ਬੱਦਲਾਂ ਤੋਂ ਰਾਹਤ, ਹੁੰਮਸ ਨੇ ਵਧਾਈ ਬੇਚੈਨੀ, ਅੱਜ ਵੀ ਇਸੇ ਤਰ੍ਹਾਂ ਰਹੇਗਾ ਮੌਸਮ

71 ਫ਼ੀਸਦੀ ਨਮੀ ਕਾਰਨ ਆਮ ਲੋਕਾਂ ਨੇ ਰਾਹਤ ਤੇ ਪਰੇਸ਼ਾਨੀ ਦੋਵਾਂ ਦਾ ਕੀਤਾ ਸਾਹਮਣਾ ਪਲਵਿੰਦਰ ਸਿੰਘ, ਪੰਜਾਬੀ ਜਾਗਰਣ ਗੁਰਦਾਸਪੁਰ : ਮੰਗਲਵਾਰ ਨੂੰ ਪੂਰੇ ਦਿਨ ਆਸਮਾਨ ’ਤੇ ਬੱਦਲਾਂ ਦੀ ਚਾਦਰ ਛਾਏ ਰਹਿਣ ਕਾਰਨ ਸ਼ਹਿਰ ਵਾਸੀਆਂ ਨੂੰ ਤੇਜ਼ ਧੁੱਪ ਤੋਂ ਤਾਂ ਨਿਜਾਤ ਮਿਲੀ ਪਰ ਮੀਂਹ ਦਾ ਇੰਤਜ਼ਾਰ ਅਧੂਰਾ ਰਹਿ ਗਿਆ। ਮੌਸਮ ਵਿਭਾਗ ਮੁਤਾਬਕ ਦਿਨ ਭਰ ਹਲਕੀਆਂ ਹਵਾਵਾਂ ਚੱਲਦੀਆਂ ਰਹੀਆਂ ਅਤੇ ਵੱਧ ਤੋਂ ਵੱਧ ਤਾਪਮਾਨ ’ਚ ਇੱਕ ਡਿਗਰੀ ਦੀ ਗਿਰਾਵਟ ਦਰਜ ਕੀਤੀ ਗਈ ਪਰ ਨਮੀ ਦੇ ਉੱਚ ਪੱਧਰ ਨੇ ਹੁੰਮਸ ਦੇ ਰੂਪ ’ਚ ਲੋਕਾਂ ਦੀ ਪਰੇਸ਼ਾਨੀ ਬਰਕਰਾਰ ਰੱਖੀ। ਬੁੱਧਵਾਰ ਨੂੰ ਵੀ ਮੌਸਮ ਦਾ ਇਹੀ ਮਿਜਾਜ਼ ਬਣੇ ਰਹਿਣ ਦਾ ਅਨੁਮਾਨ ਹੈ ਜਿਸ ਨਾਲ ਸ਼ਹਿਰ ’ਚ ਗਰਮੀ ਤੋਂ ਰਾਹਤ ਤਾਂ ਮਿਲੇਗੀ ਪਰ ਹੁੰਮਸ ਭਰੀ ਰੁਟੀਨ ਜਾਰੀ ਰਹਿ ਸਕਦੀ ਹੈ। ਸੋਮਵਾਰ ਨੂੰ ਜਿੱਥੇ ਸ਼ਹਿਰ ਦਾ ਵੱਧ ਤੋਂ ਵੱਧ ਤਾਪਮਾਨ 32 ਡਿਗਰੀ ਸੈਲਸੀਅਸ ਦਰਜ ਕੀਤਾ ਗਿਆ ਸੀ, ਉੱਥੇ ਮੰਗਲਵਾਰ ਨੂੰ ਇਹ ਘੱਟ ਕੇ 31 ਡਿਗਰੀ ’ਤੇ ਆ ਗਿਆ। ਹਾਲਾਂਕਿ ਘੱਟ ਤੋਂ ਘੱਟ ਤਾਪਮਾਨ ’ਚ ਕੋਈ ਬਦਲਾਅ ਨਹੀਂ ਆਇਆ ਤੇ ਇਹ 27 ਡਿਗਰੀ ਸੈਲਸੀਅਸ ਤੇ ਸਥਿਰ ਰਿਹਾ। ਮੌਸਮ ਮਾਹਿਰਾਂ ਮੁਤਾਬਕ ਬੱਦਲਾਂ ਦੀ ਆਵਾਜਾਈ ਕਾਰਨ ਦਿਨ ਦਾ ਤਾਪਮਾਨ ਤਾਂ ਕੰਟਰੋਲ ’ਚ ਰਿਹਾ ਪਰ ਰਾਤਾਂ ਗਰਮ ਰਹੀਆਂ। ਖ਼ਾਸ ਗੱਲ ਇਹ ਰਹੀ ਕਿ ਹਵਾ ’ਚ ਨਮੀ ਦੀ ਮਾਤਰਾ 71 ਫ਼ੀਸਦੀ ਦਰਜ ਕੀਤੀ ਗਈ, ਜੋ ਆਮ ਨਾਲੋਂ ਕਾਫ਼ੀ ਵੱਧ ਹੈ। ਇਸ ਉੱਚ ਨਮੀ ਪੱਧਰ ਨੇ ਲੋਕਾਂ ਨੂੰ ਬੇਹਾਲ ਕਰ ਦਿੱਤਾ, ਕਿਉਂਕਿ ਪਸੀਨਾ ਸੁੱਕ ਨਹੀਂ ਸਕਿਆ ਤੇ ਸਰੀਰ ਚਿਪਚਿਪਾ ਮਹਿਸੂਸ ਹੁੰਦਾ ਰਿਹਾ। ਦਿਨ ਭਰ ਚਾਰ ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਹਵਾ ਚੱਲਦੀ ਰਹੀ, ਜਿਸ ਨੇ ਕੁਝ ਹੱਦ ਤੱਕ ਗਰਮੀ ਦੇ ਤੇਜ਼ ਨੂੰ ਘਟਾਇਆ। ਪੂਰਵ-ਅਨੁਮਾਨ ਮੁਤਾਬਕ ਬੁੱਧਵਾਰ ਨੂੰ ਵੀ ਆਸਮਾਨ ’ਤੇ ਬੱਦਲ ਛਾਏ ਰਹਿਣਗੇ ਪਰ ਤਾਪਮਾਨ ’ਚ ਕੋਈ ਖ਼ਾਸ ਗਿਰਾਵਟ ਨਹੀਂ ਆਵੇਗੀ। ਵੱਧ ਤੋਂ ਵੱਧ ਤਾਪਮਾਨ 30 ਤੋਂ 32 ਡਿਗਰੀ ਦੇ ਵਿਚਕਾਰ ਅਤੇ ਘੱਟ ਤੋਂ ਘੱਟ 26 ਤੋਂ 28 ਡਿਗਰੀ ਵਿਚਕਾਰ ਰਹਿਣ ਦੀ ਸੰਭਾਵਨਾ ਜਤਾਈ ਗਈ ਹੈ। ਨਾਲ ਹੀ ਹਵਾ ’ਚ ਨਮੀ ਦੀ ਮਾਤਰਾ 70 ਫ਼ੀਸਦੀ ਦੇ ਆਸ-ਪਾਸ ਬਣੀ ਰਹਿਣ ਨਾਲ ਹੁੰਮਸ ਭਰੀ ਸਥਿਤੀ ਜਾਰੀ ਰਹੇਗੀ। ਮੌਸਮ ਵਿਭਾਗ ਨੇ ਇਹ ਵੀ ਸੰਕੇਤ ਦਿੱਤਾ ਹੈ ਕਿ ਅਗਲੇ 48 ਘੰਟਿਆਂ ’ਚ ਹਲਕੀ ਮੀਂਹ ਜਾਂ ਬੂੰਦਾਬਾਂਦੀ ਦੀ ਸੰਭਾਵਨਾ ਬਣੀ ਹੋਈ ਹੈ, ਹਾਲਾਂਕਿ ਇਸ ਦੀ ਨਿਸ਼ਚਤਤਾ ਅਜੇ ਸਪੱਸ਼ਟ ਨਹੀਂ ਹੈ। ਇਸ ਮੌਸਮ ’ਚ ਬੱਦਲ ਤਾਂ ਰਾਹਤ ਦੇ ਰਹੇ ਹਨ ਪਰ ਉੱਚ ਨਮੀ ਸਰੀਰ ਦੇ ਤਾਪਮਾਨ ਨੂੰ ਕੰਟਰੋਲ ਕਰਨ ’ਚ ਰੁਕਾਵਟ ਪੈਦਾ ਕਰਦੀ ਹੈ। 70 ਫ਼ੀਸਦੀ ਤੋਂ ਵੱਧ ਨਮੀ ਹੋਣ ’ਤੇ ਪਸੀਨਾ ਭਾਫ਼ ਨਹੀਂ ਬਣ ਪਾਉਂਦਾ, ਜਿਸ ਕਾਰਨ ਗਰਮੀ ਵੱਧ ਮਹਿਸੂਸ ਹੁੰਦੀ ਹੈ। ਅਜਿਹੇ ’ਚ ਹਲਕੇ ਸੂਤੀ ਕੱਪੜੇ ਪਾਉਣ, ਖੂਬ ਪਾਣੀ ਪੀਣ ਤੇ ਦਿਨ ਦੇ ਸਮੇਂ ਧੁੱਪ ਵਿੱਚ ਨਿਕਲਣ ਤੋਂ ਬਚਣ ਦੀ ਸਲਾਹ ਦਿੱਤੀ ਗਈ ਹੈ। ਬਜ਼ੁਰਗਾਂ ਤੇ ਬੱਚਿਆਂ ਨੇ ਹੁੰਮਸ ਕਾਰਨ ਸਾਹ ਲੈਣ ’ਚ ਤਕਲੀਫ਼ ਅਤੇ ਥਕਾਵਟ ਦੀ ਸ਼ਿਕਾਇਤ ਕੀਤੀ। ਸਿਹਤ ਮਾਹਿਰਾਂ ਨੇ ਵੀ ਇਸ ਮੌਸਮ ’ਚ ਚੌਕਸੀ ਵਰਤਣ ਦੀ ਅਪੀਲ ਕੀਤੀ ਹੈ। ਹਸਪਤਾਲਾਂ ’ਚ ਪਿਛਲੇ 2 ਦਿਨਾਂ ਤੋਂ ਡੀਹਾਈਡ੍ਰੇਸ਼ਨ ਤੇ ਗਰਮੀ ਦੀ ਥਕਾਵਟ ਕਾਰਨ ਪੀੜਤ ਮਰੀਜ਼ਾਂ ਦੀ ਗਿਣਤੀ ’ਚ ਥੋੜ੍ਹਾ ਵਾਧਾ ਦੇਖਿਆ ਗਿਆ ਹੈ, ਹਾਲਾਂਕਿ ਇਹ ਗੰਭੀਰ ਨਹੀਂ ਹੈ। ਡਾਕਟਰਾਂ ਨੇ ਸਲਾਹ ਦਿੱਤੀ ਹੈ ਕਿ ਨਮੀ ਕਾਰਨ ਸਰੀਰ ਤੋਂ ਵਾਧੂ ਗਰਮੀ ਬਾਹਰ ਨਹੀਂ ਜਾ ਪਾਉਂਦੀ। ਇਸ ਲਈ ਪਾਣੀ ਦਾ ਸੇਵਨ ਵਧਾ ਦੇਣਾ ਚਾਹੀਦਾ ਹੈ। ਨਾਰੀਅਲ ਪਾਣੀ, ਛਾਂ ਤੇ ਨਿੰਬੂ ਪਾਣੀ ਵਰਗੇ ਕੁਦਰਤੀ ਪੀਣ ਵਾਲੇ ਪਦਾਰਥ ਲਾਭਕਾਰੀ ਹਨ। ਬੱਚਿਆਂ ਨੂੰ ਧੁੱਪ ’ਚ ਖੇਡਣ ਤੋਂ ਰੋਕੋ ਤੇ ਘਰ ਵਿੱਚ ਪੱਖੇ ਤੇ ਕੂਲਰ ਦਾ ਸਹੀ ਇਸਤੇਮਾਲ ਕਰੋ। ਮੌਸਮ ਵਿਭਾਗ ਮੁਤਾਬਕ ਅਗਲੇ ਦੋ-ਤਿੰਨ ਦਿਨਾਂ ’ਚ ਬੱਦਲਾਂ ਦਾ ਸਿਸਟਮ ਸਰਗਰਮ ਰਹੇਗਾ ਪਰ ਕਿਸੇ ਤੇਜ਼ ਮੀਂਹ ਦੀ ਸੰਭਾਵਨਾ ਫਿਲਹਾਲ ਨਹੀਂ ਹੈ।