- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਚੰਡੀਗੜ੍ਹ 'ਚ ਸਾਬਕਾ ਕੌਂਸਲਰ ਦੀ ਕੋਠੀ 'ਚ ਵੱਡੀ ਵਾਰਦਾਤ, ਨੌਕਰ ਨੇ ਇੰਝ ਕੀਤਾ ਮਾਲਕਣ ਸਮੇਤ ਤਿੰਨ ਨੂੰ ਕੀਤਾ ਬੇਹੋਸ਼; ਕੋਠੀ 'ਚੋਂ ਕਰੋੜਾਂ ਦਾ ਮਾਲ ਲੁੱਟਿਆ
ਸ਼ਹਿਰ ਦੇ ਪੌਸ਼ ਸੈਕਟਰ-28 ਵਿੱਚ ਸ਼ੁੱਕਰਵਾਰ ਰਾਤ ਕਾਂਗਰਸ ਦੇ ਮਰਹੂਮ ਸਾਬਕਾ ਕੌਂਸਲਰ ਅਤੇ ਚੰਡੀਗੜ੍ਹ ਕਲੱਬ ਦੇ ਸਾਬਕਾ ਪ੍ਰਧਾਨ ਮੁਕੇਸ਼ ਬੱਸੀ ਦੀ ਕੋਠੀ ਵਿੱਚ ਜ਼ਹਿਰ ਖੁਆਣ ਤੋਂ ਬਾਅਦ ਕਰੋੜਾਂ ਰੁਪਏ ਦੀ ਲੁੱਟ ਦੀ ਸਨਸਨੀਖੇਜ਼ ਵਾਰਦਾਤ ਸਾਹਮਣੇ ਆਈ ਹੈ। ਪਰਿਵਾਰ ਮੁਤਾਬਕ ਕੁਝ ਦਿਨ ਪਹਿਲਾਂ ਹੀ ਘਰ ਵਿੱਚ ਰੱਖੇ ਗਏ ਨਵੇਂ ਕੁੱਕ ਹੇਮੰਤ ਥਾਪਾ ਨੇ ਡਿਨਰ ਵਿੱਚ ਨਸ਼ੀਲਾ ਪਦਾਰਥ ਮਿਲਾ ਕੇ ਘਰ ਦੀ ਮਾਲਕਣ ਅੰਜੂ, ਪੁਰਾਣੇ ਕੁੱਕ ਸ਼ਿਵ ਅਤੇ ਮੇਡ ਅਨੂ ਨੂੰ ਬੇਹੋਸ਼ ਕਰ ਦਿੱਤਾ। ਇਸ ਤੋਂ ਬਾਅਦ ਕਥਿਤ ਤੌਰ ’ਤੇ ਸੇਫ ਅਤੇ ਅਲਮਾਰੀਆਂ ਦੇ ਤਾਲੇ ਤੋੜ ਕੇ ਨਕਦੀ ਅਤੇ ਸੋਨੇ-ਹੀਰੇ ਦੇ ਗਹਿਣੇ ਲੈ ਕੇ ਫਰਾਰ ਹੋ ਗਿਆ।
Posted By Sunita
Publish Date: Sat, 15 Aug 2026 12:10 PM (IST)
Updated Date: Sat, 15 Aug 2026 12:12 PM (IST)
ਚੰਡੀਗੜ੍ਹ - ਸ਼ਹਿਰ ਦੇ ਪੌਸ਼ ਸੈਕਟਰ-28 ਵਿੱਚ ਸ਼ੁੱਕਰਵਾਰ ਰਾਤ ਕਾਂਗਰਸ ਦੇ ਮਰਹੂਮ ਸਾਬਕਾ ਕੌਂਸਲਰ ਅਤੇ ਚੰਡੀਗੜ੍ਹ ਕਲੱਬ ਦੇ ਸਾਬਕਾ ਪ੍ਰਧਾਨ ਮੁਕੇਸ਼ ਬੱਸੀ ਦੀ ਕੋਠੀ ਵਿੱਚ ਜ਼ਹਿਰ ਖੁਆਣ ਤੋਂ ਬਾਅਦ ਕਰੋੜਾਂ ਰੁਪਏ ਦੀ ਲੁੱਟ ਦੀ ਸਨਸਨੀਖੇਜ਼ ਵਾਰਦਾਤ ਸਾਹਮਣੇ ਆਈ ਹੈ। ਪਰਿਵਾਰ ਮੁਤਾਬਕ ਕੁਝ ਦਿਨ ਪਹਿਲਾਂ ਹੀ ਘਰ ਵਿੱਚ ਰੱਖੇ ਗਏ ਨਵੇਂ ਕੁੱਕ ਹੇਮੰਤ ਥਾਪਾ ਨੇ ਡਿਨਰ ਵਿੱਚ ਨਸ਼ੀਲਾ ਪਦਾਰਥ ਮਿਲਾ ਕੇ ਘਰ ਦੀ ਮਾਲਕਣ ਅੰਜੂ, ਪੁਰਾਣੇ ਕੁੱਕ ਸ਼ਿਵ ਅਤੇ ਮੇਡ ਅਨੂ ਨੂੰ ਬੇਹੋਸ਼ ਕਰ ਦਿੱਤਾ। ਇਸ ਤੋਂ ਬਾਅਦ ਕਥਿਤ ਤੌਰ ’ਤੇ ਸੇਫ ਅਤੇ ਅਲਮਾਰੀਆਂ ਦੇ ਤਾਲੇ ਤੋੜ ਕੇ ਨਕਦੀ ਅਤੇ ਸੋਨੇ-ਹੀਰੇ ਦੇ ਗਹਿਣੇ ਲੈ ਕੇ ਫਰਾਰ ਹੋ ਗਿਆ।
ਤਿੰਨਾਂ ਨੂੰ ਗੰਭੀਰ ਹਾਲਤ ਵਿੱਚ ਜੀਐਮਐਸਐਚ-16 ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਡਾਕਟਰਾਂ ਦੀ ਨਿਗਰਾਨੀ ਹੇਠ ਉਨ੍ਹਾਂ ਦਾ ਇਲਾਜ ਚੱਲ ਰਿਹਾ ਹੈ। ਫਿਲਹਾਲ ਤਿੰਨੇ ਬਿਆਨ ਦੇਣ ਦੀ ਸਥਿਤੀ ਵਿੱਚ ਨਹੀਂ ਹਨ। ਘਟਨਾ ਸਮੇਂ ਮੁਕੇਸ਼ ਬੱਸੀ ਦੇ ਦੋਵੇਂ ਪੁੱਤਰ ਜਿਤੇਸ਼ ਅਤੇ ਦਕਸ਼ ਆਪਣੇ ਪਰਿਵਾਰਾਂ ਨਾਲ ਸ਼ਹਿਰ ਤੋਂ ਬਾਹਰ ਸਨ।
ਰਾਤ ਸਾਢੇ 10 ਵਜੇ ਪੁੱਤਰ ਘਰ ਪਰਤਿਆ, ਡਿਜੀਟਲ ਲਾਕ ਨਹੀਂ ਖੁੱਲ੍ਹਿਆ
ਦਕਸ਼ ਸ਼ੁੱਕਰਵਾਰ ਰਾਤ ਕਰੀਬ ਸਾਢੇ 10 ਵਜੇ ਪਤਨੀ ਨਾਲ ਘਰ ਪਰਤਿਆ। ਉਸ ਨੇ ਮੁੱਖ ਦਰਵਾਜ਼ੇ ਦਾ ਡਿਜੀਟਲ ਲਾਕ ਖੋਲ੍ਹਣ ਦੀ ਕੋਸ਼ਿਸ਼ ਕੀਤੀ ਪਰ ਲਾਕ ਨਹੀਂ ਖੁੱਲ੍ਹਿਆ। ਇਸ ਤੋਂ ਬਾਅਦ ਉਹ ਕੰਧ ਟੱਪ ਕੇ ਘਰ ਦੇ ਪਿਛਲੇ ਪਾਸੇ ਪਹੁੰਚਿਆ। ਉੱਥੇ ਜਾਲੀ ਵਾਲਾ ਦਰਵਾਜ਼ਾ ਅਤੇ ਦੂਜਾ ਦਰਵਾਜ਼ਾ ਥੋੜ੍ਹਾ ਖੁੱਲ੍ਹਾ ਮਿਲਿਆ। ਅੰਦਰ ਜਾਣ ’ਤੇ ਮਾਂ ਅੰਜੂ ਬੈੱਡ ’ਤੇ ਬੇਹੋਸ਼ ਪਈ ਸੀ, ਜਦਕਿ ਪੁਰਾਣਾ ਕੁੱਕ ਸ਼ਿਵ ਅਤੇ ਮੇਡ ਅਨੂ ਵੀ ਬੇਹੋਸ਼ ਹਾਲਤ ਵਿੱਚ ਮਿਲੇ।
ਦਕਸ਼ ਨੇ ਤਿੰਨਾਂ ਨੂੰ ਆਪਣੀ ਗੱਡੀ ਰਾਹੀਂ ਜੀਐਮਐਸਐਚ-16 ਪਹੁੰਚਾਇਆ। ਹਸਪਤਾਲ ਵਿੱਚ ਡਾਕਟਰਾਂ ਨੇ ਉਨ੍ਹਾਂ ਦਾ ਇਲਾਜ ਸ਼ੁਰੂ ਕੀਤਾ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਪੁਲਿਸ ਅਧਿਕਾਰੀ ਵੀ ਮੌਕੇ ’ਤੇ ਪਹੁੰਚ ਗਏ।
ਬਿਨਾਂ ਪੁਲਿਸ ਵੈਰੀਫਿਕੇਸ਼ਨ ਦੇ ਰੱਖਿਆ ਗਿਆ ਸੀ ਕੁੱਕ
ਪਰਿਵਾਰ ਮੁਤਾਬਕ ਹੇਮੰਤ ਥਾਪਾ ਨੂੰ ਕੁਝ ਦਿਨ ਪਹਿਲਾਂ ਹੀ ਇੱਕ ਸਥਾਨਕ ਜਾਣ-ਪਛਾਣ ਵਾਲੇ ਦੀ ਸਿਫਾਰਸ਼ ’ਤੇ ਘਰ ਵਿੱਚ ਕੁੱਕ ਵਜੋਂ ਰੱਖਿਆ ਗਿਆ ਸੀ। ਉਸ ਨੂੰ ਪਰਿਵਾਰ ਦੇ ਸਾਹਮਣੇ ਭਰੋਸੇਮੰਦ ਅਤੇ ਸਮਝਦਾਰ ਵਿਅਕਤੀ ਦੱਸਿਆ ਗਿਆ ਸੀ। ਪੁਲਿਸ ਦੀ ਮੁੱਢਲੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਕੁੱਕ ਦੀ ਪੁਲਿਸ ਵੈਰੀਫਿਕੇਸ਼ਨ ਨਹੀਂ ਕਰਵਾਈ ਗਈ ਸੀ।
ਵਾਰਦਾਤ ਤੋਂ ਬਾਅਦ ਹੇਮੰਤ ਥਾਪਾ ਫਰਾਰ ਹੈ। ਪੁਲਿਸ ਉਸ ਦੀ ਭਾਲ ਵਿੱਚ ਸੰਭਾਵਿਤ ਟਿਕਾਣਿਆਂ ’ਤੇ ਛਾਪੇਮਾਰੀ ਕਰ ਰਹੀ ਹੈ। ਪੁਲਿਸ ਇਹ ਵੀ ਜਾਂਚ ਕਰ ਰਹੀ ਹੈ ਕਿ ਉਸ ਨੂੰ ਨੌਕਰੀ ’ਤੇ ਰੱਖਣ ਵਿੱਚ ਕਿਸ ਦੀ ਭੂਮਿਕਾ ਸੀ ਅਤੇ ਕੀ ਉਸ ਨੂੰ ਘਰ ਦੀ ਦਿਨਚਰਿਆ ਅਤੇ ਸੁਰੱਖਿਆ ਪ੍ਰਬੰਧਾਂ ਬਾਰੇ ਪਹਿਲਾਂ ਤੋਂ ਜਾਣਕਾਰੀ ਸੀ।
ਪੁਰਾਣਾ ਕੁੱਕ ਹੋਣ ਦੇ ਬਾਵਜੂਦ ਨਵਾਂ ਕਿਉਂ ਰੱਖਿਆ, ਜਾਂਚ ਦਾ ਅਹਿਮ ਬਿੰਦੂ
ਪੁਲਿਸ ਲਈ ਇਹ ਵੀ ਜਾਂਚ ਦਾ ਮਹੱਤਵਪੂਰਨ ਬਿੰਦੂ ਹੈ ਕਿ ਜਦੋਂ ਸ਼ਿਵ ਕਈ ਸਾਲਾਂ ਤੋਂ ਘਰ ਵਿੱਚ ਕੁੱਕ ਦਾ ਕੰਮ ਕਰ ਰਿਹਾ ਸੀ ਤਾਂ ਉਸ ਦੇ ਰਹਿੰਦਿਆਂ ਨਵੇਂ ਕੁੱਕ ਨੂੰ ਕਿਸ ਦੇ ਕਹਿਣ ’ਤੇ ਰੱਖਿਆ ਗਿਆ। ਜਾਂਚ ਟੀਮ ਇਹ ਜਾਣਕਾਰੀ ਇਕੱਠੀ ਕਰ ਰਹੀ ਹੈ ਕਿ ਹੇਮੰਤ ਥਾਪਾ ਦਾ ਪਰਿਵਾਰ ਨਾਲ ਸੰਪਰਕ ਕਿਵੇਂ ਹੋਇਆ ਅਤੇ ਉਸ ਨੂੰ ਘਰ ਅੰਦਰ ਕੰਮ ਕਰਨ ਦਾ ਮੌਕਾ ਕਿਸ ਨੇ ਦਿਵਾਇਆ।
ਪੁਲਿਸ ਨੂੰ ਸ਼ੱਕ ਹੈ ਕਿ ਵਾਰਦਾਤ ਵਿੱਚ ਇੱਕ ਤੋਂ ਵੱਧ ਲੋਕ ਸ਼ਾਮਲ ਹੋ ਸਕਦੇ ਹਨ, ਹਾਲਾਂਕਿ ਹੁਣ ਤੱਕ ਪੁਲਿਸ ਨੇ ਇਸ ਸਬੰਧੀ ਕੋਈ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਹੈ।
ਸੀਸੀਟੀਵੀ ਫੁਟੇਜ ਰਾਹੀਂ ਮੁਲਜ਼ਮ ਤੱਕ ਪਹੁੰਚਣ ਦੀ ਕੋਸ਼ਿਸ਼
ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਸੈਕਟਰ-26 ਥਾਣੇ ਦਾ ਵਾਧੂ ਚਾਰਜ ਸੰਭਾਲ ਰਹੇ ਇੰਸਪੈਕਟਰ ਸਤਨਾਮ ਸਿੰਘ, ਇਲਾਕੇ ਦੇ ਪੁਲਿਸ ਉਪ ਕਪਤਾਨ ਅਤੇ ਹੋਰ ਸੀਨੀਅਰ ਅਧਿਕਾਰੀ ਮੌਕੇ ’ਤੇ ਪਹੁੰਚੇ। ਪੁਲਿਸ ਨੇ ਘਟਨਾ ਸਥਾਨ ਦੀ ਜਾਂਚ ਦੇ ਨਾਲ-ਨਾਲ ਆਸ-ਪਾਸ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਫੁਟੇਜ ਖੰਗਾਲਣੀ ਸ਼ੁਰੂ ਕਰ ਦਿੱਤੀ ਹੈ।
ਪੁਲਿਸ ਮੁਲਜ਼ਮ ਦੇ ਘਰ ਤੋਂ ਨਿਕਲਣ ਦੇ ਸਮੇਂ, ਉਸ ਦੇ ਸੰਭਾਵਿਤ ਭੱਜਣ ਵਾਲੇ ਰਸਤੇ ਅਤੇ ਉਸ ਦੇ ਸੰਪਰਕ ਵਿੱਚ ਰਹੇ ਲੋਕਾਂ ਬਾਰੇ ਜਾਣਕਾਰੀ ਇਕੱਠੀ ਕਰ ਰਹੀ ਹੈ। ਘਰ ਦੇ ਲਾਕਰ ਅਤੇ ਅਲਮਾਰੀਆਂ ਵਿੱਚੋਂ ਗਾਇਬ ਨਕਦੀ ਅਤੇ ਗਹਿਣਿਆਂ ਦੀ ਕੀਮਤ ਦਾ ਹਾਲੇ ਅੰਤਿਮ ਅੰਦਾਜ਼ਾ ਨਹੀਂ ਲਗਾਇਆ ਗਿਆ। ਪਰਿਵਾਰ ਵੱਲੋਂ ਸਾਮਾਨ ਦੀ ਪੂਰੀ ਸੂਚੀ ਦੇਣ ਤੋਂ ਬਾਅਦ ਚੋਰੀ ਹੋਈ ਅਸਲ ਰਕਮ ਸਪਸ਼ਟ ਹੋਵੇਗੀ।
2016 ਵਿੱਚ ਕਾਂਗਰਸ ਦੇ ਮੇਅਰ ਅਹੁਦੇ ਦੇ ਉਮੀਦਵਾਰ ਸਨ ਮੁਕੇਸ਼ ਬੱਸੀ
ਮੁਕੇਸ਼ ਬੱਸੀ ਵਾਰਡ ਨੰਬਰ-17 ਤੋਂ ਕਾਂਗਰਸ ਦੇ ਕੌਂਸਲਰ ਰਹੇ ਸਨ। ਇਸ ਵਾਰਡ ਵਿੱਚ ਸੈਕਟਰ-18, 19 ਅਤੇ 28 ਦੇ ਇਲਾਕੇ ਆਉਂਦੇ ਹਨ। ਉਹ ਚੰਡੀਗੜ੍ਹ ਕਲੱਬ ਦੇ ਪ੍ਰਧਾਨ ਵੀ ਰਹੇ ਅਤੇ ਸਥਾਨਕ ਰਾਜਨੀਤੀ, ਵਪਾਰਕ ਸੰਗਠਨਾਂ ਅਤੇ ਸਮਾਜਿਕ ਗਤੀਵਿਧੀਆਂ ਵਿੱਚ ਸਰਗਰਮ ਰਹੇ।
ਸਾਲ 2016 ਦੀਆਂ ਨਗਰ ਨਿਗਮ ਚੋਣਾਂ ਵਿੱਚ ਕਾਂਗਰਸ ਨੇ ਉਨ੍ਹਾਂ ਨੂੰ ਮੇਅਰ ਅਹੁਦੇ ਦਾ ਉਮੀਦਵਾਰ ਬਣਾਇਆ ਸੀ। ਉਨ੍ਹਾਂ ਦਾ ਮੁਕਾਬਲਾ ਭਾਜਪਾ ਦੇ ਅਰੁਣ ਸੂਦ ਨਾਲ ਹੋਇਆ ਸੀ। ਸਾਲ 2021 ਵਿੱਚ ਬ੍ਰੇਨ ਹੈਮਰੇਜ ਕਾਰਨ ਉਨ੍ਹਾਂ ਦਾ ਦੇਹਾਂਤ ਹੋ ਗਿਆ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਦੇ ਦੋਵੇਂ ਪੁੱਤਰ ਪਰਿਵਾਰ ਦਾ ਕਾਰੋਬਾਰ ਸੰਭਾਲ ਰਹੇ ਹਨ।
ਪੁਲਿਸ ਦੀ ਪਹਿਲੀ ਤਰਜੀਹ ਹੁਣ ਫਰਾਰ ਕੁੱਕ ਨੂੰ ਗ੍ਰਿਫ਼ਤਾਰ ਕਰਕੇ ਲੁੱਟਿਆ ਗਿਆ ਸਾਮਾਨ ਬਰਾਮਦ ਕਰਨਾ ਹੈ। ਇਸ ਦੇ ਨਾਲ ਹੀ ਜਾਂਚ ਏਜੰਸੀਆਂ ਇਹ ਪਤਾ ਲਗਾਉਣ ਵਿੱਚ ਜੁਟੀਆਂ ਹਨ ਕਿ ਵਾਰਦਾਤ ਇਕੱਲੇ ਕੁੱਕ ਨੇ ਕੀਤੀ ਜਾਂ ਇਸ ਦੇ ਪਿੱਛੇ ਕਿਸੇ ਹੋਰ ਵਿਅਕਤੀ ਦੀ ਵੀ ਭੂਮਿਕਾ ਸੀ।