ਪੀਐਮ ਵਿਸ਼ਵਕਰਮਾ ਦੀ ਨੌਵੀਂ ਮਾਰਕੀਟਿੰਗ ਮੁਹਿੰਮ ਤਹਿਤ ਕਾਰੀਗਰਾਂ ਤਕ ਪੁੱਜੇ ਏਆਈ ਸੰਦ

ਸੀਨੀਅਰ ਰਿਪੋਰਟਰ, ਪੰਜਾਬੀ ਜਾਗਰਣ ਬਠਿੰਡਾ ਪੀਐਮ ਵਿਸ਼ਵਕਰਮਾ ਬ੍ਰਾਂਡਿੰਗ ਅਤੇ ਮਾਰਕੀਟਿੰਗ ਮੁਹਿੰਮ ਤਹਿਤ ਜ਼ਿਲ੍ਹਾ ਬਠਿੰਡਾ ਦੇ ਰਵਾਇਤੀ ਕਾਰੀਗਰਾਂ ਲਈ ਵਿਸ਼ੇਸ਼ ਜਾਗਰੂਕਤਾ ਸੈਮੀਨਾਰ ਆਯੋਜਤ ਕੀਤਾ ਗਿਆ। 17 ਸਤੰਬਰ ਨੂੰ ਇਸ ਸਕੀਮ ਦੇ ਤਿੰਨ ਸਾਲ ਪੂਰੇ ਹੋ ਰਹੇ ਹਨ ਅਤੇ ਸਲੀਮ ਤਹਿਤ ਆਮ ਕਾਰੀਗਰਾਂ ਨੂੰ ਵੱਖ ਵੱਖ ਲਾਭ ਦਿੱਤੇ ਜੇ ਰਹੇ ਹਨ। ਇਹ ਜਾਣਕਾਰੀ ਐਮਐਸਐਮਈ ਵਿਕਾਸ ਅਤੇ ਸਹੂਲਤ ਦਫ਼ਤਰ ਲੁਧਿਆਣਾ ਦੇ ਮੈਡਮ ਜਸਪ੍ਰੀਤ ਕੌਰ ਨੇ ਸਾਂਝੀ ਕੀਤੀ। ਕਾਰੀਗਰਾਂ ਨੂੰ ਸਕੀਮ ਬਾਬਤ ਵਧੇਰੀ ਜਾਨਕਾਰੀ ਦਿੱਤੀ ਗਈ ਅਤੇ ਉਨ੍ਹਾਂ ਨੂੰ ਆਰਟੀਫਿਸ਼ਲ ਇੰਟੈਲੀਜੈਂਸ ਨਾਲ ਬਣੇ ਸੰਦਾਂ ਬਾਰੇ ਦੱਸਿਆ ਗਿਆ। ਕਾਰੀਗਰਾਂ ਨੂੰ ਡਿਜ਼ਾਈਨ, ਬ੍ਰਾਂਡਿੰਗ ਅਤੇ ਮਾਰਕੀਟਿੰਗ ਲਈ ਏਆਈ ਸੰਦਾਂ ਦੀ ਸਿਖਲਾਈ ਦਿੱਤੀ ਗਈ, ਜਿਸ ਵਿਚ ਕੁੱਲ 120 ਕਾਰੀਗਰ ਸ਼ਾਮਲ ਹੋਏ, ਜਿਨ੍ਹਾਂ ਵਿੱਚ ਸਕੀਮ ਦੇ 90 ਰਜਿਸਟਰਡ ਲਾਭਪਾਤਰੀ ਅਤੇ ਜ਼ਿਲ੍ਹੇ ਦੇ ਲਗਭਗ 30 ਅਜਿਹੇ ਕਾਰੀਗਰ ਸਨ ਜਿਨ੍ਹਾਂ ਨੇ ਨਾਮ ਤਾਂ ਦਰਜ ਕਰਵਾ ਲਿਆ ਹੈ ਪਰ ਜਿਨ੍ਹਾਂ ਦੀ ਰਜਿਸਟ੍ਰੇਸ਼ਨ ਬਾਕੀ ਹੈ। ਇਹ ਪ੍ਰੋਗਰਾਮ ਕੇਂਦਰੀ ਸੂਖਮ, ਲਘੂ ਅਤੇ ਦਰਮਿਆਨੇ ਉੱਦਮ ਮੰਤਰਾਲਾ ਹੇਠ ਐਮਐਸਐਮਈ ਵਿਕਾਸ ਅਤੇ ਸਹੂਲਤ ਦਫ਼ਤਰ, ਲੁਧਿਆਣਾ ਨੇ ਪੀਐਮ ਵਿਸ਼ਵਕਰਮਾ ਸਕੀਮ ਦੀ ਰਾਜ ਪੱਧਰੀ ਪ੍ਰੋਜੈਕਟ ਪ੍ਰਬੰਧਨ ਇਕਾਈ ਨਾਲ ਮਿਲ ਕੇ ਕਰਵਾਇਆ। ਇਸ ਦੌਰਾਨ ਇੰਡੀਆ ਪੋਸਟ ਪੇਮੈਂਟਸ ਬੈਂਕ ਨੇ ਡਿਜੀਟਲ ਭੁਗਤਾਨ ਲੈਣ ਲਈ 15 ਕਿਊਆਰ ਕੋਡ ਜਾਰੀ ਕੀਤੇ ਅਤੇ ਜ਼ਿਲ੍ਹਾ ਉਦਯੋਗ ਕੇਂਦਰ ਦੇ ਅਮਲੇ ਨੇ ਮੌਕੇ ਉੱਤੇ ਤਿੰਨ ਨਵੀਆਂ ਉਦਮ ਰਜਿਸਟ੍ਰੇਸ਼ਨਾਂ ਮੁਕੰਮਲ ਕੀਤੀਆਂ। 120 ਭਾਗੀਦਾਰਾਂ ਵਿੱਚੋਂ 15 ਔਰਤਾਂ ਸਨ, ਜਿਨ੍ਹਾਂ ਕਾਰੀਗਰਾਂ ਨੂੰ ਕਿਊਆਰ ਕੋਡ ਮਿਲਿਆ, ਉਹ ਅੱਜ ਸ਼ਾਮ ਤੋਂ ਗਾਹਕ ਕੋਲੋਂ ਡਿਜੀਟਲ ਭੁਗਤਾਨ ਲੈਣ ਦੇ ਯੋਗ ਹੋ ਗਏ, ਬਿਨਾਂ ਕਿਸੇ ਦਫ਼ਤਰ ਦੇ ਦੂਜੇ ਗੇੜੇ ਅਤੇ ਬਿਨਾਂ ਕਿਸੇ ਫ਼ੀਸ ਦੇ। ਉਦਮ ਰਜਿਸਟ੍ਰੇਸ਼ਨ ਕਰਵਾਉਣ ਵਾਲੇ ਰਸਮੀ ਮਾਨਤਾ ਪ੍ਰਾਪਤ ਉੱਦਮ ਲੈ ਕੇ ਪਰਤੇ, ਜਿਸ ਨਾਲ ਕਰਜ਼ੇ ਅਤੇ ਸਰਕਾਰੀ ਖ਼ਰੀਦ ਤਕ ਪਹੁੰਚ ਤੈਅ ਹੁੰਦੀ ਹੈ। ਇਸ ਦੌਰਾਨ ਅਧਿਕਾਰੀਆਂ ਨੇ ਦੱਸਿਆ ਕਿ ਅਧੂਰੀ ਰਜਿਸਟ੍ਰੇਸ਼ਨ ਵਾਲੇ ਕਾਰੀਗਰਾਂ ਦੀ ਹਾਜ਼ਰੀ ਘੱਟ ਸੀ। ਇਸੇ ਪੜਾਅ ਉੱਤੇ ਕਾਰੀਗਰ ਸਭ ਤੋਂ ਵੱਧ ਪਿੱਛੇ ਰਹਿ ਜਾਂਦੇ ਹਨ, ਕਿਉਂਕਿ ਪਹਿਲਾਂ ਕਦਮ ਪੁੱਟਣ ਦੇ ਬਾਵਜੂਦ ਉਨ੍ਹਾਂ ਦੇ ਹੱਥ ਕੁਝ ਨਹੀਂ ਆਇਆ ਹੁੰਦਾ, ਇਸੇ ਲਈ ਦੋਵੇਂ ਡੈਸਕ ਉਨ੍ਹਾਂ ਲਈ ਵੀ ਉਹੀ ਸ਼ਰਤਾਂ ਉੱਤੇ ਖੁੱਲ੍ਹੇ ਰੱਖੇ ਗਏ। ਅੱਜ ਅੱਠ ਸੈਸ਼ਨ ਕਰਵਾਏ ਗਏ। ਏਆਈ ਸੈਸ਼ਨ ਵਿਚ ਉਤਪਾਦ ਦੀ ਫ਼ੋਟੋਗ੍ਰਾਫ਼ੀ, ਉਤਪਾਦ ਦਾ ਵੇਰਵਾ, ਗਾਹਕ ਨਾਲ ਗੱਲਬਾਤ ਅਤੇ ਏਆਈ ਦੀ ਅਮਲੀ ਸਿਖਲਾਈ ਸ਼ਾਮਲ ਰਹੀ, ਜਦਕਿ ਹੋਰ ਸੈਸ਼ਨਾਂ ਵਿੱਚ ਲੇਬਲਿੰਗ ਅਤੇ ਪੈਕੇਜਿੰਗ, ਕੀਮਤ ਨਿਰਧਾਰਨ ਅਤੇ ਲਾਗਤ, ਆਨਲਾਈਨ ਵਿਕਰੀ ਤੇ ਡਿਜੀਟਲ ਮਾਰਕੀਟਿੰਗ, ਵਿੱਤੀ ਸਾਖਰਤਾ ਤੇ ਬੈਂਕਿੰਗ, ਰਾਜ ਸਰਕਾਰ ਦੀਆਂ ਸਹਾਇਤਾ ਸਕੀਮਾਂ ਤੇ ਪੀਐਮਈਜੀਪੀ, ਪੀਐਮਐਫਐਮਈ ਤੇ ਮੁਦਰਾ ਵਰਗੀਆਂ ਕੇਂਦਰੀ ਸਕੀਮਾਂ ਦੀ ਜਾਣਕਾਰੀ ਦਿੱਤੀ ਗਈ। ਪ੍ਰੋਗਰਾਮ ਨੇ ਐਮਐਸਐਮਈ ਦਫ਼ਤਰ, ਪੀਐਮ ਵਿਸ਼ਵਕਰਮਾ ਰਾਜ ਪੱਧਰੀ ਪ੍ਰੋਜੈਕਟ ਪ੍ਰਬੰਧਨ ਇਕਾਈ ਪੰਜਾਬ, ਜ਼ਿਲ੍ਹਾ ਉਦਯੋਗ ਕੇਂਦਰ ਅਤੇ ਇੰਡੀਆ ਪੋਸਟ ਪੇਮੈਂਟਸ ਬੈਂਕ ਨੂੰ ਇੱਕ ਮੰਚ ਉੱਤੇ ਲਿਆਂਦਾ। 17 ਸਤੰਬਰ 2023 ਨੂੰ ਸ਼ੁਰੂ ਹੋਈ ਪੀਐਮ ਵਿਸ਼ਵਕਰਮਾ ਸਕੀਮ 18 ਰਵਾਇਤੀ ਕਿੱਤਿਆਂ ਦੇ ਕਾਰੀਗਰਾਂ ਅਤੇ ਸ਼ਿਲਪਕਾਰਾਂ ਨੂੰ ਕਵਰ ਕਰਦੀ ਹੈ। ਇਸ ਵਿੱਚ ਸਰਟੀਫਿਕੇਟ ਅਤੇ ਪਛਾਣ ਪੱਤਰ ਰਾਹੀਂ ਮਾਨਤਾ, ਭੱਤੇ ਸਮੇਤ ਹੁਨਰ ਸਿਖਲਾਈ, ਟੂਲਕਿੱਟ ਪ੍ਰੋਤਸਾਹਨ, ਰਿਆਇਤੀ ਦਰ ਉੱਤੇ ਬਿਨਾਂ ਗਾਰੰਟੀ ਉੱਦਮ ਕਰਜ਼ਾ, ਡਿਜੀਟਲ ਲੈਣ ਦੇਣ ਉੱਤੇ ਪ੍ਰੋਤਸਾਹਨ ਅਤੇ ਮੰਡੀਕਰਨ ਸਹਾਇਤਾ ਸ਼ਾਮਲ ਹੈ। ਅੱਜ ਦੀ ਮੁਹਿੰਮ ਨਾਲ ਲੁਧਿਆਣਾ ਦਫ਼ਤਰ ਪੰਜਾਬ ਦੇ ਜ਼ਿਲ੍ਹਿਆਂ ਵਿੱਚ ਅਜਿਹੇ ਨੌਂ ਪ੍ਰੋਗਰਾਮ ਕਰਵਾ ਚੁੱਕਾ ਹੈ, ਇਸ ਤੋਂ ਪਿਛਲਾ ਪ੍ਰੋਗਰਾਮ ਅਗਸਤ ਮਹੀਨੇ ਵਿੱਚ ਸੰਗਰੂਰ ਵਿਖੇ ਹੋਇਆ ਸੀ।