ਡਿਊਟੀ ਤੋਂ ਵਾਪਸ ਆ ਰਹੇ ਪੁਲਿਸ ਸਿਪਾਹੀ ਨੂੰ ਅਣਪਛਾਤੇ ਵਾਹਨ ਨੇ ਕੁਚਲਿਆ, ਤਿੰਨ ਮਹੀਨੇ ਪਹਿਲਾਂ ਹੋਈ ਸੀ ਤਾਇਨਾਤੀ; ਪਰਿਵਾਰ ਦੇ ਤਿੰਨ ਮੈਂਬਰ ਪੁਲਿਸ ’ਚ

ਜਾਗਰਣ ਸੰਵਾਦਦਾਤਾ, ਰਾਮਪੁਰ: ਦਿੱਲੀ-ਲਖਨਊ ਹਾਈਵੇ ’ਤੇ ਅਣਪਛਾਤੇ ਵਾਹਨ ਨੇ ਬਾਈਕ ਸਵਾਰ ਸਿਪਾਹੀ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ। ਇਹ ਹਾਦਸਾ ਸੋਮਵਾਰ ਰਾਤ ਮਿਲਕ ਖੇਤਰ ’ਚ ਵਾਪਰਿਆ। ਮਿਲਕ ਕੋਤਵਾਲੀ ’ਚ ਹੀ ਤਾਇਨਾਤ ਸਿਪਾਹੀ ਸਚਿਨ ਘਟਨਾ ਸਮੇਂ ਡਿਊਟੀ ’ਤੇ ਸਨ।

ਉਹ ਜਲੂਸ ’ਚ ਡਿਊਟੀ ਕਰਨ ਤੋਂ ਬਾਅਦ ਥਾਣੇ ਵਾਪਸ ਜਾ ਰਹੇ ਸਨ। ਇਸ ਦੌਰਾਨ ਹਾਈਵੇ ’ਤੇ ਕਿਸੇ ਵਾਹਨ ਨੇ ਉਨ੍ਹਾਂ ਨੂੰ ਟੱਕਰ ਮਾਰ ਦਿੱਤੀ। ਇਸ ਕਾਰਨ ਉਹ ਗੰਭੀਰ ਰੂਪ ’ਚ ਜ਼ਖ਼ਮੀ ਹੋ ਗਏ। ਰਾਹਗੀਰ ਦੀ ਸੂਚਨਾ ’ਤੇ ਕੋਤਵਾਲੀ ਪੁਲਿਸ ਮੌਕੇ ’ਤੇ ਪਹੁੰਚੀ ਤੇ ਉਨ੍ਹਾਂ ਨੂੰ ਸੀਐੱਚਸੀ ਮਿਲਕ ਲੈ ਗਈ, ਜਿੱਥੇ ਡਾਕਟਰਾਂ ਨੇ ਉਨ੍ਹਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ।

ਸਚਿਨ ਮੂਲ ਰੂਪ ’ਚ ਅਮਰੋਹਾ ਦੇ ਹਸਨਪੁਰ ਦੇ ਰਹਿਣ ਵਾਲੇ ਸਨ। ਉਹ ਕਰੀਬ ਦੋ ਮਹੀਨੇ ਪਹਿਲਾਂ ਲਖਨਊ ਤੋਂ ਤਬਾਦਲਾ ਹੋ ਕੇ ਇੱਥੇ ਆਏ ਸਨ। ਉਨ੍ਹਾਂ ਦੀ ਪਤਨੀ ਭਾਨੂ ਸ਼ਹਿਜ਼ਾਦਨਗਰ ਥਾਣੇ ’ਚ ਤਾਇਨਾਤ ਹੈ ਤੇ ਗਰਭਵਤੀ ਹੈ।

ਪਤੀ ਦੀ ਮੌਤ ਦੀ ਜਾਣਕਾਰੀ ਮਿਲਣ ਤੋਂ ਬਾਅਦ ਉਹ ਸਦਮੇ ’ਚ ਹੈ। ਸਚਿਨ ਦੇ ਭਰਾ-ਭਾਬੀ ਵੀ ਪੁਲਿਸ ਵਿਭਾਗ ’ਚ ਹਨ। ਭਰਾ ਪਵਿੱਤਰ ਇੱਥੇ ਪੁਲਿਸ ਲਾਈਨ ’ਚ ਤਾਇਨਾਤ ਹਨ, ਜਦਕਿ ਭਾਬੀ ਅਨੂ ਮਹਿਲਾ ਥਾਣੇ ’ਚ ਤਾਇਨਾਤ ਹਨ। ਵਧੀਕ ਪੁਲਿਸ ਅਧਿਕਾਰੀ ਅਨੁਰਾਗ ਸਿੰਘ ਨੇ ਦੱਸਿਆ ਕਿ ਪੁਲਿਸ ਲਾਈਨ ’ਚ ਸਲਾਮੀ ਦੇਣ ਤੋਂ ਬਾਅਦ ਮ੍ਰਿਤਕ ਦੇਹ ਪਰਿਵਾਰਕ ਮੈਂਬਰਾਂ ਦੇ ਹਵਾਲੇ ਕਰ ਦਿੱਤੀ ਜਾਵੇਗੀ।

ਤਿੰਨ ਭਰਾਵਾਂ ’ਚੋਂ ਵਿਚਕਾਰਲੇ ਸਨ ਸਚਿਨ

ਹਸਨਪੁਰ: ਕੋਤਵਾਲੀ ਖੇਤਰ ਦੇ ਪਿੰਡ ਰੁਖਾਲੂ ਵਾਸੀ ਸਚਿਨ ਕੁਮਾਰ ਯੂਪੀ ਪੁਲਿਸ ’ਚ ਕਾਂਸਟੇਬਲ ਸਨ। ਉਹ ਰਾਮਪੁਰ ਦੇ ਮਿਲਕ ਥਾਣੇ ’ਚ ਤਾਇਨਾਤ ਸਨ। ਸੋਮਵਾਰ ਦੇਰ ਰਾਤ ਡਿਊਟੀ ਤੋਂ ਬਾਅਦ ਬਾਈਕ ’ਤੇ ਕਮਰੇ ਵੱਲ ਵਾਪਸ ਆਉਂਦੇ ਸਮੇਂ ਸ਼ਹਿਜ਼ਾਦ ਨਗਰ ਥਾਣਾ ਖੇਤਰ ’ਚ ਅਣਪਛਾਤੇ ਵਾਹਨ ਦੀ ਲਪੇਟ ’ਚ ਆਉਣ ਕਾਰਨ ਉਨ੍ਹਾਂ ਦੀ ਮੌਤ ਹੋ ਗਈ। ਉਨ੍ਹਾਂ ਦੀ ਪਤਨੀ ਵੀ ਸ਼ਹਿਜ਼ਾਦ ਨਗਰ ਥਾਣੇ ’ਚ ਮਹਿਲਾ ਆਰਕਸ਼ੀ ਹੈ। ਉਹ ਤਿੰਨ ਭਰਾਵਾਂ ’ਚੋਂ ਵਿਚਕਾਰਲੇ ਸਨ। ਵੱਡੇ ਭਰਾ ਬੋਬੀ ਕੁਮਾਰ ਹਸਨਪੁਰ ਤਹਿਸੀਲ ’ਚ ਲੇਖਪਾਲ ਹਨ। ਉਨ੍ਹਾਂ ਦੀ ਪਤਨੀ ਰਸ਼ਮੀ ਸਿਹਤ ਵਿਭਾਗ ’ਚ ਕਾਰਜਰਤ ਹੈ। ਜਦਕਿ ਛੋਟੇ ਭਰਾ ਪਵਿੱਤਰ ਕੁਮਾਰ ਤੇ ਉਨ੍ਹਾਂ ਦੀ ਪਤਨੀ ਅੰਸ਼ੂ ਵੀ ਉੱਤਰ ਪ੍ਰਦੇਸ਼ ਪੁਲਿਸ ’ਚ ਕਾਂਸਟੇਬਲ ਹਨ ਤੇ ਦੋਵੇਂ ਰਾਮਪੁਰ ਪੁਲਿਸ ਲਾਈਨ ’ਚ ਤਾਇਨਾਤ ਹਨ।

ਪਿਤਾ ਸੋਮਪਾਲ ਸਿੰਘ ਤੇ ਮਾਤਾ ਅਤੁਲੇਸ਼ ਦੇਵੀ ਪਿੰਡ ’ਚ ਰਹਿ ਕੇ ਖੇਤੀ ਕਰਦੇ ਹਨ। ਜਵਾਨ ਪੁੱਤਰ ਦੀ ਮੌਤ ਨਾਲ ਪਰਿਵਾਰ ’ਤੇ ਦੁੱਖਾਂ ਦਾ ਪਹਾੜ ਟੁੱਟ ਪਿਆ ਹੈ। ਹਾਦਸੇ ਦੀ ਸੂਚਨਾ ਮਿਲਦੇ ਹੀ ਪਰਿਵਾਰਕ ਮੈਂਬਰ ਰਾਮਪੁਰ ਪਹੁੰਚ ਗਏ ਹਨ।