ਧਰਤੀ ਨਾਥ ਗਊਸ਼ਾਲਾ ਵਿੱਚ ਸ਼ੈੱਡ ਉੱਤੇ ਬਿਜਲੀ ਦੀ ਤਾਰ ਡਿੱਗਣ ਨਾਲ ਨੌਂ ਗਾਵਾਂ ਦੀ ਮੌਤ

ਪਲਵਿੰਦਰ ਸਿੰਘ, ਪੰਜਾਬੀ ਜਾਗਰਣ

ਗੁਰਦਾਸਪੁਰ: ਸਥਾਨਕ ਧਰਤੀ ਨਾਥ ਗਊਸ਼ਾਲਾ ਵਿੱਚ ਐਤਵਾਰ ਰਾਤ ਲਗਭਗ ਸਾਢੇ 12 ਵਜੇ ਅਚਾਨਕ ਤੇਜ਼ ਹਵਾ ਨਾਲ ਬਿਜਲੀ ਦੀ ਤਾਰ ਟੁੱਟ ਕੇ ਪਸ਼ੂਆਂ ਦੇ ਸ਼ੈੱਡ ਉੱਤੇ ਡਿੱਗ ਗਈ। ਤਾਰ ਸ਼ੈੱਡ ਨਾਲ ਜੁੜ ਗਈ ਜਿਸ ਕਾਰਨ ਸ਼ਾਰਟ ਸਰਕਟ ਹੋ ਗਿਆ ਅਤੇ ਕਰੰਟ ਕਾਰਨ ਸ਼ੈੱਡ ਵਿੱਚ ਬੰਨ੍ਹੀਆਂ ਨੌਂ ਗਾਵਾਂ ਦੀ ਮੌਤ ਹੋ ਗਈ। ਉਸ ਸਮੇਂ ਗਊਸ਼ਾਲਾ ਵਿੱਚ ਲਗਭਗ 250 ਗਾਵਾਂ ਮੌਜੂਦ ਸਨ। ਹਾਦਸੇ ਵੇਲੇ ਗਊਸ਼ਾਲਾ ਦਾ ਸੇਵਕ ਮੌਕੇ ਉੱਤੇ ਮੌਜੂਦ ਸੀ। ਉਸ ਨੇ ਤੁਰੰਤ ਸਮਝਦਾਰੀ ਦਿਖਾਉਂਦਿਆਂ ਪ੍ਰਬੰਧਕਾਂ ਅਤੇ ਸੰਬੰਧਿਤ ਟੀਮ ਨੂੰ ਫੋਨ ਕਰਕੇ ਸੂਚਨਾ ਦਿੱਤੀ। ਸੂਚਨਾ ਮਿਲਦੇ ਹੀ ਟੀਮ ਰਾਤ ਨੂੰ ਮੌਕੇ ਉੱਤੇ ਪਹੁੰਚੀ ਅਤੇ ਬਿਜਲੀ ਸਪਲਾਈ ਬੰਦ ਕਰਵਾ ਕੇ ਤਾਰ ਹਟਾ ਕੇ ਰਾਹਤ ਕਾਰਜ ਸ਼ੁਰੂ ਕੀਤੇ। ਪੂਰੀ ਰਾਤ ਟੀਮ ਮੌਕੇ ਉੱਤੇ ਡਟੀ ਰਹੀ ਅਤੇ ਸਵੇਰ ਤੱਕ ਸਥਿਤੀ ਸੰਭਾਲ ਲਈ ਗਈ।

ਸੇਵਕ ਦੀ ਸਰਗਰਮੀ ਨਾਲ ਲਗਭਗ 250 ਗਾਵਾਂ ਬਚ ਗਈਆਂ। ਦੱਸਿਆ ਜਾ ਰਿਹਾ ਹੈ ਕਿ ਮਰਨ ਵਾਲੇ ਪਸ਼ੂਆਂ ਵਿੱਚ ਚਾਰ ਵੱਛੇ ਅਤੇ ਪੰਜ ਗਾਵਾਂ ਸ਼ਾਮਲ ਹਨ, ਜਦੋਂ ਕਿ ਬਾਕੀ ਸਾਰੇ ਪਸ਼ੂ ਸੁਰੱਖਿਅਤ ਹਨ। ਗਊਸ਼ਾਲਾ ਪ੍ਰਬੰਧਨ ਨੇ ਇਸ ਨੂੰ ਵੱਡਾ ਨੁਕਸਾਨ ਦੱਸਿਆ। ਉਨ੍ਹਾਂ ਕਿਹਾ ਕਿ ਜੇ ਸਮੇਂ ਸਿਰ ਸੂਚਨਾ ਨ ਮਿਲਦੀ ਜਾਂ ਸੇਵਕ ਸਰਗਰਮ ਨ ਹੁੰਦਾ ਤਾਂ ਵੱਡਾ ਹਾਦਸਾ ਹੋ ਸਕਦਾ ਸੀ। ਵਰਖਾ ਕਾਰਨ ਜ਼ਮੀਨ ਗਿੱਲੀ ਸੀ ਜਿਸ ਕਾਰਨ ਕਰੰਟ ਵੱਧ ਫੈਲ ਗਿਆ। ਪਸ਼ੂਆਂ ਦੇ ਚਾਰੇ ਪੈਰ ਜ਼ਮੀਨ ਉੱਤੇ ਹੋਣ ਕਾਰਨ ਖ਼ਤਰਾ ਹੋਰ ਵੱਧ ਗਿਆ ਸੀ। ਫਿਲਹਾਲ ਗਊਸ਼ਾਲਾ ਵਿੱਚ ਬਚੇ ਪਸ਼ੂਆਂ ਦੀ ਦੇਖਭਾਲ ਕੀਤੀ ਜਾ ਰਹੀ ਹੈ।