ਜੇਈਈ ਐਡਵਾਂਸਡ ’ਚ ਟਰਾਈਸਿਟੀ ਦੇ ਵਿਦਿਆਰਥੀਆਂ ਦਾ ਸ਼ਾਨਦਾਰ ਪ੍ਰਦਰਸ਼ਨ, ਯਜਤ ਆਏ ਅੱਵਲ

ਤਰੁਣ ਭਜਨੀ, ਪੰਜਾਬੀ ਜਾਗਰਣ ਚੰਡੀਗੜ੍ਹ : ਜੇਈਈ ਐਡਵਾਂਸਡ 2026 ਦੇ ਨਤੀਜਿਆਂ ਵਿਚ ਟਰਾਈਸਿਟੀ ਅਤੇ ਹਰਿਆਣਾ ਦੇ ਵਿਦਿਆਰਥੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਰਾਸ਼ਟਰੀ ਪੱਧਰ ’ਤੇ ਆਪਣੀ ਪਛਾਣ ਬਣਾਈ ਹੈ। ਯਜਤ ਸਿੰਘਲ ਨੇ ਆਲ ਇੰਡੀਆ ਰੈਂਕ 21 ਹਾਸਲ ਕਰ ਕੇ ਟਰਾਈਸਿਟੀ ਵਿਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ ਹੈ। ਇਸ ਦੇ ਨਾਲ ਹੀ ਅਰਨਵ ਗਾਂਧੀ ਨੇ ਆਲ ਇੰਡੀਆ ਰੈਂਕ 36 ਅਤੇ ਆਰੁਸ਼ ਸਿੰਘਲ ਨੇ ਆਲ ਇੰਡੀਆ ਰੈਂਕ 45 ਹਾਸਲ ਕੀਤੀ। ਇਸ ਤੋਂ ਇਲਾਵਾ ਆਦਿਤਿਆ ਗੁਪਤਾ ਨੇ ਆਲ ਇੰਡੀਆ ਰੈਂਕ 81 ਪ੍ਰਾਪਤ ਕਰ ਕੇ ਆਪਣੀ ਯੋਗਤਾ ਦਾ ਲੋਹਾ ਮਨਵਾਇਆ। ਯਜਤ ਸਿੰਘਲ ਨੇ ਆਪਣੀ ਸਫਲਤਾ ਦਾ ਸਿਹਰਾ ਨਿਯਮਿਤ ਪੜ੍ਹਾਈ, ਡੂੰਘੀ ਸਮਝ ਅਤੇ ਅਨੁਸ਼ਾਸਿਤ ਤਿਆਰੀ ਨੂੰ ਦਿੱਤਾ। ਉਨ੍ਹਾਂ ਦੱਸਿਆ ਕਿ ਕਿਸੇ ਵੀ ਮੰਜ਼ਿਲ ਤੱਕ ਪਹੁੰਚਣ ਲਈ ਲਗਾਤਾਰ ਸਮਰਪਣ ਅਤੇ ਫੋਕਸ ਬਹੁਤ ਜ਼ਰੂਰੀ ਹੈ। ਦੂਜੇ ਪਾਸੇ ਅਰਨਵ ਗਾਂਧੀ ਦਾ ਮੰਨਣਾ ਹੈ ਕਿ ਨਿਯਮਿਤ ਟੈਸਟ ਵਿਸ਼ਲੇਸ਼ਣ ਅਤੇ ਆਪਣੀਆਂ ਗਲਤੀਆਂ ਤੋਂ ਸਿੱਖਣਾ ਹੀ ਸਫਲਤਾ ਦੀ ਸਭ ਤੋਂ ਵੱਡੀ ਕੁੰਜੀ ਹੈ। ਆਰੁਸ਼ ਸਿੰਘਲ ਨੇ ਆਪਣੀ ਉਪਲਬਧੀ ਦਾ ਸਿਹਰਾ ਸੰਕਲਪਾਂ ਦੀ ਸਪੱਸ਼ਟ ਸਮਝ, ਲਗਾਤਾਰ ਅਭਿਆਸ ਅਤੇ ਲੰਬੇ ਸਮੇਂ ਤੱਕ ਕੀਤੀ ਮਿਹਨਤ ਨੂੰ ਦਿੱਤਾ। ਟਰਾਈਸਿਟੀ ਟਾਪਰ ਯਜਤ ਸਿੰਘਲ, ਭਵਨ ਵਿਦਿਆਲਾ, ਪੰਚਕੂਲਾ ਦੇ ਵਿਦਿਆਰਥੀ ਹਨ। ਉਨ੍ਹਾਂ ਨੂੰ ਬਚਪਨ ਤੋਂ ਹੀ ਗਣਿਤ ਵਿੱਚ ਖਾਸ ਦਿਲਚਸਪੀ ਰਹੀ ਹੈ। ਉਨ੍ਹਾਂ ਦਾ ਚੋਣ ਇਨਮੋ ਵਿਚ ਹੋਇਆ, ਉਨ੍ਹਾਂ ਨੇ ਪ੍ਰਸਿੱਧ ਆਈਐੱਮਓਟੀਸੀ ਕੈਂਪ ਵਿਚ ਹਿੱਸਾ ਲਿਆ ਅਤੇ ਆਈਐੱਨਸੀਐੱਚਓ 2026 ਵਿਚ ਵੀ ਆਪਣੀ ਪ੍ਰਤਿਭਾ ਦਾ ਪ੍ਰਦਰਸ਼ਨ ਕੀਤਾ। ਜੇਈਈ ਮੇਨ 2026 ਵਿਚ ਉਨ੍ਹਾਂ ਨੇ ਆਲ ਇੰਡੀਆ ਰੈਂਕ 100 ਹਾਸਲ ਕੀਤੀ ਸੀ। ਯਜਤ ਰੋਜ਼ਾਨਾ ਲਗਭਗ ਅੱਠ ਘੰਟੇ ਸਵੈ-ਅਧਿਐਨ ਕਰਦੇ ਸਨ ਅਤੇ ਸੰਕਲਪਾਂ ਨੂੰ ਡੂੰਘਾਈ ਨਾਲ ਸਮਝਣ ’ਤੇ ਜ਼ੋਰ ਦਿੰਦੇ ਸਨ। ਉਨ੍ਹਾਂ ਦਾ ਮੰਨਣਾ ਹੈ ਕਿ ਜੇ ਕੋਈ ਟੀਚਾ ਹਾਸਲ ਕਰਨਾ ਹੈ ਤਾਂ ਉਸ ਲਈ ਪੂਰੀ ਤਰ੍ਹਾਂ ਸਮਰਪਿਤ ਹੋਣਾ ਲਾਜ਼ਮੀ ਹੈ। ਪੰਚਕੂਲਾ ਦੇ ਅਰਨਵ ਗਾਂਧੀ ਨੇ ਜੇਈਈ ਐਡਵਾਂਸਡ 2026 ਵਿਚ ਆਲ ਇੰਡੀਆ ਰੈਂਕ 36 ਹਾਸਲ ਕਰ ਕੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਇਸ ਤੋਂ ਪਹਿਲਾਂ ਉਹ ਜੇਈਈ ਮੇਨ 2026 ਵਿਚ ਆਲ ਇੰਡੀਆ ਰੈਂਕ 22 ਹਾਸਲ ਕਰ ਕੇ ਹਰਿਆਣਾ ਟਾਪਰ ਬਣੇ ਸਨ। ਉਨ੍ਹਾਂ ਦੀਆਂ ਉਪਲਬਧੀਆਂ ਵਿੱਚ ਇਓਕਮ, ਆਰਐੱਮਓ, ਐੱਨਐੱਸਈਪੀ ਅਤੇ ਐੱਨਐੱਸਈਸੀ ਵਰਗੀਆਂ ਉੱਚ ਪ੍ਰੀਖਿਆਵਾਂ ਵਿਚ ਸਫਲਤਾ ਸ਼ਾਮਲ ਹੈ। ਅਰਨਵ ਹਰ ਰੋਜ਼ ਛੇ ਤੋਂ ਅੱਠ ਘੰਟੇ ਪੜ੍ਹਾਈ ਕਰਦੇ ਸਨ ਅਤੇ ਟੈਸਟ ਵਿਸ਼ਲੇਸ਼ਣ ਨੂੰ ਆਪਣੀ ਤਿਆਰੀ ਦਾ ਅਹਿਮ ਹਿੱਸਾ ਮੰਨਦੇ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਹਰ ਟੈਸਟ ਸਿੱਖਣ ਅਤੇ ਆਪਣੇ ਆਪ ਨੂੰ ਬਿਹਤਰ ਬਣਾਉਣ ਦਾ ਮੌਕਾ ਹੁੰਦਾ ਹੈ। ਆਰੁਸ਼ ਸਿੰਘਲ ਨੇ ਆਲ ਇੰਡੀਆ ਰੈਂਕ 45 ਹਾਸਲ ਕਰ ਕੇ ਚੰਡੀਗੜ੍ਹ ਟਾਪਰ ਬਣਨ ਦਾ ਮਾਣ ਪ੍ਰਾਪਤ ਕੀਤਾ। ਇਸ ਤੋਂ ਪਹਿਲਾਂ ਉਹ ਜੇਈਈ ਮੇਨ 2026 ਵਿਚ ਏਆਈਆਰ 8 ਨਾਲ ਚੰਡੀਗੜ੍ਹ ਟਾਪਰ ਰਹਿ ਚੁੱਕੇ ਹਨ। ਆਰੁਸ਼ ਨੇ ਇਨਮੋ, ਇਨਫੋ, ਇੰਚੋ ਅਤੇ ਈਨਾਓ ਵਰਗੀਆਂ ਰਾਸ਼ਟਰੀ ਪੱਧਰ ਦੀਆਂ ਮੁਕਾਬਲੇਬਾਜ਼ੀਆਂ ਵਿਚ ਵੀ ਸਫਲਤਾ ਹਾਸਲ ਕੀਤੀ ਹੈ। ਉਨ੍ਹਾਂ ਨੇ ਓਸੀਐੱਸਸੀ ਕੈਂਪਾਂ ਵਿਚ ਵੀ ਹਿੱਸਾ ਲਿਆ। ਆਰੁਸ਼ ਦਾ ਕਹਿਣਾ ਹੈ ਕਿ ਅਨੁਸ਼ਾਸਿਤ ਤਿਆਰੀ ਅਤੇ ਲੰਬੇ ਸਮੇਂ ਤੱਕ ਲਗਾਤਾਰ ਕੀਤੀ ਮਿਹਨਤ ਹੀ ਉਨ੍ਹਾਂ ਦੀ ਸਫਲਤਾ ਦਾ ਆਧਾਰ ਰਹੀ ਹੈ।