ਸ਼ਮਸ਼ਾਨ ਦੀ ਜ਼ਮੀਨ ’ਤੇ ਮੁਰਦੇ ਕਰਨਗੇ ‘ਕਸਰਤ’, ਪੰਚਾਇਤ ਵਿਭਾਗ ਨੇ ਬਣਾ ਦਿੱਤੀ ਓਪਨ ਜਿਮ; ਝਿਜਕ ਰਹੇ ਲੋਕ

ਰੇਵਾੜੀ ਦੇ ਭਾੜਾਵਾਸ ਪਿੰਡ ’ਚ ਸ਼ਮਸ਼ਾਨ ਭੂਮੀ ’ਤੇ 8 ਲੱਖ ਰੁਪਏ ਦੀ ਲਾਗਤ ਨਾਲ ਓਪਨ ਜਿਮ ਬਣਾਈ ਗਈ ਹੈ। ਇਸ ਕਾਰਨ ਪਿੰਡ ਵਾਸੀ ਕਸਰਤ ਕਰਨ ਤੋਂ ਝਿਜਕ ਰਹੇ ਹਨ ਤੇ ਅੰਤਿਮ ਸੰਸਕਾਰ ਦੌਰਾਨ ਵੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

Posted By Paramjit Kaur

Publish Date: Sat, 26 Sep 2026 04:42 PM (IST)

Updated Date: Sat, 26 Sep 2026 04:44 PM (IST)

ਸ਼ਮਸ਼ਾਨ ਦੀ ਜ਼ਮੀਨ ’ਤੇ ਮੁਰਦੇ ਕਰਨਗੇ ‘ਕਸਰਤ’, ਪੰਚਾਇਤ ਵਿਭਾਗ ਨੇ ਬਣਾ ਦਿੱਤੀ ਓਪਨ ਜਿਮ; ਝਿਜਕ ਰਹੇ ਲੋਕ

ਮੁਕੇਸ਼ ਸ਼ਰਮਾ, ਰੇਵਾੜੀ : ਇੱਕ ਪਾਸੇ ਅੰਤਿਮ ਸੰਸਕਾਰ ਦੀ ਜਗ੍ਹਾ ਤੇ ਉਸ ਦੇ ਬਿਲਕੁਲ ਸਾਹਮਣੇ ਕਸਰਤ ਕਰਨ ਵਾਲਾ ਸਾਮਾਨ। ਇਹ ਨਜ਼ਾਰਾ ਭਾੜਾਵਾਸ ਪਿੰਡ ਦੀ ਸ਼ਮਸ਼ਾਨ ਭੂਮੀ ਦਾ ਹੈ। ਇੱਥੇ ਪੰਚਾਇਤ ਵਿਭਾਗ ਵੱਲੋਂ ਦਿੱਤੀ ਗਈ ਗ੍ਰਾਂਟ ਨਾਲ ਗ੍ਰਾਮ ਪੰਚਾਇਤ ਨੇ ਓਪਨ ਜਿਮ ਬਣਾ ਦਿੱਤੀ ਹੈ। ਕਰੀਬ ਚਾਰ ਮਹੀਨੇ ਪਹਿਲਾਂ ਬਣਾਈ ਗਈ ਇਸ ਓਪਨ ਜਿਮ ’ਚ ਭਾਵੇਂ ਪਿੰਡ ਵਾਸੀ ਕਸਰਤ ਕਰਨ ਨਹੀਂ ਪਹੁੰਚੇ, ਪਰ ਜਦੋਂ ਕਿਸੇ ਦੇ ਅੰਤਿਮ ਸੰਸਕਾਰ ਲਈ ਜਾਂਦੇ ਹਨ ਤਾਂ ਉਨ੍ਹਾਂ ਨੂੰ ਪਰੇਸ਼ਾਨੀ ਜ਼ਰੂਰ ਹੁੰਦੀ ਹੈ। ਇਸ ਦਾ ਕਾਰਨ ਇਹ ਹੈ ਕਿ ਜਿਸ ਟੀਨ ਸ਼ੈੱਡ ਹੇਠਾਂ ਲੋਕਾਂ ਦੇ ਬੈਠਣ ਦਾ ਪ੍ਰਬੰਧ ਸੀ, ਉਸੇ ਸ਼ੈੱਡ ਹੇਠਾਂ ਇਹ ਓਪਨ ਜਿਮ ਬਣਾਈ ਗਈ ਹੈ।

ਦਹਾਕਿਆਂ ਤੋਂ ਬਣੀ ਹੋਈ ਹੈ ਸ਼ਮਸ਼ਾਨ ਭੂਮੀ

ਦਰਅਸਲ, ਭਾੜਾਵਾਸ ਪਿੰਡ ਦੇ ਬਿਲਕੁਲ ਬਾਹਰ ਸ਼ਾਹਜਹਾਂਪੁਰ ਰੋਡ ਦੇ ਨਾਲ ਲੱਗਦੀ ਗ੍ਰਾਮ ਪੰਚਾਇਤ ਦੀ ਕਰੀਬ ਅੱਧਾ ਏਕੜ ਜ਼ਮੀਨ ’ਤੇ ਦਹਾਕਿਆਂ ਤੋਂ ਸ਼ਮਸ਼ਾਨ ਭੂਮੀ ਬਣੀ ਹੋਈ ਹੈ। ਇੱਥੇ ਤਿੰਨ ਸ਼ੈੱਡ ਹਨ। ਦੋ ਟੀਨ ਸ਼ੈੱਡਾਂ ਹੇਠਾਂ ਅੰਤਿਮ ਸੰਸਕਾਰ ਕੀਤੇ ਜਾਂਦੇ ਹਨ, ਜਦਕਿ ਇੱਕ ਵੱਡੇ ਟੀਨ ਸ਼ੈੱਡ ਹੇਠਾਂ ਇੱਥੇ ਆਉਣ ਵਾਲੇ ਲੋਕਾਂ ਲਈ ਬੈਠਣ ਦਾ ਪ੍ਰਬੰਧ ਸੀ। ਕਰੀਬ ਚਾਰ ਮਹੀਨੇ ਪਹਿਲਾਂ ਪੰਚਾਇਤ ਵਿਭਾਗ ਵੱਲੋਂ ਭਾੜਾਵਾਸ ਪਿੰਡ ’ਚ ਓਪਨ ਜਿਮ ਬਣਾਈ ਜਾਣੀ ਸੀ। ਪੰਚਾਇਤ ਨੇ ਕਿਸੇ ਹੋਰ ਜਗ੍ਹਾ ਦੀ ਬਜਾਏ ਸ਼ਮਸ਼ਾਨ ਭੂਮੀ ਨੂੰ ਹੀ ਓਪਨ ਜਿਮ ਲਈ ਢੁਕਵਾਂ ਸਮਝਿਆ ਤੇ ਉੱਥੇ ਜਿਮ ਬਣਵਾ ਦਿੱਤੀ। ਕਰੀਬ 8 ਲੱਖ ਰੁਪਏ ਦੀ ਲਾਗਤ ਨਾਲ ਓਪਨ ਜਿਮ ਤੇ ਟਾਈਲਾਂ ਲਗਾਉਣ ਦਾ ਕੰਮ ਕੀਤਾ ਗਿਆ।

ਹੁਣ ਸ਼ਮਸ਼ਾਨ ਭੂਮੀ ਦੇ ਅੰਦਰ ਓਪਨ ਜਿਮ ਬਣਾਉਣ ਨੂੰ ਲੈ ਕੇ ਸਵਾਲ ਖੜ੍ਹੇ ਹੋ ਰਹੇ ਹਨ। ਜੇਕਰ ਪਿੰਡ ’ਚ ਹੀ ਕਿਸੇ ਹੋਰ ਜਗ੍ਹਾ ’ਤੇ ਇਹ ਜਿਮ ਬਣਾਈ ਜਾਂਦੀ ਤਾਂ ਸ਼ਾਇਦ ਪਿੰਡ ਵਾਸੀ ਇਸ ਦਾ ਲਾਭ ਲੈਂਦੇ। ਪਰ ਪਿੰਡ ਤੋਂ ਬਾਹਰ ਤੇ ਉਹ ਵੀ ਸ਼ਮਸ਼ਾਨ ਭੂਮੀ ਦੇ ਅੰਦਰ ਬਣੀ ਜਿਮ ’ਚ ਜਾਣ ਤੋਂ ਲੋਕ ਝਿਜਕ ਰਹੇ ਹਨ।

ਸਰਕਾਰ ਦੇ ਹੁਕਮਾਂ ’ਤੇ ਬਣਾਈ ਜਾ ਰਹੀ ਹੈ ਓਪਨ ਜਿਮ

ਪਿੰਡ ਦੇ ਪੰਚ ਪਵਨ ਕੁਮਾਰ ਦੇ ਮੁਤਾਬਕ, ਸਰਕਾਰ ਦੇ ਹੁਕਮਾਂ ਤੋਂ ਬਾਅਦ ਹਰ ਪਿੰਡ ’ਚ ਓਪਨ ਜਿਮ ਬਣਵਾਈਆਂ ਜਾ ਰਹੀਆਂ ਹਨ। ਓਪਨ ਜਿਮ ਲਈ 450 ਵਰਗ ਗਜ਼ ਜ਼ਮੀਨ ਦੀ ਲੋੜ ਸੀ। ਭਾੜਾਵਾਸ ਪਿੰਡ ਦੀ ਪੰਚਾਇਤ ਕੋਲ ਸਾਢੇ 300 ਵਰਗ ਗਜ਼ ਤੋਂ ਵੱਡਾ ਕੋਈ ਹੋਰ ਪਲਾਟ ਨਹੀਂ ਸੀ। ਸਰਪੰਚ ਸੁਨੀਲ ਕੁਮਾਰ ਦੇ ਮੁਤਾਬਕ, ਕਿਸੇ ਹੋਰ ਜਗ੍ਹਾ ’ਤੇ ਇੰਨੀ ਜ਼ਮੀਨ ਉਪਲਬਧ ਨਾ ਹੋਣ ਕਾਰਨ ਹੀ ਸ਼ਮਸ਼ਾਨ ਭੂਮੀ ’ਚ ਓਪਨ ਜਿਮ ਬਣਵਾਈ ਗਈ ਹੈ। ਹੁਣ ਸਵਾਲ ਇਹ ਹੈ ਕਿ ਜਦੋਂ ਜਗ੍ਹਾ ਦੀ ਕਮੀ ਸੀ ਤਾਂ ਸ਼ਮਸ਼ਾਨ ਭੂਮੀ ’ਚ ਜਿਮ ਬਣਵਾ ਕੇ ਪੈਸਿਆਂ ਦੀ ਬਰਬਾਦੀ ਕਿਉਂ ਕੀਤੀ ਗਈ, ਕਿਉਂਕਿ ਇੱਥੇ ਨਾ ਤਾਂ ਪਿੰਡ ਵਾਸੀ ਪਹੁੰਚਦੇ ਹਨ ਤੇ ਨਾ ਹੀ ਬੱਚੇ ਆਉਂਦੇ ਹਨ।

“ਸ਼ਮਸ਼ਾਨ ਭੂਮੀ ਦੇ ਅੰਦਰ ਓਪਨ ਜਿਮ ਬਣਾਉਣ ਦਾ ਮਾਮਲਾ ਮੇਰੇ ਧਿਆਨ ’ਚ ਨਹੀਂ ਹੈ। ਮੈਂ ਇਸ ਦੀ ਜਾਂਚ ਕਰਵਾਉਂਦਾ ਹਾਂ। ਇਸ ਤੋਂ ਬਾਅਦ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।”
— ਨਰਿੰਦਰ ਸਾਰਨਵਾਨ, ਡੀਡੀਪੀਓ, ਰੇਵਾੜੀ