ਪੰਚਕੂਲਾ 'ਚ ਦਰਦਨਾਕ ਹਾਦਸਾ : ਚੌਥੀ ਮੰਜ਼ਿਲ 'ਤੇ ਜਨਰੇਟਰ ਚੜ੍ਹਾਉਂਦਿਆਂ ਬੇਕਾਬੂ ਹੋ ਕੇ ਡਿੱਗੀ ਕ੍ਰੇਨ, ਦੋ ਨੌਜਵਾਨਾਂ ਦੀ ਮੌਕੇ 'ਤੇ ਮੌਤ

ਤਰੁਣ ਭਜਨੀ, ਪੰਜਾਬੀ ਜਾਗਰਣ, ਪੰਚਕੂਲਾ : ਸ਼ਹਿਰ ਦੇ ਉਦਯੋਗਿਕ ਖੇਤਰ ਫੇਜ਼-2 ਵਿੱਚ ਵੀਰਵਾਰ ਦੁਪਹਿਰ ਇੱਕ ਵੱਡਾ ਹਾਦਸਾ ਵਾਪਰ ਗਿਆ। ਇੱਥੇ ਸਥਿਤ ਇੱਕ ਕੰਪਨੀ ਦੀ ਇਮਾਰਤ ਦੀ ਚੌਥੀ ਮੰਜ਼ਿਲ ’ਤੇ ਕਰੇਨ ਦੀ ਮਦਦ ਨਾਲ ਨਵਾਂ ਜਨਰੇਟਰ ਚੜ੍ਹਾਇਆ ਜਾ ਰਿਹਾ ਸੀ। ਇਸ ਦੌਰਾਨ ਕਰੇਨ ਦਾ ਸੰਤੁਲਨ ਵਿਗੜ ਗਿਆ ਅਤੇ ਜਨਰੇਟਰ ਦੇ ਉੱਪਰ ਬੈਠੇ ਦੋ ਕਰਮਚਾਰੀ ਜਨਰੇਟਰ ਸਮੇਤ ਹੇਠਾਂ ਜਾ ਡਿੱਗੇ। ਹਾਦਸੇ ਤੋਂ ਬਾਅਦ ਮੌਕੇ ’ਤੇ ਹਫੜਾ-ਦਫੜੀ ਮਚ ਗਈ। ਗੰਭੀਰ ਜ਼ਖ਼ਮੀ ਦੋਵਾਂ ਕਰਮਚਾਰੀਆਂ ਨੂੰ ਤੁਰੰਤ ਸੈਕਟਰ-6 ਸਥਿਤ ਸਿਵਲ ਹਸਪਤਾਲ ਪਹੁੰਚਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਮ੍ਰਿਤਕਾਂ ਦੀ ਪਛਾਣ ਬਿਹਾਰ ਵਾਸੀ ਮਨੀਸ਼ ਅਤੇ ਹਿਮਾਚਲ ਪ੍ਰਦੇਸ਼ ਵਾਸੀ ਨਵੀਨ ਵਜੋਂ ਹੋਈ ਹੈ। ਦੋਵਾਂ ਦੀ ਉਮਰ ਕਰੀਬ 22 ਤੋਂ 23 ਸਾਲ ਦੱਸੀ ਜਾ ਰਹੀ ਹੈ। ਉੱਥੇ ਹੀ ਕਰੇਨ ਚਾਲਕ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ।

ਹਾਦਸਾ ਵੀਰਵਾਰ ਦੁਪਹਿਰ ਬਾਅਦ ਕਰੀਬ 3:30 ਵਜੇ ਵਾਪਰਿਆ। ਸਟੇਟ ਪਲਾਟ ਨੰਬਰ-310 ਵਿੱਚ ਇੱਕ ਨਿੱਜੀ ਕੰਪਨੀ ਦੀ ਛੱਤ ’ਤੇ ਜਨਰੇਟਰ ਚੜ੍ਹਾਇਆ ਜਾ ਰਿਹਾ ਸੀ। ਜਨਰੇਟਰ ਨੂੰ ਕਰੇਨ ਦੀ ਮਦਦ ਨਾਲ ਉੱਪਰ ਲਿਜਾਇਆ ਜਾ ਰਿਹਾ ਸੀ। ਇਸ ਦੌਰਾਨ ਜਨਰੇਟਰ ਦੇ ਉੱਪਰ ਬੈਠੇ ਦੋਵੇਂ ਕਰਮਚਾਰੀ ਵੀ ਉਸ ਦੇ ਨਾਲ ਉੱਪਰ ਜਾ ਰਹੇ ਸਨ। ਅਚਾਨਕ ਕਰੇਨ ਦਾ ਸੰਤੁਲਨ ਵਿਗੜ ਗਿਆ ਅਤੇ ਕਰੇਨ ਪਲਟ ਗਈ। ਕਰੇਨ ਦੇ ਨਾਲ ਜਨਰੇਟਰ ਵੀ ਹੇਠਾਂ ਆ ਡਿੱਗਿਆ ਅਤੇ ਉਸ ’ਤੇ ਬੈਠੇ ਮਨੀਸ਼ ਤੇ ਨਵੀਨ ਵੀ ਕਈ ਫੁੱਟ ਦੀ ਉਚਾਈ ਤੋਂ ਹੇਠਾਂ ਡਿੱਗ ਗਏ। ਦੋਵਾਂ ਦੀ ਮੌਤ ਹੋ ਗਈ। ਇਹ ਘਟਨਾ ਨੇੜੇ ਲੱਗੇ ਸੀਸੀਟੀਵੀ ਕੈਮਰੇ ਵਿੱਚ ਕੈਦ ਹੋ ਗਈ ਹੈ।

ਮਨੀਸ਼ ਅਤੇ ਨਵੀਨ ਨੇ ਜਨਰੇਟਰ ਫਿੱਟ ਕਰਨਾ ਸੀ

ਜਾਣਕਾਰੀ ਅਨੁਸਾਰ ਜਨਰੇਟਰ ਕਿਸੇ ਹੋਰ ਸੂਬੇ ਤੋਂ ਪੰਚਕੂਲਾ ਲਿਆਂਦਾ ਗਿਆ ਸੀ। ਇਸ ਤੋਂ ਬਾਅਦ ਇਸ ਨੂੰ ਕੰਪਨੀ ਦੀ ਛੱਤ ’ਤੇ ਲਿਜਾ ਕੇ ਫਿੱਟ ਕੀਤਾ ਜਾਣਾ ਸੀ। ਇਸੇ ਕੰਮ ਲਈ ਮਨੀਸ਼ ਅਤੇ ਨਵੀਨ ਨੂੰ ਜਨਰੇਟਰ ਫਿੱਟ ਕਰਨ ਲਈ ਭੇਜਿਆ ਗਿਆ ਸੀ। ਇਸ ਦੌਰਾਨ ਕਰੇਨ ਰਾਹੀਂ ਜਨਰੇਟਰ ਨੂੰ ਉਚਾਈ ’ਤੇ ਲਿਜਾਂਦੇ ਸਮੇਂ ਇਹ ਹਾਦਸਾ ਵਾਪਰ ਗਿਆ।

ਫਿਲਹਾਲ ਪੁਲਿਸ ਨੇ ਦੋਵਾਂ ਦੀਆਂ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਹਸਪਤਾਲ ਦੀ ਮੋਰਚਰੀ ਵਿੱਚ ਰਖਵਾ ਦਿੱਤਾ ਹੈ ਅਤੇ ਮਾਮਲੇ ਦੀ ਜਾਂਚ ਜਾਰੀ ਹੈ। ਸੈਕਟਰ-19 ਚੌਕੀ ਇੰਚਾਰਜ ਕਮਲਜੀਤ ਸਿੰਘ ਨੇ ਦੱਸਿਆ ਕਿ ਪੂਰੇ ਹਾਦਸੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।