- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਦੁੱਧ-ਦਹੀ ਖਾਣ ਵਾਲਿਆਂ ’ਤੇ ਮਹਿੰਗਾਈ ਦੀ ਮਾਰ, ਰਸੋਈ ਦਾ ਵਿਗੜਿਆ ਬਜਟ; ਜਾਣੋ ਕਿੰਨਾ ਵਧਿਆ ਮਹੀਨੇ ਦਾ ਖ਼ਰਚਾ?
ਪਿੰਡਾਂ ਦੀਆਂ ਸੱਥਾਂ ਤੋਂ ਲੈ ਕੇ ਸੋਸ਼ਲ ਮੀਡੀਆ ਤੱਕ ਸਿਰਫ਼ ਇੱਕੋ ਚਰਚਾ ਹੈ ਕਿ ਆਖ਼ਰ ਇਸ ਮਹਿੰਗਾਈ ’ਚ ਪਰਿਵਾਰ ਦੀ ਖ਼ੁਰਾਕ ਦਾ ਸੰਤੁਲਨ ਕਿਵੇਂ ਬਣਾਇਆ ਜਾਵੇ। ਸਪਲਾਈ ਕਰਨ ਵਾਲੇ ਦੋਧੀਆ ਨੇ ਲੰਘੀ 1 ਸਤੰਬਰ ਤੋਂ ਵਧੀਆਂ ਹੋਈਆਂ ਦਰਾਂ ਦਾ ਐਲਾਨ ਕਰ ਦਿੱਤਾ ਹੈ, ਜਿਸ ਤੋਂ ਬਾਅਦ ਘਰਾਂ ’ਚ ਦੁੱਧ-ਦਹੀ ਦੀ ਖ਼ਪਤ ਵਿੱਚ ਕਟੌਤੀ ਦਾ ਦੌਰ ਸ਼ੁਰੂ ਹੋ ਗਿਆ ਹੈ।
Posted By Anuradha Bains
Publish Date: Thu, 03 Sep 2026 03:57 PM (IST)
Updated Date: Thu, 03 Sep 2026 04:02 PM (IST)
ਜਾਗਰਣ ਸੰਵਾਦਦਾਤਾ, ਝੱਜਰ। 'ਦੇਸ਼ਾਂ ਵਿੱਚ ਦੇਸ਼ ਹਰਿਆਣਾ, ਜਿੱਥੇ ਦੁੱਧ-ਦਹੀ ਦਾ ਖਾਣਾ' - ਇਹ ਲਾਈਨਾਂ ਹੁਣ ਜ਼ਿਲ੍ਹੇ ਦੇ ਪੇਂਡੂ ਅਤੇ ਸ਼ਹਿਰੀ ਇਲਾਕਿਆਂ ’ਚ ਇੱਕ ਕਹਾਵਤ ਬਣ ਕੇ ਸਿਮਟਦੀਆਂ ਨਜ਼ਰ ਆ ਰਹੀਆਂ ਹਨ। ਰਸੋਈ ਦੀ ਚੌਤਰਫ਼ਾ ਮਹਿੰਗਾਈ ਦੇ ਵਿਚਕਾਰ ਹੁਣ ਦੁੱਧ ਦੀਆਂ ਕੀਮਤਾਂ ’ਚ ਅਚਾਨਕ ਆਏ 10 ਤੋਂ 15 ਰੁਪਏ ਪ੍ਰਤੀ ਲੀਟਰ ਦੇ ਉਛਾਲ ਨੇ ਹਰ ਆਮ ਪਰਿਵਾਰ ਦੇ ਬਜਟ ਦਾ ਗਣਿਤ ਵਿਗਾੜ ਦਿੱਤਾ ਹੈ।
ਪਿੰਡਾਂ ਦੀਆਂ ਸੱਥਾਂ ਤੋਂ ਲੈ ਕੇ ਸੋਸ਼ਲ ਮੀਡੀਆ ਤੱਕ ਸਿਰਫ਼ ਇੱਕੋ ਚਰਚਾ ਹੈ ਕਿ ਆਖ਼ਰ ਇਸ ਮਹਿੰਗਾਈ ’ਚ ਪਰਿਵਾਰ ਦੀ ਖ਼ੁਰਾਕ ਦਾ ਸੰਤੁਲਨ ਕਿਵੇਂ ਬਣਾਇਆ ਜਾਵੇ। ਸਪਲਾਈ ਕਰਨ ਵਾਲੇ ਦੋਧੀਆ ਨੇ ਲੰਘੀ 1 ਸਤੰਬਰ ਤੋਂ ਵਧੀਆਂ ਹੋਈਆਂ ਦਰਾਂ ਦਾ ਐਲਾਨ ਕਰ ਦਿੱਤਾ ਹੈ, ਜਿਸ ਤੋਂ ਬਾਅਦ ਘਰਾਂ ’ਚ ਦੁੱਧ-ਦਹੀ ਦੀ ਖ਼ਪਤ ਵਿੱਚ ਕਟੌਤੀ ਦਾ ਦੌਰ ਸ਼ੁਰੂ ਹੋ ਗਿਆ ਹੈ।
ਆਮ ਉਪਭੋਗਤਾ ਦੀ ਪੀੜ: 100 ਲੀਟਰ ਖ਼ਪਤ 'ਤੇ 1000 ਤੋਂ 1200 ਰੁਪਏ ਦਾ ਸਿੱਧਾ ਝਟਕਾ
ਦੁੱਧ ਦੀਆਂ ਕੀਮਤਾਂ ਵਿੱਚ ਆਈ ਇਸ ਤੇਜ਼ੀ ਨੇ ਮੱਧਵਰਗੀ ਅਤੇ ਦਿਹਾੜੀਦਾਰ ਪਰਿਵਾਰਾਂ ਦੀ ਲੱਕ ਤੋੜ ਦਿੱਤੀ ਹੈ। ਸ਼ਹਿਰੀ ਤੇ ਕਸਬਾਈ ਇਲਾਕਿਆਂ ਵਿੱਚ ਰਹਿਣ ਵਾਲੇ ਪਰਿਵਾਰਾਂ ਦਾ ਹਿਸਾਬ-ਕਿਤਾਬ ਗੜਬੜਾ ਗਿਆ ਹੈ।
ਰਾਕੇਸ਼ ਕੁਮਾਰ ਮੁਤਾਬਕ, ਜੇਕਰ ਕਿਸੇ ਘਰ ਵਿੱਚ ਔਸਤਨ ਰੋਜ਼ਾਨਾ 3 ਤੋਂ 4 ਲੀਟਰ ਯਾਨੀ ਮਹੀਨੇ ਦਾ 100 ਲੀਟਰ ਦੁੱਧ ਵਰਤਿਆ ਜਾਂਦਾ ਹੈ ਤਾਂ ਨਵੇਂ ਰੇਟ ਲਾਗੂ ਹੋਣ ਤੋਂ ਬਾਅਦ ਉਨ੍ਹਾਂ ਦਾ ਮਹੀਨਾਵਾਰ ਖ਼ਰਚਾ ਸਿੱਧਾ 1,000 ਤੋਂ 1,200 ਰੁਪਏ ਵਧ ਗਿਆ ਹੈ। ਘਰੇਲੂ ਔਰਤਾਂ ਇਸ ਗੱਲ ਤੋਂ ਦੁਖੀ ਹਨ ਕਿ ਸਬਜ਼ੀਆਂ ਅਤੇ ਕਰਿਆਨੇ ਪਹਿਲਾਂ ਹੀ ਮਹਿੰਗੇ ਸਨ ਅਤੇ ਹੁਣ ਬੱਚਿਆਂ ਦੇ ਦੁੱਧ ਅਤੇ ਸਵੇਰ ਦੀ ਚਾਹ ਵਿੱਚ ਵੀ ਕਟੌਤੀ ਕਰਨੀ ਪੈਂਦੀ ਹੈ। ਲੋਕ ਹੁਣ ਦਹੀਂ, ਘਿਓ ਅਤੇ ਮੱਖਣ ਦੀ ਵਰਤੋਂ ਘਟਾ ਰਹੇ ਹਨ।
ਪਸ਼ੂ ਪਾਲਕਾਂ ਦਾ ਪੱਖ: ਤੂੜੀ, ਖਲ਼ ਅਤੇ ਦਵਾਈਆਂ ਦੇ ਭਾਅ ਨੇ ਤੋੜੀ ਲੱਕ
ਦੂਜੇ ਪਾਸੇ, ਪਿੰਡਾਂ ਵਿੱਚ ਬੈਠਕਾਂ ਕਰ ਰਹੇ ਪਸ਼ੂ ਪਾਲਕਾਂ ਦਾ ਆਪਣਾ ਦਰਦ ਹੈ। ਪਸ਼ੂ ਪਾਲਕਾਂ ਦਾ ਸਾਫ਼ ਕਹਿਣਾ ਹੈ ਕਿ ਦੁੱਧ ਦੇ ਭਾਅ ਵਧਾਉਣਾ ਕੋਈ ਮੁਨਾਫ਼ਾਖ਼ੋਰੀ ਨਹੀਂ, ਸਗੋਂ ਪਸ਼ੂ ਪਾਲਣ ਨੂੰ ਜਿਊਂਦਾ ਰੱਖਣ ਦੀ ਮਜ਼ਬੂਰੀ ਹੈ।
ਪਸ਼ੂ ਪਾਲਕ ਸੁਲੋਧਾ ਪਿੰਡ ਦੇ ਨਿਵਾਸੀ ਵੀਰੇਂਦਰ ਦੱਸਦੇ ਹਨ ਕਿ ਤੂੜੀ ਦੇ ਭਾਅ ਅਸਮਾਨ ਛੂਹ ਰਹੇ ਹਨ। ਖਲ਼, ਵੜੇਵੇਂ (ਬਿਨੌਲਾ) ਅਤੇ ਸੁੱਕੀ ਖ਼ੁਰਾਕ ਦੀਆਂ ਕੀਮਤਾਂ ਵਿੱਚ ਪਿਛਲੇ ਕੁੱਝ ਮਹੀਨਿਆਂ ਵਿੱਚ ਭਾਰੀ ਵਾਧਾ ਹੋਇਆ ਹੈ। ਪਸ਼ੂਆਂ ਦੇ ਬੀਮਾਰ ਹੋਣ 'ਤੇ ਡਾਕਟਰ ਦੀ ਫ਼ੀਸ, ਟੀਕਿਆਂ ਅਤੇ ਦਵਾਈਆਂ ਦਾ ਖ਼ਰਚਾ ਇੰਨਾ ਵਧ ਗਿਆ ਹੈ ਕਿ 60-70 ਰੁਪਏ ਲੀਟਰ ਵਿੱਚ ਦੁੱਧ ਵੇਚਣਾ ਘਾਟੇ ਦਾ ਸੌਦਾ ਬਣ ਚੁੱਕਾ ਸੀ। ਇਸੇ ਦੇ ਚੱਲਦਿਆਂ ਪਿੰਡਾਂ ਵਿੱਚ ਆਪਸੀ ਸਹਿਮਤੀ ਨਾਲ ਤੈਅ ਕੀਤਾ ਗਿਆ ਹੈ ਕਿ ਦੋਧੀਆਂ ਨੂੰ ਮੱਝ ਦਾ ਦੁੱਧ 80 ਰੁਪਏ ਅਤੇ ਗਾਂ ਦਾ ਦੁੱਧ 60 ਰੁਪਏ ਲੀਟਰ ਤੋਂ ਘੱਟ ਵਿੱਚ ਨਹੀਂ ਦਿੱਤਾ ਜਾਵੇਗਾ।
ਦੋਧੀਆਂ ਅਤੇ ਡੇਅਰੀ ਸੰਚਾਲਕਾਂ ਦੀ ਖਿੱਚੋਤਾਣ
ਪਿੰਡਾਂ ਤੋਂ ਦੁੱਧ ਇਕੱਠਾ ਕਰਕੇ ਸ਼ਹਿਰਾਂ ਵਿੱਚ ਘਰ-ਘਰ ਪਹੁੰਚਾਉਣ ਵਾਲੇ ਦੋਧੀਆਂ ਦੀ ਹਾਲਤ ਦੋ ਚੱਕੀਆਂ ਦੇ ਪੁੜਾਂ ਵਿਚਾਲੇ ਫ਼ਸਣ ਵਰਗੀ ਹੈ। ਡੇਅਰੀਆਂ 'ਤੇ ਫੈਟ ਦਾ ਰੇਟ (85 ਤੋਂ 90 ਪੈਸੇ ਪ੍ਰਤੀ ਫੈਟ) ਮਿਲਣ ਅਤੇ ਪਿੰਡਾਂ ਵਿੱਚ ਖ਼ਰੀਦ ਮਹਿੰਗੀ ਹੋਣ ਨਾਲ ਉਨ੍ਹਾਂ ਦਾ ਮਾਰਜਿਨ ਖ਼ਤਮ ਹੋ ਗਿਆ ਹੈ।
ਜਦੋਂ ਉਹ ਵਧੇ ਹੋਏ ਭਾਅ ਲੈ ਕੇ ਗਾਹਕਾਂ ਕੋਲ ਜਾਂਦੇ ਹਨ ਤਾਂ ਉਨ੍ਹਾਂ ਨੂੰ ਉਪਭੋਗਤਾਵਾਂ ਦੀ ਨਾਰਾਜ਼ਗੀ ਝੱਲਣੀ ਪੈਂਦੀ ਹੈ। ਕੁੱਲ ਮਿਲਾ ਕੇ, ਲਗਪਗ ਹਰ ਘਰ ਦੇ ਬਜਟ 'ਤੇ ਦੁੱਧ ਦੀ ਆਂਚ ਸਾਫ਼ ਦਿਖਾਈ ਦੇ ਰਹੀ ਹੈ, ਜਿਸ ਦੀ ਪ੍ਰਤੀਕਿਰਿਆ ਆਉਣ ਵਾਲੇ ਦਿਨਾਂ ਵਿੱਚ ਦੇਖਣ ਨੂੰ ਮਿਲੇਗੀ।
ਪਿੰਡ-ਪਿੰਡ ਗਰਮਾਇਆ ਮਾਹੌਲ
ਜ਼ਿਲ੍ਹੇ ਭਰ ਦੇ ਵੱਖ-ਵੱਖ ਪੇਂਡੂ ਖੇਤਰਾਂ ਵਿੱਚ ਹੋ ਰਹੀਆਂ ਪਸ਼ੂ ਪਾਲਕਾਂ ਦੀਆਂ ਬੈਠਕਾਂ ਦੀਆਂ ਵੀਡੀਓਜ਼ ਵੀ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀਆਂ ਹਨ। ਹਾਲਾਂਕਿ ਪਸ਼ੂ ਪਾਲਕਾਂ ਨੇ ਸਾਫ਼ ਕੀਤਾ ਹੈ ਕਿ ਪਿੰਡ ਦੇ ਅੰਦਰ ਆਪਸੀ ਭਾਈਚਾਰੇ ਵਿੱਚ ਖੁੱਲ੍ਹੇ ਦੁੱਧ ਦੀ ਵਿਕਰੀ 'ਤੇ ਕੋਈ ਪਾਬੰਦੀ ਨਹੀਂ ਹੈ, ਪਰ ਵਪਾਰਕ ਦੋਧੀਆਂ ਨੂੰ ਤੈਅ ਘੱਟੋ-ਘੱਟ ਦਰ 'ਤੇ ਹੀ ਦੁੱਧ ਦਿੱਤਾ ਜਾਵੇਗਾ। ਫਿਲਹਾਲ, ਪਸ਼ੂ ਪਾਲਕਾਂ ਦੀ ਵਧਦੀ ਲਾਗਤ ਅਤੇ ਉਪਭੋਗਤਾਵਾਂ ਦੀ ਜੇਬ 'ਤੇ ਪਏ ਡਾਕੇ ਵਿਚਾਲੇ ਪੂਰੇ ਜ਼ਿਲ੍ਹੇ ਵਿੱਚ ਦੁੱਧ ਦਾ ਇਹ ਮੁੱਦਾ ਗਰਮਾਇਆ ਹੋਇਆ ਹੈ।