ਭਾਰਤੀ ਸਟੇਟ ਬੈਂਕ ਦੇ ਬ੍ਰਾਂਚ ਮੈਨੇਜਰ ਦੀ ਸ਼ੱਕੀ ਹਾਲਾਤਾਂ ’ਚ ਮੌਤ, ਸਰੀਏ ਨਾਲ ਲਟਕੀ ਮਿਲੀ ਲਾਸ਼; ਖੁਦਕੁਸ਼ੀ ਦਾ ਸ਼ੱਕ

ਸੰਵਾਦ ਸੂਤਰ, ਧੁਮਾਕੋਟ। ਭਾਰਤੀ ਸਟੇਟ ਬੈਂਕ ਦੀ ਧੁਮਾਕੋਟ ਸ਼ਾਖਾ ਦੇ ਮੈਨੇਜਰ ਦੀ ਸ਼ੱਕੀ ਹਾਲਾਤਾਂ ’ਚ ਮੌਤ ਹੋ ਗਈ। ਪੁਲਿਸ ਨੇ ਉਨ੍ਹਾਂ ਦੇ ਕਮਰੇ ’ਚ ਇੱਕ ਲੋਹੇ ਦੇ ਸਰੀਏ ਨਾਲ ਰੱਸੀ ਦੇ ਸਹਾਰੇ ਲਟਕੀ ਲਾਸ਼ ਬਰਾਮਦ ਕੀਤੀ ਹੈ। ਪਹਿਲੀ ਨਜ਼ਰ ’ਚ ਪੁਲਿਸ ਇਸ ਮਾਮਲੇ ਨੂੰ ਖੁਦਕੁਸ਼ੀ ਮੰਨ ਰਹੀ ਹੈ।

ਭਾਰਤੀ ਸਟੇਟ ਬੈਂਕ ਦੀ ਧੁਮਾਕੋਟ ਸ਼ਾਖਾ ਦੇ ਮੈਨੇਜਰ ਗਣੇਸ਼ ਸਿੰਘ ਨੇਗੀ ਦੇ ਪਰਿਵਾਰਕ ਮੈਂਬਰ ਕੱਲ੍ਹ ਤੋਂ ਉਨ੍ਹਾਂ ਨੂੰ ਫੋਨ ਕਰ ਰਹੇ ਸਨ, ਪਰ ਉਹ ਫੋਨ ਨਹੀਂ ਚੁੱਕ ਰਹੇ ਸਨ।

ਅੱਜ ਸਵੇਰੇ ਉਨ੍ਹਾਂ ਦੇ ਪਿਤਾ ਨੇ ਬੈਂਕ ਦੇ ਇੱਕ ਕਰਮਚਾਰੀ ਨੂੰ ਫੋਨ ਕਰਕੇ ਪੁੱਤਰ ਦੇ ਕਮਰੇ ’ਚ ਜਾ ਕੇ ਉਸ ਨਾਲ ਗੱਲ ਕਰਵਾਉਣ ਦੀ ਬੇਨਤੀ ਕੀਤੀ। ਜਦੋਂ ਕਰਮਚਾਰੀ ਕਮਰੇ ’ਚ ਪਹੁੰਚਿਆ ਤਾਂ ਕਮਰੇ ਦਾ ਦਰਵਾਜ਼ਾ ਖੁੱਲ੍ਹਾ ਹੋਇਆ ਸੀ, ਜਦਕਿ ਰਸੋਈ ’ਚ ਗਣੇਸ਼ ਦੀ ਲਾਸ਼ ਇੱਕ ਸਰਿਏ ਨਾਲ ਬੰਨ੍ਹੀ ਰੱਸੀ ਦੇ ਸਹਾਰੇ ਲਟਕ ਰਹੀ ਸੀ।

ਸੂਚਨਾ ਮਿਲਦੇ ਹੀ ਪੁਲਿਸ ਮੌਕੇ ’ਤੇ ਪਹੁੰਚੀ ਤੇ ਲਾਸ਼ ਨੂੰ ਰੱਸੀ ਤੋਂ ਹੇਠਾਂ ਉਤਾਰ ਕੇ ਹਸਪਤਾਲ ਭੇਜਿਆ। ਉੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਗਣੇਸ਼ ਨੇ ਕੁਝ ਸਮਾਂ ਪਹਿਲਾਂ ਹੀ ਬੈਂਕ ’ਚ ਆਪਣਾ ਅਹੁਦਾ ਸੰਭਾਲਿਆ ਸੀ। ਉਹ ਮੇਰਠ ਤੋਂ ਤਬਾਦਲਾ ਹੋ ਕੇ ਧੁਮਾਕੋਟ ਆਏ ਸਨ।