3 ਮਹੀਨੇ ਦੀ ਪਲੈਨਿੰਗ, 25 ਨੀਂਦ ਦੀਆਂ ਗੋਲੀਆਂ ਤੇ ਸੱਪ ਤੋਂ ਮਰਵਾਇਆ ਡੰਗ; ਡਰਾਈਵਰ ਦੇ ਪਿਆਰ 'ਚ ਅੰਨ੍ਹੀ ਪਤਨੀ ਨੇ ਇੰਝ ਰਚੀ ਪਤੀ ਦੇ ਕਤਲ ਦੀ ਖ਼ੌਫ਼ਨਾਕ ਸਾਜ਼ਿਸ਼

ਜਾਗਰਣ ਸੰਵਾਦਦਾਤਾ, ਮੇਰਠ : ਅਤੁਲ ਪੰਵਾਰ ਦੇ ਕਤਲ ਤੋਂ ਬਾਅਦ ਪੁਲਿਸ ਨੇ ਦਾਮਿਨੀ ਦੀ ਕਾਲ ਡਿਟੇਲ ਕਢਵਾਈ। ਦਾਮਿਨੀ ਨੇ ਜਨਵਰੀ ਤੋਂ ਲੈ ਕੇ 17 ਜੁਲਾਈ ਦੀ ਸਵੇਰ ਤੱਕ ਤੁਸ਼ਾਰ ਪਾਇਲਾ ਨੂੰ 2000 ਕਾਲਾਂ ਕੀਤੀਆਂ ਸਨ। ਉਦੋਂ ਹੀ ਪੁਲਿਸ ਨੂੰ ਸ਼ੱਕ ਹੋਇਆ ਕਿ ਦਾਮਿਨੀ ਦੀ ਆਪਣੇ ਡਰਾਈਵਰ ਤੁਸ਼ਾਰ ਪਾਇਲਾ ਨਾਲ ਨੇੜਤਾ ਹੈ। ਪੁਲਿਸ ਨੇ ਤੁਰੰਤ ਤੁਸ਼ਾਰ ਪਾਇਲਾ ਦੇ ਘਰ ਛਾਪਾ ਮਾਰਿਆ, ਪਰ ਘਰ ਨੂੰ ਤਾਲਾ ਲੱਗਿਆ ਹੋਇਆ ਸੀ। ਤੁਸ਼ਾਰ ਦੀ ਪਤਨੀ ਵੀ ਵੀਰਵਾਰ ਨੂੰ ਮੇਰਠ ਦੇ ਸ਼ਾਸਤਰੀ ਨਗਰ 'ਚ ਆਪਣੀ ਰਿਸ਼ਤੇਦਾਰੀ 'ਚ ਆ ਗਈ ਸੀ। ਤੁਸ਼ਾਰ ਵੀ ਘਰੋਂ ਫ਼ਰਾਰ ਹੋ ਕੇ ਮੇਰਠ ਆ ਗਿਆ ਸੀ। ਮੋਬਾਈਲ ਕਾਲ ਲੋਕੇਸ਼ਨ ਦੇ ਆਧਾਰ 'ਤੇ ਪੁਲਿਸ ਨੇ ਤੁਸ਼ਾਰ ਨੂੰ ਦਬੋਚ ਲਿਆ। ਪੁਲਿਸ ਦੀ ਗੱਡੀ 'ਚ ਬੈਠਦਿਆਂ ਹੀ ਤੁਸ਼ਾਰ ਬੋਲਿਆ, "ਮੇਰੀ ਕੁੱਟਮਾਰ ਨਾ ਕਰਨਾ, ਮੈਂ ਸਭ ਕੁਝ ਸਾਫ਼-ਸਾਫ਼ ਦੱਸ ਦੇਵਾਂਗਾ।" ਤੁਸ਼ਾਰ ਨੇ ਤੁਰੰਤ ਉਗਲ ਦਿੱਤਾ ਕਿ ਦਾਮਿਨੀ ਨਾਲ ਵਿਆਹ ਕਰਨ ਲਈ ਹੀ ਉਨ੍ਹਾਂ ਨੇ ਅਤੁਲ ਉੱਤੇ ਸੱਪ ਛੱਡ ਕੇ ਉਸ ਨੂੰ ਮਾਰ ਦਿੱਤਾ। ਇਸ ਤੋਂ ਬਾਅਦ ਪੁਲਿਸ ਨੇ ਅੰਤਿਮ ਸਸਕਾਰ ਤੋਂ ਬਾਅਦ ਦਾਮਿਨੀ ਨੂੰ ਹਿਰਾਸਤ 'ਚ ਲੈ ਲਿਆ।