- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਦਰਦਨਾਕ ਹਾਦਸਾ: 100 ਫੁੱਟ ਡੂੰਘੀ ਖਾਈ 'ਚ ਡਿੱਗਿਆ ਸ਼ਰਧਾਲੂਆਂ ਨਾਲ ਭਰਿਆ ਟੈਂਪੋ, 3 ਦੀ ਮੌਤ ਤੇ 3 ਜ਼ਖ਼ਮੀ
ਪੀੜਤਾਂ ਵਿੱਚੋਂ ਇੱਕ ਵਿਅਕਤੀ ਫਰਨੀਚਰ ਦੀ ਦੁਕਾਨ 'ਤੇ ਕੰਮ ਕਰਦਾ ਸੀ। ਉਹ ਨਵਰਾਤਰੀ ਤਿਉਹਾਰ ਦੌਰਾਨ ਮਾਹੂਰ ਵਿੱਚ ਇੱਕ ਮੰਦਰ ਦੇ ਦਰਸ਼ਨ ਕਰਕੇ ਯਵਤਮਾਲ ਵਾਪਸ ਪਰਤ ਰਿਹਾ ਸੀ। ਪੁਲਿਸ ਅਨੁਸਾਰ, ਟੈਂਪੂ ਘਾਟ ਤੋਂ ਹੇਠਾਂ ਉਤਰ ਰਿਹਾ ਸੀ, ਜਦੋਂ ਸਾਹਮਣੇ ਤੋਂ ਤੇਜ਼ ਰਫ਼ਤਾਰ ਨਾਲ ਆ ਰਿਹਾ ਇੱਕ ਵਾਹਨ ਸੜਕ ਦੇ ਗਲਤ ਪਾਸੇ ਆ ਗਿਆ।
Posted By alisha
Publish Date: Sat, 17 Oct 2026 10:37 AM (IST)
Updated Date: Sat, 17 Oct 2026 10:43 AM (IST)
ਡਿਜੀਟਲ ਡੈਸਕ, ਨਾਂਦੇੜ : ਮਹਾਰਾਸ਼ਟਰ ਦੇ ਨਾਂਦੇੜ ਜ਼ਿਲ੍ਹੇ ਵਿੱਚ ਇੱਕ ਘਾਟੀ ਵਾਲੀ ਸੜਕ 'ਤੇ ਸ਼ਰਧਾਲੂਆਂ ਨੂੰ ਲਿਜਾ ਰਿਹਾ ਇੱਕ ਟੈਂਪੂ ਲਗਪਗ 100 ਫੁੱਟ ਡੂੰਘੀ ਖੱਡ ਵਿੱਚ ਡਿੱਗ ਗਿਆ। ਪੁਲਿਸ ਨੇ ਸ਼ਨੀਵਾਰ ਨੂੰ ਦੱਸਿਆ ਕਿ ਇਸ ਹਾਦਸੇ ਵਿੱਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਅਤੇ ਤਿੰਨ ਹੋਰ ਜ਼ਖ਼ਮੀ ਹੋ ਗਏ।
ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਇਹ ਘਟਨਾ ਸ਼ੁੱਕਰਵਾਰ ਸਵੇਰੇ ਕਰੀਬ 5:00 ਵਜੇ ਵਾਪਰੀ, ਜਦੋਂ ਯਵਤਮਾਲ ਤੋਂ ਸ਼ਰਧਾਲੂਆਂ ਨੂੰ ਲਿਜਾ ਰਿਹਾ ਟੈਂਪੂ ਮਾਹੂਰ ਤਹਿਸੀਲ ਦੇ ਕੇਰੋਲੀ ਘਾਟ 'ਤੇ ਇੱਕ ਤਿੱਖੇ ਮੋੜ ਤੋਂ ਲੰਘ ਰਿਹਾ ਸੀ।
ਗਲਤ ਪਾਸੇ ਤੋਂ ਆ ਰਿਹਾ ਸੀ ਵਾਹਨ
ਪੀੜਤਾਂ ਵਿੱਚੋਂ ਇੱਕ ਵਿਅਕਤੀ ਫਰਨੀਚਰ ਦੀ ਦੁਕਾਨ 'ਤੇ ਕੰਮ ਕਰਦਾ ਸੀ। ਉਹ ਨਵਰਾਤਰੀ ਤਿਉਹਾਰ ਦੌਰਾਨ ਮਾਹੂਰ ਵਿੱਚ ਇੱਕ ਮੰਦਰ ਦੇ ਦਰਸ਼ਨ ਕਰਕੇ ਯਵਤਮਾਲ ਵਾਪਸ ਪਰਤ ਰਿਹਾ ਸੀ। ਪੁਲਿਸ ਅਨੁਸਾਰ, ਟੈਂਪੂ ਘਾਟ ਤੋਂ ਹੇਠਾਂ ਉਤਰ ਰਿਹਾ ਸੀ, ਜਦੋਂ ਸਾਹਮਣੇ ਤੋਂ ਤੇਜ਼ ਰਫ਼ਤਾਰ ਨਾਲ ਆ ਰਿਹਾ ਇੱਕ ਵਾਹਨ ਸੜਕ ਦੇ ਗਲਤ ਪਾਸੇ ਆ ਗਿਆ।
ਦੱਸਿਆ ਜਾ ਰਿਹਾ ਹੈ ਕਿ ਸਾਹਮਣੇ ਤੋਂ ਆ ਰਹੇ ਵਾਹਨ ਦੀਆਂ ਤੇਜ਼ ਹੈੱਡਲਾਈਟਾਂ ਕਾਰਨ ਟੈਂਪੂ ਚਾਲਕ ਨੂੰ ਕੁਝ ਦਿਖਾਈ ਨਹੀਂ ਦਿੱਤਾ; ਟੱਕਰ ਤੋਂ ਬਚਣ ਦੀ ਕੋਸ਼ਿਸ਼ ਵਿੱਚ ਉਸਨੇ ਵਾਹਨ ਨੂੰ ਇੱਕ ਪਾਸੇ ਮੋੜ ਦਿੱਤਾ। ਮੋੜ 'ਤੇ ਕੋਈ ਮਜ਼ਬੂਤ ਸੁਰੱਖਿਆ ਕੰਧ ਜਾਂ ਬੈਰੀਅਰ ਨਾ ਹੋਣ ਕਾਰਨ, ਡਰਾਈਵਰ ਦਾ ਵਾਹਨ 'ਤੇ ਕਾਬੂ ਨਹੀਂ ਰਿਹਾ ਅਤੇ ਟੈਂਪੂ ਡੂੰਘੀ ਖੱਡ ਵਿੱਚ ਜਾ ਡਿੱਗਿਆ।
ਟੈਂਪੂ 'ਚੋਂ ਬਾਹਰ ਡਿੱਗੇ ਯਾਤਰੀ
ਜਿਵੇਂ ਹੀ ਟੈਂਪੂ ਢਲਾਣ ਤੋਂ ਹੇਠਾਂ ਡਿੱਗਿਆ, ਤਿੰਨ ਵਿਅਕਤੀ ਬਾਬਾਰਾਓ ਗਿਆਨੋਬਾ ਟੇਕਮ (60), ਰਾਹੁਲ ਸੁਧਾਕਰਰਾਓ ਠਾਕਰੇ (25) ਅਤੇ ਪ੍ਰੀਤਮ ਰਾਮਰਾਓ ਪ੍ਰਧਾਨ (38) ਜੋ ਪਿੱਛੇ ਖੁੱਲ੍ਹੇ ਹਿੱਸੇ ਵਿੱਚ ਬੈਠੇ ਸਨ, ਬਾਹਰ ਜਾ ਡਿੱਗੇ। ਅਧਿਕਾਰੀ ਨੇ ਦੱਸਿਆ ਕਿ ਠਾਕਰੇ ਅਤੇ ਪ੍ਰਧਾਨ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਦਕਿ ਤੀਜੇ ਵਿਅਕਤੀ ਦੀ ਇਲਾਜ ਦੌਰਾਨ ਮੌਤ ਹੋ ਗਈ।
ਅਧਿਕਾਰੀ ਮੁਤਾਬਕ, ਟੈਂਪੂ ਦੇ ਅਗਲੇ ਹਿੱਸੇ (ਕੈਬਿਨ) ਵਿੱਚ ਸਵਾਰ ਡਰਾਈਵਰ ਪ੍ਰਤੀਕ ਅਰਵਿੰਦ ਅਡਕਿਨੇ (26), ਦੱਤਾ ਮਨੋਹਰ ਮੇਸ਼ਰਾਮ (35) ਅਤੇ ਯਸ਼ਵੰਤ ਅਰਵਿੰਦ ਪਾਟਿਲ (25) ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ ਅਤੇ ਉਨ੍ਹਾਂ ਦੀ ਹਾਲਤ ਸਥਿਰ ਹੈ। ਉਨ੍ਹਾਂ ਦੱਸਿਆ ਕਿ ਰੱਸੀਆਂ ਅਤੇ ਇੱਕ ਕ੍ਰੇਨ ਦੀ ਮਦਦ ਨਾਲ ਟੈਂਪੂ ਅਤੇ ਉਸ ਵਿੱਚ ਸਵਾਰ ਲੋਕਾਂ ਨੂੰ ਬਾਹਰ ਕੱਢਿਆ ਗਿਆ।