ਪੰਜਾਬ ਦੀ ਸਿਆਸੀ 'ਚ ਹਲਚਲ : ਪੰਨੂ ਨੇ ਘੇਰਿਆ ਮਜੀਠੀਆ, ਕਿਹਾ- ਦੱਸਣ ਸੱਤਾ ਤੇ ਪਿੰਦੀ ਨਾਲ ਕੀ ਹੈ ਸਬੰਧ; ਜੇ ਫੋਟੋਆਂ ਦੀ ਹੀ ਸਿਆਸਤ ਕਰਨੀ ਤਾਂ ਸਾਡੇ ਕੋਲ ਵੀ...

ਗੁਰਤੇਜ ਸਿੰਘ ਸਿੱਧੂ, ਪੰਜਾਬੀ ਜਾਗਰਣ, ਬਠਿੰਡਾ: ‘ਆਪ’ ਆਗੂ ਬਲਤੇਜ ਪੰਨੂ ਨੇ ਬਠਿੰਡਾ ’ਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ਼੍ਰੋਮਣੀ ਅਕਾਲੀ ਦਲ ਦੇ ਆਗੂ ਬਿਕਰਮ ਮਜੀਠੀਆ ’ਤੇ ਤਿੱਖੇ ਸਿਆਸੀ ਹਮਲੇ ਕੀਤੇ। ਉਨ੍ਹਾਂ ਕਿਹਾ ਕਿ ਜੇ ਸਿਆਸਤ ਸਿਰਫ਼ ਤਸਵੀਰਾਂ ਦਿਖਾਉਣ ਤੱਕ ਸੀਮਤ ਹੈ ਤਾਂ ਉਨ੍ਹਾਂ ਕੋਲ ਵੀ ਬਹੁਤ ਸਾਰੀਆਂ ਤਸਵੀਰਾਂ ਹਨ। ਪੰਨੂ ਨੇ ਮਜੀਠੀਆ ਤੋਂ ਸਵਾਲ ਕੀਤਾ ਕਿ ਸਤਪ੍ਰੀਤ ਸਿੰਘ ਸੱਤਾ ਅਤੇ ਪਰਮਿੰਦਰ ਸਿੰਘ ਉਰਫ਼ ਪਿੰਦੀ ਦੇ ਸ਼੍ਰੋਮਣੀ ਅਕਾਲੀ ਦਲ ਨਾਲ ਕੀ ਸਬੰਧ ਰਹੇ ਹਨ ਅਤੇ ਉਨ੍ਹਾਂ ਨੂੰ ਕਿਹੜੇ ਮੌਕਿਆਂ ’ਤੇ ਮੁੱਖ ਮਹਿਮਾਨ ਵਜੋਂ ਸੱਦਿਆ ਜਾਂਦਾ ਰਿਹਾ। ਪੰਨੂ ਨੇ ਦਾਅਵਾ ਕੀਤਾ ਕਿ ਪਿੰਦੀ ਦੇ ਇਕ ਪੁੱਤਰ ਦੀ ਕੈਨੇਡਾ ’ਚ ਗੈਂਗਵਾਰ ਦੌਰਾਨ ਮੌਤ ਹੋਈ, ਜਦਕਿ ਦੂਜੇ ਪੁੱਤਰ ਨੂੰ ਐੱਫਬੀਆਈ ਦੇ ਨਸ਼ਿਆਂ ਖ਼ਿਲਾਫ਼ ਆਪ੍ਰੇਸ਼ਨ ਦੌਰਾਨ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਉਨ੍ਹਾਂ ਮਜੀਠੀਆ ਤੋਂ ਉਨ੍ਹਾਂ ਦੇ ਵਿਆਹ ’ਚ ਸੱਤਾ ਤੇ ਪਿੰਦੀ ਦੀ ਭੂਮਿਕਾ ਬਾਰੇ ਵੀ ਸਵਾਲ ਕੀਤਾ। ਪੰਨੂ ਨੇ ਕਿਹਾ ਕਿ ਇਸ ਸਬੰਧੀ ਤਸਵੀਰਾਂ ਉਨ੍ਹਾਂ ਕੋਲ ਹਨ ਅਤੇ ਲੋੜ ਪੈਣ ’ਤੇ ਜਨਤਕ ਕੀਤੀਆਂ ਜਾਣਗੀਆਂ।