ਗੁਲਾਬਗੜ੍ਹ ਦੀ ਫਿਰਨੀ ’ਤੇ ਮਚੀ ਹਫੜਾ-ਦਫੜੀ, ਕੈਂਟਰ ਦੀ ਲਪੇਟ 'ਚ ਆਉਣ ਨਾਲ ਟੁੱਟੀਆਂ ਬਿਜਲੀ ਦੀਆਂ ਤਾਰਾਂ; ਟਲਿਆ ਵੱਡਾ ਹਾਦਸਾ

ਪ੍ਰਾਪਤ ਜਾਣਕਾਰੀ ਅਨੁਸਾਰ ਕੈਂਟਰ ਚਾਲਕ ਪਿੰਡ ਦੇ ਰਸਤੇ ਰਾਹੀਂ ਇਕ ਫੈਕਟਰੀ ਵੱਲ ਸਾਮਾਨ ਲੈ ਕੇ ਜਾ ਰਿਹਾ ਸੀ। ਜਦੋਂ ਕੈਂਟਰ ਫਿਰਨੀ ਵਾਲੇ ਹਿੱਸੇ ਵਿਚ ਪਹੁੰਚਿਆ ਤਾਂ ਉੱਪਰੋਂ ਲੰਘ ਰਹੀਆਂ ਬਿਜਲੀ ਦੀਆਂ ਤਾਰਾਂ ਵਾਹਨ ਨਾਲ ਟਕਰਾ ਗਈਆਂ। ਤਾਰਾਂ ਦੇ ਖਿੱਚੇ ਜਾਣ ਨਾਲ ਬਿਜਲੀ ਦਾ ਖੰਭਾ ਵੀ ਪ੍ਰਭਾਵਿਤ ਹੋਇਆ ਅਤੇ ਤਾਰਾਂ ਕੈਂਟਰ ਉੱਪਰ ਆ ਡਿੱਗੀਆਂ। ਘਟਨਾ ਦੇ ਸਮੇਂ ਕੁਝ ਸਮੇਂ ਲਈ ਤਾਰਾਂ ਵਿਚੋਂ ਚੰਗਿਆੜੀਆਂ ਨਿਕਲਦੀਆਂ ਵੀ ਦਿਖਾਈ ਦਿੱਤੀਆਂ, ਜਿਸ ਕਾਰਨ ਆਸ-ਪਾਸ ਮੌਜੂਦ ਲੋਕਾਂ ਵਿਚ ਘਬਰਾਹਟ ਪੈਦਾ ਹੋ ਗਈ। ਹਾਦਸੇ ਤੋਂ ਤੁਰੰਤ ਬਾਅਦ ਬਿਜਲੀ ਵਿਭਾਗ ਨੂੰ ਸੂਚਿਤ ਕਰਕੇ ਸਪਲਾਈ ਬੰਦ ਕਰਵਾਈ ਗਈ, ਤਾਂ ਜੋ ਕਿਸੇ ਹੋਰ ਵਿਅਕਤੀ ਨਾਲ ਜਾਨਲੇਵਾ ਹਾਦਸਾ ਨਾ ਵਾਪਰ ਸਕੇ। ਖੁਸ਼ਕਿਸਮਤੀ ਨਾਲ ਘਟਨਾ ਵਿਚ ਕੈਂਟਰ ਚਾਲਕ ਜਾਂ ਕਿਸੇ ਰਾਹਗੀਰ ਦੇ ਜ਼ਖ਼ਮੀ ਹੋਣ ਦੀ ਸੂਚਨਾ ਨਹੀਂ ਹੈ। ਹਾਦਸੇ ਕਾਰਨ ਪਿੰਡ ਦੇ ਕੁਝ ਹਿੱਸਿਆਂ ਵਿੱਚ ਬਿਜਲੀ ਸਪਲਾਈ ਵੀ ਪ੍ਰਭਾਵਿਤ ਹੋਈ।