ਸਫਾਇਰ ਮਾਲ ਦੇ 18 ਸਪਾ ਸੈਂਟਰਾਂ ’ਚ ਚੱਲ ਰਿਹਾ ਸੀ ਗਲਤ ਧੰਦਾ, 50 ਲੋਕਾਂ ਦੇ ਫੜੇ ਜਾਣ ਤੋਂ ਬਾਅਦ ਸਾਹਮਣੇ ਆਇਆ ਸੱਚ; ਥਾਣਾ ਇੰਚਾਰਜ ਸਸਪੈਂਡ

ਜਾਗਰਣ ਸੰਵਾਦਦਾਤਾ, ਗੁਰੂਗ੍ਰਾਮ : ਸਾਈਬਰ ਸਿਟੀ ’ਚ ਚਾਰ ਦਿਨ ਪਹਿਲਾਂ ਸਫਾਇਰ-90 ਮਾਲ ਦੇ 18 ਸਪਾ ਸੈਂਟਰਾਂ ’ਚ ਚੱਲ ਰਹੀਆਂ ਕਥਿਤ ਅਨੈਤਿਕ ਗਤੀਵਿਧੀਆਂ ਤੇ ਦੇਹ ਵਪਾਰ ਦਾ ਪਰਦਾਫਾਸ਼ ਹੋਣ ਤੋਂ ਬਾਅਦ ਪੁਲਿਸ ਵਿਭਾਗ ’ਚ ਵੱਡੀ ਕਾਰਵਾਈ ਕੀਤੀ ਗਈ ਹੈ। ਖੇੜਕੀਦੌਲਾ ਥਾਣਾ ਇੰਚਾਰਜ ਇੰਸਪੈਕਟਰ ਰਵਿੰਦਰ ਨੂੰ ਸਸਪੈਂਡ ਕਰਕੇ ਪੁਲਿਸ ਲਾਈਨ ਭੇਜ ਦਿੱਤਾ ਗਿਆ ਹੈ। ਉਨ੍ਹਾਂ ਦੀ ਥਾਂ ਇੰਸਪੈਕਟਰ ਵਿਨੋਦ ਕੁਮਾਰ ਨੂੰ ਨਵਾਂ ਥਾਣਾ ਇੰਚਾਰਜ ਬਣਾਇਆ ਗਿਆ ਹੈ। ਏਸੀਪੀ ਮਾਨੇਸਰ ਨੇ ਕਾਰਵਾਈ ਦੀ ਪੁਸ਼ਟੀ ਕੀਤੀ ਹੈ। ਦਰਅਸਲ, ਇਹ ਪੂਰਾ ਮਾਮਲਾ ਹਰਿਆਣਾ ਮਹਿਲਾ ਕਮਿਸ਼ਨ ਦੀ ਚੇਅਰਪਰਸਨ ਦੀ ਸ਼ਿਕਾਇਤ ਤੋਂ ਬਾਅਦ ਕੀਤੀ ਗਈ ਛਾਪੇਮਾਰੀ ਨਾਲ ਜੁੜਿਆ ਹੈ। ਮਹਿਲਾ ਕਮਿਸ਼ਨ ਨੂੰ ਸਫਾਇਰ-90 ਮਾਲ ਸਥਿਤ ਸਪਾ ਸੈਂਟਰਾਂ ’ਚ ਅਨੈਤਿਕ ਗਤੀਵਿਧੀਆਂ ਦੀ ਸ਼ਿਕਾਇਤ ਮਿਲੀ ਸੀ, ਜਿਸ ਤੋਂ ਬਾਅਦ ਟੀਮ ਨੇ ਛਾਪਾ ਮਾਰਿਆ ਸੀ।

18 ਸਪਾ ਸੈਂਟਰਾਂ ਤੋਂ 50 ਲੋਕ ਫੜੇ ਗਏ

ਛਾਪੇਮਾਰੀ ਦੌਰਾਨ ਮਾਲ ਦੇ 18 ਸਪਾ ਸੈਂਟਰਾਂ ਤੋਂ ਕਰੀਬ 50 ਲੋਕਾਂ ਨੂੰ ਫੜਿਆ ਗਿਆ ਸੀ। ਛਾਪੇਮਾਰੀ ਤੋਂ ਬਾਅਦ ਸਥਾਨਕ ਪੁਲਿਸ ਦੀ ਭੂਮਿਕਾ ’ਤੇ ਲਗਾਤਾਰ ਸਵਾਲ ਉੱਠ ਰਹੇ ਸਨ। ਦੋਸ਼ ਸੀ ਕਿ ਇੰਨੇ ਵੱਡੇ ਮਾਲ ’ਚ ਲੰਬੇ ਸਮੇਂ ਤੋਂ ਇਹ ਧੰਧਾ ਚੱਲ ਰਿਹਾ ਸੀ ਤੇ ਥਾਣੇ ਨੂੰ ਇਸ ਦੀ ਭਿਣਕ ਤੱਕ ਨਹੀਂ ਲੱਗੀ। ਸੂਤਰਾਂ ਮੁਤਾਬਕ ਇਸ ਲਾਪਰਵਾਹੀ ਨੂੰ ਦੇਖਦੇ ਹੋਏ ਅਧਿਕਾਰੀਆਂ ਨੇ ਖੇੜਕੀਦੌਲਾ ਥਾਣਾ ਇੰਚਾਰਜ ਖ਼ਿਲਾਫ਼ ਕਾਰਵਾਈ ਕੀਤੀ।