Faridkot News: 108 ਐਂਬੂਲੈਂਸ ਨੇ 91,700 ਤੋਂ ਵੱਧ ਐਮਰਜੈਂਸੀ ਸੇਵਾਵਾਂ ਕੀਤੀਆਂ ਪ੍ਰਦਾਨ, ਐਂਬੂਲੈਂਸਾਂ ’ਚ 52 ਸੁਰੱਖਿਅਤ ਜਣੇਪੇ

ਹਰਪ੍ਰੀਤ ਸਿੰਘ ਚਾਨਾ, ਪੰਜਾਬੀ ਜਾਗਰਣ, ਫਰੀਦਕੋਟ : ਜ਼ੈਨ ਪਲੱਸ ਪ੍ਰਾਈਵੇਟ ਲਿਮਟਿਡ ਦੁਆਰਾ ਚਲਾਈ ਜਾ ਰਹੀ 108 ਐਂਬੂਲੈਂਸ ਸੇਵਾ ਨੇ ਜਨਵਰੀ ਅਤੇ ਜੂਨ 2026 ਦੇ ਵਿਚਕਾਰ ਪੰਜਾਬ ਭਰ ਵਿੱਚ 91,713 ਐਮਰਜੈਂਸੀ ਮਾਮਲਿਆਂ ਵਿੱਚ ਤੁਰੰਤ ਡਾਕਟਰੀ ਸਹਾਇਤਾ ਪ੍ਰਦਾਨ ਕੀਤੀ। 108 ਐਂਬੂਲੈਂਸ ਸੇਵਾ ਦੇ ਪ੍ਰੋਜੈਕਟ ਮੁਖੀ ਮਨੀਸ਼ ਬੱਤਰਾ ਨੇ ਕਿਹਾ ਕਿ ਇਹ ਸੇਵਾ ਰਾਜ ਦੇ ਸ਼ਹਿਰੀ ਅਤੇ ਪੇਂਡੂ ਦੋਵਾਂ ਖੇਤਰਾਂ ਵਿੱਚ ਨਾਗਰਿਕਾਂ ਨੂੰ ਸਮੇਂ ਸਿਰ ਹਸਪਤਾਲ-ਪੂਰਵ ਦੇਖਭਾਲ ਅਤੇ ਐਮਰਜੈਂਸੀ ਸਹਾਇਤਾ ਪ੍ਰਦਾਨ ਕਰ ਰਹੀ ਹੈ।ਸੇਵਾ ਦੇ ਅੰਕੜਿਆਂ ਅਨੁਸਾਰ ਛੇ ਮਹੀਨਿਆਂ ਦੀ ਮਿਆਦ ਦੌਰਾਨ ਡਾਕਟਰੀ ਐਮਰਜੈਂਸੀ ਦੇ 36,403 ਮਾਮਲੇ, ਗਰਭ-ਅਵਸਥਾ ਨਾਲ ਸਬੰਧਤ ਐਮਰਜੈਂਸੀ ਦੇ 20,538 ਮਾਮਲੇ ਅਤੇ ਸੜਕੀ ਹਾਦਸਿਆਂ ਦੇ 13,929 ਮਾਮਲੇ ਦਰਜ ਕੀਤੇ ਗਏ।

ਇਸ ਤੋਂ ਇਲਾਵਾ 108 ਐਂਬੂਲੈਂਸ ਸੇਵਾ ਨੇ ਦਿਲ ਦੀ ਐਮਰਜੈਂਸੀ (ਕਾਰਡੀਅਕ ਐਮਰਜੈਂਸੀ) ਦੇ 11,380 ਮਾਮਲਿਆਂ ਅਤੇ ਹੋਰ ਐਮਰਜੈਂਸੀ ਦੇ 9,463 ਮਾਮਲਿਆਂ ਵਿੱਚ ਸਹਾਇਤਾ ਪ੍ਰਦਾਨ ਕੀਤੀ।ਇਸ ਸਮੇਂ ਦੌਰਾਨ 108 ਐਂਬੂਲੈਂਸ ਸੇਵਾ ਦੇ ਸਿਖਲਾਈ ਪ੍ਰਾਪਤ ਐਮਰਜੈਂਸੀ ਮੈਡੀਕਲ ਟੈਕਨੀਸ਼ੀਅਨਾਂ ਨੇ ਐਂਬੂਲੈਂਸਾਂ ਦੇ ਅੰਦਰ 52 ਸੁਰੱਖਿਅਤ ਜਣੇਪੇ ਕਰਵਾਏ, ਜਿਸ ਨਾਲ ਐਮਰਜੈਂਸੀ ਹਾਲਾਤਾਂ ਵਿੱਚ ਉਨ੍ਹਾਂ ਦੀ ਤਿਆਰੀ ਅਤੇ ਸਮਰੱਥਾ ਦਾ ਪ੍ਰਦਰਸ਼ਨ ਹੋਇਆ।

ਅੰਕੜਿਆਂ ਅਨੁਸਾਰ, ਜੂਨ 2026 ਵਿੱਚ ਐਮਰਜੈਂਸੀ ਮਾਮਲਿਆਂ ਲਈ ਸਭ ਤੋਂ ਵੱਧ 16,025 ਸੇਵਾਵਾਂ ਪ੍ਰਦਾਨ ਕੀਤੀਆਂ ਗਈਆਂ। ਇਨ੍ਹਾਂ ਵਿੱਚ 6,688 ਡਾਕਟਰੀ ਐਮਰਜੈਂਸੀ, 3,263 ਗਰਭ-ਅਵਸਥਾ ਨਾਲ ਸਬੰਧਤ ਮਾਮਲੇ, 2,517 ਸੜਕ ਹਾਦਸਿਆਂ ਦੇ ਮਾਮਲੇ, 1,676 ਦਿਲ ਦੀਆਂ ਬਿਮਾਰੀਆਂ ਨਾਲ ਸਬੰਧਤ ਐਮਰਜੈਂਸੀ ਅਤੇ 1,881 ਹੋਰ ਐਮਰਜੈਂਸੀ ਮਾਮਲੇ ਸ਼ਾਮਲ ਸਨ। ਜ਼ਿਲ੍ਹਾ ਪੱਧਰ 'ਤੇ, ਸਭ ਤੋਂ ਵੱਧ ਕੇਸ ਲੁਧਿਆਣਾ ਵਿੱਚ 12,541 ਦਰਜ ਕੀਤੇ ਗਏ। ਇਸ ਤੋਂ ਬਾਅਦ ਪਟਿਆਲਾ (7,862), ਜਲੰਧਰ (7,609), ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੋਹਾਲੀ) (7,457) ਅਤੇ ਅੰਮ੍ਰਿਤਸਰ (6,656) ਦਾ ਸਥਾਨ ਰਿਹਾ। ਹੋਰ ਜ਼ਿਲ੍ਹਿਆਂ ਵਿੱਚ, 108 ਐਂਬੂਲੈਂਸ ਸੇਵਾ ਨੇ ਹੁਸ਼ਿਆਰਪੁਰ (4,812), ਬਠਿੰਡਾ (4,314), ਗੁਰਦਾਸਪੁਰ (4,231), ਸੰਗਰੂਰ (3,459), ਕਪੂਰਥਲਾ (3,268), ਤਰਨਤਾਰਨ (3,155), ਰੂਪਨਗਰ (2,901), ਮੋਗਾ (2,754), ਫਾਜ਼ਿਲਕਾ (2,676), ਫਤਿਹਗੜ੍ਹ ਸਾਹਿਬ (2,663), ਫਿਰੋਜ਼ਪੁਰ (2,610), ਮਾਨਸਾ (2,519), ਸ੍ਰੀ ਮੁਕਤਸਰ ਸਾਹਿਬ (2,517), ਸ਼ਹੀਦ ਭਗਤ ਸਿੰਘ ਨਗਰ (2,284), ਫਰੀਦਕੋਟ (1,917), ਮਲੇਰਕੋਟਲਾ (1,255), ਬਰਨਾਲਾ (1,253), ਇਸ ਤੋਂ ਇਲਾਵਾ, ਪਠਾਨਕੋਟ ਵਿੱਚ 108 ਐਂਬੂਲੈਂਸ ਸੇਵਾ ਨੇ 1,000 ਮਾਮਲਿਆਂ ਵਿੱਚ ਸਹਾਇਤਾ ਪ੍ਰਦਾਨ ਕੀਤੀ।

ਇਸ ਮੌਕੇ ਜ਼ੈਨਪਲੱਸ ਪ੍ਰਾਈਵੇਟ ਲਿਮਟਿਡ ਦੀ 108 ਐਂਬੂਲੈਂਸ ਸੇਵਾ ਦੇ ਪ੍ਰੋਜੈਕਟ ਮੁਖੀ ਮਨੀਸ਼ ਬੱਤਰਾ ਨੇ ਕਿਹਾ, "ਛੇ ਮਹੀਨਿਆਂ ਦੇ ਅੰਦਰ 91,700 ਤੋਂ ਵੱਧ ਐਮਰਜੈਂਸੀ ਮਾਮਲਿਆਂ ਵਿੱਚ ਸੇਵਾਵਾਂ ਪ੍ਰਦਾਨ ਕਰਨਾ ਸਾਡੇ ਐਂਬੂਲੈਂਸ ਪਾਇਲਟਾਂ, ਐਮਰਜੈਂਸੀ ਮੈਡੀਕਲ ਤਕਨੀਸ਼ੀਅਨਾਂ ਅਤੇ ਸਹਾਇਕ ਟੀਮਾਂ ਦੀ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ। ਸਾਡੀ ਪਹਿਲਕਦਮੀ ਰਾਜ ਦੇ ਹਰੇਕ ਨਾਗਰਿਕ ਤੱਕ ਤੇਜ਼ੀ ਨਾਲ ਹੁੰਗਾਰਾ, ਸੁਰੱਖਿਅਤ ਆਵਾਜਾਈ ਅਤੇ ਹਸਪਤਾਲ ਪਹੁੰਚਣ ਤੋਂ ਪਹਿਲਾਂ ਮਿਆਰੀ ਡਾਕਟਰੀ ਸੇਵਾਵਾਂ ਪਹੁੰਚਾਉਣਾ ਹੈ।