ਸੂਰਿਆ ਕਿਰਨ ਏਅਰ ਸ਼ੋਅ : 35 ਮਿੰਟ ਤੱਕ ਰੁਕ ਜਾਣਗੇ ਸਾਹ, ਮੇਰਠ ਦੇ ਆਸਮਾਨ ’ਚ ਪਹਿਲੀ ਵਾਰ ਰੋਮਾਂਚਕ ਕਰਤੱਬ ਦਿਖਾਉਣਗੇ ਹਵਾਈ ਸੈਨਾ ਦੇ ਜਹਾਜ਼

ਜਾਗਰਣ ਸੰਵਾਦਦਾਤਾ, ਮੇਰਠ : ਭਾਰਤੀ ਹਵਾਈ ਸੈਨਾ ਦੀ ਸੂਰਿਆ ਕਿਰਨ ਏਰੋਬੈਟਿਕ ਟੀਮ ਦਾ ਏਅਰ ਸ਼ੋਅ 19 ਤੇ 20 ਸਤੰਬਰ ਨੂੰ ਪਹਿਲੀ ਵਾਰ ਮੇਰਠ ਦੇ ਆਸਮਾਨ ’ਚ ਕੀਤਾ ਜਾਵੇਗਾ। ਸ਼ੋਅ ’ਚ ਲਾਲ-ਸਫੈਦ ਰੰਗ ਦੇ ਨੌਂ ਜਹਾਜ਼ ਆਸਮਾਨ ’ਚ ਸ਼ਾਨਦਾਰ ਆਕਾਰ ਬਣਾਉਂਦੇ ਹੋਏ ਹੈਰਾਨ ਕਰ ਦੇਣ ਵਾਲੇ ਕਰਤੱਬ ਦਿਖਾਉਣਗੇ।

ਪ੍ਰੋਗਰਾਮ ਨੂੰ ਲੈ ਕੇ ਸੂਰਿਆ ਕਿਰਨ ਟੀਮ ਦੇ ਨਾਲ-ਨਾਲ ਦਰਸ਼ਕਾਂ ਲਈ ਜ਼ਮੀਨ ’ਤੇ ਜ਼ਿਲ੍ਹਾ ਪ੍ਰਸ਼ਾਸਨ ਨੇ ਵੀ ਤਿਆਰੀਆਂ ਤੇਜ਼ ਕਰ ਦਿੱਤੀਆਂ ਹਨ। ਇਸ ਪ੍ਰੋਗਰਾਮ ’ਚ ਸਮਾਜ ਦੇ ਵੱਖ-ਵੱਖ ਵਰਗਾਂ ਦੀ ਭਾਗੀਦਾਰੀ ਯਕੀਨੀ ਬਣਾਉਣ ਲਈ ਵਿਸ਼ੇਸ਼ ਪ੍ਰਬੰਧ ਕੀਤੇ ਜਾ ਰਹੇ ਹਨ। ਮੋਹਿਉੱਦੀਨਪੁਰ ’ਚ ਇੰਟੀਗ੍ਰੇਟਿਡ ਨਿਊ ਟਾਊਨਸ਼ਿਪ ਵਾਲੀ ਥਾਂ ’ਤੇ 5,000 ਲੋਕਾਂ ਦੇ ਬੈਠਣ ਦੀ ਵਿਵਸਥਾ ਕੀਤੀ ਜਾ ਰਹੀ ਹੈ। ਦੋ ਦਿਨਾਂ ’ਚ 10,000 ਲੋਕ ਬੈਠ ਕੇ ਇਹ ਪ੍ਰੋਗਰਾਮ ਦੇਖ ਸਕਣਗੇ। ਇਸ ਤੋਂ ਇਲਾਵਾ ਆਸ-ਪਾਸ ਖੜ੍ਹੇ ਹੋ ਕੇ ਵੀ ਸ਼ੋਅ ਦੇਖਣ ਦੀ ਇਜਾਜ਼ਤ ਹੋਵੇਗੀ।

ਰਾਜ ਸਭਾ ਮੈਂਬਰ ਡਾ. ਲਕਸ਼ਮੀਕਾਂਤ ਵਾਜਪੇਈ ਨੇ ਦੱਸਿਆ ਕਿ ਬੈਠਣ ਦੀ ਵਿਵਸਥਾ ਤੋਂ ਇਲਾਵਾ ਮੈਦਾਨ ਦਾ ਵੱਡਾ ਹਿੱਸਾ ਖੁੱਲ੍ਹਾ ਰਹੇਗਾ, ਜਿੱਥੇ ਲੋਕ ਖੜ੍ਹੇ ਹੋ ਕੇ ਵੀ ਸ਼ੋਅ ਦਾ ਆਨੰਦ ਲੈ ਸਕਣਗੇ। ਸਕੂਲਾਂ ਨੂੰ ਵਿਸ਼ੇਸ਼ ਤੌਰ ’ਤੇ ਇਸ ਪ੍ਰੋਗਰਾਮ ਨਾਲ ਜੋੜਿਆ ਜਾ ਰਿਹਾ ਹੈ। ਜਿਨ੍ਹਾਂ ਸਕੂਲਾਂ ਕੋਲ ਬੱਸਾਂ ਦੀ ਸਹੂਲਤ ਹੈ, ਉਹ ਆਪਣੇ ਵਿਦਿਆਰਥੀਆਂ ਨੂੰ ਬੱਸਾਂ ਰਾਹੀਂ ਪ੍ਰੋਗਰਾਮ ਵਾਲੀ ਥਾਂ ’ਤੇ ਲਿਆ ਸਕਣਗੇ। ਅਜਿਹੇ ਸਕੂਲਾਂ ਨੂੰ ਪਾਸ ਉਪਲਬਧ ਕਰਵਾਏ ਜਾਣਗੇ। ਸ਼ਹਿਰ ਦੇ ਰੋਟਰੀ, ਲਾਇਨਜ਼ ਕਲੱਬ, ਆਈਐਮਏ, ਬਾਰ ਐਸੋਸੀਏਸ਼ਨ ਤੇ ਆਈਆਈਏ ਸਮੇਤ ਵੱਖ-ਵੱਖ ਸੰਗਠਨਾਂ ਨੂੰ ਵੀ 10 ਤੋਂ 20 ਤੱਕ ਪਾਸ ਦਿੱਤੇ ਜਾਣਗੇ।

35 ਮਿੰਟ ਤੱਕ ਆਸਮਾਨ ’ਚ ਰੋਮਾਂਚ

ਸੂਰਿਆ ਕਿਰਨ ਟੀਮ ਦੇ ਨੌਂ ਜਹਾਜ਼ ਲਾਲ ਤੇ ਸਫੈਦ ਰੰਗ ਦੇ ਹੋਣਗੇ ਤੇ ਲਗਭਗ 35 ਮਿੰਟ ਤੱਕ ਏਰੋਬੈਟਿਕ ਪ੍ਰਦਰਸ਼ਨ ਕਰਨਗੇ। ਦਰਸ਼ਕਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਸਮੇਂ ਤੋਂ ਪਹਿਲਾਂ ਪਹੁੰਚ ਕੇ ਆਪਣੇ ਨਿਰਧਾਰਤ ਸਥਾਨ ’ਤੇ ਬੈਠ ਜਾਣ। ਪ੍ਰੋਗਰਾਮ ਲਈ ਸਵੇਰੇ 9 ਵਜੇ ਤੋਂ 11:30 ਵਜੇ ਤੱਕ ਦਾ ਸਮਾਂ ਰੱਖਿਆ ਗਿਆ ਹੈ। ਇਸ ਸ਼ੋਅ ਦੀ ਇੱਕ ਖਾਸ ਗੱਲ ਇਹ ਵੀ ਹੋਵੇਗੀ ਕਿ ਦੋ ਪਾਇਲਟ ਮੇਰਠ ਦੇ ਰਹਿਣ ਵਾਲੇ ਹਨ।

ਤੀਜੇ ਮੇਰਠ ਵਾਸੀ ਪਾਇਲਟ ਦੀ ਭੂਮਿਕਾ ਜ਼ਮੀਨ ਤੋਂ ਸ਼ੋਅ ਦੇ ਪ੍ਰਬੰਧਨ ’ਚ ਹੋਵੇਗੀ। ਇਨ੍ਹਾਂ ’ਚ ਸਕੁਆਡਰਨ ਲੀਡਰ ਅਮਨ ਗੋਇਲ, ਸਕੁਆਡਰਨ ਲੀਡਰ ਰਾਹੁਲ ਸਿੰਘ ਤੇ ਸਕੁਆਡਰਨ ਲੀਡਰ ਸ਼ਰਦ ਗੋਇਲ ਸ਼ਾਮਲ ਹਨ।

ਬੀਐਸਏ ਤੇ ਡੀਆਈਓਐਸ ਨੂੰ 500-500 ਪਾਸ

ਡਾ. ਵਾਜਪੇਈ ਨੇ ਦੱਸਿਆ ਕਿ ਦਰਸ਼ਕਾਂ ਦੀ ਭਾਗੀਦਾਰੀ ਵਧਾਉਣ ਤੇ ਸਕੂਲੀ ਵਿਦਿਆਰਥੀਆਂ ਨੂੰ ਵੀ ਹਵਾਈ ਸੈਨਾ ਦੀ ਪੇਸ਼ਕਾਰੀ ਦਿਖਾਉਣ ਲਈ ਬੇਸਿਕ ਸਿੱਖਿਆ ਅਧਿਕਾਰੀ ਤੇ ਜ਼ਿਲ੍ਹਾ ਸਕੂਲ ਇੰਸਪੈਕਟਰ ਨੂੰ 500-500 ਪਾਸ ਦਿੱਤੇ ਜਾਣਗੇ। ਹੋਰ ਸਮਾਜਿਕ ਤੇ ਵਪਾਰਕ ਸੰਗਠਨਾਂ ਨੂੰ ਵੀ ਪਾਸ ਉਪਲਬਧ ਕਰਵਾਏ ਜਾਣਗੇ। ਪ੍ਰੋਗਰਾਮ ਦਾ ਉਦੇਸ਼ ਸਮਾਜ ਦੇ ਹਰ ਵਰਗ ਨੂੰ ਏਅਰ ਸ਼ੋਅ ਦੇਖਣ ਦਾ ਮੌਕਾ ਦੇਣਾ ਹੈ।

ਡਾ. ਵਾਜਪੇਈ ਨੇ ਦੱਸਿਆ ਕਿ 19 ਤੇ 20 ਸਤੰਬਰ ਦੋਵੇਂ ਦਿਨ ਪ੍ਰੋਗਰਾਮ ਆਯੋਜਿਤ ਹੋਵੇਗਾ ਤੇ ਦੋਵਾਂ ਦਿਨਾਂ ਦੇ ਸੱਦੇ ਗਏ ਮਹਿਮਾਨਾਂ ਦੀ ਸੂਚੀ ਵੱਖ-ਵੱਖ ਰੱਖੀ ਜਾਵੇਗੀ। ਪ੍ਰੋਗਰਾਮ ਨੂੰ ਲੈ ਕੇ ਵਧ ਰਹੀ ਮੰਗ ਤੇ ਸੀਮਿਤ ਸਮਰੱਥਾ ਦੇ ਵਿਚਕਾਰ ਪਾਸ ਵੰਡਣ ਦੀ ਵਿਵਸਥਾ ਕੀਤੀ ਜਾ ਰਹੀ ਹੈ।

ਸੂਰਿਆ ਕਿਰਨ ਏਰੋਬੈਟਿਕ ਟੀਮ ਨੌਂ ਜਹਾਜ਼ਾਂ ਨਾਲ ਪ੍ਰਦਰਸ਼ਨ ਕਰਨ ਵਾਲੀ ਏਸ਼ੀਆ ਦੀ ਇਕਲੌਤੀ ਏਰੋਬੈਟਿਕ ਟੀਮ ਹੈ। ਗਰੁੱਪ ਕੈਪਟਨ ਅਜੈ ਦਸਰਥੀ ਦੀ ਅਗਵਾਈ ਹੇਠ ਟੀਮ ਨੌਂ ਲਾਲ-ਸਫੈਦ ਹਾਕ ਐਮਕੇ 132 ਜਹਾਜ਼ਾਂ ਨਾਲ ਲੂਪ, ਬੈਰਲ ਰੋਲ, ਉਲਟੀ ਉਡਾਣ ਤੇ ਡੀਐਨਏ ਮੈਨੂਵਰ ਵਰਗੇ ਹਵਾਈ ਕਰਤੱਬ ਦਿਖਾਏਗੀ।