PM ਮੋਦੀ ਦੀ ਦਿਵਿਆਂਗਾਂ ਨੂੰ ਵੱਡੀ ਸੌਗਾਤ! ਪੈਨਸ਼ਨ ਰਾਸ਼ੀ 'ਚ ਵਾਧਾ, ਜਨਮ ਤੋਂ ਹੀ ਖਾਤੇ 'ਚ ਆਵੇਗੀ ਸਹਾਇਤਾ ਰਾਸ਼ੀ

ਆਈਏਐਨਐਸ, ਨਵੀਂ ਦਿੱਲੀ - ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀਰਵਾਰ ਨੂੰ ਕਿਹਾ ਕਿ ਕੇਂਦਰ ਸਰਕਾਰ ਨੇ ਜਨਮ ਤੋਂ ਹੀ ਯੋਗ ਦਿਵਿਆਂਗ ਬੱਚਿਆਂ ਲਈ ਪੈਨਸ਼ਨ ਦਾ ਰਾਹ ਖੋਲ੍ਹ ਦਿੱਤਾ ਹੈ। ਇਸ ਦੇ ਨਾਲ ਹੀ ਪੈਨਸ਼ਨ ਦੀ ਰਕਮ ਵਿੱਚ ਵੀ ਵਾਧਾ ਕੀਤਾ ਗਿਆ ਹੈ।

ਏਸ਼ਿਆਈ ਪੈਰਾ ਖੇਡਾਂ ਵਿੱਚ ਹਿੱਸਾ ਲੈ ਕੇ ਪਰਤੇ ਖਿਡਾਰੀਆਂ ਨੂੰ ਸੰਬੋਧਨ ਕਰਦਿਆਂ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਕੁਝ ਦਿਨ ਪਹਿਲਾਂ ਹੀ ਕੈਬਨਿਟ ਵਿੱਚ ਦਿਵਿਆਂਗ ਵਿਅਕਤੀਆਂ ਦੀ ਪੈਨਸ਼ਨ ਨੂੰ ਲੈ ਕੇ ਵੱਡੇ ਫ਼ੈਸਲੇ ਲਏ ਗਏ ਹਨ। ਅਸੀਂ ਪੈਨਸ਼ਨ ਦੀ ਰਕਮ ਵਧਾਈ ਹੈ ਅਤੇ ਦਿਵਿਆਂਗਤਾ ਦਾ ਮਾਪਦੰਡ 80 ਫ਼ੀਸਦੀ ਤੋਂ ਘਟਾ ਕੇ 40 ਫ਼ੀਸਦੀ ਕਰ ਦਿੱਤਾ ਹੈ। ਪਹਿਲਾਂ ਪੈਨਸ਼ਨ ਲੈਣ ਲਈ 18 ਸਾਲ ਦੀ ਉਮਰ ਹੋਣਾ ਲਾਜ਼ਮੀ ਸੀ, ਪਰ ਹੁਣ ਜਨਮ ਤੋਂ ਹੀ ਯੋਗ ਦਿਵਿਆਂਗ ਬੱਚਿਆਂ ਲਈ ਪੈਨਸ਼ਨ ਦਾ ਰਾਹ ਖੋਲ੍ਹ ਦਿੱਤਾ ਗਿਆ ਹੈ।

ਪ੍ਰਧਾਨ ਮੰਤਰੀ ਦਿਵਿਆਂਗਜਨ ਪੈਨਸ਼ਨ ਯੋਜਨਾ ਵਿੱਚ ਕੀ ਹੋਇਆ ਬਦਲਾਅ?

ਪਿਛਲੇ ਮਹੀਨੇ ਸਰਕਾਰ ਨੇ ਪ੍ਰਧਾਨ ਮੰਤਰੀ ਦਿਵਿਆਂਗਜਨ ਪੈਨਸ਼ਨ ਯੋਜਨਾ ਤਹਿਤ ਦਿਵਿਆਂਗ ਵਿਅਕਤੀਆਂ ਲਈ ਯੋਗਤਾ ਦੀ ਘੱਟੋ-ਘੱਟ ਉਮਰ ਸੀਮਾ ਹਟਾ ਦਿੱਤੀ ਸੀ। ਇਸ ਨਾਲ ਹੁਣ ਦਿਵਿਆਂਗ ਵਿਅਕਤੀ ਜਨਮ ਤੋਂ ਹੀ ਪੈਨਸ਼ਨ ਲਈ ਯੋਗ ਹੋ ਜਾਂਦਾ ਹੈ। ਇਸ ਯੋਜਨਾ ਤਹਿਤ ਕੇਂਦਰੀ ਸਹਾਇਤਾ ਵੀ ਵਧਾ ਕੇ 79 ਸਾਲ ਤੱਕ ਦੀ ਉਮਰ ਵਾਲੇ ਲਾਭਪਾਤਰੀਆਂ ਲਈ 375 ਰੁਪਏ ਪ੍ਰਤੀ ਮਹੀਨਾ ਅਤੇ 80 ਸਾਲ ਜਾਂ ਇਸ ਤੋਂ ਵੱਧ ਉਮਰ ਵਾਲਿਆਂ ਲਈ 625 ਰੁਪਏ ਪ੍ਰਤੀ ਮਹੀਨਾ ਕਰ ਦਿੱਤੀ ਗਈ ਹੈ। ਇਸ ਤਹਿਤ ਲਾਭਪਾਤਰੀਆਂ ਦੀ ਗਿਣਤੀ 8.33 ਲੱਖ ਤੋਂ ਵਧ ਕੇ 27.48 ਲੱਖ ਹੋ ਗਈ ਹੈ।

ਸਰਕਾਰ ਮੁਤਾਬਕ, ਇਸ ਫ਼ੈਸਲੇ ਨਾਲ ਤਿੰਨ ਵਰਗਾਂ ਨੂੰ ਹੋਵੇਗਾ ਲਾਭ :-

ਪਹਿਲਾ: ਉਹ ਵਿਅਕਤੀ, ਜਿਨ੍ਹਾਂ ਨੂੰ 40 ਤੋਂ 79 ਫ਼ੀਸਦੀ ਦੇ ਵਿਚਕਾਰ ਦਿਵਿਆਂਗਤਾ ਵਾਲਾ ਪ੍ਰਮਾਣਿਤ ਕੀਤਾ ਗਿਆ ਹੈ ਅਤੇ ਜੋ ਗਰੀਬੀ ਰੇਖਾ ਤੋਂ ਹੇਠਾਂ ਰਹਿਣ ਵਾਲੇ ਪਰਿਵਾਰਾਂ ਨਾਲ ਸਬੰਧਤ ਹਨ।

ਦੂਜਾ: ਗਰੀਬੀ ਰੇਖਾ ਤੋਂ ਹੇਠਾਂ ਰਹਿਣ ਵਾਲੇ ਪਰਿਵਾਰਾਂ ਦੇ ਅਜਿਹੇ ਬੱਚੇ, ਜਿਨ੍ਹਾਂ ਕੋਲ ਨਿਰਧਾਰਤ ਮਾਪਦੰਡਾਂ ਮੁਤਾਬਕ ਦਿਵਿਆਂਗਤਾ ਦਾ ਸਰਟੀਫਿਕੇਟ ਹੈ। ਉਨ੍ਹਾਂ ਨੂੰ ਜਨਮ ਤੋਂ ਹੀ ਤੈਅ ਨਿਯਮਾਂ ਤਹਿਤ ਲਾਭ ਮਿਲੇਗਾ, ਜਦਕਿ ਪਹਿਲਾਂ ਪਰਿਵਾਰ ਨੂੰ ਬੱਚੇ ਦੇ 18 ਸਾਲ ਦਾ ਹੋਣ ਤੱਕ ਉਡੀਕ ਕਰਨੀ ਪੈਂਦੀ ਸੀ।

ਤੀਜਾ: ਉਹ ਵਿਅਕਤੀ ਜੋ ਪਹਿਲਾਂ ਤੋਂ ਹੀ ਪੈਨਸ਼ਨ ਪ੍ਰਾਪਤ ਕਰ ਰਹੇ ਹਨ। ਉਨ੍ਹਾਂ ਨੂੰ ਸਰਕਾਰ ਵੱਲੋਂ ਮਨਜ਼ੂਰ ਕੀਤੀਆਂ 375 ਰੁਪਏ ਅਤੇ 625 ਰੁਪਏ ਦੀਆਂ ਵਧੀਆਂ ਹੋਈਆਂ ਦਰਾਂ ਅਨੁਸਾਰ ਪੈਨਸ਼ਨ ਮਿਲੇਗੀ।

ਸਾਲ 2011 ਦੀ ਜਨਗਣਨਾ ਵਿੱਚ ਭਾਰਤ ਵਿੱਚ 2.68 ਕਰੋੜ ਦਿਵਿਆਂਗ ਵਿਅਕਤੀ ਦਰਜ ਕੀਤੇ ਗਏ ਸਨ, ਜੋ ਦੇਸ਼ ਦੀ ਕੁੱਲ ਆਬਾਦੀ ਦਾ 2.21 ਫ਼ੀਸਦੀ ਹਨ। ਸਾਲ 2016 ਦੇ ਐਕਟ ਦੀ ਅਨੁਸੂਚੀ ਵਿੱਚ 21 ਤਰ੍ਹਾਂ ਦੀਆਂ ਦਿਵਿਆਂਗਤਾਵਾਂ ਨਿਰਧਾਰਤ ਕੀਤੀਆਂ ਗਈਆਂ ਹਨ।