ਸੂਬੇ ਦੇ ਨੌਜਵਾਨਾਂ ਨੂੰ ਦਾਅਵਿਆਂ ਦੀ ਨਹੀਂ, ਰੁਜ਼ਗਾਰ ਦੀ ਲੋੜ; ਸਚਿਨ ਪਾਇਲਟ ਨੇ ਪੰਜਾਬ ਸਰਕਾਰ 'ਤੇ ਸਾਧਿਆ ਨਿਸ਼ਾਨਾ

ਰਿਪੋਰਟ ਮੁਤਾਬਕ ਪੰਜਾਬ ’ਚ ਬੇਰੁਜ਼ਗਾਰੀ ਦਰ 5.3 ਫ਼ੀਸਦੀ ਰਹੀ, ਜਦਕਿ ਹਰਿਆਣਾ ਤੇ ਹਿਮਾਚਲ ਪ੍ਰਦੇਸ਼ ’ਚ ਇਹ 4.5-4.5 ਫ਼ੀਸਦੀ ਸੀ। ਉੱਥੇ ਹੀ 15 ਤੋਂ 29 ਸਾਲ ਦੀ ਉਮਰ ਵਰਗ ’ਚ ਰੁਜ਼ਗਾਰ, ਸਿੱਖਿਆ ਜਾਂ ਟ੍ਰੇਨਿੰਗ ਤੋਂ ਬਾਹਰ ਰਹਿਣ ਵਾਲੇ ਨੌਜਵਾਨਾਂ ਦੀ ਹਿੱਸੇਦਾਰੀ ਪੰਜਾਬ ’ਚ 27.7 ਫ਼ੀਸਦੀ ਰਹੀ। ਪੰਜਾਬ ’ਚ ਲੇਬਰ ਫੋਰਸ ਭਾਗੀਦਾਰੀ ਦਰ 55.2 ਫ਼ੀਸਦੀ ਤੇ ਵਰਕਰ ਪਾਪੂਲੇਸ਼ਨ ਰੇਸ਼ੋ 52.3 ਫ਼ੀਸਦੀ ਦਰਜ ਕੀਤਾ ਗਿਆ। ਰਿਪੋਰਟ ਮੁਤਾਬਕ ਪੰਜਾਬ ਦੇ ਚੁਣੇ ਹੋਏ ਜ਼ਿਲ੍ਹਿਆਂ ’ਚ ਗੁਰਦਾਸਪੁਰ ’ਚ ਬੇਰੁਜ਼ਗਾਰੀ ਦਰ 8.6 ਫ਼ੀਸਦੀ ਰਹੀ, ਜਦਕਿ ਅੰਮ੍ਰਿਤਸਰ ’ਚ ਇਹ 8.3 ਫ਼ੀਸਦੀ ਤੇ ਜਲੰਧਰ ’ਚ 6 ਫ਼ੀਸਦੀ ਸੀ। ਗੁਰਦਾਸਪੁਰ ’ਚ ਰੁਜ਼ਗਾਰ, ਸਿੱਖਿਆ ਜਾਂ ਟ੍ਰੇਨਿੰਗ ਤੋਂ ਬਾਹਰ ਰਹਿਣ ਵਾਲੇ ਨੌਜਵਾਨਾਂ ਦੀ ਦਰ ਵੀ 36.4 ਫ਼ੀਸਦੀ ਰਹੀ। ਪਾਇਲਟ ਨੇ ਕਿਹਾ ਕਿ ਪੰਜਾਬ ਦੇ ਨੌਜਵਾਨਾਂ ਦੀਆਂ ਉਮੀਦਾਂ ਨੂੰ ਪੂਰਾ ਕਰਨ ਲਈ ਮਜ਼ਬੂਤ ਨਿਵੇਸ਼, ਉਦਯੋਗਾਂ ਦਾ ਵਿਸਥਾਰ ਤੇ ਨਵੇਂ ਰੁਜ਼ਗਾਰ ਦੇ ਮੌਕੇ ਜ਼ਰੂਰੀ ਹਨ। ਉਨ੍ਹਾਂ ਸਰਕਾਰ ਤੋਂ ਰੁਜ਼ਗਾਰ ਸਿਰਜਣ ਨੂੰ ਲੈ ਕੇ ਮਾਪਣਯੋਗ ਟੀਚੇ ਤੈਅ ਕਰਨ ਤੇ ਇਸ ਦੀ ਪ੍ਰਗਤੀ ਜਨਤਕ ਕਰਨ ਦੀ ਮੰਗ ਕੀਤੀ।