ਕੁੰਡੀ ਲਗਾ ਕੇ ਦਿੱਤੀ ਜਾ ਰਹੀ ਸੀ ਬਿਜਲੀ, ਕਰੰਟ ਹਾਦਸੇ ’ਚ ਖੁਲਾਸਾ; ਜਾਂਚ ਤੋਂ ਬਾਅਦ JE ਸਮੇਤ 3 ਹੋਰ ਅਧਿਕਾਰੀ ਸਸਪੈਂਡ

ਜਾਗਰਣ ਸੰਵਾਦਦਾਤਾ, ਗੋਹਾਨਾ : ਪਿੰਡ ਮੁੰਡਲਾਨਾ ’ਚ 27 ਅਗਸਤ ਨੂੰ ਹੋਏ ਕਰੰਟ ਹਾਦਸੇ ਦੀ ਤਕਨੀਕੀ ਜਾਂਚ ’ਚ ਬਿਜਲੀ ਸਪਲਾਈ ’ਚ ਗੰਭੀਰ ਬੇਨਿਯਮੀਆਂ ਸਾਹਮਣੇ ਆਈਆਂ ਹਨ। ਖੇਤੀਬਾੜੀ ਫੀਡਰ ਦੀ ਲਾਈਨ ਦੇ ਉੱਪਰੋਂ ਘਰੇਲੂ ਫੀਡਰ ਦੀ ਲਾਈਨ ਲੰਘ ਰਹੀ ਸੀ। ਘਰੇਲੂ ਫੀਡਰ ਦੀ ਲਾਈਨ ’ਚ ਗੈਰ-ਕਾਨੂੰਨੀ ਤਾਰ ਲਗਾ ਕੇ ਉਨ੍ਹਾਂ ਨੂੰ ਹੇਠਾਂ ਉਤਾਰਿਆ ਗਿਆ ਸੀ। ਖੇਤੀਬਾੜੀ ਫੀਡਰ ਦੀ ਸਪਲਾਈ ਬੰਦ ਹੋਣ ’ਤੇ ਗੈਰ-ਕਾਨੂੰਨੀ ਤਾਰਾਂ ’ਚ ਕੁੰਡੀ ਲਗਾ ਕੇ ਘਰੇਲੂ ਫੀਡਰ ਤੋਂ ਬਿਜਲੀ ਚਾਲੂ ਕਰ ਲਈ ਜਾਂਦੀ ਸੀ। ਇਸੇ ਗੈਰ-ਕਾਨੂੰਨੀ ਪ੍ਰਬੰਧ ਕਾਰਨ ਖੇਤੀਬਾੜੀ ਫੀਡਰ ਦੀ ਲਾਈਨ ’ਚ ਕਰੰਟ ਪਹੁੰਚਣ ਨਾਲ ਹਾਦਸਾ ਵਾਪਰਨ ਦੀ ਗੱਲ ਸਾਹਮਣੇ ਆਈ ਹੈ। ਬਿਜਲੀ ਨਿਗਮ ਦੀ ਮੀਟਰਿੰਗ ਐਂਡ ਪ੍ਰੋਟੈਕਸ਼ਨ (M&P) ਟੀਮ ਨੇ ਹਾਦਸੇ ਤੋਂ ਬਾਅਦ ਤਕਨੀਕੀ ਜਾਂਚ ਦੌਰਾਨ ਮਹਿਮੂਦਪੁਰ ਸਥਿਤ ਬਿਜਲੀ ਘਰ ਤੇ ਆਸ-ਪਾਸ ਦੇ ਕਨੈਕਸ਼ਨਾਂ ਦੀ ਜਾਂਚ ਕੀਤੀ। ਜਾਂਚ ’ਚ ਸਾਹਮਣੇ ਆਏ ਤੱਥਾਂ ਦੇ ਆਧਾਰ ’ਤੇ ਹੁਣ ਨਿਗਮ ਅਧਿਕਾਰੀਆਂ ਨੇ JE ਲਲਿਤ, AFM ਮਨੋਜ ਤੇ ਲਾਈਨਮੈਨ ਨਵਦੀਪ ਨੂੰ ਮੁਅੱਤਲ ਕਰ ਦਿੱਤਾ ਹੈ। ਘਟਨਾ ਵਾਲੇ ਦਿਨ ਹੀ ਸ਼ੁਰੂਆਤੀ ਲਾਪਰਵਾਹੀ ਦੇ ਮਾਮਲੇ ’ਚ ਲਾਈਨਮੈਨ ਮੋਹਿਤ ਤੇ ਬਿਜਲੀ ਘਰ ਦੇ SA ਰਾਮਫਲ ਨੂੰ ਮੁਅੱਤਲ ਕੀਤਾ ਜਾ ਚੁੱਕਾ ਸੀ।

ਪਰਮਿਟ ਦੇ ਬਾਵਜੂਦ ਪਹੁੰਚਿਆ ਸੀ ਕਰੰਟ

ਹਾਦਸੇ ਵਾਲੇ ਦਿਨ ਖੇਤੀਬਾੜੀ ਫੀਡਰ ਦੀ ਲਾਈਨ ’ਤੇ ਕੰਮ ਕਰਨ ਲਈ ਪਰਮਿਟ ਲਿਆ ਗਿਆ ਸੀ। ਇਸ ਦੇ ਬਾਵਜੂਦ ਲਾਈਨ ’ਚ ਕਰੰਟ ਪਹੁੰਚ ਗਿਆ। 27 ਅਗਸਤ ਦੀ ਸਵੇਰ ਕਰੀਬ 9:30 ਵਜੇ ਪਿੰਡ ਸਿਵਾਨਕਾ ਵਾਸੀ 19 ਸਾਲਾ ਅਪ੍ਰੈਂਟਿਸ ਕਰਮਚਾਰੀ ਸੌਰਭ ਤੇ ਮੁੰਡਲਾਨਾ ਵਾਸੀ 38 ਸਾਲਾ ਕਿਸਾਨ ਜੋਗਿੰਦਰ ਕਰੰਟ ਦੀ ਲਪੇਟ ’ਚ ਆ ਗਏ ਸਨ। ਦੋਵਾਂ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਸੀ। ਨਿਗਮ ਦੀ ਜਾਂਚ ਹੁਣ ਇਸ ਗੱਲ ’ਤੇ ਕੇਂਦਰਿਤ ਰਹੀ ਕਿ ਪਰਮਿਟ ਤੋਂ ਬਾਅਦ ਬੰਦ ਕੀਤੀ ਗਈ ਲਾਈਨ ’ਚ ਦੂਜੇ ਪਾਸਿਓਂ ਬਿਜਲੀ ਕਿਵੇਂ ਪਹੁੰਚੀ।

ਨਿਰਧਾਰਤ ਸਮੇਂ ਤੋਂ ਪਹਿਲਾਂ ਕਿਵੇਂ ਆਇਆ ਸੀ ਕਰੰਟ?

ਮੁੰਡਲਾਨਾ ’ਚ ਟਿਊਬਵੈਲ ਕਨੈਕਸ਼ਨਾਂ ਲਈ ਨਿਰਧਾਰਤ ਸ਼ਡਿਊਲ ਮੁਤਾਬਕ ਹਰ ਰੋਜ਼ ਸਵੇਰੇ 10:45 ਵਜੇ ਬਿਜਲੀ ਸਪਲਾਈ ਸ਼ੁਰੂ ਹੁੰਦੀ ਹੈ, ਜਦਕਿ ਹਾਦਸਾ ਕਰੀਬ 9:30 ਵਜੇ ਵਾਪਰਿਆ। ਅਜਿਹੇ ’ਚ ਨਿਰਧਾਰਤ ਸਮੇਂ ਤੋਂ ਪਹਿਲਾਂ ਲਾਈਨ ’ਚ ਕਰੰਟ ਪਹੁੰਚਣ ਦਾ ਕਾਰਨ ਵੀ ਜਾਂਚ ਦਾ ਅਹਿਮ ਬਿੰਦੂ ਬਣਿਆ। M&P ਟੀਮ ਨੇ ਬਿਜਲੀ ਘਰ ਦੀ ਮੀਟਰਿੰਗ ਵਿਵਸਥਾ, ਆਸ-ਪਾਸ ਦੇ ਕਨੈਕਸ਼ਨਾਂ ਤੇ ਹੋਰ ਲਾਈਨਾਂ ਤੋਂ ਕਰੰਟ ਪਹੁੰਚਣ ਦੀ ਸੰਭਾਵਨਾ ਬਾਰੇ ਜਾਂਚ ਕੀਤੀ। ਸ਼ੁਰੂਆਤ ’ਚ ਮ੍ਰਿਤਕ ਕਿਸਾਨ ਦੇ ਪਰਿਵਾਰਕ ਮੈਂਬਰਾਂ ਦੀ ਸ਼ਿਕਾਇਤ ’ਤੇ ਸਦਰ ਥਾਣੇ ’ਚ SDO, JE ਤੇ ਲਾਈਨਮੈਨ ਖ਼ਿਲਾਫ਼ ਮਾਮਲਾ ਵੀ ਦਰਜ ਕੀਤਾ ਗਿਆ ਸੀ। ਹੁਣ ਤਕਨੀਕੀ ਜਾਂਚ ’ਚ ਤਿੰਨ ਕਰਮਚਾਰੀਆਂ ਦੀ ਭੂਮਿਕਾ ਸ਼ੱਕੀ ਮਿਲਣ ਤੋਂ ਬਾਅਦ ਮੁਅੱਤਲ ਕਰਨ ਦੀ ਕਾਰਵਾਈ ਕੀਤੀ ਗਈ ਹੈ।