Chandigarh News : ਅੰਮ੍ਰਿਤਸਰ ਦੇ ਰਾਜਾ ਦੀ ਕਿੰਗ ਨੇ ਲੋਕਾਂ ਨੂੰ ਵੰਡੇ 500-500 ਰੁਪਏ ਦੇ ਨੋਟ ਤੇ ਫਾਸਟ ਫੂਡ, ਸੈਕਟਰ-8 ਸਥਿਤ ਸਨਾਤਨ ਧਰਮ ਮੰਦਰ ’ਚ ਲਾਇਆ ਪੈਸਿਆਂ ਦਾ ਲੰਗਰ

ਤਰੁਣ ਭਜਨੀ, ਚੰਡੀਗੜ੍ਹ : ਬਚਪਨ ਤੋਂ ਮੈਂ ਆਪਣੇ ਪਰਿਵਾਰ ਨੂੰ ਗੁਰਦੁਆਰਿਆਂ ਅਤੇ ਮੰਦਰਾਂ ਵਿੱਚ ਜਾ ਕੇ ਸੇਵਾ ਕਰਦੇ ਦੇਖਿਆ ਹੈ। ਮੈਂ ਵੀ ਇਸ ਸੇਵਾ ਦਾ ਹਿੱਸਾ ਰਿਹਾ ਹਾਂ। ਪੜ੍ਹਾਈ ਪੂਰੀ ਕਰਨ ਤੋਂ ਬਾਅਦ ਮੈਂ ਬਿਟਕੋਇਨ ਦੇ ਕਾਰੋਬਾਰ ਵਿੱਚ ਸਫਲ ਹੋਇਆ ਅਤੇ ਅੱਜ ਮੇਰੇ ਕੋਲ ਇੰਨੇ ਪੈਸੇ ਹਨ ਕਿ ਮੈਂ ਕਿਸੇ ਦੀ ਲੋੜ ਪੂਰੀ ਕਰ ਸਕਾਂ। ਇਸ ਲਈ ਮੈਂ ਲਗਜ਼ਰੀ ਚੀਜ਼ਾਂ ਦਾ ਲੰਗਰ ਲਾਉਂਦਾ ਹਾਂ। ਇਹ ਕਹਿਣਾ ਹੈ ਅੰਮ੍ਰਿਤਸਰ ਦੇ ਰਾਜਾ ਦੀ ਕਿੰਗ (ਰਾਕੇਸ਼ ਤ੍ਰੇਹਨ) ਦਾ, ਜਿਨ੍ਹਾਂ ਨੇ ਮੰਗਲਵਾਰ ਨੂੰ ਸੈਕਟਰ-8 ਸਥਿਤ ਸਨਾਤਨ ਧਰਮ ਮੰਦਰ ਵਿੱਚ 500-500 ਰੁਪਏ ਦੇ ਨੋਟਾਂ ਅਤੇ ਫਾਸਟ ਫੂਡ ਦਾ ਲੰਗਰ ਲਾਇਆ।

ਅੰਮ੍ਰਿਤਸਰ ਤੋਂ ਲੰਗਰ ਲਾਉਣ ਲਈ ਪਹੁੰਚੇ ਰਾਜਾ ਦੀ ਕਿੰਗ ਨੇ ਦੱਸਿਆ ਕਿ ਧਾਰਮਿਕ ਗ੍ਰੰਥਾਂ ਵਿੱਚ ਕਿਹਾ ਗਿਆ ਹੈ ਕਿ ਆਪਣੀ ਨੇਕ ਕਮਾਈ ਦਾ ਘੱਟੋ-ਘੱਟ ਦਸਵਾਂ ਹਿੱਸਾ ਦਾਨ ਕਰਨਾ ਚਾਹੀਦਾ ਹੈ। ਮੈਂ ਵੀ ਇਸ ਗੱਲ ਨੂੰ ਫਾਲੋ ਕੀਤਾ ਅਤੇ ਸਮੇਂ-ਸਮੇਂ ’ਤੇ ਲੰਗਰ ਲਾ ਕੇ ਉਹ ਚੀਜ਼ਾਂ ਦਾਨ ਕਰਦਾ ਹਾਂ, ਜੋ ਜਾਂ ਤਾਂ ਮਨੁੱਖ ਦੀਆਂ ਮੁੱਢਲੀਆਂ ਜ਼ਰੂਰਤਾਂ ਹੁੰਦੀਆਂ ਹਨ ਜਾਂ ਫਿਰ ਉਸ ਦਾ ਸੁਪਨਾ ਹੁੰਦੀਆਂ ਹਨ।

ਉਨ੍ਹਾਂ ਦੱਸਿਆ ਕਿ ਹੁਣ ਤੱਕ ਉਹ 50 ਤੋਂ ਵੱਧ ਲੰਗਰ ਲਾ ਚੁੱਕੇ ਹਨ। ਇਹ ਲੰਗਰ ਅੰਮ੍ਰਿਤਸਰ ਤੋਂ ਇਲਾਵਾ ਚੰਡੀਗੜ੍ਹ ਵਿੱਚ ਵੀ ਲਾਏ ਗਏ ਹਨ।

ਕਾਰੋਬਾਰੀ ਪਰਿਵਾਰ ਵਿੱਚ ਪਲਿਆ-ਵਧਿਆ, ਪਰ ਦੂਜਿਆਂ ਲਈ ਕੁਝ ਕਰਨ ਦਾ ਜਜ਼ਬਾ ਬਚਪਨ ਤੋਂ

ਰਾਜਾ ਦੀ ਕਿੰਗ ਨੇ ਕਿਹਾ ਕਿ ਮੈਂ ਇੱਕ ਕਾਰੋਬਾਰੀ ਪਰਿਵਾਰ ਵਿੱਚ ਪਲਿਆ-ਵਧਿਆ ਹਾਂ। ਪਿਤਾ ਬੱਬੂ ਸ਼ਾਹ ਕੱਪੜਿਆਂ ਦਾ ਕਾਰੋਬਾਰ ਕਰਦੇ ਸਨ। ਮੈਂ ਆਪਣੇ ਪਰਿਵਾਰ ਨੂੰ ਹਮੇਸ਼ਾ ਦੂਜਿਆਂ ਦੀ ਮਦਦ ਕਰਦੇ ਹੋਏ ਦੇਖਿਆ ਹੈ। ਅੱਜ ਮੇਰਾ ਬਿਟਕੋਇਨ ਦਾ ਵਧੀਆ ਕਾਰੋਬਾਰ ਹੈ, ਜਿਸ ਕਾਰਨ ਲੋਕ ਮੈਨੂੰ ਰਾਜਾ ਦੀ ਕਿੰਗ ਦੇ ਨਾਮ ਨਾਲ ਜਾਣਦੇ ਹਨ।

ਉਨ੍ਹਾਂ ਦੱਸਿਆ ਕਿ ਭਵਿੱਖ ਵਿੱਚ ਉਹ ਪੈਟਰੋਲ ਦਾ ਲੰਗਰ ਅਤੇ ਆਈਫੋਨ ਦਾ ਲੰਗਰ ਵੀ ਲਾਉਣਗੇ, ਤਾਂ ਜੋ ਆਈਫੋਨ ਲੈਣ ਦੀ ਇੱਛਾ ਰੱਖਣ ਵਾਲੇ ਲੋਕ ਆਪਣੀ ਇਹ ਹਸਰਤ ਪੂਰੀ ਕਰ ਸਕਣ।