Gurdaspur News : ਰਾਵੀ ਦਰਿਆ ਪਾਰ ਜਾਣ ਵਾਲਿਆਂ ਨੂੰ ਛੱਡ ਕੇ ਚਲੇ ਗਏ ਕਿਸ਼ਤੀ ਚਲਾਉਣ ਵਾਲੇ, 5 ਘੰਟੇ ਫਸੇ ਰਹੇ ਲੋਕ

ਆਕਾਸ਼, ਪੰਜਾਬੀ ਜਾਗਰਣ, ਗੁਰਦਾਸਪੁਰ : ਮਕੌੜਾ ਪੱਤਣ ਦੇ ਨੇੜੇ ਰਾਵੀ ਦਰਿਆ ਪਾਰ ਵਸੇ ਸੱਤ ਪਿੰਡਾਂ ਦਾ ਜ਼ਿਲ੍ਹਾ ਗੁਰਦਾਸਪੁਰ ਦੇ ਮੁੱਖ ਦਫ਼ਤਰ ਨਾਲ ਸੰਪਰਕ ਪੂਰੀ ਤਰ੍ਹਾਂ ਟੁੱਟ ਗਿਆ ਹੈ। ਬਰਸਾਤ ਦੇ ਮੌਸਮ ਵਿੱਚ ਰਾਵੀ ਦਰਿਆ ਵਿੱਚ ਆਏ ਉਫਾਨ ਕਾਰਨ ਪ੍ਰਸ਼ਾਸਨ ਨੇ ਅਸਥਾਈ ਪੁਲ ਨੂੰ ਹਟਾ ਦਿੱਤਾ ਹੈ ਅਤੇ ਲੋਕਾਂ ਦੀ ਆਵਾਜਾਈ ਲਈ ਇੱਕ ਕਿਸ਼ਤੀ ਹੀ ਸਹਾਰਾ ਹੈ ਪਰ ਬੁੱਧਵਾਰ ਸ਼ਾਮ ਪੰਜ ਵਜੇ ਕਿਸ਼ਤੀ ਚਾਲਕ ਲੋਕਾਂ ਨੂੰ ਦਰਿਆ ਪਾਰ ਕਰਾਉਣ ਦੀ ਬਜਾਏ ਕੰਢੇ 'ਤੇ ਛੱਡ ਕੇ ਚਲੇ ਗਏ। ਇਸ ਦੌਰਾਨ ਕਰੀਬ ਦਰਜਨ ਭਰ ਲੋਕ ਦਰਿਆ ਪਾਰ ਜਾਣ ਦਾ ਇੰਤਜ਼ਾਰ ਕਰਦੇ ਰਹੇ। ਇਸ ਦੌਰਾਨ ਲੋਕਾਂ ਦੇ ਫ਼ੋਨ ਕਰਨ 'ਤੇ ਸਮਾਜ ਸੇਵੀ ਸੰਸਥਾ ਦੇ ਆਗੂਆਂ ਨੇ ਰਾਤ ਕਰੀਬ 10 ਵਜੇ ਮੌਕੇ 'ਤੇ ਪਹੁੰਚ ਕੇ ਲੋਕਾਂ ਨੂੰ ਦਰਿਆ ਪਾਰ ਕਰਵਾਇਆ।

ਜਾਣਕਾਰੀ ਅਨੁਸਾਰ ਮਕੌੜਾ ਪੱਤਣ ਦੇ ਰਸਤੇ ਰਾਵੀ ਦਰਿਆ ਦੇ ਉਸ ਪਾਰ ਸਥਿਤ ਸੱਤ ਪਿੰਡਾਂ ਦੇ ਲੋਕ ਆਪਣੇ ਰੋਜ਼ਾਨਾ ਦੇ ਕੰਮਾਂ, ਖਰੀਦਦਾਰੀ ਅਤੇ ਐਮਰਜੈਂਸੀ ਸਥਿਤੀਆਂ ਲਈ ਇਸੇ ਕਿਸ਼ਤੀ ਸੇਵਾ 'ਤੇ ਨਿਰਭਰ ਹਨ। ਪਿਛਲੇ ਦਿਨ ਸ਼ਾਮ ਕਰੀਬ ਚਾਰ ਵਜੇ ਕਿਸ਼ਤੀ ਚਾਲਕ ਉਨ੍ਹਾਂ ਨੂੰ ਦਰਿਆ ਪਾਰ ਕਰਾਉਣ ਦੀ ਬਜਾਏ ਕੰਢੇ 'ਤੇ ਛੱਡ ਕੇ ਚਲੇ ਗਏ। ਇਸ ਨਾਲ ਲੋਕ ਦਰਿਆ ਪਾਰ ਜਾਣ ਲਈ ਕਈ ਘੰਟੇ ਇੰਤਜ਼ਾਰ ਕਰਦੇ ਰਹੇ। ਜਿਵੇਂ ਹੀ ਸੂਰਜ ਢਲਿਆ ਅਤੇ ਹਨੇਰਾ ਵਧਿਆ, ਯਾਤਰੀਆਂ ਦੀ ਮੁਸ਼ਕਲ ਦੁੱਗਣੀ ਹੋ ਗਈ। ਔਰਤਾਂ ਅਤੇ ਬੱਚੇ ਦਰਿਆ ਦੇ ਕੰਢੇ ਬੈਠੇ ਰਹੇ ਪਰ ਕੋਈ ਨਹੀਂ ਪਹੁੰਚਿਆ।

ਦੇਰ ਰਾਤ ਕਰੀਬ ਦਸ ਵਜੇ ਜਦੋਂ ਯਾਤਰੀ ਪੂਰੀ ਤਰ੍ਹਾਂ ਨਿਰਾਸ਼ ਹੋ ਚੁੱਕੇ ਸਨ ਉਦੋਂ ਸਰਬੱਤ ਦਾ ਭਲਾ ਸੋਸਾਇਟੀ ਦੇ ਮੈਂਬਰ ਮੌਕੇ 'ਤੇ ਪਹੁੰਚੇ। ਉਨ੍ਹਾਂ ਨੇ ਕਿਸ਼ਤੀ ਰਾਹੀਂ ਲੋਕਾਂ ਨੂੰ ਸੁਰੱਖਿਅਤ ਦਰਿਆ ਦੇ ਪਾਰ ਪਹੁੰਚਾਇਆ।

ਇਸ ਪੂਰੇ ਮਾਮਲੇ 'ਤੇ ਐਕਸੀਐਨ ਬੀ ਐਂਡ ਆਰ ਜਸਪ੍ਰੀਤ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਕੋਲ ਕਿਸ਼ਤੀ ਚਲਾਉਣ ਲਈ ਕੁੱਲ ਤਿੰਨ ਕਰਮਚਾਰੀ ਹਨ ਜਿਨ੍ਹਾਂ ਵਿੱਚੋਂ ਇੱਕ ਸਰਕਾਰੀ ਮੁਲਾਜ਼ਮ ਹੈ, ਜਦੋਂ ਕਿ ਦੋ ਨਿੱਜੀ ਤੌਰ 'ਤੇ ਕੰਮ ਕਰਦੇ ਹਨ। ਉਨ੍ਹਾਂ ਦੱਸਿਆ ਕਿ ਸਰਕਾਰੀ ਕਰਮਚਾਰੀ ਬਿਮਾਰ ਹੋਣ ਕਾਰਨ ਗੈਰਹਾਜ਼ਰ ਸੀ ਜਦੋਂ ਕਿ ਨਿੱਜੀ ਕਰਮਚਾਰੀ ਵੀ ਬਿਨਾਂ ਕਿਸੇ ਅਗਾਊਂ ਸੂਚਨਾ ਦੇ ਡਿਊਟੀ ਛੱਡ ਕੇ ਚਲੇ ਗਏ। ਇਸੇ ਕਾਰਨ ਇਹ ਪਰੇਸ਼ਾਨੀ ਪੈਦਾ ਹੋਈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਦੋਵਾਂ ਨਿੱਜੀ ਕਰਮਚਾਰੀਆਂ ਨੂੰ ਸਖ਼ਤ ਚਿਤਾਵਨੀ ਦੇ ਦਿੱਤੀ ਗਈ ਹੈ ਅਤੇ ਜੇਕਰ ਭਵਿੱਖ ਵਿੱਚ ਅਜਿਹੀ ਲਾਪਰਵਾਹੀ ਦੁਹਰਾਈ ਗਈ ਤਾਂ ਉਨ੍ਹਾਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।