- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਹਿਮਾਚਲ ਪ੍ਰਦੇਸ਼ ਦੇ ਸਿਰਮੌਰ ਜ਼ਿਲ੍ਹੇ ਦੇ ਗਿਰੀਪਾਰ ਖੇਤਰ ’ਚ ਇੱਕ ਅਨੋਖੇ ਵਿਆਹ ਨੇ ਲੋਕਾਂ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਇੱਥੇ ਇੱਕੋ ਪਰਿਵਾਰ ਦੇ ਚਾਰ ਭਰਾਵਾਂ ਨੇ ਇੱਕੋ ਸ਼ੁਭ ਮਹੂਰਤ ’ਚ ਵਿਆਹ ਰਚਾ ਕੇ ਨਵੀਂ ਜ਼ਿੰਦਗੀ ਦੀ ਸ਼ੁਰੂਆਤ ਕੀਤੀ। ਖ਼ਾਸ ਗੱਲ ਇਹ ਰਹੀ ਕਿ ਚਾਰਾਂ ਭਰਾਵਾਂ ਦੇ ਵਿਆਹ ਦੀਆਂ ਰਸਮਾਂ ਇੱਕੋ ਸਮੇਂ ਸੰਪੰਨ ਹੋਈਆਂ ਅਤੇ ਵਿਆਹ ਤੋਂ ਬਾਅਦ ਚਾਰਾਂ ਨਵ-ਵਿਆਹੁਤਾ ਜੋੜਿਆਂ ਨੇ ਇੱਕੋ ਸਮੇਂ 'ਤੇ ਗ੍ਰਹਿ ਪ੍ਰਵੇਸ਼ ਕੀਤਾ।

ਇਸ ਅਨੋਖੇ ਸਮਾਗਮ ਨੂੰ ਦੇਖਣ ਅਤੇ ਨਵ-ਵਿਆਹੁਤਾ ਜੋੜਿਆਂ ਨੂੰ ਅਸ਼ੀਰਵਾਦ ਦੇਣ ਲਈ ਵੱਡੀ ਗਿਣਤੀ ਵਿੱਚ ਰਿਸ਼ਤੇਦਾਰ ਅਤੇ ਇਲਾਕੇ ਦੇ ਲੋਕ ਪਹੁੰਚੇ।
ਗਿਰੀਪਾਰ ਦੇ ਸ਼ਿੱਲਾ ਪਿੰਡ ਦੇ ਪ੍ਰਤਾਪ ਚੌਹਾਨ ਦੇ ਚਾਰ ਪੁੱਤਰਾਂ ਦਾ ਵਿਆਹ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਵੱਡੇ ਪੁੱਤਰ ਭਵਾਨ ਸਿੰਘ ਨੇ ਮਟਿਆਨਾ ਦੀ ਸ਼ਿਵਾਨੀ ਅਤੇ ਫ਼ੌਜੀ ਰਵਿੰਦਰ ਨੇ ਦੁਗਾਨਾ ਪਿੰਡ ਦੀ ਰਵੀਨਾ ਨਾਲ ਸੱਤ ਫੇਰੇ ਲਏ।
ਸੁਰਿੰਦਰ ਸਿੰਘ ਦੇ ਪੁੱਤਰ ਵਿਜੇ ਚੌਹਾਨ ਨੇ ਬਾਲੀਕੋਟੀ ਦੀ ਪ੍ਰਮਿਲਾ ਅਤੇ ਅਜੇ ਨੇ ਬਿਰਾਖਨਾ ਪਿੰਡ ਦੀ ਸੁਨੀਤਾ ਨਾਲ ਵਿਆਹ ਕਰਵਾਇਆ।
ਪਰਿਵਾਰ ਵਿੱਚ ਚਾਰ ਵਿਆਹਾਂ ਦੀਆਂ ਤਿਆਰੀਆਂ ਇਕੱਠੀਆਂ ਕੀਤੀਆਂ ਗਈਆਂ। ਘਰ ’ਚ ਕਈ ਦਿਨਾਂ ਤੋਂ ਤਿਉਹਾਰ ਵਰਗਾ ਮਾਹੌਲ ਬਣਿਆ ਰਿਹਾ। ਵਿਆਹ ਸਮਾਗਮ ਦੌਰਾਨ ਰਵਾਇਤੀ ਰੀਤੀ-ਰਿਵਾਜਾਂ ਨਾਲ ਚਾਰਾਂ ਲਾੜਿਆਂ ਨੇ ਆਪੋ-ਆਪਣੀ ਜੀਵਨ ਸਾਥਣ ਨਾਲ ਸੱਤ ਫੇਰੇ ਲਏ। ਇੱਕੋ ਸਮੇਂ ਚਾਰ ਲਾੜਿਆਂ ਦੀ ਬਰਾਤ, ਵਿਆਹ ਦੀਆਂ ਰਸਮਾਂ ਅਤੇ ਪਰਿਵਾਰਕ ਮੈਂਬਰਾਂ ਦੀਆਂ ਖੁਸ਼ੀਆਂ ਨੇ ਇਸ ਸਮਾਗਮ ਨੂੰ ਹੋਰ ਵੀ ਖ਼ਾਸ ਬਣਾ ਦਿੱਤਾ।
ਸਭ ਤੋਂ ਆਕਰਸ਼ਕ ਪਲ ਉਸ ਸਮੇਂ ਰਿਹਾ, ਜਦੋਂ ਵਿਆਹ ਦੀਆਂ ਸਾਰੀਆਂ ਰਸਮਾਂ ਪੂਰੀਆਂ ਹੋਣ ਤੋਂ ਬਾਅਦ ਚਾਰਾਂ ਨਵ-ਵਿਆਹੁਤਾ ਜੋੜਿਆਂ ਨੇ ਇੱਕੋ ਸ਼ੁਭ ਸਮੇਂ 'ਤੇ ਆਪਣੇ ਨਵੇਂ ਘਰ ’ਚ ਪ੍ਰਵੇਸ਼ ਕੀਤਾ। ਪਰਿਵਾਰ ਦੇ ਬਜ਼ੁਰਗਾਂ ਨੇ ਨਵ-ਵਿਆਹੁਤਾ ਜੋੜਿਆਂ ਨੂੰ ਅਸ਼ੀਰਵਾਦ ਦਿੱਤਾ ਅਤੇ ਉਨ੍ਹਾਂ ਦੇ ਸੁਖੀ ਵਿਆਹੁਤਾ ਜੀਵਨ ਦੀ ਕਾਮਨਾ ਕੀਤੀ। ਚਾਰ ਭਰਾਵਾਂ ਦਾ ਇੱਕੋ ਮਹੂਰਤ ਵਿੱਚ ਵਿਆਹ ਅਤੇ ਇੱਕੋ ਸਮੇਂ ਗ੍ਰਹਿ ਪ੍ਰਵੇਸ਼ ਕਰਨਾ ਇਲਾਕੇ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ।
ਗਿਰੀਪਾਰ ਖੇਤਰ ਆਪਣੀ ਅਮੀਰ ਲੋਕ ਸੰਸਕ੍ਰਿਤੀ, ਰੀਤੀ-ਰਿਵਾਜਾਂ ਅਤੇ ਰਵਾਇਤੀ ਸਮਾਜਿਕ ਵਿਵਸਥਾ ਲਈ ਵਿਸ਼ੇਸ਼ ਪਛਾਣ ਰੱਖਦਾ ਹੈ। ਇੱਥੇ ਅੱਜ ਵੀ ਕਈ ਪਰਿਵਾਰ ਵਿਆਹ ਵਰਗੇ ਸ਼ੁਭ ਮੌਕਿਆਂ 'ਤੇ ਆਪਣੀਆਂ ਪਰੰਪਰਾਵਾਂ ਅਤੇ ਪਰਿਵਾਰਕ ਏਕਤਾ ਨੂੰ ਵਿਸ਼ੇਸ਼ ਮਹੱਤਵ ਦਿੰਦੇ ਹਨ। ਪਿਛਲੇ ਸਾਲ ਇੱਥੇ ਇਸੇ ਪਰੰਪਰਾ ਤਹਿਤ ਦੋ ਭਰਾਵਾਂ ਨੇ ਇੱਕੋ ਔਰਤ ਨਾਲ ਵਿਆਹ ਕੀਤਾ ਸੀ, ਜਿਨ੍ਹਾਂ ਦਾ 'ਜੋੜੀਦਾਰ ਭਾਈ' ਨਾਮ ਦਾ ਫੇਸਬੁੱਕ ਪੇਜ ਹੈ।