‘ਮੈਂ ਯਮਰਾਜ ਹਾਂ, 5 ਲੱਖ ਦੀ ਰੰਗਦਾਰੀ ਨਹੀਂ ਦਿੱਤੀ ਤਾਂ ਸਾਰਿਆਂ ਨੂੰ ਮਾਰ ਦਿਆਂਗਾ’; ESIC ਸਟਾਫ ਨੂੰ ਧਮਕੀ ਭਰਿਆ ਪੱਤਰ

ਜਾਗਰਣ ਸੰਵਾਦਦਾਤਾ, ਰੇਵਾੜੀ : ਰੇਵਾੜੀ ਦੇ ਧਾਰੂਹੇੜਾ ਸਥਿਤ ESIC ਡਿਸਪੈਂਸਰੀ ਨੰਬਰ-2 ’ਚ ਸੋਮਵਾਰ ਉਸ ਸਮੇਂ ਹੜਕੰਪ ਮਚ ਗਿਆ, ਜਦੋਂ ਇੱਕ ਕਰਮਚਾਰੀ ਦੀ ਕਾਰ ’ਤੇ ਦੋ ਪੰਨਿਆਂ ਦਾ ਹੱਥ ਨਾਲ ਲਿਖਿਆ ਧਮਕੀ ਭਰਿਆ ਪੱਤਰ ਮਿਲਿਆ। ਪੱਤਰ ’ਚ ਖੁਦ ਨੂੰ ‘ਯਮਰਾਜ’ ਦੱਸਣ ਵਾਲੇ ਵਿਅਕਤੀ ਨੇ ਡਾਕਟਰ ਤੋਂ ਲੈ ਕੇ ਚਪੜਾਸੀ ਤੱਕ ਡਿਸਪੈਂਸਰੀ ਦੇ ਪੂਰੇ ਸਟਾਫ ਨੂੰ ਜਾਨੋਂ ਮਾਰਨ ਦੀ ਧਮਕੀ ਦਿੰਦਿਆਂ 5 ਲੱਖ ਰੁਪਏ ਦੀ ਰੰਗਦਾਰੀ ਮੰਗੀ ਹੈ।

ਮੁਲਜ਼ਮ ਨੇ ਰਕਮ ਦੇਣ ਲਈ ਸਹਿਮਤੀ ਦੇ ਸੰਕੇਤ ਵਜੋਂ ਡਿਸਪੈਂਸਰੀ ਦੇ ਮੁੱਖ ਗੇਟ ’ਤੇ ‘+’ ਦਾ ਨਿਸ਼ਾਨ ਬਣਾਉਣ ਲਈ ਕਿਹਾ ਹੈ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਸੈਕਟਰ-6 ਥਾਣਾ ਪੁਲਿਸ ਮੌਕੇ ’ਤੇ ਪਹੁੰਚੀ ਤੇ ਜਾਂਚ ਸ਼ੁਰੂ ਕਰ ਦਿੱਤੀ।

5 ਲੱਖ ਰੁਪਏ ਦੇਣ ਦੀ ਮੰਗ

ਜਾਣਕਾਰੀ ਅਨੁਸਾਰ, ਡਿਸਪੈਂਸਰੀ ’ਚ ਲੈਬ ਟੈਕਨੀਸ਼ੀਅਨ ਦੇ ਅਹੁਦੇ ’ਤੇ ਤਾਇਨਾਤ ਗੁਰਮੀਤ ਸਿੰਘ ਸੋਮਵਾਰ ਨੂੰ ਆਪਣੀ ਕਾਰ ਕੋਲ ਪਹੁੰਚੇ। ਉਨ੍ਹਾਂ ਨੂੰ ਕਾਰ ’ਤੇ ਦੋ ਪੰਨਿਆਂ ਦਾ ਹੱਥ ਨਾਲ ਲਿਖਿਆ ਪੱਤਰ ਰੱਖਿਆ ਹੋਇਆ ਮਿਲਿਆ। ਪੱਤਰ ’ਚ ਡਿਸਪੈਂਸਰੀ ਦੇ ਸਾਰੇ ਕਰਮਚਾਰੀਆਂ ਨੂੰ ਮਿਲ ਕੇ 5 ਲੱਖ ਰੁਪਏ ਦੇਣ ਦੀ ਮੰਗ ਕੀਤੀ ਗਈ। ਰਕਮ ਨਾ ਦੇਣ ’ਤੇ ਪੂਰੇ ਸਟਾਫ ਨੂੰ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ ਗਈ ਹੈ। ਪੱਤਰ ’ਚ ਮੁਲਜ਼ਮ ਨੇ ਖੁਦ ਨੂੰ ‘ਯਮਰਾਜ’ ਦੱਸਦਿਆਂ ਧਮਕੀ ਦਿੱਤੀ ਕਿ ਉਸ ਦੇ ਫੋਨ ਜਾਂ ਪੱਤਰ ਤੋਂ ਬਾਅਦ ਮੌਤ ਤੈਅ ਹੈ।

ਸ਼ਾਮ 5 ਵਜੇ ਤੱਕ ਸਹਿਮਤੀ ਦਾ ਸੰਕੇਤ ਦੇਣ ਲਈ ਕਿਹਾ

ਪੱਤਰ ’ਚ ਮੁਲਜ਼ਮ ਨੇ ਸੋਮਵਾਰ ਸ਼ਾਮ 5 ਵਜੇ ਤੱਕ ਰਕਮ ਦੇਣ ਲਈ ਸਹਿਮਤੀ ਦਾ ਸੰਕੇਤ ਦੇਣ ਵਾਸਤੇ ਡਿਸਪੈਂਸਰੀ ਦੇ ਮੁੱਖ ਗੇਟ ’ਤੇ ‘+’ ਦਾ ਨਿਸ਼ਾਨ ਬਣਾਉਣ ਲਈ ਕਿਹਾ। ਇਸ ਦੇ ਨਾਲ ਹੀ ਚਿਤਾਵਨੀ ਦਿੱਤੀ ਗਈ ਕਿ ਇਸ ਤੋਂ ਬਾਅਦ ਕਰਮਚਾਰੀਆਂ ਦਾ ‘ਕਾਊਂਟਡਾਊਨ’ ਸ਼ੁਰੂ ਹੋ ਜਾਵੇਗਾ। ਮੰਗ ਪੂਰੀ ਨਾ ਕਰਨ ’ਤੇ ਰੰਗਦਾਰੀ ਦੀ ਰਕਮ ਦੁੱਗਣੀ ਕਰਨ ਦੀ ਧਮਕੀ ਵੀ ਦਿੱਤੀ ਗਈ ਹੈ। ਗੁਰਮੀਤ ਸਿੰਘ ਨੇ ਇਸ ਮਾਮਲੇ ਦੀ ਸ਼ਿਕਾਇਤ ਧਾਰੂਹੇੜਾ ਸੈਕਟਰ-6 ਥਾਣਾ ਪੁਲਿਸ ਨੂੰ ਦਿੱਤੀ। ਪੁਲਿਸ ਨੇ ਧਮਕੀ ਭਰੇ ਪੱਤਰ ਨੂੰ ਕਬਜ਼ੇ ’ਚ ਲੈ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਡਿਸਪੈਂਸਰੀ ਤੇ ਆਸ-ਪਾਸ ਲੱਗੇ CCTV ਕੈਮਰਿਆਂ ਦੀ ਫੁਟੇਜ ਖੰਗਾਲੀ ਜਾ ਰਹੀ ਹੈ, ਤਾਂ ਜੋ ਪੱਤਰ ਰੱਖਣ ਵਾਲੇ ਵਿਅਕਤੀ ਦੀ ਪਛਾਣ ਕੀਤੀ ਜਾ ਸਕੇ। ਘਟਨਾ ਤੋਂ ਬਾਅਦ ਡਿਸਪੈਂਸਰੀ ਦੇ ਕਰਮਚਾਰੀਆਂ ’ਚ ਦਹਿਸ਼ਤ ਦਾ ਮਾਹੌਲ ਹੈ।