ਜ਼ਰੂਰਤਮੰਦ ਔਰਤਾਂ ਲਈ ਮੁਫ਼ਤ ਸਿਲਾਈ ਸੈਂਟਰ ਦਾ ਕੀਤਾ ਉਦਘਾਟਨ

ਧਰਮਪਾਲ ਸਿੰਘ, ਪੰਜਾਬੀ ਜਾਗਰਣ ਸੰਗਤ ਮੰਡੀ ਪਿੰਡ ਮਹਿਤਾ ਵਿਖੇ ਜ਼ਰੂਰਤਮੰਦ ਔਰਤਾਂ ਅਤੇ ਲੜਕੀਆਂ ਨੂੰ ਆਤਮ-ਨਿਰਭਰ ਬਣਾਉਣ ਦੇ ਮਕਸਦ ਨਾਲ ਮੁਫ਼ਤ ਸਿਲਾਈ ਸੈਂਟਰ ਦੀ ਸ਼ੁਰੂਆਤ ਕੀਤੀ ਗਈ ਹੈ। ਇਸ ਸਿਲਾਈ ਸੈਂਟਰ ਦਾ ਉਦਘਾਟਨ ਮਰਹੂਮ ਐਮਐਲਏ ਮੱਖਣ ਸਿੰਘ ਦੀ ਨੂੰਹ ਰਿਤੂ ਸਵੇਰਾ ਵੱਲੋਂ ਕੀਤਾ ਗਿਆ। ਪਿੰਡ ’ਚ ਸ਼ੁਰੂ ਕੀਤਾ ਗਿਆ ਇਹ ਦੂਜਾ ਮੁਫ਼ਤ ਸਿਲਾਈ ਸੈਂਟਰ ਹੈ। ਪਿੰਡ ਵਾਸੀ ਸਮਾਜਸੇਵੀ ਪਿੰਟੂ ਸ਼ਰਮਾ ਨੇ ਦੱਸਿਆ ਗਿਆ ਕਿ ਸਿਲਾਈ ਸੈਂਟਰ ਵਿਖੇ ਇਕ ਮਹੀਨੇ ਦਾ ਸਿਲਾਈ-ਕਢਾਈ ਕੋਰਸ ਕਰਵਾਇਆ ਜਾਵੇਗਾ, ਜਿਸ ਲਈ ਜ਼ਰੂਰਤਮੰਦ ਔਰਤਾਂ ਤੇ ਲੜਕੀਆਂ ਤੋਂ ਕੋਈ ਫੀਸ ਨਹੀਂ ਲਈ ਜਾਵੇਗੀ। ਇਸ ਉਪਰਾਲੇ ਦਾ ਮੁੱਖ ਉਦੇਸ਼ ਪੇਂਡੂ ਖੇਤਰ ਦੀਆਂ ਧੀਆਂ-ਭੈਣਾਂ ਨੂੰ ਹੁਨਰਮੰਦ ਬਣਾਉਣਾ ਤੇ ਭਵਿੱਖ ’ਚ ਉਨ੍ਹਾਂ ਨੂੰ ਆਪਣੇ ਪੈਰਾਂ ’ਤੇ ਖੜ੍ਹੇ ਹੋਣ ਦੇ ਯੋਗ ਬਣਾਉਣਾ ਹੈ। ਉਨ੍ਹਾਂ ਦੱਸਿਆ ਕਿ ਸੈਂਟਰ ਦੀ ਸ਼ੁਰੂਆਤ ਮੌਕੇ ਕਰਵਾਏ ਗਏ ਵਿਸ਼ੇਸ਼ ਪ੍ਰੋਗਰਾਮ ਦੌਰਾਨ ਕਰੀਬ 30 ਬੱਚੀਆਂ, ਔਰਤਾਂ ਅਤੇ ਭੈਣਾਂ ਦੇ ਰਜਿਸਟਰੇਸ਼ਨ ਫਾਰਮ ਭਰੇ ਗਏ। ਰਜਿਸਟਰੇਸ਼ਨ ਤੋਂ ਬਾਅਦ ਇਹ ਸਿਖਿਆਰਥਣਾਂ ਜਲਦ ਹੀ ਸਿਖਲਾਈ ਸ਼ੁਰੂ ਕਰਨਗੀਆਂ। ਸਮਾਗਮ ਦੌਰਾਨ ਪਿੰਟੂ ਸ਼ਰਮਾ ਮਹਿਤਾ, ਰਜਿੰਦਰ ਕੌਰ, ਡਾ. ਕਿਰਨਾ, ਮੈਡਮ ਪ੍ਰਦੀਪ ਕੌਰ ਪਿੰਡ ਧੁਨੀਕੇ ਸਮੇਤ ਸੋਸਾਇਟੀ ਦੇ ਮੈਂਬਰ ਅਤੇ ਸਿਲਾਈ ਸਿੱਖਣ ਵਾਲੀਆਂ ਲੜਕੀਆਂ ਹਾਜ਼ਰ ਸਨ।