ਕੱਲ੍ਹ ਜੱਜ ਸਾਹਮਣੇ ਰੋ ਪਏ ਸਨ ਸਾਬਕਾ DIG ਭੁੱਲਰ, ਅੱਜ ਫਿਰ ਪੇਸ਼ ਕੀਤੇ ਤਾਂ ਬਾਹਰ ਆ ਕੇ ਬੋਲੇ- ਹੁਣੇ ਕੁਝ ਨਹੀਂ ਕਹਿ ਸਕਦਾ

ਰਿਸ਼ਵਤ ਮਾਮਲੇ ’ਚ ਭੁੱਲਰ ਦੇ ਵਿਚੋਲੇ ਕ੍ਰਿਸ਼ਣੁ ਸ਼ਾਰਦਾ ਨੂੰ ਕੋਰਟ ਵਿੱਚ ਪੇਸ਼ ਕੀਤਾ ਗਿਆ ਸੀ। ਇਸ ਦੌਰਾਨ ਭੁੱਲਰ ਅਤੇ ਕ੍ਰਿਸ਼ਣੁ ਦੇ ਵਕੀਲਾਂ ਨੇ ਸ਼ਿਕਾਇਤਕਰਤਾ ਆਕਾਸ਼ ਬੱਤਾ ਦਾ ਕਰੌਸ ਐਗਜ਼ਾਮੀਨੇਸ਼ਨ ਕੀਤਾ। ਆਕਾਸ਼ ਬੱਤਾ ਇਸ ਮਾਮਲੇ ਵਿੱਚ ਗਵਾਹੀ ਦੇ ਚੁੱਕੇ ਹਨ ਅਤੇ ਹੁਣ ਬਚਾਅ ਪੱਖ ਦੇ ਵਕੀਲ ਉਨ੍ਹਾਂ ਤੋਂ ਸਵਾਲ-ਜਵਾਬ ਕਰ ਰਹੇ ਹਨ। ਇਸ ਤੋਂ ਪਹਿਲਾਂ ਬੱਤਾ ਨੇ ਸੀ.ਬੀ.ਆਈ. ਜੱਜ ਅੱਗੇ ਦੋਵਾਂ ਦੋਸ਼ੀਆਂ ਖ਼ਿਲਾਫ਼ ਖੁੱਲ੍ਹ ਕੇ ਗਵਾਹੀ ਦਿੱਤੀ ਸੀ।

ਘਰੋਂ ਮਿਲੇ ਸਨ ਕਰੋੜਾਂ ਰੁਪਏ ਕੈਸ਼, ਸੋਨਾ

ਭੁੱਲਰ ਨੂੰ ਪਿਛਲੇ ਸਾਲ 16 ਅਕਤੂਬਰ ਨੂੰ ਸੀ.ਬੀ.ਆਈ. ਨੇ ਗ੍ਰਿਫ਼ਤਾਰ ਕੀਤਾ ਸੀ। ਦੋਸ਼ ਸੀ ਕਿ ਉਹ ਮੰਡੀ ਗੋਬਿੰਦਗੜ੍ਹ ਦੇ ਵਪਾਰੀ ਆਕਾਸ਼ ਬੱਤਾ ਤੋਂ ਅੱਠ ਲੱਖ ਰੁਪਏ ਰਿਸ਼ਵਤ ਮੰਗ ਰਹੇ ਸਨ। ਉਨ੍ਹਾਂ ਨੂੰ ਕਿਸੇ ਅਪਰਾਧਿਕ ਮਾਮਲੇ ਵਿੱਚ ਗ੍ਰਿਫ਼ਤਾਰੀ ਦਾ ਡਰ ਦਿੱਤਾ ਜਾ ਰਿਹਾ ਸੀ।

ਬੱਤਾ ਨੇ ਜਦੋਂ ਇਸ ਬਾਰੇ ਸੀ.ਬੀ.ਆਈ. ਨੂੰ ਸ਼ਿਕਾਇਤ ਦਿੱਤੀ ਤਾਂ ਜਾਂਚ ਏਜੰਸੀ ਨੇ ਭੁੱਲਰ ਅਤੇ ਕ੍ਰਿਸ਼ਣੁ ਨੂੰ ਗ੍ਰਿਫ਼ਤਾਰ ਕਰ ਲਿਆ ਸੀ। ਭੁੱਲਰ ਦੇ ਸੈਕਟਰ-40 ਸਥਿਤ ਘਰੋਂ ਸੀ.ਬੀ.ਆਈ. ਨੂੰ ਸਾਢੇ ਸੱਤ ਕਰੋੜ ਰੁਪਏ ਕੈਸ਼ ਅਤੇ ਕਰੀਬ ਢਾਈ ਕਿਲੋ ਸੋਨਾ ਮਿਲਿਆ ਸੀ।