ਡਿਜੀਟਲ ਡਾਕੂਆਂ ਦਾ ਜਾਲ, ਡਰ ਦੇ ਸੌਦੇ ’ਚ ਲੁੱਟੇ ਜਾ ਰਹੇ ਪੰਜਾਬੀ; ਨਵੀਂ ਤਕਨੀਕ ਨਾਲ ਠੱਗਾਂ ਨੇ ਲੱਭੇ ਨਵੇਂ ਰਸਤੇ

ਗੁਰਤੇਜ ਸਿੰਘ ਸਿੱਧੂ, ਪੰਜਾਬੀ ਜਾਗਰਣ, ਬਠਿੰਡਾ। ਅਪਰਾਧ ਦਾ ਰੂਪ ਸਮੇਂ ਦੇ ਨਾਲ ਬਦਲ ਰਿਹਾ ਹੈ। ਹੁਣ ਅਪਰਾਧੀ ਹਥਿਆਰ ਲੈ ਕੇ ਘਰਾਂ ਵਿੱਚ ਦਾਖਲ ਹੋਣ ਦੀ ਬਜਾਏ ਮੋਬਾਈਲ ਦੀ ਸਕਰੀਨ ਪਿੱਛੇ ਬੈਠ ਕੇ ਲੋਕਾਂ ਦੀ ਜ਼ਿੰਦਗੀ ਭਰ ਦੀ ਕਮਾਈ ’ਤੇ ਹੱਥ ਸਾਫ਼ ਕਰ ਰਹੇ ਹਨ। ਇੰਟਰਨੈੱਟ ਅਤੇ ਡਿਜੀਟਲ ਲੈਣ-ਦੇਣ ਨੇ ਜ਼ਿੰਦਗੀ ਸੌਖੀ ਕੀਤੀ ਹੈ ਪਰ ਇਸੇ ਤਕਨੀਕ ਨੇ ਸਾਈਬਰ ਠੱਗਾਂ ਨੂੰ ਵੀ ਨਵੇਂ ਰਸਤੇ ਦੇ ਦਿੱਤੇ ਹਨ।

ਕਦੇ ਵੱਡੇ ਮੁਨਾਫ਼ੇ ਦਾ ਲਾਲਚ, ਕਦੇ ਪੁਲਿਸ ਦਾ ਡਰ, ਕਦੇ ਬੈਂਕ ਖਾਤਾ ਬੰਦ ਕਰਨ ਦੀ ਧਮਕੀ ਅਤੇ ਕਦੇ ਰਿਸ਼ਤੇਦਾਰ ਜਾਂ ਦੋਸਤ ਦੀ ਆਵਾਜ਼ ਦੀ ਨਕਲ ਕਰਕੇ ਇਹ ਲੋਕਾਂ ਦੇ ਭਰੋਸੇ ਨੂੰ ਹੀ ਹਥਿਆਰ ਬਣਾ ਰਹੇ ਹਨ। ਇਸ ਲਈ ਸਾਈਬਰ ਅਪਰਾਧੀ ਹੁਣ ਆਮ ਲੋਕਾਂ ਲਈ ‘ਡਿਜੀਟਲ ਡਾਕੂ’ ਬਣਦੇ ਜਾ ਰਹੇ ਹਨ।