PGI 'ਚ ਲਾਪਰਵਾਹੀ ਦੀਆਂ ਹੱਦਾਂ ਪਾਰ: ਰਿਕਾਰਡ 'ਚ ਪੁੱਤਰ, ਹਸਪਤਾਲ 'ਚ ਬੱਚੀ ਤੇ ਡੈੱਥ ਸਰਟੀਫਿਕੇਟ 'ਚ ਟਰਾਂਸਜੈਂਡਰ; ਪਰਿਵਾਰ ਦੇ ਉੱਡੇ ਹੋਸ਼

ਮਨੀਮਾਜਰਾ ਵਾਸੀ 22 ਸਾਲਾ ਮਹਿਲਾ ਨੂੰ ਜਣੇਪੇ ਲਈ 17 ਅਗਸਤ ਨੂੰ ਪੀਜੀਆਈ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। ਪਰਿਵਾਰ ਮੁਤਾਬਕ 18 ਅਗਸਤ ਦੀ ਸਵੇਰ ਕਰੀਬ 5:20 ਵਜੇ ਜਣੇਪਾ ਹੋਇਆ। ਡਾਕਟਰਾਂ ਅਤੇ ਸਟਾਫ ਨੇ ਨਵਜਾਤ ਦੇ ਪੁੱਤਰ ਹੋਣ ਦੀ ਜਾਣਕਾਰੀ ਦਿੱਤੀ। ਹਸਪਤਾਲ ਦੇ ਰਿਕਾਰਡ ਵਿੱਚ ਵੀ ‘ਮੇਲ ਬੇਬੀ’ ਦਰਜ ਕੀਤਾ ਗਿਆ। ਨਵਜਾਤ ਕਰੀਬ 23 ਹਫ਼ਤਿਆਂ ਦਾ ਸੀ ਅਤੇ ਉਸ ਦਾ ਭਾਰ ਲਗਭਗ 600 ਗ੍ਰਾਮ ਸੀ। ਬਹੁਤ ਜ਼ਿਆਦਾ ਪ੍ਰੀਮੈਚਿਊਰ ਹੋਣ ਕਾਰਨ ਉਸ ਦੀ ਹਾਲਤ ਗੰਭੀਰ ਸੀ ਅਤੇ ਉਸ ਨੂੰ ਐੱਨਆਈਸੀਯੂ ਦੀ ਦੇਖਭਾਲ ਦੀ ਲੋੜ ਸੀ। ਪਰਿਵਾਰ ਮੁਤਾਬਕ ਪੀਜੀਆਈ ਵਿੱਚ ਨਵਜਾਤ ਲਈ ਬੈੱਡ ਉਪਲੱਬਧ ਨਾ ਹੋਣ ਦੀ ਗੱਲ ਕਹੀ ਗਈ। ਇਸ ਤੋਂ ਬਾਅਦ 18 ਅਗਸਤ ਦੀ ਰਾਤ ਨਵਜਾਤ ਨੂੰ ਮੋਰਿੰਡਾ ਦੇ ਫਤਿਹ ਹਸਪਤਾਲ ਲਿਜਾਇਆ ਗਿਆ। ਪਰਿਵਾਰ ਦਾ ਦੋਸ਼ ਹੈ ਕਿ ਉੱਥੇ ਡਾਕਟਰਾਂ ਨੇ ਜਾਂਚ ਤੋਂ ਬਾਅਦ ਉਸ ਨੂੰ ਬੱਚੀ ਦੱਸਿਆ। ਕੁਝ ਘੰਟੇ ਪਹਿਲਾਂ ਪੀਜੀਆਈ ਵਿੱਚ ਪੁੱਤਰ ਦੱਸੇ ਗਏ ਨਵਜਾਤ ਨੂੰ ਨਿੱਜੀ ਹਸਪਤਾਲ ’ਚ ਬੱਚੀ ਦੱਸੇ ਜਾਣ ਤੋਂ ਬਾਅਦ ਪਰਿਵਾਰ ਦਾ ਸ਼ੱਕ ਹੋਰ ਡੂੰਘਾ ਹੋ ਗਿਆ।