Manipur News : ਮਣੀਪੁਰ ’ਚ ਅੱਤਵਾਦੀ ਹਮਲਾ, ਨਗਾ ਭਾਈਚਾਰੇ ਦੀ ਗੱਡੀ ’ਤੇ ਹਮਲੇ ’ਚ ਚਾਰ ਦੀ ਮੌਤ

ਇੰਫਾਲ (ਪੀਟੀਆਈ): ਮਣੀਪੁਰ ਦੇ ਕਾਂਗਪੋਕਪੀ ਜ਼ਿਲ੍ਹੇ ਵਿਚ ਹਥਿਆਰਬੰਦ ਦਹਿਸ਼ਤਗਰਦਾਂ ਨੇ ਨਗਾ ਭਾਈਚਾਰੇ ਦੇ ਲੋਕਾਂ ਦੀ ਗੱਡੀ ’ਤੇ ਹਮਲਾ ਕਰ ਦਿੱਤਾ, ਜਿਸ ਨਾਲ ਲਗਭਗ ਚਾਰ ਲੋਕ ਮਾਰੇ ਗਏ ਅਤੇ ਇਕ ਵਿਅਕਤੀ ਜ਼ਖ਼ਮੀ ਹੋ ਗਿਆ। ਇਕ ਅਧਿਕਾਰੀ ਨੇ ਦੱਸਿਆ ਕਿ ਦਹਿਸ਼ਤਗਰਦਾਂ ਨੇ ਮਕੁਈ ਅਸ਼ਾਂਗ ਅਤੇ ਥਾਬਾਂਬਾ ਨਗਾ ਵਿਚਕਾਰ ਇਕ ਸੁੰਨਸਾਨ ਖੇਤਰ ਵਿਚ ਗੱਡੀ ’ਤੇ ਹਮਲਾ ਕੀਤਾ। ਸਾਰੇ ਪੀੜਤ ਲਿਆਂਗਮਾਈ ਨਗਾ ਭਾਈਚਾਰੇ ਦੇ ਸਨ।

ਮਰੇ ਹੋਏ ਲੋਕਾਂ ਦੀ ਪਛਾਣ ਪ੍ਰਾਈਵੇਟ ਸਕੂਲ ਦੇ ਸੰਸਥਾਪਕ ਅਤੇ ਪ੍ਰਿੰਸਿਪਲ ਟਡਸੋਂਗਬੋਉ ਰਿੰਗਕਾਂਗਮਾਈ, ਐੱਮ ਵਿਜ਼ੁਨਮਾਈ, ਅਨੀਲ ਵਿਜ਼ੁਨਮਾਈ ਅਤੇ ਵਿਸੋਬੋਉ ਚਾਰੇਨਮਾਈ (ਚਾਵਾਂਗਕਿਨਿੰਗ ਪਿੰਡ ਪ੍ਰਸ਼ਾਸਨ ਦੇ ਚੇਅਰਮੈਨ) ਦੇ ਤੌਰ ’ਤੇ ਹੋਈ ਹੈ। ਲਾਸ਼ਾਂ ਨੂੰ ਸੈਣਾਪਤੀ ਜ਼ਿਲ੍ਹਾ ਹਸਪਤਾਲ ਲਿਜਾਇਆ ਗਿਆ ਹੈ।

ਜ਼ਖਮੀ ਵਿਅਕਤੀ ਦੀ ਪਛਾਣ ਗਾਇਕਾਮਾਂਗ ਰਿੰਗਕਾਂਗਮਾਈ ਦੇ ਤੌਰ ’ਤੇ ਹੋਈ ਹੈ। ਇਸ ਘਟਨਾ ਤੋਂ ਬਾਅਦ ਨਗਾ ਪੀਪਲਸ ਆਰਗਨਾਈਜ਼ੇਸ਼ਨ (ਐੱਨਪੀਓ) ਨੇ ਸੈਣਾਪਤੀ ਜ਼ਿਲ੍ਹਾ ਦਫ਼ਤਰ, ਸ਼ਹਿਰ ਦੀਆਂ ਦੁਕਾਨਾਂ ਅਤੇ ਵਪਾਰਿਕ ਸੰਸਥਾਵਾਂ ਨੂੰ ਬੰਦ ਕਰਵਾ ਦਿੱਤਾ। ਮਈ 2023 ਤੋਂ ਮਣੀਪੁਰ ਵਿਚ ਘਾਟੀ ਵਿਚ ਰਹਿਣ ਵਾਲੇ ਮਾਇਤੇਈ ਅਤੇ ਪਹਾੜੀ ਜ਼ਿਲ੍ਹਿਆਂ ਵਿਚ ਰਹਿਣ ਵਾਲੇ ਕੁਕੀ ਭਾਈਚਾਰਿਆਂ ਵਿਚਕਾਰ ਜਾਤੀਵਾਦੀ ਹਿੰਸਾ ਵਿਚ ਲਗਭਗ 260 ਲੋਕ ਮਾਰੇ ਗਏ ਹਨ। ਇਸ ਦੇ ਨਾਲ ਹਜ਼ਾਰਾਂ ਲੋਕ ਬੇਘਰ ਹੋ ਗਏ ਹਨ।