ਪਰਗਟ ਸਿੰਘ ਦੀ ਤਾਜਪੋਸ਼ੀ ਨਾਲ ਫ਼ਰੀਦਕੋਟ ਕਾਂਗਰਸ ’ਚ ਬਦਲਣਗੇ ਸਿਆਸੀ ਸਮੀਕਰਨ?

ਰਾਜਾ ਵੜਿੰਗ ਦੇ ਨਾਲ ਖੜ੍ਹੇ ਆਗੂਆਂ ਤੇ ਵੜਿੰਗ ਤੋਂ ਦੂਰੀ ਬਣਾਈ ਰੱਖਣ ਵਾਲੇ ਧੜੇ ’ਤੇ ਟਿਕੀਆਂ ਨਜ਼ਰਾਂ ਕੁਸ਼ਲਦੀਪ ਢਿੱਲੋਂ ਦੀ ‘ਚੈੱਕਮੇਟ’ ਪੋਸਟ ਨੇ ਵਧਾਈ ਸਿਆਸੀ ਚਰਚਾ ਜਗਮੀਤ ਸਿੰਘ, ਪੰਜਾਬੀ ਜਾਗਰਣ, ਫ਼ਰੀਦਕੋਟ : ਪੰਜਾਬ ਕਾਂਗਰਸ ਦੀ ਕਮਾਨ ਪਰਗਟ ਸਿੰਘ ਨੂੰ ਸੌਂਪੇ ਜਾਣ ਤੋਂ ਬਾਅਦ ਫ਼ਰੀਦਕੋਟ ਜ਼ਿਲ੍ਹੇ ਦੀ ਕਾਂਗਰਸੀ ਸਿਆਸਤ ’ਚ ਵੀ ਨਵੇਂ ਸਮੀਕਰਨ ਬਣਨ ਦੀਆਂ ਚਰਚਾਵਾਂ ਤੇਜ਼ ਹੋ ਗਈਆਂ ਹਨ। ਪਿਛਲੇ ਸਮੇਂ ਦੌਰਾਨ ਜ਼ਿਲ੍ਹਾ ਕਾਂਗਰਸ ’ਚ ਸਾਹਮਣੇ ਆਏ ਧੜਿਆਂ ਤੇ ਆਗੂਆਂ ਦੀਆਂ ਆਪਸੀ ਨੇੜਤੀਆਂ ਨੂੰ ਦੇਖਦਿਆਂ ਹੁਣ ਸਭ ਦੀ ਨਜ਼ਰ ਇਸ ਗੱਲ ’ਤੇ ਹੈ ਕਿ ਨਵੇਂ ਪ੍ਰਧਾਨ ਦੀ ਅਗਵਾਈ ਹੇਠ ਕਿਹੜੇ ਆਗੂਆਂ ਦੀ ਭੂਮਿਕਾ ਵਧਦੀ ਹੈ ਤੇ ਕਿਹੜੇ ਆਗੂ ਨਵੇਂ ਸਿਆਸੀ ਸਮੀਕਰਨਾਂ ’ਚ ਆਪਣੀ ਥਾਂ ਬਣਾਉਂਦੇ ਹਨ। ਪਰਗਟ ਸਿੰਘ ਨੂੰ 3 ਅਕਤੂਬਰ 2026 ਨੂੰ ਪੰਜਾਬ ਕਾਂਗਰਸ ਦਾ ਨਵਾਂ ਪ੍ਰਧਾਨ ਨਿਯੁਕਤ ਕੀਤੇ ਜਾਣ ਦੀ ਪੁਸ਼ਟੀ ਹੋਈ ਹੈ। ਦਰਅਸਲ, ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦੀ ਪ੍ਰਧਾਨਗੀ ਦੌਰਾਨ ਫ਼ਰੀਦਕੋਟ ਕਾਂਗਰਸ ’ਚ ਆਗੂਆਂ ਦੇ ਦੋ ਧੜਿਆਂ ਵਿਚਾਲੇ ਦੂਰੀਆਂ ਦੀ ਚਰਚਾ ਰਹੀ। ਰਾਜਾ ਵੜਿੰਗ ਦੇ ਹੱਕ ’ਚ ਖੜ੍ਹੇ ਆਗੂਆਂ ’ਚ ਜ਼ਿਲ੍ਹਾ ਕਾਂਗਰਸ ਪ੍ਰਧਾਨ ਨਵਦੀਪ ਸਿੰਘ ਬੱਬੂ ਬਰਾੜ, ਸਾਬਕਾ ਵਿਧਾਇਕ ਪ੍ਰਕਾਸ਼ ਸਿੰਘ ਭੱਟੀ ਤੇ ਸਾਬਕਾ ਵਿਧਾਇਕ ਮਾਸਟਰ ਬਲਦੇਵ ਸਿੰਘ ਸਮੇਤ ਕਈ ਆਗੂ ਸ਼ਾਮਲ ਰਹੇ। ਦੂਜੇ ਪਾਸੇ 2022 ਦੀਆਂ ਵਿਧਾਨ ਸਭਾ ਚੋਣਾਂ ’ਚ ਕਾਂਗਰਸ ਦੀ ਟਿਕਟ ’ਤੇ ਕ੍ਰਮਵਾਰ ਫ਼ਰੀਦਕੋਟ, ਕੋਟਕਪੂਰਾ ਤੇ ਜੈਤੋ ਤੋਂ ਚੋਣ ਲੜ ਚੁੱਕੇ ਕੁਸ਼ਲਦੀਪ ਸਿੰਘ ਢਿੱਲੋਂ, ਅਜੇਪਾਲ ਸਿੰਘ ਸੰਧੂ ਤੇ ਦਰਸ਼ਨ ਸਿੰਘ ਢਿੱਲਵਾਂ ਰਾਜਾ ਵੜਿੰਗ ਦੀ ਪ੍ਰਧਾਨਗੀ ਦੌਰਾਨ ਉਨ੍ਹਾਂ ਦੇ ਨਾਲ ਉਸ ਤਰ੍ਹਾਂ ਖੜ੍ਹੇ ਨਜ਼ਰ ਨਹੀਂ ਆਏ। ਇਸੇ ਕਾਰਨ ਜ਼ਿਲ੍ਹੇ ਦੀ ਕਾਂਗਰਸ ’ਚ ਇਹ ਸਵਾਲ ਲਗਾਤਾਰ ਚਰਚਾ ’ਚ ਰਿਹਾ ਕਿ ਆਖ਼ਰ ਪਾਰਟੀ ਦੀ ਸਥਾਨਕ ਸਿਆਸਤ ’ਚ ਕਿਸ ਧੜੇ ਦਾ ਪ੍ਰਭਾਵ ਵਧੇਰੇ ਹੈ। ਰਾਜਾ ਵੜਿੰਗ ਵੱਲੋਂ ਫ਼ਰੀਦਕੋਟ ’ਚ ਕੀਤੀ ਗਈ ਵਰਕਰ ਮਿਲਣੀ ਦੌਰਾਨ ਵੀ ਅੰਦਰੂਨੀ ਖਿੱਚਤਾਣ ਦੇ ਸੰਕੇਤ ਸਾਹਮਣੇ ਆਏ ਸਨ। ਵੜਿੰਗ ਵੱਲੋਂ ਆਪਣੇ ਵਿਰੋਧੀ ਧੜੇ ’ਤੇ ਕੀਤੀਆਂ ਟਿੱਪਣੀਆਂ ਤੋਂ ਬਾਅਦ ਜ਼ਿਲ੍ਹੇ ਦੀ ਕਾਂਗਰਸ ਅੰਦਰਲੇ ਮਤਭੇਦ ਹੋਰ ਚਰਚਾ ’ਚ ਆ ਗਏ ਸਨ। ਹੁਣ ਇਸ ਸਾਰੇ ਘਟਨਾਕ੍ਰਮ ਵਿਚਕਾਰ ਕੁਸ਼ਲਦੀਪ ਸਿੰਘ ਢਿੱਲੋਂ ਦੀ ਸੋਸ਼ਲ ਮੀਡੀਆ ਪੋਸਟ ‘ਚੈੱਕਮੇਟ’ ਨੇ ਸਿਆਸੀ ਚਰਚਾ ਨੂੰ ਹੋਰ ਦਿਲਚਸਪ ਬਣਾ ਦਿੱਤਾ ਹੈ। ਸ਼ਤਰੰਜ ’ਚ ‘ਚੈੱਕਮੇਟ’ ਦਾ ਅਰਥ ਖੇਡ ਦੇ ਅਜਿਹੇ ਪੜਾਅ ਨਾਲ ਹੁੰਦਾ ਹੈ, ਜਿੱਥੇ ਵਿਰੋਧੀ ਪੱਖ ਕੋਲ ਬਚਣ ਦਾ ਕੋਈ ਕਾਨੂੰਨੀ ਰਸਤਾ ਨਹੀਂ ਰਹਿੰਦਾ। ਹਾਲਾਂਕਿ ਢਿੱਲੋਂ ਨੇ ਆਪਣੀ ਪੋਸਟ ’ਚ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਇਹ ਟਿੱਪਣੀ ਕਿਸ ਸੰਦਰਭ ’ਚ ਕੀਤੀ ਗਈ ਹੈ ਪਰ ਫ਼ਰੀਦਕੋਟ ਕਾਂਗਰਸ ’ਚ ਬਦਲਦੇ ਸਿਆਸੀ ਮਾਹੌਲ ਦਰਮਿਆਨ ਇਸ ਪੋਸਟ ਨੂੰ ਲੈ ਕੇ ਤਰ੍ਹਾਂ-ਤਰ੍ਹਾਂ ਦੀ ਚਰਚਾ ਸ਼ੁਰੂ ਹੋ ਗਈ ਹੈ। ਹੁਣ ਅਸਲ ਨਜ਼ਰ ਇਸ ਗੱਲ ’ਤੇ ਰਹੇਗੀ ਕਿ ਪਰਗਟ ਸਿੰਘ ਫ਼ਰੀਦਕੋਟ ’ਚ ਪਾਰਟੀ ਦੇ ਵੱਖ-ਵੱਖ ਧੜਿਆਂ ਨਾਲ ਕਿਹੋ ਜਿਹਾ ਤਾਲਮੇਲ ਬਣਾਉਂਦੇ ਹਨ। ਕੀ ਪਿਛਲੇ ਸਮੇਂ ’ਚ ਵੜਿੰਗ ਦੇ ਨਾਲ ਖੜ੍ਹੇ ਰਹੇ ਆਗੂ ਆਪਣੀ ਪਕੜ ਕਾਇਮ ਰੱਖਣਗੇ ਜਾਂ ਵੜਿੰਗ ਤੋਂ ਦੂਰੀ ਰੱਖਣ ਵਾਲੇ ਆਗੂ ਮੁੜ ਪਾਰਟੀ ਦੀ ਮੁੱਖ ਧਾਰਾ ’ਚ ਸਰਗਰਮ ਨਜ਼ਰ ਆਉਣਗੇ? ਕੁਸ਼ਲਦੀਪ ਢਿੱਲੋਂ ਦੀ ‘ਚੈੱਕਮੇਟ’ ਪੋਸਟ ਨੇ ਇਸ ਸਵਾਲ ਨੂੰ ਹੋਰ ਵੀ ਦਿਲਚਸਪ ਬਣਾ ਦਿੱਤਾ ਹੈ। ਆਉਣ ਵਾਲੇ ਦਿਨਾਂ ’ਚ ਪਾਰਟੀ ਦੀਆਂ ਮੀਟਿੰਗਾਂ, ਜਥੇਬੰਦਕ ਨਿਯੁਕਤੀਆਂ ਤੇ ਸਥਾਨਕ ਆਗੂਆਂ ਦੀ ਸਰਗਰਮੀ ਹੀ ਦੱਸੇਗੀ ਕਿ ਪਰਗਟ ਸਿੰਘ ਦੀ ਨਵੀਂ ਪਾਰੀ ਫ਼ਰੀਦਕੋਟ ਕਾਂਗਰਸ ਦੇ ਪੁਰਾਣੇ ਸਿਆਸੀ ਸਮੀਕਰਨਾਂ ਨੂੰ ਕਿੰਨਾ ਬਦਲਦੀ ਹੈ।