DJ ਦੀ ਧਮਕ ਬਣ ਸਕਦੀ ਹੈ ਦਿਲ ਲਈ ਖਤਰਾ! Brugada Syndrome ਤੇ LQTS ਮਰੀਜ਼ਾਂ ਲਈ ਤੇਜ਼ ਆਵਾਜ਼ ਤੋਂ ਸਾਵਧਾਨ, ਹੋ ਸਕਦਾ ਹੈ Cardiac Arrest

DJ ਦੀ ਤੇਜ਼ ਆਵਾਜ਼ ਬ੍ਰੁਗਾਡਾ ਸਿੰਡਰੋਮ ਤੇ ਲਾਂਗ ਕਿਊਟੀ ਸਿੰਡਰੋਮ ਟਾਈਪ-2 (LQTS) ਤੋਂ ਪੀੜਤ ਲੋਕਾਂ ਲਈ ਜਾਨਲੇਵਾ ਹੋ ਸਕਦੀ ਹੈ। ਇਸ ਨਾਲ ਕਾਰਡਿਅਕ ਅਰੇਸਟ ਦਾ ਖਤਰਾ ਵੱਧ ਸਕਦਾ ਹੈ। ਮੇਰਠ ਤੇ ਬਲਰਾਮਪੁਰ ’ਚ ਹੋਈਆਂ ਮੌਤਾਂ ਤੋਂ ਬਾਅਦ ਮਾਹਿਰਾਂ ਨੇ ਤੇਜ਼ ਆਵਾਜ਼ ਤੋਂ ਬਚਣ ਤੇ ਡੈਸੀਬਲ ਮਾਪਦੰਡਾਂ ਦੀ ਪਾਲਣਾ ਕਰਨ ਦੀ ਸਲਾਹ ਦਿੱਤੀ ਹੈ।

Posted By Paramjit Kaur

Publish Date: Mon, 28 Sep 2026 03:14 PM (IST)

Updated Date: Mon, 28 Sep 2026 03:19 PM (IST)

DJ ਦੀ ਧਮਕ ਬਣ ਸਕਦੀ ਹੈ ਦਿਲ ਲਈ ਖਤਰਾ! Brugada Syndrome ਤੇ LQTS ਮਰੀਜ਼ਾਂ ਲਈ ਤੇਜ਼ ਆਵਾਜ਼ ਤੋਂ ਸਾਵਧਾਨ, ਹੋ ਸਕਦਾ ਹੈ Cardiac Arrest

ਜਾਗਰਣ ਸੰਵਾਦਦਾਤਾ, ਆਗਰਾ: ਮਿਊਜ਼ਿਕ ਸਿਸਟਮ (ਡਿਸਕ ਜੌਕੀ, DJ) ਦੀ ਤੇਜ਼ ਆਵਾਜ਼ ਤੇ ਧਮਕ ਕਾਰਨ ਮੇਰਠ ’ਚ ਇੱਕ ਪ੍ਰਸੂਤਾ ਤੇ ਬਲਰਾਮਪੁਰ ’ਚ ਕਲਾਸ-2 ਦੀ ਵਿਦਿਆਰਥਣ ਦੀ ਮੌਤ ਤੋਂ ਬਾਅਦ ਲੋਕ ਚਿੰਤਤ ਹਨ। ਜਨਮਦਿਨ ਦੀ ਪਾਰਟੀ ਤੋਂ ਲੈ ਕੇ ਵਿਆਹ ਸਮਾਗਮਾਂ ਤੇ ਧਾਰਮਿਕ ਪ੍ਰੋਗਰਾਮਾਂ ’ਚ ਤੇਜ਼ ਆਵਾਜ਼ ’ਤੇ ਮਿਊਜ਼ਿਕ ਸਿਸਟਮ ਵਜਾਉਣ ਨਾਲ ਜਿੱਥੇ ਲੋਕਾਂ ਦੀ ਨੀਂਦ ਪ੍ਰਭਾਵਿਤ ਹੁੰਦੀ ਹੈ, ਉੱਥੇ ਇਹ ਜਾਨਲੇਵਾ ਵੀ ਹੋ ਸਕਦਾ ਹੈ।

ਦਿਲ ਦੀ ਜੈਨੇਟਿਕ ਬਿਮਾਰੀ ਬ੍ਰੁਗਾਡਾ ਸਿੰਡਰੋਮ ਤੇ ਲਾਂਗ ਕਿਊਟੀ ਸਿੰਡਰੋਮ ਟਾਈਪ-2 (LQTS) ਤੋਂ ਪੀੜਤ ਮਰੀਜ਼ਾਂ ਦੀ ਕਾਰਡਿਅਕ ਅਰੇਸਟ ਕਾਰਨ ਮੌਤ ਹੋ ਸਕਦੀ ਹੈ। ਹਾਲਾਂਕਿ ਇਨ੍ਹਾਂ ਦੋਵਾਂ ਸਿੰਡਰੋਮ ਤੋਂ ਪੀੜਤ ਮਰੀਜ਼ਾਂ ਦੀ ਗਿਣਤੀ ਬਹੁਤ ਘੱਟ ਹੈ ਤੇ ਜ਼ਿਆਦਾਤਰ ਮਰੀਜ਼ਾਂ ’ਚ ਕੋਈ ਲੱਛਣ ਵੀ ਨਹੀਂ ਦਿਖਾਈ ਦਿੰਦੇ।

DJ ਦੀ ਆਵਾਜ਼ 100 ਡੈਸੀਬਲ ਤੋਂ ਵੱਧ ਹੁੰਦੀ ਹੈ ਤੇ 120 ਡੈਸੀਬਲ ਤੋਂ ਜ਼ਿਆਦਾ ਦੀ ਆਵਾਜ਼ ਨਾਲ ਕੰਨਾਂ ਦੇ ਪਰਦੇ ਫਟਣ ਤੇ ਦਿਲ ਦੀ ਧੜਕਨ ਤੇਜ਼ ਹੋਣ ਦਾ ਖਤਰਾ ਵੱਧ ਸਕਦਾ ਹੈ। ਅਜਿਹੇ ’ਚ ਬ੍ਰੁਗਾਡਾ ਸਿੰਡਰੋਮ ਤੇ LQTS ਟਾਈਪ-2 ਵਾਲੇ ਲੋਕਾਂ ’ਚ ਤੇਜ਼ ਆਵਾਜ਼ ਕਾਰਨ ਦਿਲ ਦੀ ਧੜਕਨ ਬੇਕਾਬੂ ਹੋ ਸਕਦੀ ਹੈ ਤੇ ਕਾਰਡਿਅਕ ਅਰੇਸਟ ਤੱਕ ਹੋ ਸਕਦਾ ਹੈ।

ਬ੍ਰੁਗਾਡਾ ਸਿੰਡਰੋਮ

70 ਫੀਸਦੀ ਮਾਮਲਿਆਂ ’ਚ ਕੋਈ ਲੱਛਣ ਨਹੀਂ ਹੁੰਦੇ।
ਦਿਲ ਦੇ ਸੋਡੀਅਮ ਚੈਨਲ ਜੀਨ ’ਚ ਮਿਊਟੇਸ਼ਨ ਕਾਰਨ ਇਹ ਬਿਮਾਰੀ ਹੁੰਦੀ ਹੈ।
10 ਹਜ਼ਾਰ ’ਚੋਂ ਪੰਜ ਲੋਕਾਂ ਨੂੰ ਇਹ ਜੈਨੇਟਿਕ ਬਿਮਾਰੀ ਹੋ ਸਕਦੀ ਹੈ।
30 ਤੋਂ 50 ਸਾਲ ਦੀ ਉਮਰ ਦੇ ਲੋਕਾਂ ’ਚ ਇਹ ਜ਼ਿਆਦਾ ਪਾਈ ਜਾਂਦੀ ਹੈ।

ਅਚਾਨਕ ਬੇਹੋਸ਼ੀ, ਦੌਰੇ ਪੈਣਾ ਤੇ ਚੱਕਰ ਆਉਣਾ ਬ੍ਰੁਗਾਡਾ ਸਿੰਡਰੋਮ ਦੇ ਲੱਛਣ ਹੋ ਸਕਦੇ ਹਨ।

LQTS ਟਾਈਪ-2

80 ਫੀਸਦੀ ਮਾਮਲਿਆਂ ’ਚ ਕੋਈ ਲੱਛਣ ਨਹੀਂ ਹੁੰਦੇ।
ਜੀਨ ’ਚ ਮਿਊਟੇਸ਼ਨ ਕਾਰਨ ਇਹ ਸਿੰਡਰੋਮ ਹੁੰਦਾ ਹੈ।
ਪੰਜ ਹਜ਼ਾਰ ਵਿੱਚੋਂ ਇੱਕ ਵਿਅਕਤੀ ਨੂੰ ਇਹ ਸਮੱਸਿਆ ਹੋ ਸਕਦੀ ਹੈ।

10 ਤੋਂ 30 ਸਾਲ ਦੀ ਉਮਰ ’ਚ ਇਹ ਸਮੱਸਿਆ ਜ਼ਿਆਦਾ ਮਿਲਦੀ ਹੈ।

ਅਚਾਨਕ ਚੱਕਰ ਆਉਣਾ, ਬੇਹੋਸ਼ ਹੋਣਾ, ਘਬਰਾਹਟ, ਤੇਜ਼ ਧੜਕਨ ਮਹਿਸੂਸ ਹੋਣਾ ਤੇ ਦੌਰੇ ਪੈਣਾ LQTS ਟਾਈਪ-2 ਦੇ ਲੱਛਣ ਹੋ ਸਕਦੇ ਹਨ।

ਇਹ ਹਨ ਡੈਸੀਬਲ ਦੇ ਮਾਪਦੰਡ

50 ਡੈਸੀਬਲ ਤੱਕ ਦੀ ਆਵਾਜ਼ ਨਾਲ ਕੋਈ ਨੁਕਸਾਨ ਨਹੀਂ ਹੁੰਦਾ।

60 ਤੋਂ 80 ਡੈਸੀਬਲ ਤੋਂ ਵੱਧ ਦੀ ਆਵਾਜ਼ ਹਫ਼ਤੇ ’ਚ 40 ਘੰਟਿਆਂ ਤੱਕ ਹੀ ਸੁਰੱਖਿਅਤ ਮੰਨੀ ਜਾਂਦੀ ਹੈ।
90 ਡੈਸੀਬਲ ਦੀ ਆਵਾਜ਼ ’ਚ ਚਾਰ ਘੰਟਿਆਂ ਤੋਂ ਵੱਧ ਰਹਿਣਾ ਖਤਰਨਾਕ ਹੋ ਸਕਦਾ ਹੈ।
100 ਡੈਸੀਬਲ ਦੀ ਆਵਾਜ਼ ’ਚ 20 ਮਿੰਟ ਤੋਂ ਵੱਧ ਰਹਿਣਾ ਘਾਤਕ ਹੋ ਸਕਦਾ ਹੈ।

“ਜੇ ਗਰਭਵਤੀ, ਪ੍ਰਸਵ ਜਾਂ ਪ੍ਰਸੂਤਾ ਨੂੰ ਕੋਈ ਜੈਨੇਟਿਕ ਬਿਮਾਰੀ ਨਹੀਂ ਹੈ ਤਾਂ ਤੇਜ਼ ਆਵਾਜ਼ ਨਾਲ ਕਾਰਡਿਅਕ ਅਰੇਸਟ ਦਾ ਖਤਰਾ ਨਹੀਂ ਹੁੰਦਾ। ਹਾਲਾਂਕਿ ਜ਼ਿਆਦਾ ਦੇਰ ਤੱਕ ਤੇਜ਼ ਆਵਾਜ਼ ’ਚ ਨਹੀਂ ਰਹਿਣਾ ਚਾਹੀਦਾ। ਗਰਭਵਤੀ ਔਰਤ ਨੂੰ 30 ਤੋਂ 50 ਡੈਸੀਬਲ ਦੀ ਆਵਾਜ਼ ’ਚ ਸੰਗੀਤ ਸੁਣਨਾ ਚਾਹੀਦਾ ਹੈ।”

— ਡਾ. ਰਿਚਾ ਸਿੰਘ, ਗਾਇਨੀਕੋਲੋਜਿਸਟ, ਐਸਐਨ ਮੈਡੀਕਲ ਕਾਲਜ ਤੇ ਹਸਪਤਾਲ

“ਬ੍ਰੁਗਾਡਾ ਸਿੰਡਰੋਮ ਤੋਂ ਪੀੜਤ ਮਰੀਜ਼ਾਂ ’ਚ ਤੇਜ਼ ਆਵਾਜ਼ ਤੇ ਤੇਜ਼ ਬੁਖਾਰ ਕਾਰਨ ਦਿਲ ਦੀ ਧੜਕਨ ਬੇਕਾਬੂ ਹੋਣ ਨਾਲ ਕਾਰਡਿਅਕ ਅਰੇਸਟ ਹੋ ਸਕਦਾ ਹੈ। ਇਸੇ ਤਰ੍ਹਾਂ LQTS ਟਾਈਪ-2 ’ਚ ਤੇਜ਼ ਆਵਾਜ਼ ਜਾਂ ਅਚਾਨਕ ਕਿਸੇ ਗੱਲ ਦਾ ਸਦਮਾ ਲੱਗਣ ਨਾਲ ਕਾਰਡਿਅਕ ਅਰੇਸਟ ਦੀ ਸੰਭਾਵਨਾ ਰਹਿੰਦੀ ਹੈ। ਆਮ ਲੋਕਾਂ ’ਚ ਤੇਜ਼ ਆਵਾਜ਼ ਨਾਲ ਅਜਿਹਾ ਖਤਰਾ ਨਹੀਂ ਹੁੰਦਾ।”

— ਡਾ. ਸੌਰਭ ਨਾਗਰ, ਹਿਰਦਾ ਰੋਗ ਮਾਹਿਰ, ਐਸਐਨ ਮੈਡੀਕਲ ਕਾਲਜ ਤੇ ਹਸਪਤਾਲ