‘ICU ’ਚ ਦਾਖ਼ਲ ਹੋਏ ਸ਼ਿਵਸੈਨਾ ਦੇ ਵਰਕਰ’, ਬਿੱਲ ਨੂੰ ਲੈ ਕੇ ਵਿਵਾਦ ਤੋਂ ਬਾਅਦ ਹਸਪਤਾਲ ’ਚ ਕਰਮਚਾਰੀ ਨੂੰ ਥੱਪੜ ਮਾਰਨ ਦਾ ਦੋਸ਼

ਡਿਜੀਟਲ ਡੈਸਕ, ਮੁੰਬਈ : ਏਕਨਾਥ ਸ਼ਿੰਦੇ ਦੀ ਅਗਵਾਈ ਵਾਲੀ ਸ਼ਿਵਸੈਨਾ ਦੇ ਲਗਭਗ 25-30 ਵਰਕਰ ਪਾਲਘਰ ਦੇ ਇੱਕ ਹਸਪਤਾਲ ਦੇ ICU ਵਾਰਡ ’ਚ ਦਾਖ਼ਲ ਹੋ ਕੇ ਹੰਗਾਮਾ ਕਰਨ ਲੱਗ ਪਏ। ਦਹੀ ਹਾਂਡੀ ਸਮਾਰੋਹ ਦੌਰਾਨ ਜ਼ਖ਼ਮੀ ਹੋਏ ਪੰਜ ਗੋਵਿੰਦਿਆਂ ਦੇ ਮੈਡੀਕਲ ਬਿੱਲ ਨੂੰ ਲੈ ਕੇ ਡਾਕਟਰ ਨਾਲ ਗਾਲੀ-ਗਲੌਚ ਕੀਤੀ ਗਈ ਤੇ ਹਸਪਤਾਲ ਦੇ ਕਰਮਚਾਰੀਆਂ ਨੂੰ ਧਮਕਾਇਆ ਗਿਆ। NDTV ਅਨੁਸਾਰ, ਸ਼ਨੀਵਾਰ ਰਾਤ ਨੂੰ ਵਰਕਰਾਂ ਨੇ ICU ’ਚ ਦਾਖ਼ਲ ਇੱਕ ਮਰੀਜ਼ ਨੂੰ ਕਥਿਤ ਤੌਰ ’ਤੇ ਜ਼ਬਰਦਸਤੀ ਉਥੋਂ ਬਾਹਰ ਕੱਢ ਲਿਆ। ਇਹ ਘਟਨਾ ਸ਼ਨੀਵਾਰ ਤੜਕੇ ਪਾਲਘਰ ਦੇ ਰਿਲੀਫ ਹਸਪਤਾਲ ’ਚ ਵਾਪਰੀ। ਦੱਸਿਆ ਜਾ ਰਿਹਾ ਹੈ ਕਿ ਸ਼ਿਵਸੈਨਾ ਦੇ ਕੇਂਦਰੀ ਦਫ਼ਤਰ ਦੇ ਬਾਹਰ ਕਰਵਾਏ ਗਏ ਦਹੀ ਹਾਂਡੀ ਪ੍ਰੋਗਰਾਮ ਦੌਰਾਨ ਜ਼ਖ਼ਮੀ ਹੋਏ ਗੋਵਿੰਦਿਆਂ ਨੂੰ ਇਲਾਜ ਲਈ ਹਸਪਤਾਲ ਲਿਆਂਦਾ ਗਿਆ ਸੀ।

ਕੀ ਹੈ ਪੂਰਾ ਮਾਮਲਾ?

ਹਸਪਤਾਲ ਦੇ ਬਿਲਿੰਗ ਅਸਿਸਟੈਂਟ ਨੇ ਦੱਸਿਆ ਕਿ ਪੰਜ ਗੋਵਿੰਦਾ ਮਰੀਜ਼ਾਂ ਨੂੰ ਸਾਡੇ ਹਸਪਤਾਲ ਲਿਆਂਦਾ ਗਿਆ ਸੀ। ਦੋ ਦੇ ਸੀਨੇ ’ਤੇ ਸੱਟਾਂ ਸਨ, ਜਦਕਿ ਹੋਰਾਂ ਨੂੰ ਰੀੜ੍ਹ ਦੀ ਹੱਡੀ, ਸਿਰ ਤੇ ਮੋਢੇ ’ਤੇ ਸੱਟਾਂ ਲੱਗੀਆਂ ਸਨ। ਸਿਰ ’ਤੇ ਸੱਟ ਲੱਗੇ ਇੱਕ ਮਰੀਜ਼ ਨੇ ਹੋਸ਼ ਗੁਆ ਦਿੱਤਾ ਸੀ, ਇਸ ਲਈ ਉਸਨੂੰ ICU ’ਚ ਸ਼ਿਫਟ ਕਰਨਾ ਪਿਆ ਤੇ CT ਸਕੈਨ ਦੀ ਸਲਾਹ ਦਿੱਤੀ ਗਈ। ਪਰ ਸ਼ਿਵਸੈਨਾ ਦੇ ਵਰਕਰ ਚਾਹੁੰਦੇ ਸਨ ਕਿ ਮਰੀਜ਼ਾਂ ਨੂੰ ਜਲਦ ਤੋਂ ਜਲਦ ਹਸਪਤਾਲ ਤੋਂ ਛੁੱਟੀ ਦੇ ਦਿੱਤੀ ਜਾਵੇ। ਇਨ੍ਹਾਂ ’ਚ ਪਾਰਟੀ ਦੇ ਪਾਲਘਰ ਜ਼ਿਲ੍ਹਾ ਤੇ ਸ਼ਹਿਰੀ ਇਕਾਈ ਦੇ ਮੁਖੀ ਵੀ ਸ਼ਾਮਲ ਸਨ।

ਮੈਡੀਕਲ ਬਿੱਲ ਨੂੰ ਲੈ ਕੇ ਹੋਇਆ ਵਿਵਾਦ

ਅੱਧੀ ਰਾਤ ਤੱਕ ਪੰਜਾਂ ਮਰੀਜ਼ਾਂ ਦਾ ਕੁੱਲ ਮੈਡੀਕਲ ਬਿੱਲ 19,866 ਰੁਪਏ ਹੋ ਗਿਆ ਸੀ। ਇਸ ’ਚੋਂ ਇੱਕ ਸਹਿਯੋਗੀ ਵੱਲੋਂ 10,000 ਰੁਪਏ ਨਕਦ ਜਮ੍ਹਾਂ ਕਰਵਾਏ ਗਏ ਸਨ। ਇਸ ਤੋਂ ਬਾਅਦ ਸ਼ਿਵਸੈਨਾ ਦੇ ਕੁਝ ਅਹੁਦੇਦਾਰ ਉੱਥੇ ਪਹੁੰਚੇ ਤੇ ਮਰੀਜ਼ਾਂ ਨੂੰ ਤੁਰੰਤ ਡਿਸਚਾਰਜ ਕਰਨ ਦੀ ਮੰਗ ਕਰਨ ਲੱਗੇ। ਹਾਲਾਂਕਿ, ਹਸਪਤਾਲ ਦੇ ਪ੍ਰੋਟੋਕੋਲ ਮੁਤਾਬਕ ਮਰੀਜ਼ਾਂ ਦੀ ਡਿਸਚਾਰਜ ਸਮਰੀ ਤੇ ਬਿਲਿੰਗ ਦੀ ਪ੍ਰਕਿਰਿਆ ਅਜੇ ਬਾਕੀ ਸੀ, ਇਸ ਲਈ ਹਸਪਤਾਲ ਨੇ ਕੁਝ ਸਮਾਂ ਮੰਗਿਆ। ਉਨ੍ਹਾਂ ਨੇ ਪੂਰਾ ਬਿੱਲ ਅਦਾ ਨਹੀਂ ਕੀਤਾ, ਸਗੋਂ ਸਿਰਫ਼ 10,000 ਰੁਪਏ ਦਿੱਤੇ ਤੇ ਇਸ ਗੱਲ ’ਤੇ ਅੜ ਗਏ ਕਿ ਪੰਜਾਂ ਮਰੀਜ਼ਾਂ ਦਾ ਖਰਚਾ ਇਸੇ ਰਕਮ ’ਚ ਐਡਜਸਟ ਕੀਤਾ ਜਾਵੇ।

ਮਹਿਲਾ ਡਾਕਟਰ ਨਾਲ ਬਦਸਲੂਕੀ, ਸਟਾਫ ਨਾਲ ਵੀ ਮਾਰਕੁੱਟ

ਜਦੋਂ ਬਿੱਲ ਦੀ ਪ੍ਰਕਿਰਿਆ ਚੱਲ ਰਹੀ ਸੀ, ਉਸੇ ਦੌਰਾਨ ਸ਼ਿਵਸੈਨਾ ਦੇ ਵਰਕਰ ਐਮਰਜੈਂਸੀ ਰੂਮ ਰਾਹੀਂ ਅੰਦਰ ਦਾਖ਼ਲ ਹੋ ਗਏ। ਉਹ ਚੀਕਦੇ ਤੇ ਧਮਕਾਉਂਦੇ ਹੋਏ ਡਾਕਟਰ ਤੇ ਨਰਸਾਂ ਕੋਲ ਪਹੁੰਚੇ ਤੇ ਪੁੱਛਣ ਲੱਗੇ ਕਿ ਮਰੀਜ਼ ਨੂੰ ਹਸਪਤਾਲ ’ਚ ਦਾਖ਼ਲ ਕਿਉਂ ਕੀਤਾ ਗਿਆ ਹੈ। ਉਨ੍ਹਾਂ ਨੇ ਮਹਿਲਾ ਡਾਕਟਰ ਨੂੰ ਕਥਿਤ ਤੌਰ ’ਤੇ ਕਿਹਾ ਕਿ ਤੁਹਾਨੂੰ ਸਿਰਫ਼ ਇਸ ਲਈ ਛੱਡਿਆ ਗਿਆ ਹੈ ਕਿਉਂਕਿ ਤੁਸੀਂ ਇੱਕ ਔਰਤ ਹੋ। ਜੇਕਰ ਤੁਸੀਂ ਔਰਤ ਨਾ ਹੁੰਦੇ ਤਾਂ ਅਸੀਂ ਤੁਹਾਨੂੰ ਬਰਬਾਦ ਕਰ ਦਿੰਦੇ। ਵਰਕਰਾਂ ਨੇ ਡਾਕਟਰਾਂ ਨਾਲ ਗਾਲੀ-ਗਲੌਚ ਕੀਤੀ ਤੇ ਮਹਿਲਾ ਡਾਕਟਰ ਬਾਰੇ ਸਿੱਧੀਆਂ ਅਸ਼ਲੀਲ ਤੇ ਅਪਮਾਨਜਨਕ ਟਿੱਪਣੀਆਂ ਕੀਤੀਆਂ। ਸਥਿਤੀ ਵਿਗੜਦੀ ਦੇਖ ਕੇ ਇੱਕ ਕਰਮਚਾਰੀ ਡਾਕਟਰ ਨੂੰ ਬਚਾਉਣ ਲਈ ਵਿਚਕਾਰ ਆਇਆ। ਉਸਦੇ ਦਖ਼ਲ ਦੇਣ ’ਤੇ ਵਰਕਰਾਂ ਨੇ ਕਥਿਤ ਤੌਰ ’ਤੇ ਉਸਨੂੰ ਥੱਪੜ ਮਾਰਿਆ ਤੇ ਉਸ ਨਾਲ ਮਾਰਕੁੱਟ ਕੀਤੀ।

ਇਸ ਤੋਂ ਬਾਅਦ ਉਹ ਰੌਲਾ ਪਾਉਣ ਲੱਗੇ ਕਿ ਮਰੀਜ਼ ਨੂੰ ICU ’ਚੋਂ ਬਾਹਰ ਕੱਢੋ। ਲਗਭਗ 25-30 ਲੋਕਾਂ ਦੀ ਭੀੜ ਨੇ ICU ’ਚ ਦਾਖ਼ਲ ਹੋ ਕੇ ਨਰਸਿੰਗ ਸਟਾਫ ਨੂੰ ਡਰਾਇਆ-ਧਮਕਾਇਆ ਤੇ ਮਰੀਜ਼ ਨੂੰ ਕਥਿਤ ਤੌਰ ’ਤੇ ਜ਼ਬਰਦਸਤੀ ਉਥੋਂ ਲੈ ਗਏ।

ਮਾਮਲੇ ’ਚ 17 ਲੋਕਾਂ ਖ਼ਿਲਾਫ਼ FIR ਦਰਜ

ਹਸਪਤਾਲ ਵੱਲੋਂ ਰਾਤ 3 ਵਜੇ ਪੁਲਿਸ ਥਾਣੇ ਜਾ ਕੇ ਸ਼ਿਕਾਇਤ ਦਰਜ ਕਰਵਾਈ ਗਈ। ਆਪਣੀਆਂ ਮੰਗਾਂ ਬਾਰੇ ਪੁੱਛੇ ਜਾਣ ’ਤੇ ਹਸਪਤਾਲ ਨੇ ਕਾਨੂੰਨੀ ਪ੍ਰਕਿਰਿਆ ਦੀ ਪਾਲਣਾ ਕੀਤੇ ਜਾਣ ਦੀ ਮੰਗ ਕੀਤੀ ਤੇ ਸੱਤਾ ਦੀ ਦੁਰਵਰਤੋਂ ਦਾ ਦੋਸ਼ ਲਗਾਇਆ। ਐਤਵਾਰ ਸਵੇਰੇ ਪੁਲਿਸ ਨੇ ਇਸ ਮਾਮਲੇ ’ਚ ਸ਼ਿਵਸੈਨਾ ਜ਼ਿਲ੍ਹਾ ਮੁਖੀ ਕੁੰਦਨ ਬਾਲਕ੍ਰਿਸ਼ਨ ਸੰਖੇ, ਸ਼ਿਵਸੈਨਾ ਸ਼ਹਿਰ ਮੁਖੀ ਰਾਹੁਲ ਰਾਮਦਾਸ ਘਰਤ, ਵਿਧਾਇਕ ਰਾਜੇਂਦਰ ਗਾਵਿਤ ਦੇ ਪੁੱਤਰ ਰੋਹਿਤ ਗਾਵਿਤ, ਮਨੀਸ਼ ਉਰਫ਼ ਵਿੱਕੀ ਸੰਖੇ, ਸਾਈਰਾਜ ਪਾਟਿਲ, ਰਾਹੁਲ ਸੰਖੇ, ਮਨੋਜ ਘਰਤ, ਨੀਲਮ ਸੰਖੇ, ਸ਼ੁਭਮ ਬਾਂਦਿਵਡੇਕਰ, ਰਿਸ਼ਭ ਵਰੇ ਤੇ 7-8 ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ FIR ਦਰਜ ਕੀਤੀ ਹੈ। ਪਾਲਘਰ ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਖ਼ਿਲਾਫ਼ ਭਾਰਤੀ ਨਿਆਂ ਸੰਹਿਤਾ ਤੇ ਮਹਾਰਾਸ਼ਟਰ ਮੈਡੀਕੇਅਰ ਸਰਵਿਸ ਪਰਸਨਜ਼ ਐਂਡ ਮੈਡੀਕੇਅਰ ਸਰਵਿਸ ਇੰਸਟੀਚਿਊਸ਼ਨਜ਼ ਐਕਟ ਤਹਿਤ ਮਾਰਪੀਟ, ਅਪਰਾਧਿਕ ਧਮਕੀ, ਗੈਰਕਾਨੂੰਨੀ ਤਰੀਕੇ ਨਾਲ ਦਾਖ਼ਲ ਹੋਣ, ਗੈਰਕਾਨੂੰਨੀ ਇਕੱਠ ਤੇ ਹੋਰ ਅਪਰਾਧਾਂ ਲਈ ਮਾਮਲਾ ਦਰਜ ਕੀਤਾ ਗਿਆ ਹੈ। ਮਾਮਲੇ ਦੀ ਜਾਂਚ ਸਬ-ਇੰਸਪੈਕਟਰ ਵਿਨਾਇਕ ਕੇਸਰਕਰ ਕਰ ਰਹੇ ਹਨ। ਹਾਲਾਂਕਿ, ਹੁਣ ਤੱਕ ਕਿਸੇ ਦੀ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ।

NCP (SP) ਨੇ ਘਟਨਾ ਦੀ ਕੀਤੀ ਨਿੰਦਾ

ਸ਼ਰਦ ਪਵਾਰ ਦੀ ਅਗਵਾਈ ਵਾਲੀ NCP (SP) ਨੇ ਸ਼ਿਵਸੈਨਾ ਅਹੁਦੇਦਾਰਾਂ ਦੀ ਇਸ ਕਾਰਵਾਈ ਦੀ ਸਖ਼ਤ ਨਿੰਦਾ ਕੀਤੀ ਹੈ ਤੇ ਇਸਨੂੰ ਮੈਡੀਕਲ ਪ੍ਰਣਾਲੀ ਤੇ ਕਾਨੂੰਨ ਦੇ ਰਾਜ ’ਤੇ ਸਿੱਧਾ ਹਮਲਾ ਕਰਾਰ ਦਿੱਤਾ ਹੈ। NCP (SP) ਦੇ ਬੁਲਾਰੇ ਮਹੇਸ਼ ਤਪਾਸੇ ਨੇ ਇੱਕ ਬਿਆਨ ’ਚ ਕਿਹਾ ਕਿ ਘਟਨਾ ਦੇ ਵੇਰਵਿਆਂ ਤੋਂ ਲੱਗਦਾ ਹੈ ਕਿ ਇਹ ਅਚਾਨਕ ਆਇਆ ਗੁੱਸਾ ਨਹੀਂ ਸੀ, ਸਗੋਂ ਸੱਤਾ ਦੇ ਅਹੰਕਾਰ ਤੋਂ ਪੈਦਾ ਹੋਈ ਇੱਕ ਯੋਜਨਾਬੱਧ ਗੁੰਡਾਗਰਦੀ ਸੀ। ਉਨ੍ਹਾਂ ਨੇ ਡੋਂਬਿਵਲੀ ਦੇ ਸ਼ਾਸਤਰੀ ਨਗਰ ਹਸਪਤਾਲ ’ਚ ਵਾਪਰੀ ਇੱਕ ਪਿਛਲੀ ਘਟਨਾ ਦਾ ਵੀ ਹਵਾਲਾ ਦਿੱਤਾ, ਜਿੱਥੇ ਸੱਤਾਧਾਰੀ ਸ਼ਿਵਸੈਨਾ ਦੇ ਇੱਕ ਕੌਂਸਲਰ ਰਮੇਸ਼ ਮ੍ਹਾਤਰੇ ਨੇ ਕਥਿਤ ਤੌਰ ’ਤੇ ਡਾਕਟਰਾਂ ਤੇ ਨਰਸਾਂ ਨਾਲ ਮਾਰਕੁੱਟ ਕੀਤੀ ਸੀ। ਤਪਾਸੇ ਨੇ ਕਿਹਾ ਕਿ ਇਹ ਪੈਟਰਨ ਚਿੰਤਾਜਨਕ ਹੈ। ਉਨ੍ਹਾਂ ਕਿਹਾ ਕਿ ਪਾਲਘਰ ’ਚ ਜੋ ਕੁਝ ਹੋਇਆ, ਉਹ ਉਸੇ ਪੈਟਰਨ ਦੀ ਦੁਹਰਾਈ ਹੈ। ਇਹ ਕੋਈ ਇਤਫ਼ਾਕ ਨਹੀਂ ਹੈ ਕਿ ਇਹ ਸੱਤਾਧਾਰੀ ਪਾਰਟੀ ਦੇ ਵਰਕਰਾਂ ਨੂੰ ਮਿਲਣ ਵਾਲੀ ਸਿਆਸੀ ਸੁਰੱਖਿਆ ਦਾ ਲਾਜ਼ਮੀ ਨਤੀਜਾ ਹੈ।