦੇਸ਼ 'ਤੇ ਕੁਰਬਾਨ ਹੋ ਗਿਆ।

ਕਾਰਗਿਲ ਦੀਆਂ ਬਰਫੀਲੀਆਂ ਚੋਟੀਆਂ ’ਤੇ ਮੁਕੇਸ਼ ਨੇ ਦਿਖਾਈ ਵੀਰਤਾ : ਧਾਰੀਵਾਲ ਦੇ ਨਜ਼ਦੀਕੀ ਪਿੰਡ ਫੱਤੇਨੰਗਲ ਦੇ ਲਾਂਸਨਾਇਕ ਮੁਕੇਸ਼ ਕੁਮਾਰ ਦਾ ਜਨਮ 15 ਫਰਵਰੀ 1974 ਨੂੰ ਪਿਤਾ ਮਹਾਂਗਾ ਰਾਮ ਅਤੇ ਮਾਤਾ ਸੁਭਾਸ਼ ਰਾਣੀ ਦੇ ਘਰ ਹੋਇਆ। ਮਿਸ਼ਨ ਹਾਈ ਸਕੂਲ ਧਾਰੀਵਾਲ ਤੋਂ ਦਸਵੀਂ ਕਰਨ ਮਗਰੋਂ 14 ਅਗਸਤ 1991 ਨੂੰ ਇਹ ਸੇਨਾ ਦੀ 1889 ਆਰ.ਟੀ. ਰੈਜੀਮੈਂਟ ਵਿੱਚ ਭਰਤੀ ਹੋ ਗਏ। 26 ਜੂਨ 1999 ਨੂੰ ਕਾਰਗਿਲ ਦੀਆਂ ਬਰਫੀਲੀਆਂ ਚੋਟੀਆਂ ਤੋਂ ਪਾਕਿਸਤਾਨੀ ਸੇਨਾ ਨੂੰ ਖਦੇੜਦਿਆਂ ਇਨ੍ਹਾਂ ਨੇ ਸੀਨੇ 'ਤੇ ਗੋਲੀ ਖਾ ਕੇ ਆਪਣੀ ਕੁਰਬਾਨੀ ਦੇ ਦਿੱਤੀ।

ਕੁਰਬਾਨੀ ਦੇ ਕੇ ਹਰੀਸ਼ ਨੇ ਯੂਨਿਟ ਦੇ ਗੌਰਵ ਨੂੰ ਵਧਾਇਆ : ਜ਼ਿਲ੍ਹਾ ਪਠਾਨਕੋਟ ਦੇ ਸਰਹੱਦੀ ਪਿੰਡ ਝੜੌਲੀ ਦੇ ਲਾਂਸਨਾਇਕ ਹਰੀਸ਼ ਪਾਲ ਸ਼ਰਮਾ ਦਾ ਜਨਮ 12 ਮਈ 1969 ਨੂੰ ਪਿਤਾ ਬਿਸ਼ਨ ਦਾਸ ਅਤੇ ਮਾਤਾ ਰਾਜ ਦੁਲਾਰੀ ਦੇ ਘਰ ਹੋਇਆ। ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਬਮਿਆਲ ਤੋਂ ਮੈਟ੍ਰਿਕ ਕਰਨ ਮਗਰੋਂ 1990 ਨੂੰ ਸੇਨਾ ਦੀ 13 ਜੈਕ ਰਾਈਫਲ ਯੂਨਿਟ ਵਿੱਚ ਭਰਤੀ ਹੋ ਗਏ। 15 ਜੂਨ 1999 ਨੂੰ ਕਾਰਗਿਲ ਦੀਆਂ ਦੁਰਗਮ ਚੋਟੀਆਂ 'ਤੇ ਪਾਕਿਸਤਾਨੀ ਸੇਨਾ ਨਾਲ ਅਦਭੁੱਤ ਵੀਰਤਾ ਨਾਲ ਲੜਦਿਆਂ ਆਪਣੀ ਕੁਰਬਾਨੀ ਦੇ ਕੇ ਯੂਨਿਟ ਦਾ ਗੌਰਵ ਵਧਾਇਆ।

ਵੀਰਤਾ ਨਾਲ ਲੜਦਿਆਂ ਸਿਪਾਹੀ ਮੇਜਰ ਨੇ ਦੁਸ਼ਮਣ ਦੇ ਦੰਦ ਕੀਤੇ ਸਨ ਖੱਟੇ : ਪਿੰਡ ਭਟੋਆ ਦੇ ਸਿਪਾਹੀ ਮੇਜਰ ਸਿੰਘ ਦਾ ਜਨਮ 27 ਜੁਲਾਈ 1974 ਨੂੰ ਪਿਤਾ ਬਲਕਾਰ ਸਿੰਘ ਅਤੇ ਮਾਤਾ ਰਖਵੰਤ ਕੌਰ ਦੇ ਘਰ ਹੋਇਆ। ਸਰਕਾਰੀ ਹਾਈ ਸਕੂਲ ਸਾਹੋਵਾਲ ਤੋਂ ਦਸਵੀਂ ਜਮਾਤ ਪਾਸ ਕਰਨ ਮਗਰੋਂ 1995 ਨੂੰ ਇਹ ਸੇਨਾ ਦੀ 8 ਸਿੱਖ ਯੂਨਿਟ ਵਿੱਚ ਭਰਤੀ ਹੋ ਗਏ। 21 ਮਈ 1999 ਨੂੰ ਟਾਈਗਰ ਹਿੱਲ ਨੂੰ ਫਤਹਿ ਕਰਨ ਵਾਲੀ ਟੀਮ ਦਾ ਇਹ ਹਿੱਸਾ ਸਨ। ਦੋਵਾਂ ਪਾਸਿਆਂ ਤੋਂ ਹੋਈ ਭਿਆਨਕ ਗੋਲਾਬਾਰੀ ਵਿੱਚ ਪਾਕਿਸਤਾਨੀ ਸੇਨਾ ਨੂੰ ਮੂੰਹ-ਤੋੜ ਜਵਾਬ ਦਿੰਦਿਆਂ ਸਿਪਾਹੀ ਮੇਜਰ ਸਿੰਘ ਨੇ ਦੁਸ਼ਮਣ ਦੇ ਦੰਦ ਖੱਟੇ ਕਰਕੇ ਆਪਣੀ ਕੁਰਬਾਨੀ ਦੇ ਦਿੱਤੀ।

19 ਸਾਲ ਦੀ ਛੋਟੀ ਉਮਰ ਵਿੱਚ ਸਤਵੰਤ ਨੇ ਪੀਤਾ ਸੀ ਸ਼ਹਾਦਤ ਦਾ ਜਾਮ : ਕਾਰਗਿਲ ਯੁੱਧ ਵਿੱਚ ਕੁਰਬਾਨ ਹੋਣ ਵਾਲੇ ਸੈਨਿਕਾਂ ਵਿੱਚ ਸਤਵੰਤ ਸਿੰਘ ਸਭ ਤੋਂ ਘੱਟ ਉਮਰ ਦੇ ਸਨ। ਇਨ੍ਹਾਂ ਦਾ ਜਨਮ 2 ਦਸੰਬਰ 1980 ਨੂੰ ਪਿੰਡ ਸਲਾਹਪੁਰ ਬੇਟ ਵਿੱਚ ਮਾਤਾ ਸੁਖਦੇਵ ਕੌਰ ਅਤੇ ਪਿਤਾ ਕਸ਼ਮੀਰ ਸਿੰਘ ਦੇ ਘਰ ਹੋਇਆ। 1 ਜਨਵਰੀ 1998 ਨੂੰ ਇਹ ਸੇਨਾ ਦੀ 8 ਸਿੱਖ ਯੂਨਿਟ ਵਿੱਚ ਭਰਤੀ ਹੋ ਕੇ ਦੇਸ਼ ਸੇਵਾ ਵਿੱਚ ਜੁਟ ਗਏ। 4 ਜੁਲਾਈ 1999 ਨੂੰ ਸਤਵੰਤ ਸਿੰਘ ਨੇ ਆਪਣੇ ਸੈਨਿਕ ਦਸਤੇ ਤੋਂ ਅੱਗੇ ਹੋ ਕੇ ਦੁਸ਼ਮਣ ਨਾਲ ਲੋਹਾ ਲਿਆ ਅਤੇ ਛੋਟੀ ਉਮਰ ਵਿੱਚ ਹੀ ਵੱਡਾ ਕੰਮ ਕਰਦਿਆਂ ਦੁਸ਼ਮਣ ਨੂੰ ਪਰਾਸਤ ਕਰਕੇ ਆਪਣੀ ਕੁਰਬਾਨੀ ਦੇ ਦਿੱਤੀ।

ਦੁਸ਼ਮਣ ’ਤੇ ਮੌਤ ਬਣ ਕੇ ਟੁੱਟੇ ਲਾਂਸਨਾਇਕ ਕੰਸਰਾਜ : ਪਿੰਡ ਡੇਰਾ ਪਠਾਣਾ ਦੇ ਲਾਂਸਨਾਇਕ ਕੰਸਰਾਜ ਦਾ ਜਨਮ 14 ਅਗਸਤ 1965 ਨੂੰ ਪਿਤਾ ਬਿਹਾਰੀ ਲਾਲ ਅਤੇ ਮਾਤਾ ਸੇਵਾ ਬੰਤੀ ਦੇ ਘਰ ਹੋਇਆ। ਸਰਕਾਰੀ ਸਕੂਲ ਧਾਰੋਵਾਲੀ ਤੋਂ ਦਸਵੀਂ ਕਰਨ ਮਗਰੋਂ 7 ਅਗਸਤ 1985 ਨੂੰ ਸੇਨਾ ਦੀ 7 ਡੋਗਰਾ ਰੈਜੀਮੈਂਟ ਵਿੱਚ ਭਰਤੀ ਹੋ ਗਏ। 31 ਅਗਸਤ 1999 ਨੂੰ ਕਾਰਗਿਲ ਦੀਆਂ ਚੋਟੀਆਂ 'ਤੇ ਛੁਪੇ ਪਾਕਿਸਤਾਨੀ ਸੇਨਾ ਦੇ ਜਵਾਨਾਂ ਨੇ ਇਨ੍ਹਾਂ ਦੇ ਸੈਨਿਕ ਦਸਤੇ 'ਤੇ ਗੋਲਾਬਾਰੀ ਕਰਨੀ ਸ਼ੁਰੂ ਕਰ ਦਿੱਤੀ। ਉਨ੍ਹਾਂ ਦੇ ਇਸ ਹਮਲੇ ਦਾ ਮੂੰਹ-ਤੋੜ ਜਵਾਬ ਦਿੰਦਿਆਂ ਲਾਂਸਨਾਇਕ ਕੰਸਰਾਜ ਨੇ ਉਨ੍ਹਾਂ ਨੂੰ ਪਿੱਛੇ ਹਟਣ 'ਤੇ ਮਜ਼ਬੂਰ ਕਰ ਦਿੱਤਾ ਅਤੇ ਖੁਦ ਦੁਸ਼ਮਣ ਵੱਲੋਂ ਚਲਾਈ ਇੱਕ ਗੋਲੀ ਨਾਲ ਸ਼ਹਾਦਤ ਦਾ ਜਾਮ ਪੀ ਗਏ।