PGI 'ਚ ਕਰੋੜਾਂ ਦਾ ਮਹਾਂ-ਘਪਲਾ! ਢਾਬੇ ਤੇ ਫੋਟੋਸਟੇਟ ਵਾਲਿਆਂ ਨੇ ਮਰੀਜ਼ਾਂ ਦੀ ਸਹਾਇਤਾ ਰਾਸ਼ੀ ਆਪਣੇ ਖਾਤਿਆਂ 'ਚ ਕੀਤੀ ਟਰਾਂਸਫਰ

ਮੋਹਿਤ ਪਾਂਡੇ, ਚੰਡੀਗੜ੍ਹ- PGI ਵਿੱਚ ਪਿਛਲੇ ਸਾਲ ਪ੍ਰਾਈਵੇਟ ਗ੍ਰਾਂਟ ਸੈੱਲ ਦੇ 1.14 ਕਰੋੜ ਰੁਪਏ ਦੇ ਘਪਲੇ ਦਾ ਵੱਡਾ ਮਾਮਲਾ ਸਾਹਮਣੇ ਆਇਆ ਸੀ। ਇਸ ਮਾਮਲੇ ਦਾ ਮੁੱਖ ਸਰਗਨਾ PGI ਸਥਿਤ ਗੋਲ ਮਾਰਕੀਟ ਵਿੱਚ ਫੋਟੋਸਟੇਟ ਦੀ ਦੁਕਾਨ ਚਲਾਉਣ ਵਾਲਾ ਦੁਰਲੱਭ ਕੁਮਾਰ ਸੀ। ਇਸ ਦੇ ਨਾਲ ਹੀ ਦੂਜਾ ਮੁੱਖ ਮੁਲਜ਼ਮ ਉਸੇ ਮਾਰਕੀਟ ਵਿੱਚ ਢਾਬਾ ਚਲਾਉਣ ਵਾਲਾ ਸਾਹਿਲ ਸੂਦ ਹੈ।

CBI ਵੱਲੋਂ ਦਰਜ ਕੀਤੀ ਗਈ FIR ਵਿੱਚ ਸਾਹਿਲ ਨੂੰ ਦੁਰਲੱਭ ਦਾ ਸਾਥੀ ਦੱਸਿਆ ਗਿਆ ਹੈ। ਉੱਥੇ ਹੀ, ਜਾਗਰਣ ਦੀ ਪੜਤਾਲ ਵਿੱਚ ਸਾਹਮਣੇ ਆਇਆ ਹੈ ਕਿ ਦੋਵੇਂ ਸਾਂਝੇਦਾਰ ਨਹੀਂ ਹਨ। ਮੁੱਖ ਮੁਲਜ਼ਮ ਦੁਰਲੱਭ ਵੱਖਰੇ ਤੌਰ 'ਤੇ ਫੋਟੋਸਟੇਟ ਦੀ ਦੁਕਾਨ ਚਲਾਉਂਦਾ ਹੈ, ਜਦਕਿ ਉਸ ਦਾ ਸਾਥੀ ਮੁਲਜ਼ਮ ਢਾਬਾ ਚਲਾਉਂਦਾ ਹੈ।

ਇਸ ਤੋਂ ਇਲਾਵਾ PGI ਦੇ ਛੇ ਕਰਮਚਾਰੀਆਂ ਦੀ ਮਿਲੀਭੁਗਤ ਨਾਲ ਪ੍ਰਾਈਵੇਟ ਗ੍ਰਾਂਟ ਸੈੱਲ ਅਧੀਨ ਗਰੀਬ ਅਤੇ ਲੋੜਵੰਦ ਮਰੀਜ਼ਾਂ ਨੂੰ ਦਿੱਤੀ ਜਾਣ ਵਾਲੀ ਵਿੱਤੀ ਸਹਾਇਤਾ ਦੇ ਜਾਅਲੀ ਦਸਤਾਵੇਜ਼ ਤਿਆਰ ਕਰਕੇ ਘਪਲਾ ਕੀਤਾ ਜਾ ਰਿਹਾ ਸੀ। ਇਸ ਮਾਮਲੇ ਵਿੱਚ CBI ਨੇ ਦੁਰਲੱਭ, ਸਾਹਿਲ ਸਮੇਤ PGI ਦੇ ਛੇ ਕਰਮਚਾਰੀਆਂ ਵਿਰੁੱਧ ਕੁੱਲ ਅੱਠ ਮੁਲਜ਼ਮਾਂ ਖ਼ਿਲਾਫ਼ FIR ਦਰਜ ਕੀਤੀ ਸੀ।

ਦੱਸ ਦੇਈਏ ਕਿ ਇਹ ਪ੍ਰਾਈਵੇਟ ਗ੍ਰਾਂਟ ਸੈੱਲ ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ, ਪ੍ਰਧਾਨ ਮੰਤਰੀ ਰਾਸ਼ਟਰੀ ਰਾਹਤ ਫੰਡ, ਰਾਸ਼ਟਰੀ ਆਰੋਗਿਆ ਨਿਧੀ, ਹੰਸ ਕਲਚਰ ਸੋਸਾਇਟੀ ਅਤੇ ਹੋਰ ਸਰਕਾਰੀ ਤੇ ਗੈਰ-ਸਰਕਾਰੀ ਸੰਸਥਾਵਾਂ ਤੋਂ ਮਿਲਣ ਵਾਲੀਆਂ ਗ੍ਰਾਂਟਾਂ ਦੇ ਪ੍ਰਬੰਧਨ ਦਾ ਕੰਮ ਕਰਦਾ ਹੈ।

ਇਸੇ ਸੈੱਲ ਰਾਹੀਂ ਗਰੀਬ ਅਤੇ ਲੋੜਵੰਦ ਮਰੀਜ਼ਾਂ ਨੂੰ ਵਿੱਤੀ ਸਹਾਇਤਾ ਅਤੇ ਦਵਾਈਆਂ ਮੁਹੱਈਆ ਕਰਵਾਈਆਂ ਜਾਂਦੀਆਂ ਹਨ। ਦੋਸ਼ ਹੈ ਕਿ ਮੁਲਜ਼ਮਾਂ ਨੇ ਆਪਸ ਵਿੱਚ ਮਿਲ ਕੇ ਗਰੀਬ ਅਤੇ ਲੋੜਵੰਦ ਮਰੀਜ਼ਾਂ ਨੂੰ ਮਿਲਣ ਵਾਲੀ ਆਰਥਿਕ ਸਹਾਇਤਾ ਦੀ ਰਕਮ ਆਪਣੇ ਬੈਂਕ ਖਾਤਿਆਂ ਵਿੱਚ ਟਰਾਂਸਫਰ ਕਰ ਲਈ ਸੀ।

ਪ੍ਰਾਈਵੇਟ ਗ੍ਰਾਂਟ ਸੈੱਲ ਦੇ ਅਧਿਕਾਰੀਆਂ ਨਾਲ ਸੀ ਸੰਪਰਕ

CBI ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਸੀ ਕਿ ਇਹ ਘਪਲਾ PGI ਦੀ ਹੀ ਗੋਲ ਮਾਰਕੀਟ ਵਿੱਚ ਸਥਿਤ ਇੱਕ ਫੋਟੋ ਕਾਪੀ ਦੀ ਦੁਕਾਨ ਤੋਂ ਚਲਾਇਆ ਜਾ ਰਿਹਾ ਸੀ। ਇਸ ਦੁਕਾਨ ਦੇ ਮਾਲਕ ਦਾ PGI ਦੇ ਪ੍ਰਾਈਵੇਟ ਗ੍ਰਾਂਟ ਸੈੱਲ ਦੇ ਅਧਿਕਾਰੀਆਂ ਨਾਲ ਲਗਾਤਾਰ ਸੰਪਰਕ ਸੀ।

ਇਨ੍ਹਾਂ ਵਿੱਚ PGI ਦੇ ਜੂਨੀਅਰ ਐਡਮਿਨਿਸਟ੍ਰੇਟਿਵ ਅਸਿਸਟੈਂਟ (ਸੇਵਾਮੁਕਤ) ਧਰਮਚੰਦ, ਮੈਡੀਕਲ ਰਿਕਾਰਡ ਕਲਰਕ ਸੁਨੀਲ ਕੁਮਾਰ, ਲੋਅਰ ਡਿਵੀਜ਼ਨ ਕਲਰਕ ਪ੍ਰਦੀਪ ਸਿੰਘ, ਚੇਤਨ ਗੁਪਤਾ, ਹਸਪਤਾਲ ਅਟੈਂਡੈਂਟ ਨੇਹਾ ਅਤੇ ਪ੍ਰਾਈਵੇਟ ਗ੍ਰਾਂਟ ਸੈੱਲ ਦੇ ਕਰਮਚਾਰੀ ਗਗਨਪ੍ਰੀਤ ਸਿੰਘ ਸ਼ਾਮਲ ਹਨ।

ਇਸ ਤਰ੍ਹਾਂ ਸਾਹਮਣੇ ਆਇਆ ਘਪਲਾ

ਇਸ ਘਪਲੇ ਦਾ ਪਰਦਾਫਾਸ਼ ਉਸ ਸਮੇਂ ਹੋਇਆ ਜਦੋਂ ਇੱਕ ਲਾਭਪਾਤਰੀ ਮਰੀਜ਼ ਕਮਲੇਸ਼ ਦੇਵੀ (ਫਾਈਲ ਨੰਬਰ 18796) ਦੇ ਪਤੀ ਦਵਾਈਆਂ ਲਈ ਮਨਜ਼ੂਰ ਹੋਈ ਢਾਈ ਲੱਖ ਰੁਪਏ ਦੀ ਗ੍ਰਾਂਟ ਦਾ ਲਾਭ ਲੈਣ ਲਈ ਪ੍ਰਾਈਵੇਟ ਗ੍ਰਾਂਟ ਸੈੱਲ ਪਹੁੰਚੇ। ਉੱਥੇ ਪਤਾ ਲੱਗਾ ਕਿ ਉਨ੍ਹਾਂ ਦੀ ਫਾਈਲ ਨਸ਼ਟ ਕਰ ਦਿੱਤੀ ਗਈ ਸੀ।

ਇਸ ਦਾ ਡਿਜੀਟਲ ਰਿਕਾਰਡ ਵੀ ਡਿਲੀਟ ਕਰ ਦਿੱਤਾ ਗਿਆ ਸੀ ਅਤੇ 22,01,839 ਰੁਪਏ ਦੀ ਰਕਮ RTGS ਰਾਹੀਂ ਨਿਵਾਸ ਯਾਦਵ ਨਾਂ ਦੇ ਇੱਕ ਨਿੱਜੀ ਵਿਅਕਤੀ ਦੇ ਖਾਤੇ ਵਿੱਚ ਟਰਾਂਸਫਰ ਕਰ ਦਿੱਤੀ ਗਈ ਸੀ। ਇਸ ਵਿਅਕਤੀ ਦਾ ਮਰੀਜ਼ ਨਾਲ ਕੋਈ ਸਬੰਧ ਵੀ ਨਹੀਂ ਸੀ।

ਇਸ ਤੋਂ ਬਾਅਦ PGI ਨੇ ਆਪਣੇ ਪੱਧਰ 'ਤੇ ਜਾਂਚ ਸ਼ੁਰੂ ਕੀਤੀ ਤਾਂ ਹੋਰ ਵੀ ਮਰੀਜ਼ਾਂ ਨਾਲ ਇਸ ਤਰ੍ਹਾਂ ਦੇ ਘਪਲੇ ਸਾਹਮਣੇ ਆਏ। ਇੱਕ ਹੋਰ ਮਰੀਜ਼ ਅਰਵਿੰਦ ਕੁਮਾਰ (ਫਾਈਲ ਨੰਬਰ 20404) ਨੂੰ ਮਿਲਣ ਵਾਲੀ ਰਕਮ ਵਿੱਚੋਂ 90 ਹਜ਼ਾਰ ਰੁਪਏ PGI ਦੀ ਹੀ ਕਰਮਚਾਰੀ ਨੇਹਾ ਦੇ ਖਾਤੇ ਵਿੱਚ ਭੇਜੇ ਗਏ ਸਨ।

ਇਸ ਮਾਮਲੇ ਦਾ ਨੋਟਿਸ ਲੈਂਦਿਆਂ PGI ਪ੍ਰਸ਼ਾਸਨ ਨੇ ਸਕੂਲ ਆਫ਼ ਪਬਲਿਕ ਹੈਲਥ ਐਂਡ ਕਮਿਊਨਿਟੀ ਮੈਡੀਸਨ ਦੇ ਪ੍ਰੋਫੈਸਰ ਅਤੇ ਮੁਖੀ ਡਾ. ਅਰੁਣ ਕੁਮਾਰ ਅਗਰਵਾਲ ਦੀ ਪ੍ਰਧਾਨਗੀ ਹੇਠ ਇੱਕ ਅੰਦਰੂਨੀ ਜਾਂਚ ਕਮੇਟੀ ਦਾ ਗਠਨ ਕੀਤਾ ਸੀ।