37ਵੀਂ ਪੰਜਾਬ ਸਟੇਟ ਸਬ-ਜੂਨੀਅਰ ਤੈਰਾਕੀ ਚੈਂਪੀਅਨਸ਼ਿਪ ਸਮਾਪਤ, ਜਲੰਧਰ ਓਵਰਆਲ ਚੈਂਪੀਅਨ

ਪੰਜਾਬੀ ਜਾਗਰਣ ਰਿਪੋਰਟਰ, ਫਿਰੋਜ਼ਪੁਰ : ਫ਼ਿਰੋਜ਼ਪੁਰ ਵਿਖੇ ਦਿੱਲੀ ਪਬਲਕਿ ਸਕੂਲ ’ਚ ਦੋ ਰੋਜ਼ਾ ਚੱਲੀ 37ਵੀਂ ਸਬ-ਜੂਨੀਅਰ ਪੰਜਾਬ ਸਟੇਟ ਤੈਰਾਕੀ ਚੈਂਪੀਅਨਸ਼ਿਪ (ਲੜਕੇ ਅਤੇ ਲੜਕੀਆਂ) ਸ਼ਾਨੋ-ਸ਼ੌਕਤ ਨਾਲ ਸਮਾਪਤ ਹੋ ਗਈ ਹੈ। ਦੋ ਦਿਨ ਚੱਲੇ ਇਨ੍ਹਾਂ ਰੋਮਾਂਚਕ ਮੁਕਾਬਲਿਆਂ ਵਿਚ ਜਲੰਧਰ ਦੀ ਟੀਮ ਨੇ ਕੁੱਲ 103 ਅੰਕ ਪ੍ਰਾਪਤ ਕਰਕੇ ਓਵਰਆਲ ਚੈਂਪੀਅਨਸ਼ਿਪ ਦੀ ਟਰਾਫ਼ੀ ’ਤੇ ਕਬਜ਼ਾ ਕੀਤਾ। ਵੱਖ-ਵੱਖ ਵਰਗਾਂ ਦੇ ਫਾਈਨਲ ਮੁਕਾਬਲਿਆਂ ਵਿਚ ਪੰਜਾਬ ਭਰ ਦੇ ਨੌਜਵਾਨ ਖਿਡਾਰੀਆਂ ਨੇ ਸਵਿਮਿੰਗ ਪੂਲ ਵਿਚ ਆਪਣੀ ਤੈਰਾਕੀ ਦੇ ਸ਼ਾਨਦਾਰ ਜੌਹਰ ਦਿਖਾ ਕੇ ਹਾਜ਼ਰੀਨ ਨੂੰ ਪ੍ਰਭਾਵਿਤ ਕੀਤਾ। ਇਸ ਵੱਕਾਰੀ ਰਾਜ ਪੱਧਰੀ ਚੈਂਪੀਅਨਸ਼ਿਪ ਦੇ ਆਖਰੀ ਦਿਨ ਵੱਖ-ਵੱਖ ਉਮਰ ਵਰਗਾਂ ਦੇ ਦਿਲਚਸਪ ਮੁਕਾਬਲੇ ਦੇਖਣ ਨੂੰ ਮਿਲੇ, ਜਿਨ੍ਹਾਂ ਦੇ ਅਧਿਕਾਰਤ ਨਤੀਜੇ ਵਿਚ ਲੜਕੀਆਂ (ਗਰੁੱਪ-2) ’ਚ ਜਲੰਧਰ ਦੀ ਟੀਮ 49 ਅੰਕਾਂ ਨਾਲ ਜੇਤੂ ਰਹੀ, ਜਦਕਿ ਮੋਹਾਲੀ ਦੀ ਟੀਮ 31 ਅੰਕਾਂ ਨਾਲ ਉਪ-ਜੇਤੂ ਰਹੀ। ਲੜਕੀਆਂ (ਗਰੁੱਪ-3) ’ਚ ਲੁਧਿਆਣਾ ਨੇ 43 ਅੰਕਾਂ ਨਾਲ ਪਹਿਲਾ ਸਥਾਨ ਹਾਸਲ ਕੀਤਾ ਅਤੇ ਫ਼ਰੀਦਕੋਟ 23 ਅੰਕਾਂ ਨਾਲ ਦੂਜੇ ਸਥਾਨ ’ਤੇ ਰਿਹਾ। ਲੜਕੇ (ਗਰੁੱਪ-2) ’ਚ ਮੋਹਾਲੀ ਦੀ ਟੀਮ ਨੇ 57 ਅੰਕ ਲੈ ਕੇ ਜਿੱਤ ਦਰਜ ਕੀਤੀ, ਜਦਕਿ ਜਲੰਧਰ 54 ਅੰਕਾਂ ਨਾਲ ਉਪ-ਜੇਤੂ ਰਿਹਾ। ਲੜਕੇ (ਗਰੁੱਪ-3) ’ਚ ਮੇਜ਼ਬਾਨ ਫ਼ਿਰੋਜ਼ਪੁਰ ਦੀ ਟੀਮ ਨੇ 48 ਅੰਕਾਂ ਨਾਲ ਬਾਜ਼ੀ ਮਾਰੀ ਅਤੇ ਲੁਧਿਆਣਾ ਦੀ ਟੀਮ 37 ਅੰਕਾਂ ਨਾਲ ਦੂਜੇ ਸਥਾਨ ’ਤੇ ਰਹੀ। ਇਸੇ ਤਰ੍ਹਾਂ 4 ਗੁਣਾਂ 50 ਮੀਟਰ ਫਰੀ ਰਿਲੇਅ (ਲੜਕੇ-3) ’ਚ ਫ਼ਿਰੋਜ਼ਪੁਰ ਦੀ ਟੀਮ ਦਿਲਸ਼ਾਨਪ੍ਰੀਤ, ਮਨਸੀਮਰ, ਮਨਵੀਰ, ਅਨਹਦ ਨੇ 02.10.55 ਦੇ ਸਮੇਂ ਨਾਲ ਪਹਿਲਾ, ਲੁਧਿਆਣਾ ਨੇ ਦੂਜਾ ਅਤੇ ਫ਼ਰੀਦਕੋਟ ਨੇ ਤੀਜਾ ਸਥਾਨ ਪ੍ਰਾਪਤ ਕੀਤਾ। 4 ਗੁਣਾਂ 50 ਮੀਟਰ ਫਰੀ ਰਿਲੇਅ (ਲੜਕੀਆਂ-3) ’ਚ ਲੁਧਿਆਣਾ ਦੀ ਟੀਮ ਨਵਿਆ, ਮਿਸ਼ਿਕਾ, ਜੀਨਤ, ਪਰਸੀਮ ਨੇ ਪਹਿਲਾ 02.26.79, ਫ਼ਰੀਦਕੋਟ ਨੇ ਦੂਜਾ ਅਤੇ ਜਲੰਧਰ ਨੇ ਤੀਜਾ ਸਥਾਨ ਹਾਸਲ ਕੀਤਾ। 200 ਮੀਟਰ ਆਈ.ਐੱਮ. (ਲੜਕੇ-2) ’ਚ ਮੋਹਾਲੀ ਦੇ ਅਗਮਜੋਤ ਸਿੰਘ ਨੇ ਪਹਿਲਾ 02.32.45 ਅਤੇ ਜਲੰਧਰ ਦੇ ਦਿਵਜੋਤ ਸਿੰਘ ਨੇ ਦੂਜਾ ਸਥਾਨ ਲਿਆ। ਲੜਕੀਆਂ ਦੇ ਇਸੇ ਮੁਕਾਬਲੇ ਵਿਚ ਮੋਹਾਲੀ ਦੀ ਸੋਨਾਕਸ਼ੀ ਸਹਿਗਲ ਪਹਿਲੇ ਸਥਾਨ ’ਤੇ ਰਹੀ। 100 ਮੀਟਰ ਫਰੀ ਸਟਾਈਲ (ਲੜਕੇ-2) ’ਚ ਜਲੰਧਰ ਦੇ ਦਿਵਜੋਤ ਸਿੰਘ ਨੇ 01.03.06 ਦੇ ਸਮੇਂ ਨਾਲ ਸੋਨੇ ਦਾ ਮੈਡਲ ਜਿੱਤਿਆ। ਲੜਕੀਆਂ ਦੇ ਵਰਗ ਵਿਚ ਫ਼ਰੀਦਕੋਟ ਦੀ ਕਾਤਨਾ ਚਾਹਲ 01.09.77 ਪਹਿਲੇ ਸਥਾਨ ’ਤੇ ਰਹੀ। 50 ਮੀਟਰ ਬ੍ਰੈਸਟ ਸਟਰੋਕ (ਲੜਕੇ-2) ’ਚ ਸੰਗਰੂਰ ਦੇ ਅਰਨਵਜੀਤ ਸਿੰਘ ਨੇ 34.85 ਸਕਿੰਟਾਂ ਨਾਲ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਲੜਕੀਆਂ ਵਿਚ ਜਲੰਧਰ ਦੀ ਅਮਰੀਤ ਦਹੀਆ ਜੇਤੂ ਰਹੀ। 50 ਮੀਟਰ ਬਟਰਫਲਾਈ (ਲੜਕੇ-2) ’ਚ ਮੋਹਾਲੀ ਦੇ ਅਗਮਜੋਤ ਸਿੰਘ ਨੇ 30.13 ਸਕਿੰਟਾਂ ਨਾਲ ਪਹਿਲਾ ਸਥਾਨ ਹਾਸਲ ਕੀਤਾ। ਲੜਕੀਆਂ ਵਿਚ ਫ਼ਰੀਦਕੋਟ ਦੀ ਕਾਤਨਾ ਚਾਹਲ ਨੇ ਬਾਜ਼ੀ ਮਾਰੀ।