‘ਚਿੱਟੇ’ ਨੇ ਉਜਾੜੇ ਹੱਸਦੇ-ਵੱਸਦੇ ਘਰ: ਇੱਕੋ ਮੁਹੱਲੇ ਦੇ 10 ਘਰਾਂ ਦੇ ਬੁੱਝੇ ਚਿਰਾਗ

ਯਾਦਵਿੰਦਰ ਸਿੰਘ ਭੁੱਲਰ, ਪੰਜਾਬੀ ਜਾਗਰਣ, ਬਰਨਾਲਾ : ਜ਼ਿਲ੍ਹਾ ਬਰਨਾਲਾ ਦੇ ਇਤਿਹਾਸਿਕ ਕਸਬੇ ਹੰਡਿਆਇਆ ਵਿਖੇ ਨੌਵੇਂ ਪਾਤਸ਼ਾਹ ਸ੍ਰੀ ਗੁਰੂ ਤੇਗ ਬਹਾਦਰ ਜੀ ਦੀ ਚਰਨ-ਛੋਹ ਪ੍ਰਾਪਤ ਗੁਰਦੁਆਰਾ ਸਾਹਿਬ ਵਿਖੇ ਸ਼ੁੱਕਰਵਾਰ ਨੂੰ ਬਹੁਤ ਹੀ ਦਰਦਨਾਕ ਮੰਜ਼ਰ ਦੇਖਣ ਨੂੰ ਮਿਲਿਆ। ਇੱਥੇ ਇੱਕੋ ਮੁਹੱਲੇ ਦੀਆਂ ਕਰੀਬ 10 ਲਾਚਾਰ ਔਰਤਾਂ ਨੇ ਭਰੇ ਇਕੱਠ ਵਿੱਚ ਨਸ਼ੇ ਦੀ ਭੇਂਟ ਚੜ੍ਹੇ ਆਪਣੇ ਜਵਾਨ ਪੁੱਤਾਂ, ਪਤੀਆਂ ਤੇ ਪਿਓਆਂ ਦੀਆਂ ਤਸਵੀਰਾਂ ਬੁੱਕਲ 'ਚ ਘੁੱਟ ਕੇ ਗੁਰੂ ਕੇ ਦਰ 'ਤੇ ਧਾਹਾਂ ਮਾਰ-ਮਾਰ ਕੇ ਆਪਣੇ ਦੁੱਖੜੇ ਰੋਏ। ​ਕਸਬੇ ਵਿੱਚ ਨਸ਼ੇ ਕਾਰਨ ਹੋ ਰਹੀਆਂ ਧੜਾਧੜ ਮੌਤਾਂ ਨੂੰ ਲੈ ਕੇ ਸ਼੍ਰੋਮਣੀ ਅਕਾਲੀ ਦਲ ਦੇ ਹਲਕਾ ਇੰਚਾਰਜ ਕੁਲਵੰਤ ਸਿੰਘ ਕੀਤੂ ਦੀ ਅਗਵਾਈ ਹੇਠ ਅਕਾਲੀ ਆਗੂਆਂ ਨੇ ਪੰਜਾਬ ਸਰਕਾਰ ਵਿਰੁੱਧ ਮੋਰਚਾ ਖੋਲ੍ਹਦਿਆਂ ਸੂਬਾ ਸਰਕਾਰ ਨੂੰ ਤਿੱਖੇ ਹੱਥੀਂ ਲਿਆ।