'ਪੰਜਾਬੀ ਏਕਤਾ ਅੱਗੇ ਫੇਲ੍ਹ ਹੋਵੇਗੀ ਨਫ਼ਰਤ ਦੀ ਰਾਜਨੀਤੀ', ਭਾਜਪਾ ਦੇ ਸਿਆਸੀ ਪਲਾਨ 'ਤੇ ਪੰਨੂ ਦਾ ਪਲਟਵਾਰ; ਗਰਮਾਇਆ ਸਿਆਸੀ ਮਾਹੌਲ

ਤੂਰ ਬੰਜਾਰਾ ਦੀ ਘਟਨਾ ’ਤੇ ਪੰਨੂ ਨੇ ਕਿਹਾ ਕਿ ਉੱਥੋਂ ਦੇ ਲੋਕਾਂ ਦਾ ਇਹ ਜਵਾਬ ਭਾਜਪਾ ਲਈ ਸਾਫ਼ ਸੰਦੇਸ਼ ਹੈ ਕਿ ਪੰਜਾਬ ’ਚ ਵੰਡਣ ਵਾਲੀ ਸਿਆਸਤ ਲਈ ਕੋਈ ਥਾਂ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੀ ਧਰਤੀ ਉਪਜਾਊ ਹੈ, ਪਰ ਇੱਥੇ ਧਰਮ, ਜਾਤੀ ਤੇ ਨਫ਼ਰਤ ਦੀਆਂ ਫ਼ਸਲਾਂ ਨਹੀਂ ਉੱਗਦੀਆਂ। ਤੂਰ ਬੰਜਾਰਾ ਤੋਂ ਪਹਿਲਾਂ ਲੋਕਾਂ ਨੇ ਕਾਂਗਰਸ ਨੂੰ ਵੀ ਇਹੀ ਸੰਦੇਸ਼ ਦਿੱਤਾ ਸੀ ਤੇ ਅੱਜ ਉਨ੍ਹਾਂ ਨੇ ਭਾਜਪਾ ਨੂੰ ਵੀ ਭਜਾ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਲੋਕਾਂ ਨੇ ਹਮੇਸ਼ਾ ਸਿਆਸੀ ਫ਼ਾਇਦੇ ਲਈ ਸਮਾਜ ਨੂੰ ਵੰਡਣ ਦੀਆਂ ਕੋਸ਼ਿਸ਼ਾਂ ਨੂੰ ਨਕਾਰਿਆ ਹੈ। ਜਦੋਂ ਹਰਿਆਣਾ ’ਚ ਚੋਣਾਂ ਹੋਈਆਂ ਸਨ, ਤਾਂ ਭਾਜਪਾ ਨੇ ਜਾਟ-ਗ਼ੈਰ ਜਾਟ ਦਾ ਖੇਡ ਖੇਡਿਆ ਸੀ। ਹੁਣ ਉਹ ਪੰਜਾਬ ’ਚ ਵੀ ਉਹੀ ਖੇਡ ਖੇਡਣਾ ਚਾਹੁੰਦੇ ਹਨ। ਪਰ ਅਜਿਹਾ ਖੇਡ ਪੰਜਾਬ ’ਚ ਕਦੇ ਨਹੀਂ ਖੇਡਿਆ ਗਿਆ ਤੇ ਨਾ ਹੀ ਭਵਿੱਖ ’ਚ ਕਦੇ ਖੇਡਿਆ ਜਾਏਗਾ।