'ਪਾਰਕ ਨਹੀਂ ਪਹੁੰਚੀ ਤਾਂ ਜ਼ਿੰਦਾ ਨਹੀਂ ਛੱਡਾਂਗੇ...': ਗੁੰਡਾਗਰਦੀ ਤੇ ਧਮਕੀਆਂ ਤੋਂ ਪਰੇਸ਼ਾਨ ਮੁਟਿਆਰ ਨੇ ਬਠਿੰਡਾ ਦੀ ਝੀਲ 'ਚ ਮਾਰੀ ਛਾਲ

ਮ੍ਰਿਤਕਾ ਦੇ ਪਿਤਾ ਸ਼ਿਵਰਾਜ ਸਿੰਘ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਦੱਸਿਆ ਕਿ ਉਨ੍ਹਾਂ ਦੀ ਧੀ ਪਿੰਦਰ ਕੌਰ 31 ਅਕਤੂਬਰ ਨੂੰ ਕਾਲਜ ਤੋਂ ਛੁੱਟੀ ਹੋਣ ਤੋਂ ਬਾਅਦ ਪਿੰਡ ਭਾਗੂ ਵਿੱਚ ਆਪਣੀ ਭੂਆ ਕਿਰਨਦੀਪ ਕੌਰ ਦੇ ਘਰ ਗਈ ਸੀ। ਐਤਵਾਰ ਦੀ ਛੁੱਟੀ ਬਿਤਾਉਣ ਤੋਂ ਬਾਅਦ 2 ਨਵੰਬਰ ਨੂੰ ਉਹ ਸਵੇਰੇ ਨਿੱਜੀ ਬੱਸ ਰਾਹੀਂ ਬਠਿੰਡਾ ਲਈ ਰਵਾਨਾ ਹੋਈ ਸੀ। ਸ਼ਿਵਰਾਜ ਸਿੰਘ ਅਨੁਸਾਰ, 2 ਨਵੰਬਰ ਦੀ ਸਵੇਰ ਕਰੀਬ 9 ਵਜੇ ਪਿੰਦਰ ਨੇ ਆਪਣੀ ਮਾਂ ਜਸਵੀਰ ਕੌਰ ਨੂੰ ਫ਼ੋਨ ਕੀਤਾ। ਉਸ ਨੇ ਦੱਸਿਆ ਕਿ ਉਹ ਉਸ ਦਿਨ ਹਸਪਤਾਲ ਨਹੀਂ ਜਾਵੇਗੀ ਅਤੇ ਪਹਿਲਾਂ ਕਾਲਜ ਜਾਣ ਤੋਂ ਬਾਅਦ ਜਾਗਰ ਪਾਰਕ ਪਹੁੰਚੇਗੀ। ਫ਼ੋਨ 'ਤੇ ਪਿੰਦਰ ਕਾਫ਼ੀ ਘਬਰਾਈ ਹੋਈ ਸੀ। ਉਸ ਨੇ ਮਾਂ ਨੂੰ ਦੱਸਿਆ ਕਿ ਉਹ ਪਿਛਲੇ ਕੁਝ ਸਮੇਂ ਤੋਂ ਮਾਨਸਿਕ ਤਣਾਅ ਅਤੇ ਪਰੇਸ਼ਾਨੀ ਵਿੱਚੋਂ ਲੰਘ ਰਹੀ ਹੈ ਅਤੇ ਕੁਝ ਨੌਜਵਾਨ ਉਸ ਨੂੰ ਲਗਾਤਾਰ ਤੰਗ ਕਰ ਰਹੇ ਹਨ।