ਮਨਪਸੰਦ ਕਾਲਜ ’ਚ ਦਾਖਲਾ ਨਾ ਮਿਲਣ ’ਤੇ ਵਿਦਿਆਰਥੀ ਨੇ ਖੁਦ ਨੂੰ ਗੋਲੀ ਮਾਰੀ, ਸਵਾਲ ਇਹ ਕਿ ਪਿਸਤੌਲ ਆਇਆ ਕਿੱਥੋਂ!

ਜਾਗਰਣ ਸੰਵਾਦਦਾਤਾ, ਮੇਰਠ : ਮਨਪਸੰਦ ਕਾਲਜ ’ਚ ਦਾਖਲਾ ਨਾ ਮਿਲਣ ਕਾਰਨ ਟੀਪੀਨਗਰ ਥਾਣਾ ਖੇਤਰ ਦੇ ਦਿਨੇਸ਼ ਵਿਹਾਰ ’ਚ ਇੱਕ ਵਿਦਿਆਰਥੀ ਨੇ ਪਿਸਤੌਲ ਨਾਲ ਖੁਦ ਨੂੰ ਗੋਲੀ ਮਾਰ ਲਈ। ਪਰਿਵਾਰਕ ਮੈਂਬਰਾਂ ਨੇ ਪੁਲਿਸ ਨੂੰ ਸੂਚਿਤ ਕੀਤੇ ਬਿਨਾਂ ਉਸ ਨੂੰ ਸੁਭਾਰਤੀ ਹਸਪਤਾਲ ’ਚ ਦਾਖਲ ਕਰਵਾ ਦਿੱਤਾ। ਸਵਾਲ ਇਹ ਹੈ ਕਿ ਵਿਦਿਆਰਥੀ ਕੋਲ ਪਿਸਤੌਲ ਕਿੱਥੋਂ ਆਇਆ? ਇੰਸਪੈਕਟਰ ਅਰੁਣ ਮਿਸ਼ਰਾ ਦਾ ਕਹਿਣਾ ਹੈ ਕਿ ਇਲਾਜ ਤੋਂ ਬਾਅਦ ਵਿਦਿਆਰਥੀ ਤੋਂ ਪਿਸਤੌਲ ਬਾਰੇ ਪੁੱਛਗਿੱਛ ਕੀਤੀ ਜਾਵੇਗੀ। ਪਰਿਵਾਰਕ ਮੈਂਬਰ ਵੀ ਪਿਸਤੌਲ ਬਾਰੇ ਕੁਝ ਨਹੀਂ ਦੱਸ ਰਹੇ। ਮੰਨਿਆ ਜਾ ਰਿਹਾ ਹੈ ਕਿ ਉਸ ਨੇ ਕਿਸੇ ਦੋਸਤ ਤੋਂ ਪਿਸਤੌਲ ਲਿਆ ਹੋਵੇਗਾ।

ਦਿਨੇਸ਼ ਵਿਹਾਰ ਵਾਸੀ ਦੀਪਕ ਕੁਮਾਰ ਦਾ ਹਰਿਦੁਆਰ ’ਚ ਪਤੰਜਲੀ ਯੋਗ ਪੀਠ ਦੇ ਸਾਹਮਣੇ ਇੱਕ ਹੋਸਟਲ ਹੈ। ਘਰ ’ਚ ਉਨ੍ਹਾਂ ਦਾ 18 ਸਾਲਾ ਪੁੱਤਰ ਹਨੀ, ਪਤਨੀ ਤੇ ਦੋ ਧੀਆਂ ਰਹਿੰਦੀਆਂ ਹਨ। ਹਨੀ ਨੇ ਇਸੇ ਸਾਲ 12ਵੀਂ ਜਮਾਤ ਪਾਸ ਕੀਤੀ ਹੈ। ਪੁਲਿਸ ਮੁਤਾਬਕ, ਮਨਪਸੰਦ ਕਾਲਜ ’ਚ ਦਾਖਲਾ ਨਾ ਮਿਲਣ ਕਾਰਨ ਸ਼ੁੱਕਰਵਾਰ ਸ਼ਾਮ ਨੂੰ ਹਨੀ ਦਾ ਆਪਣੀ ਮਾਂ ਨਾਲ ਝਗੜਾ ਹੋ ਗਿਆ। ਇਸ ਤੋਂ ਬਾਅਦ ਹਨੀ ਦੂਜੇ ਕਮਰੇ ’ਚ ਗਿਆ ਤੇ ਪਿਸਤੌਲ ਨਾਲ ਆਪਣੇ ਪੇਟ ’ਚ ਗੋਲੀ ਮਾਰ ਲਈ। ਜਦੋਂ ਪਰਿਵਾਰਕ ਮੈਂਬਰ ਕਮਰੇ ’ਚ ਪਹੁੰਚੇ ਤਾਂ ਹਨੀ ਖੂਨ ਨਾਲ ਲਥਪਥ ਪਿਆ ਸੀ। ਪਰਿਵਾਰਕ ਮੈਂਬਰ ਹਨੀ ਨੂੰ ਸੁਭਾਰਤੀ ਹਸਪਤਾਲ ਲੈ ਗਏ। ਸੂਚਨਾ ਮਿਲਣ ’ਤੇ ਟੀਪੀਨਗਰ ਪੁਲਿਸ ਹਸਪਤਾਲ ਪਹੁੰਚੀ ਤੇ ਜਾਣਕਾਰੀ ਹਾਸਲ ਕੀਤੀ। ਥਾਣਾ ਇੰਚਾਰਜ ਅਰੁਣ ਮਿਸ਼ਰਾ ਦਾ ਕਹਿਣਾ ਹੈ ਕਿ ਮਨਪਸੰਦ ਕਾਲਜ ’ਚ ਦਾਖਲਾ ਨਾ ਹੋਣ ਦੀ ਗੱਲ ਨੂੰ ਲੈ ਕੇ ਹਨੀ ਦਾ ਆਪਣੀ ਮਾਂ ਨਾਲ ਵਿਵਾਦ ਹੋਇਆ ਸੀ। ਇਸ ਤੋਂ ਬਾਅਦ ਉਸ ਨੇ ਇਹ ਕਦਮ ਚੁੱਕਿਆ।