- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
UK ਤੋਂ ਪੜ੍ਹ ਕੇ ਆਏ ਨੌਜਵਾਨ ਨੇ ਗੁਆਂਢੀ ਦੇ ਮਾਸੂਮ ਪੁੱਤ ਨੂੰ ਕੀਤਾ ਅਗਵਾ; ਬੰਧਕ ਬਣਾ ਕੇ ਬੇਰਹਿਮੀ ਨਾਲ ਕੀਤਾ ਕਤਲ
ਭਾਸਕਰ ਅਤੇ ਏਦੁਕੋਂਡਾਲੂ ਪ੍ਰਜਵਲ ਨੂੰ ਇੱਕ ਸੁੰਨਸਾਨ ਥਾਂ 'ਤੇ ਲੈ ਗਏ। ਉੱਥੇ, ਉਨ੍ਹਾਂ ਨੇ ਉਸਨੂੰ ਬੰਧਕ ਬਣਾ ਲਿਆ ਅਤੇ ਇੱਕ ਵੀਡੀਓ ਬਣਾਈ ਤਾਂ ਜੋ ਫਿਰੌਤੀ ਦੀ ਮੰਗ ਲਈ ਉਸਦੇ ਪਰਿਵਾਰ ਨੂੰ ਭੇਜੀ ਜਾ ਸਕੇ ਫਿਰ ਉਨ੍ਹਾਂ ਨੇ ਲੜਕੇ ਦੇ ਸਿਰ 'ਤੇ ਲੱਕੜ ਦੇ ਗੁਟਕੇ ਨਾਲ ਵਾਰ ਕੀਤਾ
Posted By alisha
Publish Date: Sat, 19 Sep 2026 03:33 PM (IST)
Updated Date: Sat, 19 Sep 2026 03:43 PM (IST)
ਡਿਜੀਟਲ ਡੈਸਕ, ਬੈਂਗਲੁਰੂ : ਬੈਂਗਲੁਰੂ ਸ਼ਹਿਰੀ ਜ਼ਿਲ੍ਹੇ ਵਿੱਚ ਯੂਕੇ ਤੋਂ ਪਰਤੇ ਇੱਕ ਐਮ.ਟੈਕ (M.Tech) ਗ੍ਰੈਜੂਏਟ ਨੂੰ 13 ਸਾਲਾ ਲੜਕੇ ਦੇ ਅਗਵਾ ਅਤੇ ਕਤਲ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਮੁਲਜ਼ਮ ਨੇ ਹਾਲ ਹੀ ਵਿੱਚ ਇੱਕ ਬੁਨਿਆਦੀ ਢਾਂਚਾ ਕੰਪਨੀ ਵਿੱਚ ਨੌਕਰੀ ਸ਼ੁਰੂ ਕੀਤੀ ਸੀ। ਬੁੱਧਵਾਰ ਰਾਤ ਨੂੰ ਉਸਨੇ ਆਪਣੇ ਇੱਕ ਸਾਬਕਾ ਗੁਆਂਢੀ ਦੇ ਪੁੱਤਰ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ।
ਪੁਲਿਸ ਅਨੁਸਾਰ, ਮੁੱਖ ਮੁਲਜ਼ਮ ਭਾਸਕਰ ਰੈਡੀ ਨੇ ਲੜਕੇ ਦੇ ਪਿਤਾ ਜੋ ਕਿ ਇੱਕ ਰੀਅਲ ਅਸਟੇਟ ਕਾਰੋਬਾਰੀ ਹਨ, ਤੋਂ 1 ਕਰੋੜ ਰੁਪਏ ਦੀ ਫਿਰੌਤੀ ਵਸੂਲਣ ਦੀ ਯੋਜਨਾ ਬਣਾਈ ਸੀ। ਉਸਦਾ ਮਕਸਦ ਆਪਣੇ ਪਰਿਵਾਰ ਸਿਰ ਚੜ੍ਹਿਆ 3 ਕਰੋੜ ਰੁਪਏ ਦਾ ਕਰਜ਼ਾ ਲਾਹੁਣਾ ਸੀ। ਇਸ ਕਤਲ ਵਿੱਚ ਇੱਕ ਸਾਥੀ ਏਦੁਕੋਂਡਾਲੂ ਵੀ ਸ਼ਾਮਲ ਸੀ; ਉਹ ਫਿਲਹਾਲ ਫਰਾਰ ਹੈ।
ਪਟਾਕੇ ਖਰੀਦਣ ਦੇ ਬਹਾਨੇ ਅਗਵਾ ਕੀਤਾ
ਮੁੱਢਲੀ ਜਾਂਚ ਦੇ ਆਧਾਰ 'ਤੇ ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਰੈਡੀ ਅਤੇ 8ਵੀਂ ਜਮਾਤ ਦੇ ਵਿਦਿਆਰਥੀ ਐਮ. ਪ੍ਰਜਵਲ ਦਾ ਪਰਿਵਾਰ ਕਦੇ ਯੇਲਾਹੰਕਾ ਵਿੱਚ ਗੁਆਂਢੀ ਸਨ, ਜਿਸ ਤੋਂ ਬਾਅਦ ਪ੍ਰਜਵਲ ਦਾ ਪਰਿਵਾਰ ਉਸੇ ਇਲਾਕੇ ਦੀ ਇੱਕ ਹੋਰ ਗਲੀ ਵਿੱਚ ਚਲਾ ਗਿਆ ਸੀ।
ਬੁੱਧਵਾਰ ਨੂੰ ਭਾਸਕਰ ਨੇ ਪ੍ਰਜਵਲ ਨੂੰ ਉਸਦੇ ਘਰ ਦੇ ਨੇੜੇ ਤੋਂ ਆਪਣੀ SUV ਵਿੱਚ ਬਿਠਾਇਆ ਅਤੇ ਕਿਹਾ ਕਿ ਉਹ ਪਟਾਕੇ ਖਰੀਦਣ ਜਾ ਰਹੇ ਹਨ। ਉਸਨੇ ਲੜਕੇ ਨੂੰ ਕਾਰ ਚਲਾਉਣਾ ਸਿਖਾਉਣ ਦਾ ਲਾਲਚ ਵੀ ਦਿੱਤਾ ਸੀ।
ਇੱਟਾਂ ਮਾਰ ਕੇ ਕਤਲ ਕੀਤਾ
ਪੁਲਿਸ ਅਨੁਸਾਰ, ਭਾਸਕਰ ਅਤੇ ਏਦੁਕੋਂਡਾਲੂ ਪ੍ਰਜਵਲ ਨੂੰ ਇੱਕ ਸੁੰਨਸਾਨ ਥਾਂ 'ਤੇ ਲੈ ਗਏ। ਉੱਥੇ, ਉਨ੍ਹਾਂ ਨੇ ਉਸਨੂੰ ਬੰਧਕ ਬਣਾ ਲਿਆ ਅਤੇ ਇੱਕ ਵੀਡੀਓ ਬਣਾਈ ਤਾਂ ਜੋ ਫਿਰੌਤੀ ਦੀ ਮੰਗ ਲਈ ਉਸਦੇ ਪਰਿਵਾਰ ਨੂੰ ਭੇਜੀ ਜਾ ਸਕੇ ਫਿਰ ਉਨ੍ਹਾਂ ਨੇ ਲੜਕੇ ਦੇ ਸਿਰ 'ਤੇ ਲੱਕੜ ਦੇ ਗੁਟਕੇ ਨਾਲ ਵਾਰ ਕੀਤਾ, ਜਿਸ ਨਾਲ ਉਹ ਬੇਹੋਸ਼ ਹੋ ਗਿਆ।
ਇਸ ਤੋਂ ਬਾਅਦ ਮੁਲਜ਼ਮ ਪ੍ਰਜਵਲ ਨੂੰ ਇੱਕ ਹੋਰ ਸੁੰਨਸਾਨ ਥਾਂ 'ਤੇ ਲੈ ਗਏ। ਇੱਕ ਕੰਪਾਊਂਡ ਦੀ ਕੰਧ 'ਤੇ ਖੜ੍ਹੇ ਹੋ ਕੇ, ਉਨ੍ਹਾਂ ਨੇ ਹੇਠਾਂ ਪਏ ਲੜਕੇ 'ਤੇ ਖੋਖਲੀਆਂ ਇੱਟਾਂ ਵਰ੍ਹਾ ਕੇ ਉਸਦਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ।
ਪੁਲਿਸ ਨੇ ਖੁਲਾਸਾ ਕੀਤਾ ਕਿ ਏਦੁਕੋਂਡਾਲੂ, ਜੋ ਇੱਕ ਨਿੱਜੀ ਸਕੂਲ ਬੱਸ ਵਿੱਚ ਸਫਾਈ ਕਰਮਚਾਰੀ ਸੀ, ਨੇ ਪੈਸੇ ਦੇ ਲਾਲਚ ਵਿੱਚ ਇਸ ਅਪਰਾਧ ਵਿੱਚ ਹਿੱਸਾ ਲਿਆ ਸੀ। ਕਤਲ ਤੋਂ ਬਾਅਦ ਏਦੁਕੋਂਡਾਲੂ ਮੌਕੇ ਤੋਂ ਫਰਾਰ ਹੋ ਗਿਆ।
ਨਸ਼ੇ ਦੀ ਹਾਲਤ 'ਚ ਕਾਰ ਹਾਦਸੇ ਨਾਲ ਕਤਲ ਦਾ ਖੁਲਾਸਾ
ਏਦੁਕੋਂਡਾਲੂ ਦੇ ਜਾਣ ਤੋਂ ਬਾਅਦ ਭਾਸਕਰ ਨੇ ਪ੍ਰਜਵਲ ਦੀ ਲਾਸ਼ ਨੂੰ ਨੇਲੋਰ ਆਂਧਰਾ ਪ੍ਰਦੇਸ਼ ਲਿਜਾ ਕੇ ਟਿਕਾਣੇ ਲਗਾਉਣ ਦਾ ਫੈਸਲਾ ਕੀਤਾ। ਉਸਨੇ ਲਾਸ਼ ਨੂੰ ਉੱਥੇ ਮਿਲੇ ਇੱਕ ਪੁਰਾਣੇ ਅਤੇ ਫਟੇ ਹੋਏ ਗੱਦੇ ਵਿੱਚ ਲਪੇਟਿਆ ਅਤੇ ਆਪਣੀ SUV ਦੀ ਡਿੱਗੀ ਵਿੱਚ ਰੱਖ ਦਿੱਤਾ।
ਹਾਲਾਂਕਿ, ਲਾਸ਼ ਨੂੰ ਲਿਜਾਣ ਦੌਰਾਨ ਰੈਡੀ ਦੀ ਯੋਜਨਾ ਅਸਫਲ ਹੋ ਗਈ। ਪੁਲਿਸ ਅਨੁਸਾਰ, ਉਹ ਬੁਰੀ ਤਰ੍ਹਾਂ ਨਸ਼ੇ ਵਿੱਚ ਸੀ ਅਤੇ ਉਸਨੇ ਆਪਣੀ SUV ਬਿਜਲੀ ਦੇ ਖੰਭੇ ਨਾਲ ਟਕਰਾ ਦਿੱਤੀ। ਇਸ ਦੇ ਬਾਵਜੂਦ, ਉਹ ਗੱਡੀ ਚਲਾਉਂਦਾ ਰਿਹਾ ਅਤੇ ਚਿੱਕਾਜਾਲਾ ਨੇੜੇ ਇੱਕ ਅਪਾਰਟਮੈਂਟ ਕੰਪਲੈਕਸ ਦੇ ਬਾਹਰ ਖੜ੍ਹੀਆਂ ਦੋ ਹੋਰ ਕਾਰਾਂ ਨਾਲ ਜਾ ਟਕਰਾਇਆ।
ਟੱਕਰ ਦੀ ਤੇਜ਼ ਆਵਾਜ਼ ਸੁਣ ਕੇ ਸੁਰੱਖਿਆ ਕਰਮਚਾਰੀ ਅਤੇ ਸਥਾਨਕ ਲੋਕ ਬਾਹਰ ਆ ਗਏ ਅਤੇ ਰੈਡੀ ਨੂੰ ਕਾਬੂ ਕਰ ਲਿਆ। ਉਸ ਦੇ ਨਸ਼ੇ ਵਿੱਚ ਹੋਣ ਦਾ ਸ਼ੱਕ ਹੋਣ 'ਤੇ ਉਨ੍ਹਾਂ ਨੇ ਗੱਡੀ ਦੀ ਤਲਾਸ਼ੀ ਲਈ ਅਤੇ ਡਿੱਗੀ ਵਿੱਚ ਬੱਚੇ ਦੀ ਲਾਸ਼ ਬਰਾਮਦ ਕੀਤੀ।
ਕਾਰਾਂ ਪ੍ਰਤੀ ਸ਼ੌਕ ਦਾ ਫਾਇਦਾ ਉਠਾਉਣਾ
ਡਿਪਟੀ ਕਮਿਸ਼ਨਰ ਆਫ਼ ਪੁਲਿਸ (ਉੱਤਰ-ਪੂਰਬੀ ਡਿਵੀਜ਼ਨ) ਜੀ.ਕੇ. ਮਿਥੁਨ ਕੁਮਾਰ ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਲੜਕੇ ਦੇ ਪਿਤਾ ਮਨੋਹਰ ਅਤੇ ਭਾਸਕਰ ਰੈਡੀ ਕਈ ਸਾਲਾਂ ਤੋਂ ਗੁਆਂਢੀ ਸਨ।
ਦੋਵਾਂ ਪਰਿਵਾਰਾਂ ਵਿਚਕਾਰ ਕੋਈ ਦੁਸ਼ਮਣੀ ਜਾਂ ਵਪਾਰਕ ਮੁਕਾਬਲੇਬਾਜ਼ੀ ਨਹੀਂ ਸੀ। ਲੜਕੇ ਨੂੰ ਕਾਰਾਂ ਦਾ ਬਹੁਤ ਸ਼ੌਕ ਸੀ ਅਤੇ ਦੋਸ਼ੀ ਨੇ ਇਸੇ ਦਿਲਚਸਪੀ ਦਾ ਫਾਇਦਾ ਉਠਾਉਂਦੇ ਹੋਏ ਉਸਨੂੰ ਆਪਣੇ ਨਾਲ ਜਾਣ ਲਈ ਮਨਾ ਲਿਆ।
ਪੁਲਿਸ ਇਸ ਸਮੇਂ ਕਤਲ ਪਿੱਛੇ ਹੋਰ ਕਾਰਨਾਂ ਦਾ ਪਤਾ ਲਗਾਉਣ ਲਈ ਭਾਸਕਰ ਤੋਂ ਪੁੱਛਗਿੱਛ ਕਰ ਰਹੀ ਹੈ। ਇਸ ਦੌਰਾਨ ਫਰਾਰ ਦੋਸ਼ੀ ਏਡੂਕੋਂਡਾਲੂ ਦੀ ਭਾਲ ਜਾਰੀ ਹੈ।