- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਭਾਰਤ ਤੋਂ ਨੇਪਾਲ ਜਾ ਰਹੀ ਔਰਤ ਕੋਲੋਂ ਮਿਲਿਆ ਸੋਨੇ ਦਾ ਖਜ਼ਾਨਾ, 2.6 ਕਿਲੋ ਗਹਿਣੇ ਜ਼ਬਤ, ਸ਼ੁੱਧ ਸੋਨੇ ਨੇ ਉਡਾਏ ਹੋਸ਼
ਭਾਰਤ ਤੋਂ ਨੇਪਾਲ ’ਚ ਦਾਖ਼ਲ ਹੋ ਰਹੀ ਇੱਕ ਮਹਿਲਾ ਕੋਲੋਂ ਹਥਿਆਰਬੰਦ ਪੁਲਿਸ ਨੇ 2.605 ਕਿਲੋ ਸੋਨੇ ਦੇ ਗਹਿਣੇ ਜ਼ਬਤ ਕੀਤੇ ਹਨ, ਜਿਨ੍ਹਾਂ ’ਚ ਇੱਕ ਕਿਲੋ ਸ਼ੁੱਧ ਸੋਨਾ ਸ਼ਾਮਲ ਹੈ। ਰੁਪਨਦੇਹੀ ਜ਼ਿਲ੍ਹੇ ਦੇ ਸ਼ਾਂਤੀਗੇਟ ਚੈਕਪੋਸਟ ’ਤੇ ਹੋਈ ਇਸ ਕਾਰਵਾਈ ’ਚ ਬਰਾਮਦ ਸੋਨੇ ਦੀ ਕੀਮਤ 2.5 ਕਰੋੜ ਨੇਪਾਲੀ ਰੁਪਏ ਤੋਂ ਵੱਧ ਅੰਕੀ ਗਈ ਹੈ। ਮਹਿਲਾ ਨੂੰ ਅਗਲੀ ਕਾਨੂੰਨੀ ਕਾਰਵਾਈ ਲਈ ਭੰਸਾਰ ਦਫ਼ਤਰ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ।
Posted By Paramjit Kaur
Publish Date: Fri, 02 Oct 2026 01:37 PM (IST)
Updated Date: Fri, 02 Oct 2026 01:39 PM (IST)
ਸੰਵਾਦ ਸੂਤਰ, ਭੈਰਹਵਾ (ਨੇਪਾਲ): ਭਾਰਤ ਤੋਂ ਨੇਪਾਲ ’ਚ ਦਾਖ਼ਲ ਹੋ ਰਹੀ ਇੱਕ ਮਹਿਲਾ ਕੋਲੋਂ ਹਥਿਆਰਬੰਦ ਪੁਲਿਸ ਨੇ 2.605 ਕਿਲੋ ਸੋਨੇ ਦੇ ਗਹਿਣੇ ਬਰਾਮਦ ਕੀਤੇ ਹਨ। ਰੁਪਨਦੇਹੀ ਜ਼ਿਲ੍ਹੇ ਦੀ ਸਿੱਧਾਰਥਨਗਰ ਨਗਰਪਾਲਿਕਾ-1 ਸਥਿਤ ਸ਼ਾਂਤੀਗੇਟ ਚੈਕਪੋਸਟ ’ਤੇ ਬੁੱਧਵਾਰ ਰਾਤ ਨੂੰ ਵਿਸ਼ੇਸ਼ ਸੂਚਨਾ ਦੇ ਆਧਾਰ ’ਤੇ ਜਾਂਚ ਦੌਰਾਨ ਇਹ ਕਾਰਵਾਈ ਕੀਤੀ ਗਈ।
ਬਰਾਮਦ ਗਹਿਣਿਆਂ ਦੀ ਜਾਂਚ ’ਚ ਇੱਕ ਕਿਲੋ ਸ਼ੁੱਧ ਸੋਨਾ ਪਾਇਆ ਗਿਆ। ਇਸ ਦੀ ਕੀਮਤ 2 ਕਰੋੜ 51 ਲੱਖ 93 ਹਜ਼ਾਰ 350 ਨੇਪਾਲੀ ਰੁਪਏ ਅੰਕੀ ਗਈ ਹੈ। ਹਥਿਆਰਬੰਦ ਪੁਲਿਸ ਨੇ ਮਹਿਲਾ ਤੇ ਬਰਾਮਦ ਗਹਿਣਿਆਂ ਨੂੰ ਜ਼ਰੂਰੀ ਕਾਨੂੰਨੀ ਕਾਰਵਾਈ ਲਈ ਵੀਰਵਾਰ ਨੂੰ ਭੈਰਹਵਾ ਭੰਸਾਰ ਦਫ਼ਤਰ, ਰੁਪਨਦੇਹੀ ਦੇ ਹਵਾਲੇ ਕਰ ਦਿੱਤਾ।
ਹਥਿਆਰਬੰਦ ਪੁਲਿਸ ਬਲ ਨੇਪਾਲ ਸੀਮਾ ਸੁਰੱਖਿਆ ਗੁਲਮ ਡੰਡਾ, ਰੁਪਨਦੇਹੀ ਦੇ ਨਾਇਬ ਉਪ-ਅਧਿਕਾਰੀ ਗੋਪੀਕ੍ਰਿਸ਼ਨ ਭਟਟਰਾਈ ਦੀ ਅਗਵਾਈ ’ਚ ਸੱਤ ਮੈਂਬਰੀ ਟੀਮ ਸ਼ਾਂਤੀਗੇਟ ਚੈਕਪੋਸਟ ’ਤੇ ਜਾਂਚ ਕਰ ਰਹੀ ਸੀ। ਇਸ ਦੌਰਾਨ ਭਾਰਤ ਵੱਲੋਂ ਨੇਪਾਲ ’ਚ ਦਾਖ਼ਲ ਹੋ ਰਹੀ ਕਾਠਮੰਡੂ ਮਹਾਨਗਰਪਾਲਿਕਾ-19 ਦੀ ਰਹਿਣ ਵਾਲੀ 46 ਸਾਲਾ ਇਲਾ ਪਟੇਲ ਦੀਆਂ ਗਤੀਵਿਧੀਆਂ ਸ਼ੱਕੀ ਲੱਗਣ ’ਤੇ ਉਸ ਦੀ ਤਲਾਸ਼ੀ ਲਈ ਗਈ।
ਤਲਾਸ਼ੀ ਦੌਰਾਨ ਮਹਿਲਾ ਕੋਲੋਂ ਪੀਲੇ ਰੰਗ ਦੀ ਧਾਤ ਨਾਲ ਬਣੇ ਵੱਖ-ਵੱਖ ਡਿਜ਼ਾਈਨਾਂ ਦੇ ਗਹਿਣੇ ਬਰਾਮਦ ਹੋਏ। ਇਸ ਤੋਂ ਬਾਅਦ ਇਲਾਕਾ ਪੁਲਿਸ ਦਫ਼ਤਰ ਬੇਲਹੀਆ ਦੀ ਟੀਮ ਨੂੰ ਮੌਕੇ ’ਤੇ ਬੁਲਾਇਆ ਗਿਆ ਤੇ ਦੋਵਾਂ ਸੁਰੱਖਿਆ ਏਜੰਸੀਆਂ ਨੇ ਸਾਂਝੇ ਤੌਰ ’ਤੇ ਬਰਾਮਦ ਗਹਿਣਿਆਂ ਦੀ ਜਾਂਚ ਕੀਤੀ।
ਇਸ ਤੋਂ ਬਾਅਦ ਬਰਾਮਦ ਗਹਿਣਿਆਂ ਦੀ ਅਸਲੀਅਤ ਤੇ ਸ਼ੁੱਧਤਾ ਦੀ ਪੁਸ਼ਟੀ ਲਈ ਉਨ੍ਹਾਂ ਦੀ ਜਾਂਚ ਸੁਨਚਾਂਦੀ ਵਪਾਰੀ ਸੰਘ, ਰੁਪਨਦੇਹੀ ਰਾਹੀਂ ਕਰਵਾਈ ਗਈ।
ਜਾਂਚ ’ਚ ਕੁੱਲ 2.605 ਕਿਲੋ ਗਹਿਣਿਆਂ ’ਚ ਇੱਕ ਕਿਲੋ ਸ਼ੁੱਧ ਸੋਨਾ ਹੋਣ ਦੀ ਪੁਸ਼ਟੀ ਹੋਈ। ਬਰਾਮਦ ਸਮਾਨ ’ਚ ਹਾਰ, ਅੰਗੂਠੀਆਂ, ਚੂੜੀਆਂ, ਚੇਨ, ਝੁਮਕੇ, ਬਰੇਸਲੈੱਟ ਸਮੇਤ ਵੱਖ-ਵੱਖ ਕਿਸਮ ਦੇ ਸੋਨੇ ਦੇ ਗਹਿਣੇ ਸ਼ਾਮਲ ਹਨ।
ਹਥਿਆਰਬੰਦ ਪੁਲਿਸ ਬਲ ਨੇਪਾਲ ਸੀਮਾ ਸੁਰੱਖਿਆ ਗੁਲਮ ਡੰਡਾ, ਰੁਪਨਦੇਹੀ ਦੇ ਨਾਇਬ ਉਪ-ਅਧਿਕਾਰੀ ਗੋਪੀਕ੍ਰਿਸ਼ਨ ਭਟਟਰਾਈ ਨੇ ਦੱਸਿਆ ਕਿ ਮਹਿਲਾ ਤੇ ਬਰਾਮਦ ਸੋਨੇ ਦੇ ਗਹਿਣਿਆਂ ਨੂੰ ਵੀਰਵਾਰ ਨੂੰ ਜ਼ਰੂਰੀ ਕਾਨੂੰਨੀ ਕਾਰਵਾਈ ਲਈ ਭੈਰਹਵਾ ਭੰਸਾਰ ਦਫ਼ਤਰ, ਰੁਪਨਦੇਹੀ ਦੇ ਹਵਾਲੇ ਕਰ ਦਿੱਤਾ ਗਿਆ ਹੈ।
ਹੁਣ ਭੰਸਾਰ ਦਫ਼ਤਰ ਵੱਲੋਂ ਗਹਿਣਿਆਂ ਦੇ ਸਰੋਤ, ਉਨ੍ਹਾਂ ਨੂੰ ਨੇਪਾਲ ਲਿਆਉਣ ਦੀ ਪ੍ਰਕਿਰਿਆ ਤੇ ਭੰਸਾਰ ਨਾਲ ਸਬੰਧਤ ਦਸਤਾਵੇਜ਼ਾਂ ਦੀ ਜਾਂਚ ਕੀਤੀ ਜਾਵੇਗੀ।