- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਚੰਡੀਗੜ੍ਹ 'ਚ ਬਣ ਰਹੀਆਂ ਮਾਂ ਦੁਰਗਾ ਦੀਆਂ ਮੂਰਤੀਆਂ, ਪੰਜਾਬ-ਹਰਿਆਣਾ ਤੇ ਹਿਮਾਚਲ ਤੱਕ ਹੁੰਦੀ ਸਪਲਾਈ; ਨਵਰਾਤਰੀ ਤੱਕ ਲੱਖਾਂ ਦਾ ਕਾਰੋਬਾਰ
ਨਵਰਾਤਰੀ ਤੋਂ ਪਹਿਲਾਂ ਚੰਡੀਗੜ੍ਹ ’ਚ ਮਾਂ ਦੁਰਗਾ ਦੀਆਂ ਮੂਰਤੀਆਂ ਬਣਾਉਣ ਦਾ ਕੰਮ ਜ਼ੋਰਾਂ-ਸ਼ੋਰਾਂ ਨਾਲ ਚੱਲ ਰਿਹਾ ਹੈ। ਇਹ ਮੂਰਤੀਆਂ ਪੰਜਾਬ, ਹਰਿਆਣਾ ਤੇ ਹਿਮਾਚਲ ਪ੍ਰਦੇਸ਼ ਤੱਕ ਭੇਜੀਆਂ ਜਾਂਦੀਆਂ ਹਨ, ਜਿਸ ਨਾਲ ਨਵਰਾਤਰੀ ਦੌਰਾਨ ਲੱਖਾਂ ਰੁਪਏ ਦਾ ਕਾਰੋਬਾਰ ਹੁੰਦਾ ਹੈ।
Posted By Paramjit Kaur
Publish Date: Sat, 03 Oct 2026 03:17 PM (IST)
Updated Date: Sat, 03 Oct 2026 03:19 PM (IST)
ਏਕਤਾ ਸ਼੍ਰੇਸ਼ਠ, ਚੰਡੀਗੜ੍ਹ : ਨਵਰਾਤਰੀ ਸ਼ੁਰੂ ਹੁੰਦੇ ਹੀ ਮਾਹੌਲ ਭਗਤੀ, ਆਸਥਾ ਤੇ ਤਿਉਹਾਰ ਦੇ ਰੰਗ ’ਚ ਰੰਗਿਆ ਜਾਵੇਗਾ। ਥਾਂ-ਥਾਂ ਧਾਰਮਿਕ ਸਮਾਗਮਾਂ ਦੇ ਨਾਲ ਸੱਭਿਆਚਾਰਕ ਪ੍ਰੋਗਰਾਮ ਵੀ ਸ਼ੁਰੂ ਹੋ ਜਾਣਗੇ। ਉੱਥੇ ਹੀ ਬੰਗਾਲੀ ਭਾਈਚਾਰੇ ਵੱਲੋਂ ਦੁਰਗਾ ਪੂਜਾ ਦੀਆਂ ਤਿਆਰੀਆਂ ਵੀ ਜ਼ੋਰ ਫੜਨਗੀਆਂ। ਪੰਡਾਲਾਂ ’ਚ ਮਾਂ ਦੁਰਗਾ ਦੀਆਂ ਮੂਰਤੀਆਂ ਸਥਾਪਿਤ ਕੀਤੀਆਂ ਜਾਣਗੀਆਂ। ਇਸ ਤੋਂ ਬਾਅਦ ਵਿਜੇਦਸ਼ਮੀ ਮੌਕੇ ਮੂਰਤੀਆਂ ਦਾ ਵਿਸਰਜਨ ਕੀਤਾ ਜਾਵੇਗਾ।
ਇਸ ਤਿਉਹਾਰ ਦੀ ਰੌਣਕ ਪਿੱਛੇ ਮੂਰਤੀਆਂ ਬਣਾਉਣ ਵਾਲੇ ਕਲਾਕਾਰਾਂ ਦੀ ਕਈ ਮਹੀਨਿਆਂ ਦੀ ਮਿਹਨਤ ਵੀ ਹੁੰਦੀ ਹੈ। ਚੰਡੀਗੜ੍ਹ ਦੀ ਗੱਲ ਕਰੀਏ ਤਾਂ ਇੱਥੇ ਕਲਾਕਾਰ ਮਿੱਟੀ ਨੂੰ ਆਕਾਰ ਦੇ ਕੇ ਮੂਰਤੀਆਂ ਤਿਆਰ ਕਰਨ ’ਚ ਜੁਟੇ ਹੋਏ ਹਨ। ਕਾਲੀਬਾੜੀ ਮੰਦਰ ’ਚ ਇਨ੍ਹੀਂ ਦਿਨੀਂ ਕਲਾਕਾਰ ਮੂਰਤੀਆਂ ਬਣਾ ਰਹੇ ਹਨ।
ਇਨ੍ਹਾਂ ਮੂਰਤੀਆਂ ਦੀ ਮੰਗ ਸਿਰਫ਼ ਸਥਾਨਕ ਪੱਧਰ ਤੱਕ ਸੀਮਿਤ ਨਹੀਂ ਹੈ। ਟ੍ਰਾਈਸਿਟੀ ਤੋਂ ਇਲਾਵਾ ਹਿਮਾਚਲ ਪ੍ਰਦੇਸ਼, ਪੰਜਾਬ ਤੇ ਹਰਿਆਣਾ ਤੋਂ ਵੀ ਲੋਕ ਇੱਥੇ ਮੂਰਤੀਆਂ ਲੈਣ ਪਹੁੰਚਦੇ ਹਨ। ਨਵਰਾਤਰੀ ਦੌਰਾਨ ਲੱਖਾਂ ਰੁਪਏ ਦਾ ਕਾਰੋਬਾਰ ਹੁੰਦਾ ਹੈ। ਕਈ ਕਲਾਕਾਰ ਕਰੀਬ 30 ਸਾਲਾਂ ਤੋਂ ਇੱਥੇ ਮੂਰਤੀਆਂ ਬਣਾਉਣ ਦਾ ਕੰਮ ਕਰ ਰਹੇ ਹਨ।
2 ਫੁੱਟ ਤੋਂ ਸਾਢੇ 11 ਫੁੱਟ ਤੱਕ ਦੀਆਂ ਮੂਰਤੀਆਂ
ਜਦੋਂ ਖੋਖਨ ਅਧਿਕਾਰੀ ਤੋਂ ਮੂਰਤੀਆਂ ਦੇ ਆਕਾਰ ਬਾਰੇ ਪੁੱਛਿਆ ਗਿਆ ਤਾਂ ਉਨ੍ਹਾਂ ਦੱਸਿਆ ਕਿ ਹਰ ਸਮਾਗਮ ਤੇ ਥਾਂ ਦੀ ਲੋੜ ਮੁਤਾਬਕ ਇੱਥੇ ਵੱਖ-ਵੱਖ ਆਕਾਰ ਦੀਆਂ ਮੂਰਤੀਆਂ ਤਿਆਰ ਕੀਤੀਆਂ ਜਾਂਦੀਆਂ ਹਨ।
ਇੱਥੇ ਕਰੀਬ 2 ਫੁੱਟ ਤੋਂ ਲੈ ਕੇ 9 ਫੁੱਟ ਤੱਕ ਦੀਆਂ ਮੂਰਤੀਆਂ ਬਣਾਈਆਂ ਜਾਂਦੀਆਂ ਹਨ, ਜਦਕਿ ਕੁਝ ਮੂਰਤੀਆਂ ਸਾਢੇ 11 ਫੁੱਟ ਤੱਕ ਦੀਆਂ ਵੀ ਤਿਆਰ ਕੀਤੀਆਂ ਜਾਂਦੀਆਂ ਹਨ। ਇਹ ਸਾਰੀਆਂ ਮੂਰਤੀਆਂ ਈਕੋ-ਫ੍ਰੈਂਡਲੀ ਹਨ। ਆਕਾਰ ਭਾਵੇਂ ਵੱਖ-ਵੱਖ ਹੋਵੇ, ਪਰ ਹਰ ਮੂਰਤੀ ’ਚ ਕਲਾਕਾਰ ਮਾਂ ਦੇ ਸਰੂਪ ਤੇ ਭਾਵਨਾਵਾਂ ਨੂੰ ਉਕੇਰਨ ਦੀ ਕੋਸ਼ਿਸ਼ ਕਰਦੇ ਹਨ।