ਮੁਗਲ ਸਮਰਾਟ ਅਕਬਰ ਦੇ ਤਖ਼ਤ ਦਾ ਸੁਰਖ ਰੰਗ ਪਿਆ ਕਾਲ਼ਾ, ਕਰੋੜਾਂ ਰੁਪਏ ਦੀ ਲਾਗਤ ਨਾਲ ਤਿਆਰ ਕੀਤੇ ਪਾਰਕ ਸੱਪਾਂ ਦਾ ਬਣੇ ਰਹਿਣ ਬਸੇਰਾ

ਮਹਿੰਦਰ ਸਿੰਘ ਅਰਲੀਭੰਨ, ਪੰਜਾਬੀ ਜਾਗਰਣ, ਕਲਾਨੌਰ। ਸਿਆਣਿਆਂ ਦੀ ਕਹਾਵਤ ਹੈ ‘ਜਿੰਨੇ ਵੇਖਿਆ ਨੀ ਲਾਹੌਰ ਉਹ ਵੇਖੇ ਕਲਾਨੌਰ’, ਕਿਉਂਕਿ ਇਤਿਹਾਸਿਕ ਕਸਬਾ ਕਲਾਨੌਰ ਇੱਕ ਅਜਿਹਾ ਇਤਿਹਾਸਕ ਕਸਬਾ ਹੈ ਜਿੱਥੇ ਮੁਗਲ ਸਮਰਾਟ ਜਲਾਲੂਦੀਨ ਮੁਹੰਮਦ ਅਕਬਰ ਦੀ ਤਾਜਪੋਸ਼ੀ ਹੋਈ ਸੀ ਅਤੇ ਅੱਜ ਵੀ ਇਸ ਇਤਿਹਾਸਕ ਕਸਬੇ ਵਿੱਚ ਮੁਗਲ ਸਮਰਾਟ ਅਕਬਰ ਦਾ ਤਾਜਪੋਸ਼ੀ ਤਖ਼ਤ ਮੌਜੂਦ ਹੈ।

ਪਰੰਤੂ ਅਫ਼ਸੋਸ ਕਿ ਇਸ ਤਖ਼ਤ ਦੀ ਸਾਂਭ-ਸੰਭਾਲ ਪੁਰਾਤੱਤਵ ਵਿਭਾਗ ਕੋਲ ਹੋਣ ਕਾਰਨ ਵਿਭਾਗ ਦੀ ਅਣਦੇਖੀ ਕਾਰਨ ਇਸ ਵੇਲੇ ਇਸ ਅਕਬਰੀ ਤਖ਼ਤ ਦਾ ਸੁਰਖ ਲਾਲ ਰੰਗ ਕਾਲ਼ਾ ਪੈ ਚੁੱਕਾ ਹੈ। ਉਥੇ ਪਿਛਲੇ ਸਮੇਂ ਕਰੋੜਾਂ ਰੁਪਏ ਦੀ ਲਾਗਤ ਨਾਲ ਤਖ਼ਤ ਦੇ ਨਾਲ ਬਣਾਏ ਗਏ ਪਾਰਕ ਦੀ ਸਾਂਭ ਸੰਭਾਲ ਨਾ ਹੋਣ ਕਾਰਨ ਇਹ ਪਾਰਕ ਇਸ ਵੇਲੇ ਸੱਪਾਂ ਦਾ ਰਹਿਣ ਬਸੇਰਾ ਬਣਿਆ ਹੋਇਆ ਹੈ। ਇਥੋਂ ਤੱਕ ਕਿ ਇਸ ਪਾਰਕ ਵਿੱਚ ਬਣਾਏ ਗਏ ਦੋ ਛੋਟੇ-ਛੋਟੇ ਕਮਰਿਆਂ ਦੀਆਂ ਛੱਤਾਂ ਉੱਡ ਚੁੱਕੀਆਂ ਹਨ।