- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਕੁਦਰਤ ਦਾ ਭਿਆਨਕ ਰੂਪ : ਗੰਗਾ ਨਦੀ 'ਚ ਸਮਾਇਆ 150 ਸਾਲ ਪੁਰਾਣਾ ਇਤਿਹਾਸਕ ਸ਼ਿਵ ਮੰਦਰ, ਪੂਰੇ ਇਲਾਕੇ 'ਚ ਮਚੀ ਹਾਹਾਕਾਰ
ਪੱਛਮੀ ਬੰਗਾਲ ਦੇ ਮਾਲਦਾ 'ਚ ਹੜ੍ਹ ਅਤੇ ਦਰਿਆ ਦੇ ਕੰਢੇ ਹੋ ਰਹੇ ਕਟਾਅ ਕਾਰਨ ਹਾਲਾਤ ਵਿਗੜਦੇ ਜਾ ਰਹੇ ਹਨ। ਐਤਵਾਰ ਨੂੰ ਰਤੂਆ 'ਚ ਗੰਗਾ ਦਰਿਆ ਦੇ ਕੰਢੇ ਸਥਿਤ ਕਰੀਬ 150 ਸਾਲ ਪੁਰਾਣਾ ਸ਼ਿਵ ਮੰਦਰ ਢਹਿ ਗਿਆ ਅਤੇ ਦਰਿਆ 'ਚ ਸਮਾ ਗਿਆ। ਮਾਹਿਰਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਬਿਹਾਰ ਤੋਂ ਵੱਡੀ ਮਾਤਰਾ 'ਚ ਪਾਣੀ ਆਉਣ ਕਾਰਨ 9 ਸਤੰਬਰ ਤੱਕ ਦਰਿਆ ਦਾ ਪਾਣੀ ਪੱਧਰ ਵਧਦਾ ਰਹੇਗਾ।
Posted By Sunita
Publish Date: Tue, 08 Sep 2026 01:35 PM (IST)
Updated Date: Tue, 08 Sep 2026 01:39 PM (IST)
ਡਿਜੀਟਲ ਡੈਸਕ, ਮਾਲਦਾ - ਪੱਛਮੀ ਬੰਗਾਲ ਦੇ ਮਾਲਦਾ 'ਚ ਹੜ੍ਹ ਅਤੇ ਦਰਿਆ ਦੇ ਕੰਢੇ ਹੋ ਰਹੇ ਕਟਾਅ ਕਾਰਨ ਹਾਲਾਤ ਵਿਗੜਦੇ ਜਾ ਰਹੇ ਹਨ। ਐਤਵਾਰ ਨੂੰ ਰਤੂਆ 'ਚ ਗੰਗਾ ਦਰਿਆ ਦੇ ਕੰਢੇ ਸਥਿਤ ਕਰੀਬ 150 ਸਾਲ ਪੁਰਾਣਾ ਸ਼ਿਵ ਮੰਦਰ ਢਹਿ ਗਿਆ ਅਤੇ ਦਰਿਆ 'ਚ ਸਮਾ ਗਿਆ। ਮਾਹਿਰਾਂ ਨੇ ਚਿਤਾਵਨੀ ਦਿੱਤੀ ਹੈ ਕਿ ਬਿਹਾਰ ਤੋਂ ਵੱਡੀ ਮਾਤਰਾ 'ਚ ਪਾਣੀ ਆਉਣ ਕਾਰਨ 9 ਸਤੰਬਰ ਤੱਕ ਦਰਿਆ ਦਾ ਪਾਣੀ ਪੱਧਰ ਵਧਦਾ ਰਹੇਗਾ।
ਮਾਨਿਕਚਕ ਬਲਾਕ ਦੇ ਸਭ ਤੋਂ ਵੱਧ ਪ੍ਰਭਾਵਿਤ ਇਲਾਕੇ ਭੂਤਨੀ ਟਾਪੂ ’ਤੇ ਮੌਜੂਦ ਇਕਲੌਤੇ ਸਥਾਨਕ ਹਸਪਤਾਲ ਨੂੰ ਬੰਦ ਕਰਨਾ ਪਿਆ ਹੈ। ਹੁਣ ਮੁੱਢਲੀ ਡਾਕਟਰੀ ਸਹਾਇਤਾ ਦੀ ਵਿਵਸਥਾ ਪੰਚਾਇਤ ਦਫ਼ਤਰ 'ਚ ਤਬਦੀਲ ਕਰ ਦਿੱਤੀ ਗਈ ਹੈ। ਗਰਭਵਤੀ ਔਰਤਾਂ ਨੂੰ ਮਾਨਿਕਚਕ ਦੀਆਂ ਦੋ ਸਕੂਲ ਇਮਾਰਤਾਂ 'ਚ ਸੁਰੱਖਿਅਤ ਥਾਵਾਂ ’ਤੇ ਲਿਜਾਇਆ ਗਿਆ ਹੈ।
ਕਈ ਇਲਾਕੇ ਪ੍ਰਭਾਵਿਤ
ਮਾਨਿਕਚਕ ਅਤੇ ਰਤੂਆ ਤੋਂ ਇਲਾਵਾ ਇੰਗਲਿਸ਼ ਬਾਜ਼ਾਰ ਵੀ ਹੜ੍ਹ ਦੀ ਮਾਰ ਹੇਠ ਆ ਗਿਆ ਹੈ। ਇੱਥੇ ਖਸਕੋਲ 'ਚ ਹੋ ਰਹੇ ਕਟਾਅ ਕਾਰਨ ਜ਼ਮੀਨ ਦੇ ਵੱਡੇ ਹਿੱਸੇ ਅਤੇ ਅੰਬਾਂ ਦੇ ਬਾਗ਼ ਨਸ਼ਟ ਹੋ ਗਏ ਹਨ। ਪ੍ਰਸ਼ਾਸਨ ਵੱਲੋਂ ਜੰਗੀ ਪੱਧਰ ’ਤੇ ਰਾਹਤ ਕਾਰਜ ਚਲਾਏ ਜਾ ਰਹੇ ਹਨ ਅਤੇ ਸੂਬਾ ਸਰਕਾਰ ਦੇ ਮੰਤਰੀ ਵੀ ਮੌਕੇ ’ਤੇ ਮੌਜੂਦ ਹਨ। ਤਿੰਨ ਪੰਚਾਇਤਾਂ ਦੇ ਘੱਟੋ-ਘੱਟ 62 ਪਿੰਡ ਅਤੇ ਸਥਾਨਕ ਪੁਲਿਸ ਥਾਣਾ ਪਾਣੀ 'ਚ ਡੁੱਬੇ ਹੋਏ ਹਨ।
ਮੰਦਰ ਨੂੰ ਪਹਿਲਾਂ ਤੋਂ ਹੀ ਸੀ ਖ਼ਤਰਾ
ਰਤੂਆ ਦੇ ਮੁਨੀਰਾਮਟੋਲਾ 'ਚ ਸਥਿਤ ਇਸ ਮੰਦਰ ਨੂੰ ਪਿਛਲੇ ਸਾਲ ਤੋਂ ਹੀ ਦਰਿਆਈ ਕਟਾਅ ਦਾ ਖ਼ਤਰਾ ਬਣਿਆ ਹੋਇਆ ਸੀ। ਹਾਲਾਂਕਿ, ਅਸਥਾਈ ਬਚਾਅ ਕਾਰਜਾਂ ਕਾਰਨ ਇਹ ਮੰਦਰ ਹੁਣ ਤੱਕ ਟਿਕਿਆ ਹੋਇਆ ਸੀ।
ਇੱਕ ਸਥਾਨਕ ਸਕੂਲ ਅਧਿਆਪਕ ਆਲੋਕ ਮੰਡਲ ਨੇ ਪੁਰਾਣੀਆਂ ਯਾਦਾਂ ਸਾਂਝੀਆਂ ਕਰਦਿਆਂ ਕਿਹਾ, “ਸਾਡੇ ਬਚਪਨ 'ਚ ਦਰਿਆ ਮੰਦਰ ਤੋਂ ਲਗਭਗ 15 ਕਿਲੋਮੀਟਰ ਦੂਰ ਹੁੰਦਾ ਸੀ। ਇਹ ਮੰਦਰ ਸ਼ਰਧਾਲੂਆਂ 'ਚ ਬਹੁਤ ਪ੍ਰਸਿੱਧ ਸੀ। ਇੱਥੇ ਲੱਗਣ ਵਾਲੇ ਹਫ਼ਤਾਵਾਰੀ ਬਾਜ਼ਾਰ 'ਚ ਹਜ਼ਾਰਾਂ ਲੋਕ ਆਉਂਦੇ ਸਨ, ਇੱਥੋਂ ਤੱਕ ਕਿ ਗੁਆਂਢੀ ਸੂਬੇ ਬਿਹਾਰ ਤੋਂ ਵੀ ਲੋਕ ਇੱਥੇ ਪਹੁੰਚਦੇ ਸਨ।”
ਪਾਣੀ ਦਾ ਪੱਧਰ ਵਧਣ ਕਾਰਨ ਸ਼ਨੀਵਾਰ ਨੂੰ ਦਰਿਆ ਦੇ ਕੰਢੇ ਦਾ ਇੱਕ ਵੱਡਾ ਹਿੱਸਾ ਕਟਾਅ ਦੀ ਲਪੇਟ 'ਚ ਆ ਗਿਆ। ਇਸ ਤੋਂ ਬਾਅਦ ਐਤਵਾਰ ਸ਼ਾਮ ਨੂੰ ਦਰਿਆ ਨੇ ਪੂਰੇ ਮੰਦਰ ਨੂੰ ਹੀ ਆਪਣੀ ਲਪੇਟ 'ਚ ਲੈ ਲਿਆ। 2 ਸਤੰਬਰ ਦੀ ਰਾਤ ਤਟਬੰਧ ਟੁੱਟਣ ਅਤੇ ਭੂਤਨੀ ਟਾਪੂ ਦੇ ਪਾਣੀ 'ਚ ਡੁੱਬਣ ਤੋਂ ਬਾਅਦ ਇੱਥੇ ਹਾਲਾਤ ਹੋਰ ਵੀ ਗੰਭੀਰ ਹੋ ਗਏ ਹਨ।
6.5 ਕਰੋੜ ਦੀ ਲਾਗਤ ਨਾਲ ਬਣਿਆ ਸੀ ਤਟਬੰਧ
6.5 ਕਰੋੜ ਰੁਪਏ ਦੀ ਲਾਗਤ ਨਾਲ ਸਾਲ 2025 'ਚ ਬਣੇ ਇਸ ਤਟਬੰਧ ਦੇ ਟੁੱਟਣ ’ਤੇ ਸਥਾਨਕ ਵਿਧਾਇਕ ਗੌਰ ਮੰਡਲ ਨੇ ਸਰਕਾਰ ਦੀ ਆਲੋਚਨਾ ਕੀਤੀ ਹੈ। ਉਨ੍ਹਾਂ ਨੇ ਤਟਬੰਧ ਦੇ ਨਿਰਮਾਣ 'ਚ ਘਟੀਆ ਗੁਣਵੱਤਾ ਵਰਤੇ ਜਾਣ ਦਾ ਦੋਸ਼ ਲਗਾਇਆ ਅਤੇ ਇਸ ਬੁਨਿਆਦੀ ਢਾਂਚੇ ਦੀ ਨਾਕਾਮੀ ਲਈ ਪਿਛਲੀ ਟੀਐਮਸੀ ਸਰਕਾਰ ਨੂੰ ਜ਼ਿੰਮੇਵਾਰ ਠਹਿਰਾਇਆ।