- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਸਰੀਰ 'ਤੇ ਟੈਟੂ ਬਣਵਾਉਣਾ ਖ਼ਤਰਨਾਕ, ਜੇਕਰ ਮਾਹਿਰਾਂ ਦੀ ਸਲਾਹ ਨਾ ਮੰਨੀ ਤਾਂ ਹੋ ਸਕਦੇ ਹੋ HIV ਦਾ ਸ਼ਿਕਾਰ
ਡਰਮਾਟੋਲੋਜਿਸਟ ਅਤੇ ਡਾਕਟਰਾਂ ਦੀ ਰਾਸ਼ਟਰੀ ਸੰਸਥਾ ਫ਼ਾਇਮਾ (FAIMA) ਦੇ ਕਨਵੀਨਰ ਡਾ. ਮਨੀਸ਼ ਜਾਂਗੜਾ ਦਾ ਕਹਿਣਾ ਹੈ ਕਿ ਟੈਟੂ ਦੇ ਵਧਦੇ ਰੁਝਾਨ ਨੇ ਇਨਫੈਕਸ਼ਨ ਦਾ ਖ਼ਤਰਾ ਵਧਾ ਦਿੱਤਾ ਹੈ। ਮੈਡੀਸਨ ਮਾਹਿਰ ਡਾ. ਬਿਭੂ ਆਨੰਦ ਨੇ ਵੀ ਇਸ ਨੂੰ ਸਿਹਤ ਦੇ ਲਿਹਾਜ਼ ਨਾਲ ਖ਼ਤਰਨਾਕ ਦੱਸਦਿਆਂ ਸਾਵਧਾਨੀ ਵਰਤਣ ਦੀ ਲੋੜ ’ਤੇ ਜ਼ੋਰ ਦਿੱਤਾ ਹੈ। ਦੋਵਾਂ ਮਾਹਿਰਾਂ ਨੇ ਟੈਟੂ ਸੈਂਟਰਾਂ ਲਈ ਸਪੱਸ਼ਟ ਸਿਹਤ ਮਾਪਦੰਡਾਂ ਅਤੇ ਨਿਗਰਾਨੀ ਪ੍ਰਣਾਲੀ ਦੀ ਲੋੜ ਵੀ ਜਤਾਈ ਹੈ।
Posted By Anuradha Bains
Publish Date: Fri, 14 Aug 2026 12:37 PM (IST)
Updated Date: Fri, 14 Aug 2026 12:39 PM (IST)
ਅਨੂਪ ਕੁਮਾਰ ਸਿੰਘ, ਨਵੀਂ ਦਿੱਲੀ। ਸਰੀਰ 'ਤੇ ਟੈਟੂ ਬਣਵਾਉਣ ਦਾ ਵਧਦਾ ਸ਼ੌਕ ਹੁਣ ਐੱਚ.ਆਈ.ਵੀ. (HIV) ਸਮੇਤ ਖ਼ੂਨ ਰਾਹੀਂ ਫੈਲਣ ਵਾਲੇ ਇਨਫੈਕਸ਼ਨਾਂ ਦੇ ਖ਼ਤਰੇ ਨੂੰ ਲੈ ਕੇ ਚਿੰਤਾ ਵਧਾ ਰਿਹਾ ਹੈ। ਟੈਟੂ ਬਣਾਉਂਦੇ ਸਮੇਂ ਸੂਈ ਚਮੜੀ ਵਿੱਚ ਵਾਰ-ਵਾਰ ਦਾਖ਼ਲ ਹੁੰਦੀ ਹੈ। ਕਿਸੇ ਸੰਕਰਮਿਤ ਵਿਅਕਤੀ 'ਤੇ ਵਰਤੀ ਗਈ ਸੂਈ ਜਾਂ ਉਪਕਰਣ ਦੂਜੇ ਵਿਅਕਤੀ 'ਤੇ ਵਰਤਣ ਨਾਲ ਐੱਚ.ਆਈ.ਵੀ. ਅਤੇ ਹੈਪੇਟਾਈਟਿਸ ਬੀ-ਸੀ ਦਾ ਖ਼ਤਰਾ ਹੋ ਸਕਦਾ ਹੈ।
ਡਰਮਾਟੋਲੋਜਿਸਟ ਅਤੇ ਡਾਕਟਰਾਂ ਦੀ ਰਾਸ਼ਟਰੀ ਸੰਸਥਾ ਫ਼ਾਇਮਾ (FAIMA) ਦੇ ਕਨਵੀਨਰ ਡਾ. ਮਨੀਸ਼ ਜਾਂਗੜਾ ਦਾ ਕਹਿਣਾ ਹੈ ਕਿ ਟੈਟੂ ਦੇ ਵਧਦੇ ਰੁਝਾਨ ਨੇ ਇਨਫੈਕਸ਼ਨ ਦਾ ਖ਼ਤਰਾ ਵਧਾ ਦਿੱਤਾ ਹੈ।
ਮੈਡੀਸਨ ਮਾਹਿਰ ਡਾ. ਬਿਭੂ ਆਨੰਦ ਨੇ ਵੀ ਇਸ ਨੂੰ ਸਿਹਤ ਦੇ ਲਿਹਾਜ਼ ਨਾਲ ਖ਼ਤਰਨਾਕ ਦੱਸਦਿਆਂ ਸਾਵਧਾਨੀ ਵਰਤਣ ਦੀ ਲੋੜ ’ਤੇ ਜ਼ੋਰ ਦਿੱਤਾ ਹੈ। ਦੋਵਾਂ ਮਾਹਿਰਾਂ ਨੇ ਟੈਟੂ ਸੈਂਟਰਾਂ ਲਈ ਸਪੱਸ਼ਟ ਸਿਹਤ ਮਾਪਦੰਡਾਂ ਅਤੇ ਨਿਗਰਾਨੀ ਪ੍ਰਣਾਲੀ ਦੀ ਲੋੜ ਵੀ ਜਤਾਈ ਹੈ।
14 ਲੱਖ 29 ਹਜ਼ਾਰ ਜਾਂਚ ’ਚ ਮਿਲੇ 5,570 ਸੰਕਰਮਿਤ
ਦਿੱਲੀ ਸਟੇਟ ਏਡਜ਼ ਕੰਟਰੋਲ ਸੁਸਾਇਟੀ ਅਨੁਸਾਰ, 2025-26 ਵਿੱਚ ਦਿੱਲੀ ਵਿੱਚ 14 ਲੱਖ 29 ਹਜ਼ਾਰ ਐੱਚ.ਆਈ.ਵੀ. ਟੈਸਟ ਕੀਤੇ ਗਏ। ਇਨ੍ਹਾਂ ਵਿੱਚੋਂ 5,570 ਨਵੇਂ ਸੰਕਰਮਿਤ ਮਿਲੇ, ਜਦੋਂ ਕਿ 44,546 ਸੰਕਰਮਿਤਾਂ ਦਾ ਇਲਾਜ ਚੱਲ ਰਿਹਾ ਹੈ।
ਇੱਕ ਸੂਈ ਦੀ ਦੁਬਾਰਾ ਵਰਤੋਂ ਖ਼ਤਰਨਾਕ
ਟੈਟੂ ਮਸ਼ੀਨ ’ਚ ਇੱਕ ਜਾਂ ਕਈ ਸੂਈਆਂ ਵਾਲੀ ਕਾਰਟ੍ਰਿਜ ਲੱਗਦੀ ਹੈ, ਜੋ ਚਮੜੀ ਦੀ ਦੂਜੀ ਪਰਤ ਡਰਮਿਸ ਤੱਕ ਪਹੁੰਚਦੀ ਹੈ। ਦੂਸ਼ਿਤ ਸੂਈ ਜਾਂ ਉਪਕਰਣ ਦੁਬਾਰਾ ਵਰਤਣ ਨਾਲ ਇਨਫੈਕਸ਼ਨ ਫੈਲ ਸਕਦੀ ਹੈ। ਇਸ ਲਈ ਹਰੇਕ ਗਾਹਕ ਲਈ ਨਵੀਂ ਸੂਈ ਅਤੇ ਕਾਰਟ੍ਰਿਜ ਜ਼ਰੂਰੀ ਹੈ। ਦੁਬਾਰਾ ਵਰਤੇ ਜਾਣ ਵਾਲੇ ਉਪਕਰਣਾਂ ਦਾ ਆਟੋਕਲੇਵ ਰਾਹੀਂ ਡਿਸਇਨਫੈਕਸ਼ਨ (ਕੀਟਾਣੂ-ਰਹਿਤ ਕਰਨਾ) ਹੋਣਾ ਚਾਹੀਦਾ ਹੈ ਅਤੇ ਵਰਤੀਆਂ ਗਈਆਂ ਸੂਈਆਂ ਦਾ ਸੁਰੱਖਿਅਤ ਨਿਪਟਾਰਾ ਜ਼ਰੂਰੀ ਹੈ।
ਦਿੱਲੀ ’ਚ ਨਿਯਮਾਂ ’ਤੇ ਵੀ ਸਵਾਲ
ਵਪਾਰਕ ਸਰੋਤਾਂ ਅਨੁਸਾਰ, ਅਕਤੂਬਰ 2025 ਤੱਕ ਦਿੱਲੀ ਵਿੱਚ ਲਗਪਗ 1,722 ਟੈਟੂ ਆਰਟਿਸਟ ਅਤੇ 467 ਟੈਟੂ ਦੀਆਂ ਦੁਕਾਨਾਂ ਸਨ। ਇਨ੍ਹਾਂ ਵਿੱਚ ਵੱਡੇ ਸਟੂਡੀਓਜ਼ ਤੋਂ ਲੈ ਕੇ ਛੋਟੀਆਂ ਦੁਕਾਨਾਂ ਤੱਕ ਸ਼ਾਮਲ ਹਨ। ਸੜਕ ਕਿਨਾਰੇ ਅਤੇ ਪਾਲਿਕਾ ਬਾਜ਼ਾਰ ਵਰਗੀਆਂ ਥਾਵਾਂ ’ਤੇ ਕੰਮ ਕਰਨ ਵਾਲੇ ਅਣਉਪਚਾਰਕ ਆਰਟਿਸਟਾਂ ਦੀ ਗਿਣਤੀ 1,200 ਤੋਂ ਵੱਧ ਦੱਸੀ ਜਾਂਦੀ ਹੈ। ਹਾਲਾਂਕਿ, ਇਨ੍ਹਾਂ ਅੰਕੜਿਆਂ ਦਾ ਕੋਈ ਅਧਿਕਾਰਤ ਸਰਕਾਰੀ ਰਿਕਾਰਡ ਨਹੀਂ ਹੈ। ਮਈ 2026 ਵਿੱਚ ਦਿੱਲੀ ਹਾਈ ਕੋਰਟ ਵਿੱਚ ਦਾਇਰ ਪਟੀਸ਼ਨ ਵਿੱਚ ਵੀ ਟੈਟੂ ਉਦਯੋਗ ਦੇ ਨਿਯਮਾਂ ਅਤੇ ਲਾਜ਼ਮੀ ਲਾਇਸੈਂਸ ਦੀ ਮੰਗ ਕੀਤੀ ਗਈ ਸੀ।
ਸਿਆਹੀ ’ਚ ਵੀ ਸਿਹਤ ਜੋਖ਼ਮ
ਕਰਨਾਟਕ ਵਿੱਚ ਟੈਟੂ ਦੀ ਸਿਆਹੀ ਦੇ ਨਮੂਨਿਆਂ ਦੀ ਜਾਂਚ ਵਿੱਚ 22 ਤਰ੍ਹਾਂ ਦੀਆਂ ਭਾਰੀ ਧਾਤਾਂ ਮਿਲੀਆਂ ਸਨ। ਰਾਜ ਨੇ ਸਿਆਹੀ ਲਈ ਰਾਸ਼ਟਰੀ ਮਿਆਰ ਅਤੇ ਟੈਟੂ ਕਾਰੋਬਾਰ ਦੇ ਨਿਯਮਾਂ ਦੀ ਲੋੜ ਉਠਾਈ ਸੀ। ਕੁਝ ਖੋਜਾਂ ਵਿੱਚ ਟੈਟੂ ਅਤੇ ਲਿਮਫੋਮਾ (Lymphoma) ਵਿਚਕਾਰ ਸਬੰਧ ਦੀ ਜਾਂਚ ਹੋਈ ਹੈ ਪਰ ਟੈਟੂ ਨੂੰ ਸਿੱਧੇ ਤੌਰ ’ਤੇ ਕੈਂਸਰ ਦਾ ਕਾਰਨ ਸਾਬਤ ਨਹੀਂ ਕੀਤਾ ਗਿਆ ਹੈ।
ਮਾਹਿਰਾਂ ਦੇ ਸੁਝਾਅ
ਡਾ. ਮਨੀਸ਼ ਜਾਂਗੜਾ ਅਨੁਸਾਰ, ਟੈਟੂ ਸੈਂਟਰਾਂ ਦੀ ਲਾਜ਼ਮੀ ਰਜਿਸਟ੍ਰੇਸ਼ਨ ਅਤੇ ਨਿਯਮਤ ਸਿਹਤ ਜਾਂਚ ਹੋਣੀ ਚਾਹੀਦੀ ਹੈ। ਹਰੇਕ ਗਾਹਕ ਲਈ ਨਵੀਂ ਸੂਈ, ਨਵਾਂ ਸਿਆਹੀ ਵਾਲਾ ਕੱਪ ਅਤੇ ਦਸਤਾਨੇ ਹੋਣੇ ਚਾਹੀਦੇ ਹਨ। ਸਿਆਹੀ ’ਤੇ ਸਮੱਗਰੀ ਅਤੇ ਨਿਰਮਾਤਾ ਦੀ ਜਾਣਕਾਰੀ ਹੋਵੇ ਅਤੇ ਬਿਨਾਂ ਲੇਬਲ ਵਾਲੀ ਸਿਆਹੀ ’ਤੇ ਰੋਕ ਲੱਗੇ। ਗਾਹਕ ਨੂੰ ਇਨਫੈਕਸ਼ਨ, ਐਲਰਜੀ, ਦਾਗ ਅਤੇ ਕੀਲੋਇਡ ਵਰਗੇ ਸੰਭਾਵੀ ਖ਼ਤਰਿਆਂ ਬਾਰੇ ਪਹਿਲਾਂ ਜਾਣਕਾਰੀ ਦਿੱਤੀ ਜਾਵੇ। ਕੇਰਲ ਦੀ ਲਾਇਸੈਂਸ ਪ੍ਰਣਾਲੀ ਵਾਂਗ ਪੂਰੇ ਦੇਸ਼ ਵਿੱਚ ਇੱਕੋ ਜਿਹੇ ਸਿਹਤ-ਸੁਰੱਖਿਆ ਮਾਪਦੰਡ ਬਣਾਉਣ ਦੀ ਲੋੜ ਹੈ।